Hereva Momokani Bona Hereva Koikoi Edia Idau be Ede Ba Dibadia Toma?

1. Oi ese hereva momokani be ede o laloa tomamu?

IEHOVA ena taunimanima ese Baibul amo e diba hereva momokanidia na e ura henidia badamu. Iseda abidadama na unu hereva momokanidia amo ta hagoadaia. (Roma 10:17) Ta abia daemu Iehova ese Kristen kongrigeisin e haginia na “hereva momokani duna bona badina.” (1 Tim. 3:15) Bona mai moaleda ida ita e ‘hakaudamu taudia’ ta kamonai henidiamu, badina idia ese Baibul amo hereva momokani anidia ita e hadibalaidamu bona Dirava ena ura heḡereḡerena ai hahekau herevadia e henidamu.—Heb. 13:17.

2. Iakobo 5:19 heḡereḡerena, hereva momokani ta dibamu murinai dahaka baine vara diba?

² Hereva momokani bona Dirava ena orea baita badinaia karana na vada ta abia dae, to baita henahua toho hereva momokani dalana amo baita raka siri na garina. (Iakobo 5:19 ba duahia.) Satana na e uramu Baibul eiava Dirava ena orea amo e maimu hahekau daladia baita daradaralai.—Efe. 4:14.

3. Dahaka dainai hereva momokani baita dogoatao tarika-tarika? (Efeso 6:​13, 14)

³ Efeso 6:​13, 14 ba duahidia. Kahirakahira Diabolo ese koikoi herevadia amo bese momo be hakaudia kereremu Iehova bae inai henia totona. (Apok. 16:​13, 14) Danu, Satana na be ḡaukara goadamu Iehova ena taunimanima baine hakaudia kerere. (Apok. 12:9) Una dainai, hereva momokani bona hereva koikoi edia idau baita diba na mai anina bada, unu amo hereva momokani na dounu baita badinaia. (Roma 6:17; 1 Pet. 1:22) Unu baita kara tomamu neganai hisihisi badana ai baita roho maurimu!

4. Ina atikol ai dahaka baita herevalaimu?

⁴ Ina atikol ai ḡau rua baita herevalaimu, unu ese be durudamu Baibul ena hereva momokanidia baita diba, bona Dirava ena orea amo e maimu hahekau herevadia baita abi dae. Bena baita kara ḡaudia toi baita herevalaimu, unu ese be durudamu hereva momokani baita dogoatao tarika-tarika.

KARA HAIDA AMO HEREVA MOMOKANI BAITA DIBAIA

5. Edena dala ai Iehova igari henina karana ese be durudamu hereva momokani baita dibaia?

⁵ Iehova igari henina. Iehova igari henina karana baita manadalaiamu neganai, una ese be durudamu ia baita lalokau heniamu, bona ia lalona ihahisina karana ta basita karaiamu. Ita na ta uramu maoro bona kerere edia idau, bona hereva momokani bona hereva koikoi edia idau baita diba, unu amo Iehova ese baine lalonamo henida. (Her. 2:​3-6; Heb. 5:14) Namona na taunimanima igari henidia karana ese Iehova ilalokau henina karana basine hereaia, badina taunimanima ihamoaledia karadia ese Iehova lalona e hahisiamu.

6. Spai taudia ten na taunimanima garidia e gari dainai dahaka e kara?

⁶ Bema ita ese taunimanima baita gari henidiamu bona Dirava basita gari heniamu, hereva momokani na baita rakatania dibamu. Mani Israel tatau badadia 12 edia haheitalai aita laloa, idia na e siaidia Iehova ese baine henidia tanona bae hasinadoa. To, unu spai taudia ten na Kanaan taudia e itadia neganai, e gari bona Iehova na se laloa. Una dainai, Israel taudia ma haida e hamaorodia eto: “Una tano taudia basita tuari henidia diba, badina be idia na gogoada, ita na mamanoka.” (Num. 13:​27-31) Taunimanima edia roharoha ai, Kanaan taudia edia goada ese Israel taudia edia goada e hereaia. To, bema idia na e gwauva Israel taudia ese inaidia na basie hadareredia dibamu, anina na idia ese Iehova na se laloa. Unu spai taudia ten na Iehova ena ura Israel taudia ese bae karaia ḡauna hari bema laloa. Danu guna Iehova ese idia daidiai e kara ḡaudia bema lalodia dobu. Unu amo bema laloparara Kanaan taudia na ḡau ta lasi siahu idoinai Diravana, Iehova, vairanai. To spai taudia rarua, Iosua bona Kaleb na Iehova e abidadama henia. Idia ese Israel taudia e hamaorodia, eto: “Iehova ese baine lalo namo henida, ia ese una tano ai baine hakauda vareai, baine henida.”—Num. 14:​6-9.

7. Edena dala ai Iehova igari henina karana baita habadaia? (Laulau danu ba itaia.)

⁷ Iehova igari henina karana baita habadaia totona, namona na ta karamu abi hididia iboudiai lalodiai ia ihamoalena dalana baita laloa bada. (Sal. 16:8) Baibul sivaraidia o duahimu neganai, sibomu ba henanadai, ‘Bema egu ai bema vara, lau be dahaka nama kara?’ Heḡereḡere, mani a laloa oi na unu Israel tatau badadia ten edia ripot dikana o kamonaiamu. Oi danu edia ripot bo abia daemu bona taunimanima bo gari henidiamu, a? Eiava Iehova o lalokau heniamu dainai bo uramu ia ba hamoalea, a? Israel taudia hutuma ese Iosua bona Kaleb edia hereva na asie abia dae, ena be idia na hereva momokanidia e gwaurai. Una dainai, Iehova e dadaraia Israel taudia na Gwauhamata Tanona ai asie vareai.—Num. 14:​10, 22, 23.

8. Edena kara baita goadalaia, bona dahaka dainai?

⁸ Manau. Iehova ese manau taudia ediai hereva momokani e hahedinaraiamu. (Mat. 11:25) Ita na mai manauda ida heduru ta abi, unu amo hereva momokani ta dibaia. (Apos. 8:​30, 31) To nahuada baita toho, basita hekokoroku. Bema baita hekokorokumu, reana baita laloamu eda lalohadai ese Baibul bona Iehova ena orea amo e maimu hahekau herevadia na e hereadia.

9. Edena dala ai dounu baita manau?

⁹ Manau karana baita dogoatao totona, namona na baita helalotao Iehova ida siboda baita haheḡereḡeremu neganai, ita na mamaraḡi-mamaraḡi. (Sal. 8:​3, 4) Iehova baita noia baine duruda baita manau, unu amo baine hadibada. Ia ese be durudamu iena Hereva bona orea amo, ena lalohadai baita laloa bada. Emu Baibul duahiduahi o karaiamu neganai, ba itaia dahaka dainai Iehova ese manau taudia e ura henidiamu, bona hekokoroku taudia e inai henidiamu. Bona bema asainmen badana ta o abiamu bona una asainmen dainai taunimanima ese be matauraimumu, namona na ba manau.

HEREVA MOMOKANI BAITA DOGOATAO TARIKA-TARIKA DALANA

10. Iehova be daidia amo ena taunimanima ediai hahekau herevadia e heni?

¹⁰ Iehova ena orea amo e maimu hahekau herevadia bavabidadama henidia. Israel edia negai, Iehova ese Mose e ḡaukaralaia, bena gabeai Iosua ma e ḡaukaralaia Iena taunimanima ediai ena hahekau herevadia baine henidia. (Ios. 1:​16, 17) Israel taudia na Iehova ese e abidia hidi taudia e matauraidiava dainai namo e davariva. Laḡani hanred momo muridiai, Kristen kongrigeisin e gini matama neganai, aposetolo taudia 12 ese hahekau herevadia e heniva. (Apos. 8:​14, 15) Gabeai, Ierusalem ai elda ma haida e abidia hidi idia ida bae ḡaukara hebou. Kristen taudia na unu abidadama tataudia amo e abiva hahekau herevadia e badinava neganai, “ekalesia oreadia iboudiai edia abidadama e goada e laova, bona dina iboudiai ekalesia taudia na e hutuma e laova.” (Apos. 16:​4, 5) Hari ina negai, ita danu Iehova ese ena orea amo hahekau herevadia e henidamu. To, bema Iehova ese e abidia hidi taudia basita badinadiamu, o laloamu Iehova ena hemami be ede bamona? Una henanadai baita haerelaia totona, Israel taudia na Gwauhamata Tanona e laova lalonai e vara ḡauna mani aita herevalaia.

11. Israel taudia na Dirava ese e abia hidi tauna, Mose, asie matauraia neganai dahaka e vara? (Laulau danu ba itaia.)

¹¹ Israel taudia na Gwauhamata Tanona e laova lalonai, tatau badadia haida ese Mose ena ḡaukara bona Iehova ese ia e henia maduna na e hepapahuahulaia. Idia na e gwauva: “Badina be hebou taudia iboudiai na hehelaḡa [dia Mose mo]; oibe, ibouboudiai, bona Iehova na bogaraḡidiai e nohomu.” (Num. 16:​1-3) Momokani, ena be Dirava matana ai e “hebou taudia iboudiai” na hehelaḡa, to Iehova ese Mose e abia hidi Iena taunimanima baine gunalaidia. (Num. 16:28) Unu gwau-edeede taudia ese Mose e maumauraia neganai, idia na Iehova e maumauraia. Idia ese Iehova ena ura na asie laloa bada, to sibodia edia ura, dagi bona siahu bada, e lalodia bada. Una gwau-edeede karana e gunalaia taudia bona idia e badinadia taudia tausen momo na Dirava ese e hamasedia. (Num. 16:​30-35, 41, 49) Una sivarai amo ta dibamu hari ina negai danu, bema ta na Iehova ena orea ena hahekau dalana se matauraiamu, ia na se moalemu.

12. Edena dala ai Iehova ena orea na dounu baita abidadama henia diba?

¹² Iehova ena orea na dounu baita abidadama henia diba. Bema Baibul ena hereva momokani herevana ta, eiava Iehova ihesiai henina dalana ai laloparara matamatana ta ta abiamu neganai, Iehova ena orea e gunalaiamu taudia na kara haraḡa unu senisi e karamu bona e hadibadamu. (Her. 4:18) Idia na unu e kara tomamu, badina e uramu hanaihanai Iehova bae hamoalea. Danu, e ḡaukara goadamu Dirava ena Hereva heḡereḡerena ai disisin bae kara.

13. “Hereva momokanidia” be dahaka, bona dahaka baita kara be namo?

¹³ “Hereva momokanidia . . . ba badinadia tarika-tarika.” (2 Tim. 1:13) “Hereva momokanidia” na Baibul amo ta diba hahediba herevadia. (Ioa. 17:17) Unu hahediba herevadia na ita ese ta abi daemu ḡaudia badidia. Iehova ena orea ese e hadibadamu, ta abi daemu ḡaudia na hereva momokanidia ai baita badi kau. Bema nega iboudiai unu baita kara tomamu, Iehova ese be hanamodamu.

14. Dahaka dainai Kristen taudia haida ese “hereva momokanidia” na asie dogoatao tarika-tarika?

¹⁴ Dahaka baine vara diba bema ta abi daemu ḡaudia na “hereva momokanidia” ai asita badi kaumu? Mani haheitalai ta aita laloa. Kristen ginigunadia edia negai, Kristen taudia haida na sivarai koikoina ta e piua loaloava, e gwauva Iehova ena dina vada e kau. Reana idia ese revareva ta e abia—e laloava aposetolo Paulo ese e torea—dainai momo ese e hamomokania. Tesalonika ai, Kristen taudia haida ese una hereva na asie tahua namonamo, to ma haida ediai e haripiulaia. Bema Paulo ese matamanai idia e hamaorodia herevana bema laloatao, sivarai koikoi unu bamodia ese na basiema hakaudia kerere. (2 Tes. 2:​1-5) Paulo ese tadikakana na e sisiba henidia e kamonaimu ḡaudia iboudiai na basie abi dae. Bona idia idurudia totona, Paulo ese Tesalonika e tore henidia revareva iharuana ai eto: “Ina hahenamo herevana na lau, Paulo, sibogu imagu amo na toreamu. Egu revareva iboudiai toadia na ini na tore tomamu.”—2 Tes. 3:17.

15. Edena dala ai koikoi herevadia baita dadarai? Haheitalai ta ba gwauraia. (Laulau danu ba itadia.)

¹⁵ Paulo ese Tesalonika taudia e tore henidia herevadia amo dahaka ta dibamu? Bema ta kamonaimu herevadia na dia Baibul amo ta diba ḡaudia heḡereḡeredia, eiava sivarai ta na dia sivarai namona, baita aonega na namo. Soviet Union gunana ai, inaida ese revareva ta na tadikaka e henidia, bona eto una revareva na world headquarters amo ema. Una revareva ai tadikaka haida e hagoadadia orea amo bae parara bona orea ma ta bae haginia. Vaitani una revareva na momokani. To abidadama tadikakadia na e diba una na koikoi. Idia na e laloparara una revareva herevadia na dia Baibul amo e diba ḡaudia heḡereḡeredia. Hari, hereva momokani e inai heniamu taudia ese teknoloji e ḡaukaralaiamu, ita bae hadaradarada bona eda lalotamona karana bae hadikaia. Namona na “[laloda] na basie haraḡa-haraḡa,” to nahuada baita toho, ta kamonaimu ḡaudia eiava ta duahimu ḡaudia na Baibul amo ta diba hereva momokanidia ida baita haheḡereḡeredia.—2 Tes. 2:2; 1 Ioa. 4:1.

16. Roma 16:​17, 18 heḡereḡerena, bema haida na hereva momokani be rakataniamu, ita be dahaka baita kara?

¹⁶ Iehova e badinaiamu taudia ida ba noho. Dirava na e uramu lalotamona ai ia baita tomadiho henia. Lalotamona ai baita noho dalana na hereva momokani baita dogoatao tarika-tarika. Hereva momokani asie uramu bae badinaia taudia ese kongrigeisin e hapararaiamu, una dainai Dirava ese ita na e hamaorodamu taunimanima unu bamodia amo “ba raka oho.” Bema lasi, hereva koikoidia baita abi daemu bona Iehova basita badinaiamu.—Roma 16:​17, 18 ba duahidia.

17. Hereva momokanidia baita dogotao tarika-tarikamu ena namo be dahaka?

¹⁷ Hereva momokani baita dibamu bona baita dogoatao tarika-tarikamu neganai, Iehova dekedekenai baita nohomu, bona eda abidadama baita hagoadaiamu. (Efe. 4:​15, 16) Satana ena hahediba hereva koikoidia baita dadaraimu, bona hisihisi bada hereana lalonai Iehova ena heitatao henunai baita nohomu. Una dainai hereva momokani ba dogoatao tarika-tarika, “bena maino Diravana ese baine bamomui.”—Fili. 4:​8, 9.