Josɛfi Ndeengeisia Ti Juyailɔ A Ngie

TƆ LƐ sia ndupui ji mamanungɔ la pisoi ji hu. Josɛfi mia. Ngi ndeengeisia ti ngi majiailɔ nungei jisia ma ji ti yɛ lima Iijipt. Ti lilɔ a ngie kɛ ti ngi wotenga a nduwei. Gbɛva mia Josɛfi ndeengeisia ti ngi majiani? Ajifa ti juyangɔ wa yɛla a ngie.

Ti kɛkɛ Jekɔb, loilɔ wa a Josɛfi. Tao i ye ndomi na gɛilɔ a ngie ji i ndoma nguangɔ nyandi wa yia hɔɔni ngi va. Ji ngi ndee waisia ti tɔni kɛ Jekɔb longɔ wa yɛla a Josɛfi hinda, ti tatoilɔ a juya la a ngie. Kɛɛ ji lee va yana taa juya a ngie, hinda yeka yɛɛ na.

Josɛfi henga fele wueilɔ. Ye hengei jisia venjɔ hu kpɛlɛ, ngi ndeengeisia ti mawɛɛilɔ ngi gɔɔbu. Ji Josɛfi ye hengei jisia hugɛni a tie, ti juyailɔ a ngie i lee kpɛlɛ ma.

Foo yia ma, ji Josɛfi ndee waisia ti lini mbala mahugbemi, ti kɛkɛ Jekɔb Josɛfi looilɔ kɔ i li i ti gama gbee. Ji ngi ndeengeisia ti ngi lɔni a wa, kɛ ti lɛnga ti ndenga tɛɛ: ‘A mu ngi waa!’ Kɛɛ ti ndee wai Lubɛn ndeilɔ ti ma yɛɛ: ‘Ɔ-ɔ wua na wue!’ Kɛ ti Josɛfi hounga, ti ngi wu nja lowa bɛlingɔ yia hu. Kɛ ti heinga, kɔ ti gii a na ta pie a ngie.

Ti loni gii ma kɛ ti Ismɛbla lɔnga ta wa. Kɛ Juda ndenga ngi ndeengeisia ma yɛɛ: ‘A mu ngi majia Ismɛblei jisia ma.’ Tao himia lɔ ti pieni. Ti ngi majiani kanigole 20 va lɔ. Bi gii la kɛ hinda nyamu wa mia a na ti pieni?

Gbɔɔ ti pieni na woma? Ti njii waailɔ kɛ ti Josɛfi malomi lɔmbunga ye ŋami hu. Kɛ ti ya a ye ndomi ti kɛkɛ Jekɔb gama kɛ ti ndenga tɛɛ: ‘Ndomi ji gbee lɛ, ina Josɛfi malomi yana.’

Ji Jekɔb kɔɔni kɛ Josɛfi malomi mia, i wo gbuailɔ ma yɛɛ: ‘Fula haiŋ mia lɔɔ ngi waanga.’ Na mia ti longɔ yɛla ti kɛkɛ i gii la. Jekɔb lii nyanilɔ wa tao i wɔɔilɔ foo gboto va. Kɛɛ bi kɔɔ gbɛ le, Josɛfi ii haani. Mu tɔ lɛ naa gbɔɔ wueni a ngie.