6em Parti
Nesans Jésus Ziska So Lamor
Bondie ti avoy anz Gabriel kot enn zennfi ki ti apel Marie. Li ti dir li ki li pou gagn enn zanfan ki pou dirize kouma lerwa pou touletan. Sa zanfan-la se Jésus, ek li ti ne dan enn plas kot bann dimounn gard bann zanimo, ek bann berze ti vinn get li la. Plitar, enn zetwal ti gid bann zom, ki sorti dan les, ver sa ti zanfan-la. Nou aprann kisannla finn fer zot trouv sa zetwal-la, ek kouma Jésus inn reisi sape malgre bann zefor ki ti fer pou touy li.
Apre sa, nou trouv Jésus, kan li ti ena 12 an, ki pe koz avek bann ansegnan dan tanp. Dizwit an plitar Jésus ti batize, ek lerla li ti koumans fer travay ki Bondie ti avoy li fer lor later, setadir pres lor Rwayom ek ansegne. Pou ed li dan sa travay-la, Jésus ti swazir 12 zom ek li ti fer zot vinn so bann zapot.
Jésus ti osi fer bann mirak. Li ti nouri bann milye dimounn ar zis de-trwa ti pwason ek de-trwa dipin. Li ti geri bann malad ek li ti mem resisit bann mor. Finalman, nou aprann boukou kitsoz ki ti ariv Jésus pandan dernie zour so lavi, ek kouma finn touy li. Jésus ti pres pandan anviron trwa-z-an edmi, alor SIZIEM Parti rakont seki finn pase pandan inpe plis ki 34 an.