Pie Ngewɔ “Vehanii . . . Na Numu Ɛɛ Gu Aa Hugɛ” I Bi Lii Wumbu Ngi Lawokɔ Va

1, 2. (a) Haiŋ ye gbɛnga mia ti Ngewɔ boya haiŋ ji hu na numu ɛɛ gu aa hinda hugɛ? (b) Mɔli ye gbɛnga mia mua yɛpɛ kɔlongɔ ma kakei ji hu?

JƐHOVA mboya haiŋ na veilɔ muɛ na teengɔ kpɛlɛ ma a ji i ngi Hindolo yakpi yoyoni ndunyi ji ma. (Jɔn 3:​16; I Jɔn 4:​9, 10) Toomui Pɔɔl ye mboya haiŋ ji luawoilɔ a ‘fehani na numu ɛɛ gu aa’ hinda “hugɛ.” (II Kɔrintabla 9:​15) Gbɛva mia Pɔɔl nduawoni hi?

² Pɔɔl yɛ kɔɔ lɔ kɛ Yesu lɛvui na i kpuani a saa, ta mia pienga nuuvuisia ti langa la kɛ hindei nasia kpɛlɛ Jɛhova yɛ lahedi wumbunga pie va, a wue lɔ. (II Kɔrintabla 1:​20, NW gaa.) Ji kɛma lɔ kɛ Ngewɔ “vehanii . . . na numu ɛɛ gu aa” hinda “hugɛ” ii gɛlɛni lee Yesu lɛvui na ma i kpuani a saa. Kɛɛ i yɛpɛma gbɔma kɔlongɔ kpekpeyei nasia lɔ ma kɛ tɔnya lomi na Ngewɔ a kɛ a mue sina kulɔma. Ii bɛbɛni kɔ numu i gu i ye mboya haiŋ ji hinda hugɛ a pili na numu a gu i gatɔ panda. Mua ye gii a ye mboya haiŋ ji? Mboya haiŋ ji a ye jaa a mu lii sia mua yɛ magbatɛ wue ma Kiiya Gomi va kɔlongɔ Yesu haalei ma fui ji na bɛ ma Alabei ma, Nyawɔi 23, 2016?

MBOYA HAIŊ NA NGEWƆ FENGA MUƐ NA TEENGƆ YEPEKEISIA KPƐLƐ MA

3, 4. (a) Mua ye gii ji numu a mboya haiŋ ve mu wɛ? (b) Hinda lɛnga numu a pie bi va, ta ye hindeisia mawoove bi lɛvui hu?

³ Mu gohu a nɛɛ lɔ wa ji numu a mboya haiŋ ve mu wɛ. Kɛɛ hinda lɛnga lɔ na numu a pie mu va na a wa a kohunɛ wa mu gama tao kɛnga a hindei gbi mawoove lɔ mu lɛvui hu. Tɔmasei gɛ va, gii lɛ naa kɛ bi hinda nyamu wa wuenga, nahi kungɔ ti bi waa fa. Gama kɛ numu gbuanga nahi bii ngi gɔɔ, kɛ i ta yekpe venga kɔ ti ngi waa bi va. Hindei ji bonda a ye pie bi gii?

⁴ Ye hindei na bonda a pie lɔ lɔɔ kɔ bi bi wuehindeisia mawoove. Kɛnga na a pie lɔ gbɔma kɔ bi yaa gbekpe a nunga yekeisia tao bi yaa ndoma gɛ a tie. Tao kɛnga a pie lɔ gbɔma kɔ bi manuma gɛ a nasia ti yɛ jianga nyamungɔ a bie. Haŋ i lo hu bi haa, ba lo lɔ bi kɛ kɛ bi gohunɛingoi ye hindei na va numui na pieni.

5. Gbɛva mia mua nde kɛ ngumawo haiŋ na Ngewɔ feni mu va i leeni poloŋ mboya haiŋ kpɛlɛ ma?

⁵ Ngumawo haiŋ na Jɛhova feni, i leeni poloŋ ngumawui na ma numui na feni tɔmasei na hu. (I Pita 3:​18) Gii lɛ a ji: Mu kpɛlɛ Adam yɛ pienga mu wotenga a jumbubla, tao jumbui ye pawei mia a hei. (Romablɛisia 5:​12) Ndomi mia pieni Jɛhova Yesu yoyoni ndunyi ji hu kɔ i haa nuuvuisia kpɛlɛ va, kɔ “i ha yati gɔɔ numui kpɛlɛ va.” (Hiibrublɛisia 2:​9) Kɛɛ hei na Yesu pieni a hinda wue lɔ i lee na ma, a hei gbɔyɔ lɔ kunafɔ va. (Aisaia 25:​7, 8; I Kɔrintabla 15:​22, 26) Nasia kpɛlɛ ta kɛ kɛ ti langoi a Yesu ta yɛɛ ndiilɛi kɛ kohunɛ hu kunafɔ va. Ti lɛnga ta yɛɛ ngelegohu ta mahaya yayenge na tia Klisti-ni, yepekeisia ta yɛɛ ndunyi ji ma Ngewɔ Mahayei bu. (Romablɛisia 6:​23; Hinda Gɛngɔ 5:​9, 10) Kɛɛ nafei ye gbɛnga mia gbɔma mua majɔɔ mboya haiŋ ji hu?

6. (a) Nafei ye gbɛnga mia bi kulɔgbee wue ma fa? (b) Hinda sawei ye gbɛnga mia mboya haiŋ ji a mu lii wumbu kɔ mu pie?

⁶ Mboya haiŋ na Ngewɔ fenga mu va, i pele laa kɔ ndunyi ji i wote a alijɛni sina kulɔma, kɔ nasia ti higbɛngɔ ti mbawoya majɔɔ, tao kɔ nasia ti haanga ti yama ndɛvui hu. (Aisaia 33:​24; 35:​5, 6; Jɔn 5:​28, 29) Mu longɔ gboŋ a Jɛhova tia ngi Lui fehani na va ti feni mu va na numu ɛɛ gu aa hinda hugɛ. Gbɛ mia ye mboya haiŋ ji a gbɔ mu ma kɔ mu pie? A mu lii wumbu lɔ (1) kɔ mu Yesu Klisti lawokɔ a mu lii gbi, (2) kɔ mu lo a mu ndeengeisia, tao (3) kɔ mu manuma gɛ a nunga yekeisia.

“KRISTI LOMƐI A KPƆNDA MU MA”

7, 8. Pili ye gbɛ mia kungɔ mu gii a Klisti lomi? Gbɛ mia ye ndomi ji a mu lii wumbu pie va?

⁷ Haala, a pie lɔ mu hindeisia wue a pili na a wa a bagɔɔma Yesu gama. Na va mia toomui Pɔɔl ndeni yɛɛ: “Kristi lomɛi a kpɔnda mu ma.” (II Kɔrintabla 5:​14, 15 gaa.) Pɔɔl yɛ kɔɔ lɔ kɛ mu kɔɔnga kɛ ndoma wa mia Yesu kɛni nuuvuisia va, na a kpɔnda lɔ mu ma, ɔɔ a mu lii wumbu lɔ kɔ mu lo a Yesu tao mu bagɔɔ ngi ma. A tɔnya, ji mua kɔɔ vui kɛ hinda wa mia Jɛhova pienga mu va, na a pie lɔ mu hindeisia wue a pili na a kɛ kɛ mu bagɔɔ lɔ Yesu ma. Mua ye na wue?

⁸ Ndomi na mu lii hu Jɛhova va a pie lɔ mu Yesu lawokɔ, tao mu jia ngi gɔɔwui hu panda. (I Pita 2:​21; I Jɔn 2:​6) Ji mua golo Jɛhova bu tia Yesu, na a kɛ lɔ kɛ mu longoi vui a tie. Na va mia Yesu ndeni yɛɛ: “Numui na a nya jawɛisia gɔɔ, i ti hou, ta mia ngi longɔ a nge: tao numui na ngi longɔ a nge, nya Kɛkɛ bɛ a lolɔ a ngie, tao nya bɛ nga lolɔ a ngie, tao nga nya vuli gɛlɔ a ngie.”—Jɔn 14:​21; I Jɔn 5:​3.

9. Mui mua yekpe mahugbe lɔ, hindei ye gbɛnga mia mua lo mu pie?

⁹ Kiiya Gomɛ wati ji hu, a nyande lɔ mu yaa gii a hindei nasia mu piema mu lɛvui hu. Fale a nyande lɔ mu mua yekpe mɔli a mɔli jisia: Hindei ye gbɛnga hu mia ngi Yesu lawokɔma siahuna? Hindei ye gbɛnga hu mia nga lo ngi lɛ gulɔma a ngi lawokɔ la panda? Hinda magbeengɔ mia kɔ mu mua yekpe mɔli a mɔli jisia gbɛva see ndunyabla ti longɔ mu hindeisia wue a pili na ta pie la. (Romablɛisia 12:​2) Mui mua yekpe mahugbe lɔ, mua lo lɔ mu ndunyabla lawokɔ sia nyikɔ: ndunyama kaamɔisia na, fimi aktibla, ndoligabla wawaisia, bɔɔ leebla kɛ pimɛ wuebla wawaisia. (Kɔlɔsiabla 2:​8; I Jɔn 2:​15-17) Gbɔɔ kungɔ mu pie kɔ mua ti lawokɔ?

10. Mɔli ye gbɛnga mia kungɔ mu mua yekpe mɔli la Kiiya Gomɛ wati ji hu? Ye kpɛmbuisia ta ye gbɔ mu ma? (Pisoi na gbee kakei ji latomi.)

¹⁰ A nyande lɔ kɔ mu wati wumbu Kiiya Gomɛ wati ji hu mua yekpe hugbɛkpɛ va kɔlongɔ hinda lɛnga ma sia nyikɔ, kulei na mua gii, fimi nasia mua kpee, mijiki nasia mua woloma, kɛ haiŋ nasia ti mu kɔmptiei hu, mu fouŋ ɔɔ mu tablɛti hu. Bia yekpe mɔli lɛ a mɔli ji, ‘Ina Yesu yɛɛ mbei a tɔ pili na nga nya mayii la, nga wufe lɔ?’ (1 Timoti 2:​9, 10, NY, gaa.) ‘Mayii nasia nga pie ta kɛ lɔ kɛ Yesu womamui mia a nge? Ina Yesu yɛɛ na, a lo lɔ i fimi nasia hugbee nga kpee? A lo lɔ i wolo mijiki nasia ma nga wolo ma? Ina i nya fouŋ ɔɔ nya tablɛti wumbuilɔ, nya lii a yaa hɛɛ kɔ aa haiŋ nasia lɔ ti hu? A gbakpau lɔ nya va kɔ ngi hugɛ a Yesu na va nya longɔ a vido gemi nasia nga pile?’ Ndomi na mu lii hu Jɛhova va a pie lɔ mu woove hinda gbi ma na ma ii houni Klistimabla va, i gɛ bɛ kɛ mu longoi haŋ a ye hindei na. (Toobla ti Wiehindɛisia 19:​19, 20) Ji mu mu lɛvui veni Jɛhova wɛ, mu lahedi wumbuilɔ kɔ mu hindei nasia wue ta wa a bagɔɔma Klisti gama. Fale ii guni mu hinda gbi wue na a pie i gbakpau mu va Yesu lawokɔ va.—Matiu 5:​29, 30; Filipaibla 4:​8.

11. (a) Ndomi na mu lii hu Jɛhova tia Yesu va a ye gbɔ mu ma Ngewɔ layia le yingi hu? (b) Ndomi a ye mu lii wumbu gbɔ va mu ndeengeisia ma jamaa hu?

¹¹ Ndomi na mu lii hu Jɛhova tia Yesu va a mu lii wumbu lɔ kɔ mu Ngewɔ layei le nunga ma tao kɔ mu ti gaa a madihou. (Matiu 28:​19, 20, NW; Luuk 4:​43) Kiiya Gomɛ wati ji hu, ba bi mahindeisia hugbatɛ lɔ kɔ bi gu bi kpɔma weela yingi wue nahi ba Ngewɔ layei le hawa 30 ɔɔ 50 va? Pondo hindo yia na ngi vui gungɔ yɛla a fo 84 yɛɛ a gii la kɛ ɛɛ gu i pelela yingi wue ngi vui va, kɛ jifa kahugbua yekpe ii yɛ ngi wɛ. Kɛɛ pelelablei nasia tia tieni ti yɛ kaka yia ma ti gbɔilɔ ngi ma. Ti hugbatɛ wue lɔ kɔlongɔ mɔto hindei ma, tao kɔ ti yaa li kakei nasia ma a bɛbɛ ngi va Ngewɔ layei le va na. Na gbɔilɔ ngi ma kɔ i gu i Ngewɔ layei le hawa 30 va. Ba gu lɔ bi gbɔ numu ma bi jamaa hu kɔ i pelela yingi wue Nyawɔi ɔɔ Buwui hu? Tɔnya mia kɛ numu kpɛlɛ tɛɛ gu taa pelela yingi wue, kɛɛ mua mu wati kɛ mu gahui yayenge lɔ kɔ mu Jɛhova magbeegbua i lee pili na ma mu piema la siahuna. Mu na wuenga, mua kɛ lɔ kɛ ndomi na Yesu kɛni i jaanga vui a mu lii, sia lee i jaani la a Pɔɔl lii. Gbɛ mia gbɔma Ngewɔ lomi a mu lii wumbu pie va?

KPA MIA MU MA KƆ MU LO A MU NYƆUNYƆU

12. Gbɛ mia Ngewɔ lomi a mu lii wumbu pie va?

¹² Ye felei, ndomi na Ngewɔ kɛnga a mue a mu lii wumbu lɔ gbɔma kɔ mu lo a mu ndeengeisia. Toomui Jɔn ndeilɔ yɛɛ: “Nya limablɛisia ina Ngewɔ i yɛ loilɔ hi a mue ma a houlɔ mua bɛ mu lo a mu nyɔunyɔu.” (I Jɔn 4:​7-11) Mu kɔɔnga kɛ Ngewɔ longoi a mue, na a pie lɔ mu tɔ kɛ mahoungɔ mu lo a mu ndeengeisia. (I Jɔn 3:​16) Mua ye kɛ kɛ mu longoi a tie?

13. Tɔmasei ye gbɛ mia Yesu kɛni kɔlongɔ ndoma gɛlei ma a nunga yekeisia?

¹³ Yesu tɔmasei gɛilɔ kɔlongɔ ndoma gɛlei ma a nunga yekeisia. Ji i yɛ ndunyi ji ma, i yɛɛ a gbɔ nunga yekeisia ma, kakaye nasia ndiimayeibla a tie. I yɛɛ a nunga hale, kpɔkpɔbla, pumubla, ngolihulutubla, kɛ ndamumubla. (Matiu 11:​4, 5) Yesu yɛ gba ngewɔvɛi gbakui nasia ma ti yɛ na, ta ngi gohunɛingɔ yɛla nungei nasia gaa va ti longɔ yɛla ti kaa wue kɔlongɔ Ngewɔ ma. (Jɔn 7:​49) Ngi longɔ yɛla a ye nungei nasia bonda, fale i na gbi wueilɔ a gu a pie la kɔ i gbɔ ti ma.—Matiu 20:​28.

14. Hindei ye gbɛnga mia ba pie kɔ bi kɛ kɛ bi longoi a bi ndeengeisia?

¹⁴ Kiiya Gomɛ wati ji hu, a nyande lɔ gbɔma kɔ bi gii a pili na ba gu bi gbɔ bi ndeengei nasia ma wua tieni wu jamaa hu, kakaye nasia ti wovanga. Kɛnga ba wati wumbu lɔ kɔ bi li bi va ti ma ti ye pɛɛ la, ɔɔ ba mɛhɛ yii lɔ bi li la ti va. Ɔɔ kɛnga ba gbɔɔ ti ma a ngengenga wue la ti va ti ye pɛɛ la, ɔɔ ba gbɔɔ ti ma kɔ ti gu ti li komisia va ɔɔ bi pie wua tieni wu li Ngewɔ layia lemi. (Luuk 14:​12-14 gaa.) Pie ndomi na Ngewɔ kɛnga mu va i bi lii wumbu kɔ bi ndoma gɛ a bi ndeengeisia.

MU YAA MANU MU NDEENGEISIA MA

15. Hindei ye gbɛ mia kungɔ mu kɔɔ?

¹⁵ Hindei ye sawa yi, ndomi na Jɛhova kɛnga mu va a mu lii wumbu lɔ kɔ mu manuma gɛ a mu ndeengeisia ji ta nyamu a mue. Adam yɛ jumbui kɛ hei leenga mu kpɛlɛ gama, fale numu gbi ɛɛ nde yɛ, “Nya ngii gbeeni ngumawo haiŋ na va Jɛhova fenga mu va.” Ngewɔ mamui na vui bɛ ngi wɔnangɔ wa, ngi gbeengoi ngumawo haiŋ na va. Hinda wa mia Jɛhova pienga mu kpɛlɛ va! Kɛɛ gbɛva mia magbeengɔ kɔ mu kɔɔ na Jɛhova pienga mu va? Mua mɔli ji ye kpɛmbui majɔɔ lɔ Yesu lɔmaseisia ye ngla hu.

16, 17. (a) Gbɛ mia mua kaa tɔmasei na hu Yesu kɛni kɔlongɔ mahin na ma kɛ bɔilupui nasia? (b) Sia bi ye tɔmasei na gaanga tao bi giinga la panda, gbɛ mia bi bi lii huyiinga pie va?

¹⁶ Yesu tɔmasei gɛilɔ kɔlongɔ maha yia ma na manuni ngi bɔilupui ma nahi kungɔ yɛla i ngi pawa a dinailɔsi 60,000,000. Kɛɛ na woma ye bɔilupui na ii manuni ngi mbaa bɔilupui ma na kungɔ yɛla i ngi pawa a dinailɔsi 100 yakpe. Mahoungɔ yɛla manumi na mahin na kɛni a ngie i ngi lii wumbu kɔ i manu ngi mbaa bɔilupui na ma. Ye mahin liilee lɔ wa ji i kɔɔni kɛ bɔilupui na ii ngi mbaa na mamanu lɔni navo wulo hiŋ na va. I ndeilɔ yɛɛ: “O bia, hinda nyamu bɔilopoi ji, ngi manuilɔ bi ma a kpɛi na gbi, ajifa bi nya vɛliilɔ” ɔɔ manɛnɛilɔ. “Ma ii yɛ houni bia bɛ bi manu bi mbai ma, kia nya bɛ ngi manuni la bi ma?” (Matiu 18:​23-35) Sia lee mahin na na, Jɛhova i manuma wa gɛnga a mue. Gbɛ mia Jɛhova lomi kɛ ngi manumi a mu lii wumbu pie va?

¹⁷ Sia mu mua yekpe magbatɛma Kiiya Gomi va, a nyande lɔ mu mua yekpe mɔli a mɔli jisia: ‘Nya mbaa Klistimamɔ gbi lɔ na, na nya gbalɛma hinda wuenga? Kpaukpaungɔ nya va kɔ ngi manu ngi ma?’ I yaa hi, sabu yekpe wa lɔ a wati ji kɔ mu Jɛhova lawokɔ, na ngi “magbatɛngɔe manuva nuu ma.” (Nɛhɛmaia 9:​17; Saam 86:​5) Ina mu bagɔɔ lɔ manuma wai na ma Jɛhova kɛnga a mue, na a pie lɔ kɔ mu manu nunga yekeisia ma a mu lii gbi. Ina mui manuma gɛni a mu ndeengeisia, ii guni mu gii la kɛ Jɛhova bɛ a manu lɔ mu ma. (Matiu 6:​14, 15) Ji mua munuma gɛ a nunga yekeisia, na ɛɛ kɛ kɛ tii mu gbalɛma hinda wueni, kɛɛ a gbɔɔ mu ma kɔ mu kohunɛ majɔɔ siahuna, kɛ sina kulɔma.

18. Ndomi na Ngewɔ kɛnga a mue ye gbɔni mu ndee yia ma kɔ aa ngi nɛmahui wu wa kpulangei nasia ma ngi mbaa Klistimamɔ yia yɛ a pie?

¹⁸ Wati lɛnga ɛɛ bɛbɛ mu va kɔ mu mu nɛmahui gbua kpulangei nasia ma mu ndeengeisia ta pie. (Ɛfɛsubla 4:​32; Kɔlɔsiabla 3:​13, 14.) Mu ndee nyaha yia na yɛ kɛyi ji bonda hu yɛni a Lili lɔ.^[1] (Njiei nasia gaa ti kakei ji gɛlɛmi.) I yɛɛ a kpɔma wue pondo nyaha yia ma na ngi biyei mia a Kalo. Tɔmasei gɛ va, i yɛɛ a ngi wumbu mɔtui hu a li a ngie mia gbi lee ngi longɔ yɛla i li na, a feengɔ ngi va, tao a kpee yekanga gbua ngi ma. Sia bɛ Lili yɛ a hindei jisia kpɛlɛ wue Kalo wɛ, ngi hinda gbɔungɔ wa yɛla, tao wati lɛnga ii yɛ bɛbɛni Lili va kɔ i gbɔ ngi ma. Kɛɛ Lili ngi nɛmahui wuni Kalo wuehinda yekpisia lɔ ma, tao i loilɔ gbɔma ngi ma haŋ i lo hu Kalo i higbɛ i haa. Sia bɛ ii yɛ bɛbɛni Lili va gbɔ va Kalo ma, i ndeilɔ yɛɛ: “Nya kulɔgbe wue ma kɔ ngi Kalo lɔ ji a hiye hei hu. Nga lo lɔ ngi ngi lɔ a wati na ngi yakpuangɔ a yɛla.” Ji kɛnga gboleiŋ kɛ ndomi na Jɛhova kɛnga a mue, a mu lii wumbu lɔ kɔ mua mu nɛmahui wu wa kpulangei nasia ma mu ndeengeisia ta pie, tao kɔ mu kulɔgbe wue wati na va nuuvuisia kpɛlɛ tɛɛ yaa kpulanga wue kunafɔ va.

19. Mboya haiŋ na Ngewɔ feni mu va “na numu ɛɛ gu aa” hinda “hugɛ,” gbɔ a bi lii wumbu pie va?

¹⁹ A tɔnya, Jɛhova mu gɔnga a mboya haiŋ “na numu ɛɛ gu aa” hinda “hugɛ.” A nyande lɔ mu yaa kɛ a wati gbi kɛ mu gohunɛingoi ye mboya haiŋ ji va. Kiiya Gomɛ wati a sabu yekpe laa kɔ mu gii a hindei nasia kpɛlɛ Jɛhova tia Yesu ti pienga mu va. A mu lapi kɔ ndomi na ti kɛni a mue i mu lii wumbu kɔ mu Yesu lawokɔ, kɔ mu lo a mu ndeengeisia, tao kɔ mu manu mu ndeengeisia ma a mu lii gbi.