Mojisi Kɔti Maleeilɔ

ISUƐLBLEISIA ti yɛɛ ŋanya lɔlei hu i lee fo 39 ma. Kɛɛ ye fui jisia kpɛlɛ hu, Jɛhova yɛɛ tuŋ a ti mahugbe. I yɛɛ a ti gɔ a manaa mɛ va, tao i yɛɛ a pele gɛ a tie a folo kɛ kpindi. Lugbui mia i yɛ a pie a loo ti gulɔ a fuli, kɛ i pienga ngɔmbui i loo ti gulɔ a kpindi. Fo gboto wai ji kpɛlɛ Isuɛlbleisia ti mbumbuni ŋanya lɔlei hu, ti maguleisia tii hawani tao ti gɔweisia tii vefeni.

Fo 40 hu, ngawui ye haala yi hu ji Isuɛlbleisia ti gbuani Iijipt, ti foilɔ gbɔma Kedɛs. Na mia ti yɛna ji Mojisi hinga 12 looni kɔ ti li ti Kenaan lɔlei manɛɛ. Tao Kedɛs mia Mojisi ndii Miiliam haani na.

Isuɛlbleisia ti gbonyɛilɔ gbɔma mbeindo. Nja gbi ii yɛ na kpɔli va ŋanya lɔlei hu. Fale, Isuɛlbleisia ti tatoilɔ gbɔma a gbonyɛ la Mojisi ma tɛɛ: ‘A yɛɛ a fisa ina mu yɛ haailɔ. Gbɛva mia wu gbuani a mue Iijipt wu wa a mue mbei nahi tuhaiŋ gbi ɛɛ vale na? Mba gbi ii na, nguwa gbi ii na tao nja bɛ ii na kpɔli va.’

Na woma, Mojisi tia Ɛlɔn ti lilɔ Ngewɔ gula wɛlei la hɛ wue va. Kɛ Jɛhova ndenga Mojisi ma yɛɛ: ‘Nunga lɛma hinda yia. Bi yɛpɛ kɔti na ma ti kpɛlɛ yama. Njei a gbua lɔ hu kpoto nahi ta gu ti kpɔli tia ti lohaiŋsia kpɛlɛ.’

Fale Mojisi nunga lɛilɔ ma, kɛ i ndenga ti ma yɛɛ: ‘A wolo nya ma, wua lanaya gbii wu hu Ngewɔ va! Kɔti ji mia mua Ɛlɔn mua njei gbua hu wu va?’ Kɛ Mojisi kɔti ma leenga heima fele a ngi likpoi kɛ njei lɔ gbuama hu. Ti kpɛlɛ ti njei gbɔilɔ i gu ti va tia ti lohaiŋsia.

Kɛɛ Jɛhova lileeilɔ Mojisi tia Ɛlɔn ma. Bi kɔɔ lɔ gbɛva le? Gbɛva see tɛ tia mia ti njei gbuama kɔti hu nunga va. Kɛɛ tia yana klobɛɛ va, Jɛhova mia pieni njei i gbua kɔti hu. Jifa Mojisi tia Ɛlɔn tii tɔnya yɛpei leni kɔlongɔ ji ma, Jɛhova ndeilɔ yɛ a ti yamɔnɛ lɔ. Tao i ndeilɔ yɛɛ: ‘Wuɛ jɔkɔ Kenaan lɔlei hu.’

Na woma, Isuɛlbleisia ti gbuailɔ Kedɛs. Hu ii guani kɛ ti fonga Hɔɔ Yii ma. Ye ngii ji ya mia Ɛlɔn haani na. Ngi vui yɛni a 123 lɔ ji i haani. Ji pieilɔ Isuɛlbleisia ti lii i nyani wa. Fale ti wɔɔilɔ foo 30 va. Ɛlɔn lui Ɛlieja mia naa woteni a saagbuamɔ wai.