Ba Stadilaia Ḡauna Ta

Mai Anidia Ḡaudia Bavato Guna

Ita ta ta eda nega na dia bada siboda eda stadi baita kara totona. To edena dala ai nega baita ḡaukaralaia namonamo? Ḡau ginigunana na, nega bavato o duahiamu ḡauna ba lalohadailaia. Sivarai kwadoḡina ta bo stadilaiamu neganai bo lalopararamu, to sivarai idauidau bo duahi haraḡa-haraḡamu neganai basio lalopararamu.

Ḡau iharuana na, mai anidia bada ḡaudia haida bavato guna. (Efe. 5:15, 16) Bae durumu ḡaudia haida be ini:

• Dina ta ta ai Baibul ba duahia. (Sal. 1:2) Eda wiki ta ta heboudia edia Baibul duahiduahi sediual ba badinaia.

• Gima Kohorona Stadi bona wiki lalonai ta abiamu hebouna totona ba heḡaeḡae. Bona hebou lalonai haere ba heni.​—Sal. 22:22.

• Bema mai emu nega, lauma anianidia ma haida, heḡereḡere pablik Gima Kohorona bona Awake! magasin, vidio idauidau, bona jw.org ai e halasimu ḡaudia ma haida ba duahidia bona ba itadia.

• Stadi projek ta ba karaia. Heḡereḡere, o davariamu hekwakwanaina ta ihanaina dalana, o laloamu henanadaina ta, eiava o uramu ba lalopararalaia namonamo Baibul topik ta ba hetahulaia. Oi baine durumu ḡauna ta na, jw.org ai ina kaha “Bible Study Activities” ba itaia.