Dirava Be Dahaka Vada E Kara?

Bema oi na o uramu ta ba dibaia, namona na ia ese e haḡuḡuru ḡaudia bona e hanaidia hekwakwanaidia ba dibadia. Una heḡereḡerena, o uramu Dirava ba dibaia namonamo neganai, ia ese vada e kara ḡaudia ba dibadia. Bema unu bo kara tomamu bo hoamu badina Dirava ese idaunegai e kara ḡaudia na hari e durudamu bona vaira negai danu hahenamo na baita abimu.

DIRAVA NA EDA NAMO DAIDIAI ḠAU IBOUDIAI E HAVARA

Iehova Dirava na ita Ihavarada Tauna Badana badina “tanobada matamana amo e hehuni ḡaudia, ena siahu bona ena kara, vada eme hedinarai e kara ḡaudia ese vada e hahedinaraiamu.” (Roma 1:20) “Ia ese ena siahu amo tanobada e karaia, bona ena aonega amo tanobada idoinai e haginia, bona ena lalo-parara amo guba e idia roro.” (Ieremia 10:12) E havara ḡaudia ese danu e hahedinaraiamu, ita na e laloda badamu.

Iehova ese taunimanima e karadia dalana na idau herea, badina Baibul na e gwaumu ita na “ia heida-idana.” (Genese 1:27) Anina na, iena kara namodia na ita ese baita hahedinaraidia diba. Ia itomadiho henina karana amo ena lalohadai bona ena taravatu ta dibadiamu. Eda mauri ai baita moale totona unu na baita badinadia. To hereadaena be ina, dala na e kehoa ia baita hetura henia diba.

Dirava ese tanobada ai e kara ḡaudia ta itadiamu neganai, iena hemami ita edai ta lalopararalaiamu. Aposetolo Paulo ese e gwauraia hedinarai eto, Dirava na “sibona ihahedinaraina toadia mo se nege, a hahenamo karadia e karamu, medu guba amo bona madinamo negadia e henimuimu, bogamui e hakunudiamu, bona lalomui e hamoalediamu.” (Aposetolo Edia Kara 14:17) Dirava ese mai anidia bada ḡaudia bona ḡau idauidau e henida eda mauri baita moalelaia totona. Una ese e hahedinaraiamu, e uramu baine henida ḡaudia na momo herea.

Iehova ese tanobada e karaia taunimanima ese bae noholaia hanaihanai. Baibul na e gwaumu: “Tanobada be ia ese taunimanima natudia vada e henidia,” bona “se karaia ḡau asi oromana, a haida ese bae noholaia totona e karaia.” (Salamo 115:16; Isaia 45:18) Daidia ese bae noholaia bona ede daudauna bae noho? “Kara maoromaoro taudia ese tano bae abia, bae noholaia hanaihanai.”​—Salamo 37:29.

Iehova na tau bona hahine ginigunadia Adam bona Heva e karadia bena tanobada paradaisona ai e atodia ‘bae biru henia bona bae reḡua.’ (Genese 2:8, 15) Dirava ese ḡaukara rua e henidia: “Besemui ba havaradia, ba hutuma; tanobada ba hahonua bona ba biagua.” (Genese 1:28) Adam bona Heva edia helaro na tanobada ai mauri hanaihanai bae moalelaia. To Dirava e gwau-edeede henia dainai, “kara maoromaoro taudia” ida “tano bae noholaia hanaihanai” hahenamona e haboioa. Baita itaiamu, edia kara ese Iehova ena ura ita bona tanobada enai na se haidaua. Mani Iehova ese e karaia ḡauna ta do aita herevalaia guna.

DIRAVA ESE BAIBUL E HENIDA

Momo na mai dibadia Baibul na Dirava ena Hereva. Dahaka dainai Iehova ese Baibul e henida? Badina e uramu ia baita dibaia. (Hereva Lada-isidia 2:1-5) Momokani, Dirava ena amo ta uramu baita diba henanadai iboudiai na Baibul ese se haerelai, bona buka ma ta ai danu basita davarimu. (Kohelete 3:11) To Baibul ai e tore ḡaudia iboudiai na heḡereḡere Dirava baita dibaia totona. Taunimanima e kara henidia dalana amo ta dibamu ia be Dirava ede bamona. Danu, ta dibamu ia be daika e ura heniamu bona daidia be se ura henidiamu. (Salamo 15:1-5) Tomadiho, kara ḡoeva bona kohu ai ena lalohadai be dahaka e hadibadamu. Baibul lalonai Iehova natuna Iesu Keriso ena kara bona hereva ta duahimu neganai, Iehova ena kara ta dibadia ḡoevaḡoevamu.​—Ioane 14:9.

Iehova ese Baibul e henida badina ma ta na, eda mauri baita moalelaia dalana baita diba. Baibul amo Iehova ese e hadibadamu ḡaudia haida na ruma bese baine moale dalana, dekedai miadia ḡaudia baita moalelai dalana, bona basita lalohekwarahi. Bona ina magasin ai Baibul ese be haerelaimu henanadaidia bo itamu. Heḡereḡere, dahaka dainai hisihisi na bada herea? Vaira nega ai dahaka be varamu? Danu Baibul amo bo dibamu, Iehova be dahaka vada e kara iena ura ginigunana baine hamomokania.

Baibul na buka idau hereana. Ena be laḡani 1,600 gunanai tatau 40 ese e torea, to idia ese iena hereva badana na asie haidaua, badina “Dirava ena heuda-roha dainai e tore,” anina na Dirava na Itorena Tauna korikorina. (2 Timoteo 3:16) Baibul na dia idaunegai e tore bukadia haida heḡereḡeredia, badina e tore herevadia na se idau bona Baibul manuskrip gunadia ese una na e hamomokaniamu. Bona Baibul na doini ta duahiamu, ena be haida na e urava ihahanaina ḡaukarana bae koua, asie urava bae hariharilaia, eiava asie urava taunimanima ese bae duahia. Hari, Baibul na gado momo ai e hahanaiamu bona e hariharilaiamu. Una ese Baibel ena hereva e hamomokaniamu, e gwaumu: “Eda Dirava ena hereva baine gini hanaihanai.”​—Isaia 40:8.

DIRAVA NA E GWAUHAMATA ENA URA BAINE HAḠUḠURUA

Dirava na ita daidai mai anina bada ḡauna ta e karaia unu amo e gwauhamatalaia ḡauna na baine haḡuḡurua. Matamanai vada tame herevalaia, Dirava ena ura na taunimanima ese tanobada na bae noholaia hanaihanai. To Adam ese Dirava e gwau-edeede henia neganai, ia bona natuna veridia ese mauri hanaihanai hahenamona na e haboioa. “Tau ta dainai dika tanobada ai e vareai, bona dika ese mase e vareailaia; bena mase ese taunimanima iboudiai e butudia tao, badina be iboudiai na mai edia kara dika.” (Roma 5:12) Una gwau-edeede karana dainai, reana baita laloamu Dirava ena ura tanobada ai na basine ḡuḡurumu. To Iehova be dahaka e kara?

Iehova e kara ḡaudia ese ena kara e hahedinaraidia ḡoevaḡoeva. Iehova ese Adam bona Heva be e hahemaoro henidia, to idia natudia daidiai dala ta e heḡaeḡaelaia. Iehova na aonega Diravana dainai, ia na vada e diba una hekwakwanai be ede baine hamaoromaoroa toma bona ihamaoromaorona dalana na una horanai e herevalaia. (Genese 3:15) Kara dika bona mase amo baine ruhada tauna na Dirava natuna Iesu Keriso. Dahaka e vara?

Adam ena gwau-edeede dainai, Iehova ese taunimanima na dika amo baine hamauridia totona, Iesu e siaia tanobada, unu amo taunimanima na mauri e lao heniamu dalana baine hadibalaidia, bona ‘ena mauri baine heni, hutuma baine hamauridia helaoreana.’a (Mataio 20:28; Ioane 14:6) Iesu na ḡoevadae Adam heḡereḡerena dainai, ia sibona ese mauri idavalaina boubouna baine heni diba. To Iesu na dia Adam heḡereḡerena, badina ia na tamana e kamonai henia ela bona e mase. Iesu na basinema mase badina ia na kara dikana ta se karaia, una dainai Iehova ese e hatorea isi bona guba maurina e henia lou. Adam ese bema karaia ḡauna na Iesu ese e karaia, kamonai taudia na bae mauri hanaihanai. “Bona tau tamona ena gwau-edeede dainai hutuma na dika taudia ai e halaodiava; unuhetomana, tau tamona ena kamonai dainai hutuma na kara maoromaoro ai e halaodiamu.” (Roma 5:19) Oibe, Iesu ena mauri idavalaina boubouna dainai, Dirava ese ena gwauhamata, taunimanima na tanobada ai bae noho hanaihanai gwauhamatana, be haḡuḡuruamu.

Adam ena gwau-edeede karana amo e vara hekwakwanaidia na Iehova ese baine hamaoromaoro daladia amo ia ta dibaia namonamomu. Iehova ese ena ura baine haḡuḡurua totona, ḡau ta ese ia na basine koua diba. Iena hereva na “baine haḡuḡurua.” (Isaia 55:11) Danu tame diba, Iehova ese ita na e lalokau henida badamu. “Dirava ena lalokau na ini e hahedinarai henida toma: Dirava ese ia natuna vara-edeana tanobada ai e siaia, ia bagunai baita mauri helaoreana. Lalokau anina binai: dia ita ese Dirava ta ura henia, to ia ese ita e ura henida, bona ia Natuna e siaia, iseda dika kwarana ai ela.”​—1 Ioane 4:9, 10.

Dirava “ese Natuna vara-edeana se rua, a ita iboudai daidai e kahua nege; benaini, ḡau iboudiai ia ida basine henida a?” (Roma 8:32) Dirava be e gwauhamata ita daidai dahaka baine kara? Atikol gabena ai una ba duahia.