Jɔsua Woteilɔ a Tooklɔmɔ

MOJISI longɔ yɛla i li a Isuɛlbleisia Kenaan. Fale i Jɛhova manɛnɛilɔ yɛɛ: ‘Kɔnɛ le, pie ngi Jɔdan yei lee ngi li ngi ndɔɔ yekpi hu lɔ.’ Kɛɛ Jɛhova ndeilɔ Mojisi ma yɛɛ: ‘I yɛ hi! Baa ya yɛpɛ gbɔma kɔlongɔ ji ma!’ Bi kɔɔ lɔ gbɛva mia Jɛhova na leni?

Njɛpei na va Mojisi ndeni ji i kɔti na ma leeni. Bi kɔ lɔ, Mojisi tia Ɛlɔn tii bagɔɔma veni Jɛhova wɛ. Tii tɔnya yɛpɛ leni nunga ma kɛ Jɛhova mia pieni ti njei majɔɔ kpɔi va. Na va mia Jɛhova ndeni Mojisi ma yɛ tɛɛ fo Kenaan lɔlei hu.

Ngawu lɛnga leengɔ woma ji Ɛlɔn haani, Jɛhova ndeilɔ Mojisi ma yɛɛ: ‘Jɔsua loli i loo saagbuamui gulɔ Ɛlieja kɛ nunga kpɛlɛ, bi nde ti ma kɛ Jɔsua mia naa ngi loko loonga ngi ma kɔ i wote a tooklɔmɔ.’ Sia lee bi tɔ ma la pisoi ji hu, Mojisi pieilɔ sia lee Jɛhova ndeni la ngi ma.

Na woma kɛ Jɛhova ndenga Jɔsua ma yɛɛ: ‘Bi lii i loo, tao baa luwa. Ba gulɔ bi loo Isuɛlbleisia gulɔ li va a tie Kenaan lɔlei hu ngi lahedi wumbuni fe va ti wɛ. Tao nga yɛɛ bi woma.’

Na kpɛlɛ leengɔ woma, Jɛhova ndeilɔ Mojisi ma yɛɛ i lɛ Nebɔ Yii ya Moab lɔlei hu. Na mia i looni na kɛ i ndɔɔ nyandi na hu lɔnga. Kɛ Jɛhova ndenga ngi ma yɛɛ: ‘Ndɔɔ nyandi ji lɔ ngi lahedi wumbuni fe va Eblaham, Aisak, kɛ Jekɔb laa lengeisia wɛ. Ngi pienga bi na lɔnga, kɛɛ bɛɛ jɔkɔ na.’

Ye Nebɔ Yii ji ya mia Mojisi haani na. Ngi vui yɛni a fo 120 lɔ. Kɛɛ ngi gbakpaungɔ yɛla tuŋ tao i yɛ a kulɔ lɔ panda. Ji Mojisi haani, Isuɛlbleisia ti lii nyani lɔ wa tao ti wɔɔilɔ huleengɔ gboŋ. Kɛɛ ti gohunɛilɔ Jɔsua majɔɔ va a tooklɔmɔ.