Lemesi Vini

PLIS ki 500 an apre ki Daniel ti anons sa profesi-la, anz Gabriel ti aparet avek enn zenn vierz ki apel Mari, ki ti enn desandan Lerwa David. Gabriel ti dir li: “Bonzour, twa ki ena faver Bondie. Zeova avek twa.” (Lik 1:28) Selman Mari ti gagn per. Ki Gabriel ti pe rod dir Mari kan li ti dir li sa?

Gabriel ti dir Mari: “Pa gagn per Mari, parski to’nn gagn faver Bondie. Ek gete! to pou tom ansint ek to pou gagn enn garson, ek to pou bizin apel li Zezi . . . Bondie, Zeova, pou donn li tronn so zanset, David,” ek “so Rwayom pou existe pou touletan.” (Lik 1:30-33) Enn extra zoli nouvel sa! Mari ti pou donn nesans Lemesi, sa “desandans” ki bann dimounn ti pe atann la!

Apepre nef mwa apre, Zezi ti ne dan Betleem. Lanwit ki li ti ne, enn anz ti dir bann berze dan sa landrwa-la: ‘Gete! mo pe anons zot enn bon nouvel ki pou fer gagn enn gran lazwa. Parski zordi enn sover inn ne pou zot dan lavil kot David ti sorti, limem Kris, Lesegner.’ (Lik 2:10, 11) Inpe plitar Zezi so fami ti demenaze pou al res dan Nazaret, kot Zezi ti grandi.

Lane 29 Nou Lepok, lane kot Lemesi ti bizin vini, Zezi ti koumans servi kouma profet Bondie kan li ti ena “anviron 30 an.” (Lik 3:23) Boukou dimounn ti konpran ki Bondie ti avoy li. Zot ti dir: “Enn gran profet inn vinn parmi nou.” (Lik 7:16, 17) Me ki Zezi ti ansegne?

Zezi ti ansegn bann dimounn pou kontan Bondie ek pou ador Bondie: Li ti dir: “Zeova nou Bondie li enn sel Zeova, ek to bizin kontan Zeova to Bondie avek tou to leker, avek tou to lavi, avek tou to lespri ek avek tou to lafors.” (Mark 12:29, 30) Li ti dir osi: “Se Zeova to Bondie ki to bizin adore, ek se zis li tousel ki to bizin donn enn servis sakre.”​—Lik 4:8.

Zezi ti ankouraz bann dimounn pou kontan sakenn zot kamarad: Li ti dir: “To bizin kontan to prosin kouma tomem.” (Mark 12:31) Li ti dir osi: “Tou seki zot anvi bann dimounn fer pou zot, zot osi zot bizin fer parey pou bann-la. Parski samem ki Lalwa ek bann Profet ansegne.”​—Matie 7:12.

Zezi ti fer boukou zefor pou koz lor Rwayom Bondie ar lezot: Li ti dir: “Mo bizin anons bon nouvel lor Rwayom Bondie dan lezot lavil osi, parski akoz samem ki Bondie inn avoy mwa.” (Lik 4:43) Kifer Rwayom Bondie li enn size bien inportan?

Bann Lekritir Sakre dir ki Rwayom Bondie se enn gouvernman dan lesiel ki pou dirize partou lor later. Zezi ki Lemesi, limem Lerwa ki Bondie inn swazir. Dan enn vizion, profet Daniel ti trouve seki ti pou pase dan lesiel: Bondie ti pou donn Lemesi “dominasion, loner, ek enn rwayom.” (Daniel 7:14) Gras-a sa Rwayom-la, later pou vinn enn Paradi ek bann serviter Bondie pou kapav viv pou touletan. Eski se pa enn zoli nouvel?