Dirava Be Dahaka Be Karamu?

Hekwakwanai o davarimu negadiai, oi na bo uramu bamo namona ta ese ḡau ta baine karaia oi baine durumu. Haida na e gwaumu Dirava na dia idia turadia badina Dirava na ḡau ta se karaiamu idia idurudia. To, Dirava na ita daidai ḡau momo vada e kara, bona hari ta davarimu hisihisidia bona hekwakwanaidia baine haoredia totona, ia na ḡau haida be karamu. Ia be dahaka be karamu?

DIKA IBOUDIAI BE HAOREDIAMU

Dirava ese dika iboudiai e havaramu tauna be kokiamu. Baibul ese dika e varamu badina na ini e gwauraia toma: “Tanobada idoinai na dika tauna imana ai.” (1 Ioane 5:19) Una “dika tauna” na Iesu ese e gwauraia “ina tanobada lohiana,” ia na Satana Diabolo. (Ioane 12:31) Satana ese tanobada e biaguamu dainai dika idauidau e varamu. Dirava be dahaka be karamu?

Kahirakahira Iehova Dirava ese natuna Iesu Keriso be ḡaukalaraiamu “diabolo baine hadarerea.” (Heberu 2:14; 1 Ioane 3:8) Baibul ese e hahedinaraiamu, Diabolo na dibana ‘ena nega na eme kwadogi.’ (Apokalupo 12:12) Danu, Dirava ese dika e havaramu taudia iboudiai be haorediamu.​—Salamo 37:9; Hereva Lada-isidia 2:22.

TANODABA NA PARADAISO AI BE HALAOAMU

Tanobada ai dika iboudiai be haorediamu murinai, Ihavarada tauna ese iena ura tanobada bona taunimanima ediai na be haḡuḡurudiamu. Una negai ita be dahaka baita moalelaimu?

Maino bona noho namo. “A manau taudia ese tano bae abia; maino ena harihari-bada idia ese bae moalelaia.”​—Salamo 37:11.

Aniani namodia momo. “Aniani reidia na tano ai bae vara momomomo, ororo doridia reidia bae helado.”​—Salamo 72:16.

Ruma namodia bona ḡaukara namodia. “Ruma bae haginidia bena bae noholai; vine imeadia bae hado, bena anidia bae ani. . . . Egu abi-hidi taudia ese imadia ḡaukaradia bae moalelai daudau.”​—Isaia 65:21, 22.

O uramu mauri unu bamona ba moalelaia? Kahirakahira taunimanima na dina iboudiai mauri unu bamona be moalelaiamu.

GORERE BONA MASE BE HAOREDIAMU

Hari ita iboudai na ta goreremu bona ta masemu, to unu na basie vara hanaihanaimu. Kahirakahira Dirava ese Iesu ena boubou ḡauna dainai taunimanima na be durudiamu. Unu amo “bae abidadama henia taudia iboudiai basie mase, a mauri hanaihanai bae abia.” (Ioane 3:16) Dahaka be varamu?

Gorere na be oremu. “Hanua tauna ta basineto ‘E goreregumu.’ Unuseni ai e nohomu taudia edia dika na bae hegwau tao.”​—Isaia 33:24.

Taunimanima na basie masemu. “Ia ese mase baine ha-orea ela bona hanaihanai; Ḡaubada Iehova ese irurumata na vaira iboudiai amo baine dahu oho.”​—Isaia 25:8.

Taunimanima na be mauri hanaihanaimu. “Dirava ena harihari ḡauna na mauri hanaihanai, Keriso Iesu iseda Lohiabada bagunai.”​—Roma 6:23.

Mase taudia na be hatoredia isi loumu. “Mase taudia do bae tore isi lou, kara maoromaoro taudia bona asi edia kara maoromaoro taudia danu.” (Aposetolo Edia Kara 24:15) Dirava ena harihari ḡauna, mauri davana dainai, mase taudia na be hatoredia isi loumu.

Dirava ese unu iboudiai be edena dala ai be haḡuḡurudiamu?

GAVAMANI NAMONA TA BAINE HAGINIA

Dirava ese guba gavamanina ta amo ena ura taunimanima ediai bona tanobada ai baine haḡuḡurua, bona una gavamani na e abia hidi tauna Keriso Iesu ese be lohiaiamu. (Salamo 110:1, 2) Una gavamani eiava basileia, na Iesu ese ena hahediba taudia e hadibadia bae ḡuriḡurilaia, eto: “Tamamai e, guba ai o nohomu, . . . Emu basileia bainema.”​—Mataio 6:9, 10.

Dirava ena Basileia ese ina tanobada be lohiaiamu neganai hisihisi iboudiai be haorediamu. Una Basileia ese tanobada gavamanidia iboudiai e hereadia! Una dainai Iesu tanobada ai e nohova neganai, ia ese “Basileia sivaraina namona” na e harorolaia goadagoada, bona ena hahediba e hamaorodia namona na idia danu unu bae kara toma.​—Mataio 4:23; 24:14.

Iehova ese taunimanima na e lalokau henidia badamu dainai, e gwauhamata idia daidiai ini ḡau namodia iboudiai baine kara. Unu ḡau namodia daidiai o uramu ia ba dibaia bona ba hakahikahia, a? Unu ba kara toma ena namo be dahaka? Atikol gabena ese una be herevalaiamu.