Ji Numu A Wɔna Na A Wa Lɔ A Nafa Gboto

Baibu wati hu, wɔɔ-wɔɔma Gliki yei na ti yɛ a gawote wati lɛnga a njiei ji “wɔna” ye mbui mia a “haiŋ na kpekpengɔ.” A yɛɛ gbɔma a piehinda yekpe nahi a numu yau hou.

Klistimableisia ta njiei nasia wumbu lɔ toomui Pɔɔl ndeni a ti lii gbi, ji i ndeni yɛɛ: “Ma hindei yeepɔnɛi lɔ wie watii gbi.” Hindei ye gbɛnga le?

NDAPI NA A GƆ NUMU LII HU

Nunga gbotoma ta tia yekpe gbee lɔ mɛmɛ hu ngenda gbi pɛiŋ ta yaa li hinda. Gbɛva mia ta na wue? Jifa ti longɔ ti tɔ kɛ ti magbatɛngoi panda. Kɛɛ kɔ numu i ngi wui gbatɛ panda ɔɔ i kula nyande yii ta lee yana hindei le. Mu wuehindeisia ta pie lɔ nunga ti lo a mu hinda ɔɔ mu dii i gbua ti ma.

Ngewɔ Layei ndeilɔ yɛ wati gbotoma hinda nyamui mia mua lo mu pie. Fale Jɛnɛsis 8:​21 ndeilɔ yɛɛ: “Nuuvuu ngi giliisia ngi lii hu ti nyamungɔ a hiye ngi lopoyɛi hu.” Ji kɛma lɔ kɛ kɔɔ mu gu mu wɔna, kungɔ mu lapi a mu giiyeisia kɛ mu mani nyamuisia. Toomui Pɔɔl yɛpɛilɔ kɔlongɔ pili na ma ta vui bɛ yɛ a ye ndapi ji gɔ jumbui yeya, i ndeilɔ yɛɛ: “Nya lii longɔe a Ngewɔ Jawei. Kɛɛ ngi sawa weka lɔnga, i gba yengema nya lii hu yeesawei ji a lapi a sawei yeena nya longɔ la. A nya yɛlɔ a jɔwɔyamɔ jumbui jawei na bu i yengema nya lii hu.”—Romableisia 7:​22, 23, NY.

Tɔmasei gɛ va, ji mu lii a pie mu mani hinda nyamu wue va ɔɔ mu lo a kava hinda wue la, ii guni mu luma kɔ mu wote a nduwɔ na wue va mu lii a lo mu pie. Ndongɔ mu gama lɔ kɔ mu kitilee kɔlongɔ na ma mua lo mu pie. Ji mua mu nɛmahui gbatɛ kɔ mua kiiya nyamu wue, na a pie lɔ mu lɛ gulɔma a wɔna la sia bɛ kava hindei mu galangɔ ha piyo.

MUA GU LƆ MU WƆNA

Kɔ mu gu mu wɔna, kungɔ vui mu mu nɛmahui gbatɛ. Mamanungɔ kɔɔ va kɛ nunga gbotoma wati na ta wumbu yɛpɛ va kɔlongɔ giima haiŋ hindei ma i leeni poloŋ wati na ma ta wumbu gii va a hindei nasia ta pie kɔ ti wɔna. Fale ta tia yekpe mavale lɔ kava hindei nasia va ta pie. Buku yia na ye ngui mia a, The (Honest) Truth About Dishonesty ndeilɔ yɛɛ: “Mua ndɛɛ gula lɔ a pili na nahi nunga tɛɛ lii heima tao ta gii la kɛ numu wɔnangɔ mia a mue.” Kɛɛ buku gbi lɔ na, nahi numu a liivaama, na a kpɔma wue kɔ mu kitilee mua yekpe va kɔlongɔ kava hindei ma? Ɔɔ, taa na.

Nunga miliɔn gboto ndunyi hu ti tɔnga kɛ Baibui a gu lɔ i kpɔmi na wue mu ma. Ndahinga lɔ Baibui hu nahi muɛ ti lɔ hinda yeka gbi. (Saam 19:​7) A ndahinga ve lɔ kɔlongɔ mbonda hindei ma, ngenge hindei, pili na mua mu wuehindei yɛ sɛwɛ, kɛ Ngewɔ vɛi hindei. Taa wɔɔ gba nunga nafa ma, tao siahuna bɛ numu jianga a tie, ta ngi nafa lɔ. Ye sawei jisia kɛ ndahi jisia ti na kɛnyi kpɛlɛ lɔ va, ti yɛ a numu gowe ɔɔ numu lɛlɛi. Ji mua Baibu gaa, mu hei mu gii a na mua kaa hu, tao mu jia a hindei nasia mua kaa, na a gbɔɔ mu ma kɔ mu yɛ a tɔnyabla kɛ pɔnabla.

Kɛɛ tuŋ, hindei jisia lee tɛɛ pie mu gu mu loko gbua kava hindei hu. Gbɛva see, ndunyi ji hu mu na, na vendangoi kpauŋ a piehinda nyamuisia, tao na a pie lɔ i gbakpau mu va kɔ mu pɔna hinda wue. Na va mia kungɔ mu hɛ Jɛhova gama kɔ i gbɔ mu ma. (Filipaibla 4:​6, 7, 13) Mu na wuenga, mua ndiinɛpɔ majɔɔ lɔ kɔ mu gu mu loo kpauŋ hindei na va pɔnangɔ tao kɔ mu wɔna hindei gbi hu.

NAFEI NASIA MUA MAJƆƆ JI MUA WƆNA

Hitosi, na mu yɛpɛni kɔlongɔ ngi ma kakei ye haala yi na hu, nafailɔ gbɛva see nunga ti ngi gɔɔilɔ a ngengemɔ na ngi wɔnangɔ. Ta naa yenge numu va na bagɔɔngɔ ngi ma jifa ngi wɔnangɔ. I ndeilɔ yɛɛ: “Nya gohunɛingɔ jifa ngi guni ngi ngenge yaka majɔɔ na nga pie nahi ɛɛ nya nɛmahui vawei.”

Nunga yekeisia bɛ ti tɔnga kɛ ndahi nasia ti Baibui hu ti lɔnyangɔ. A mu yɛpɛ lɛ naa kɔlongɔ nunga lɛnga ma ti nafanga a ji ti jiama a njiei jisia ti Baibu hu na ndeni yɛ, “ma hindei yeepɔnɛi lɔ wie watii gbi.”

• Bi Nɛmahu Ɛɛ Bi Vawei

  

  “Ngi gbuailɔ sukui hu ji ngi guni a fo 13 kɔ mua humabla mu yaa lee. Fale, navui kpɛlɛ jɔngɔ yɛ nya yeya ngi guni ma a kava wele lɔ. Wati lɛnga leengɔ woma, ngi heinyɔyei wueilɔ, kɛ Jɛhova Jeliwuableisia ti tatonga a Baibu gaa wue la a nge kɛ nya hini. Na gbɔilɔ mu ma kɔ mu kɔɔ kɛ Jɛhovaa juyangoi a kava hindeisia, fale mu mu lii huyiilɔ kɔ mu woove hinda nyamuisia ma. Mu mu lɛvui veilɔ Jɛhova wɛ 1990 hu, kɔ mu ngi liima hindei wue kɛ mu baptaisinga.”—Saleisia 6:​16-19.

  “Wɔɔ, nya ye pɛɛ bu vendangɔ yɛla kpauŋ a huma hakeisia, kɛɛ siahuna haiŋ nasia bonda tii yana, tao ji pienga nya nɛmahu ɛɛ yaa nya vawei. Ji nga gii a kava hindei nasia ngi yɛ a pie, nga sɛigbua lɔ Jɛhova ma manumi na va i kɛnga a nge. Kpindi gbi nga li lama, nya liilɛingɔ loŋ jifa ngi kɔɔ lɔ kɛ Jɛhova gohunɛingɔ nya ma.”—Sɛli, Alilaŋ.

  

  “Ji nya mahumui kɔɔni kɛ ngii lumani numu i nya lahu lee ngengemi, i ndeilɔ nya ma yɛɛ: ‘Bi Yewɔi gbɔnga vui bi ma kɔ bi yɛ a pɔnamɔ. Nafa wa mia jifa bi yengema mbei.’ Ji nya wɔnangɔ hindei gbi hu i gbɔnga nya ma kɔ nya nɛmahu i yɛ sɛwɛ Jɛhova yama. I pienga gbɔma kɔ ngi gbɔ nya mabla ma kɛ nunga yekeisia kɔ tia bɛ ti wɔna.”—Sɔni, Hɔŋ Kɔŋ.

• A Wa Lɔ A Ndiilɛi

  

  “Nga yenge banki yia lɔ ma, tao numu wa mia a nge na. Ngingi ji hu, nunga ta guyu-guyu hindeisia wue lɔ wati gbotoma kɔ lee ti gbatɛ. Nunga gbotoma ti giingɔ la kɛ, ‘Hinda nyamu gbi yana ina numu kava hinda wulo wueilɔ kɔ i gbatɛ ɔɔ kɔ hindeisia ti lɛ gulɔma.’ Kɛɛ jifa nya wɔnangɔ, nya liilɛingoi. Ngi nya lii huyiinga kɔ ngi lɛ gulɔma a wɔna la, kɛyi gbi lee hu. Nya mahubla ti kɔɔ lɔ kɛ ngɛɛ ndɛɛ gula ti wɛ, tao ngɛɛ ndɛɛ gula numu wɛ ti va.”—Tɔmi, Amɛlika.

• A Wa Lɔ A Bagɔɔma

  

  “Nya mahumui ndeilɔ nya ma yɛ ngi ndɛɛ gula kɔlongɔ haiŋnga ma ti loni hu ngengemi, kɛɛ ngii lumani. Wati lɛnga leengɔ woma, ji ye humabla ti magɛni, i sɛigbuailɔ nya ma jifa ngi looni kpauŋ na va pɔnangɔ. Ndunyi ji hu ha, numu bi bi lii houilɔ, bɛɛ gu baa pɔna hinda wue. Kɛɛ numu bi wɔnanga, nunga yekeisia ta la lɔ a bie tao ta bagɔɔ lɔ bi ma.”—Kaoli, Jepan.

A tɔnya ji numu a wɔna, a nafa gboto majɔɔ lɔ sia nyikɔ jisia na, ngi nɛmahu ɛɛ ngi vawei, a gu lɔ ndiilɛi ma, tao nunga ta bagɔɔ lɔ ngi ma. Bi langoi a ji?