Kava Hindei A Ye Numu Vawei?

Bi langoi a njiei nasia nyapui na ndeni? Mu kpɛlɛ hindanga ti yɛ mu mainga sia lee i Samanta maini la. Pili na mua hindeisia wue la ji hinda a wue na a mu wɔnalei hugɔɔ a kɛ lɔ na vui mu lii hu. Tɔmasei gɛ va, ina mu bɛɛ magaolei mia magbeengɔ wa mu va na a pie lɔ mu gii la kɛ kungɔ mu ndɛɛ gula kɔ lee mu ya aa wufe. Kɛɛ ji tɔnyi ma a gɛ, na a gbua hu a yɛ nyamuni i lee kpɛlɛ ma. A mu yɛpɛ lɛ naa kɔlongɔ hindei jisia ma.

NUMU II WƆNAILƆ NA A PIE LƆ TƐƐ LA A NGIE

Kɔ ndiamɔya gbi lee i lɛ gulɔma kungɔ ye nunga ti la a ti nyɔunyɔu. Ji numu fele ta la a ti nyɔunyɔu, na a pie lɔ tɛɛ luwa ti nyɔunyɔu ma nɛmahu. Kɛɛ numu ɛɛ gu a la a numu gama-gama, kɛlee wati lɛnga leengɔ woma. Sia lee ta wati wumbu hinda yia, ta ti lii hu yieisia le ti nyɔunyɔu ma, tao ta tia yekpe gbua ndɔgbɔ ti nyɔunyɔu va, hi mia ta lɛ gulɔma a lala a ti nyɔunyɔu. Kɛɛ ye lanayei na a vawei lɔ ji ye ngla a ndɛɛ gula heima yakpe bɛ ngi mbaa wɛ. Tao ji na a wue, a gbakpau lɔ kɔ ngi mbaa na i la gbɔma a ngie.

Bi ndiamɔ yekpe wa gbi ndɛɛ gulanga wɔɔ gba bi wɛ? Ina na wuenga a bie, bi lii gami ye yɛna? A wue lɔ lɔɔ kɛ bi liilee lɔ wa, tao bi gii lɔ la kɛ baya hinda wa mia a na i pieni a bie. Numu gbi a kiiyei na bonda wue lɔ. A tɔnya, ndɛɛ i yɛ bɛ kulo hiŋ, a ndiamɔ yekpenga hu vaya lɔ.

KAVA HINDA ƐƐ NDO YEKPE LE

Kɔɔ guhu yia na ngi biyei mia a Lɔbɔti Insi, na a kɔlei gɛ Kalifonia Yunivasiti hu gɔfɛgbua yia wueilɔ na kɛni kɛ “kava hindei a vayaa hu fulo.” Fale, mua nde lɔ kɛ kava hindei wuengoi lee sia fuhaiŋ mumui nasia na ta pie higbei a vaya hu, sia lee ba yɛ leema a numui na ngi gavangɔ, hi mia bia bɛ ba gaa a kava hindei wue la.

Kɛɛ gbɛ mia a gbɔ bi ma kɔ baa loko wili kava hinda hu? Baibui a gbɔɔ bi ma. Mu yɛpɛ lɛ naa kɔlongɔ ndahi lɛnga ma ti Baibui hu.