Parole Jéhovah Vivant

COUMA Jéhovah reagir kan so prop peuple vire ledo ar Li ek commence adore bann fausse bondié? Ki arrivé, si a chaque coup zot refuse obeir Li ek appel Li au secours seulement kan zot dan grand problem? Eski mem là, Jéhovah donne zot enn chemin sorti? Livre Juges reponn sa bann question-la ek lezot question bien important encore. Sa livre-la ti ecrire par prophete Samuel vers 1100 A.N.L.; li couvert bann evenement ki ti arrivé pendant apepré 330 an—depuis la mort Josué ziska ki premier lé-roi Israël monte lor trone.

Livre Juges, li enn partie dan parole ou-soit message Bondié; alors li ena enn grand valeur pou nou. (Hébreux 4:12) Bann zistoire bien interessant ki raconté ladan aide nou pou bien comprend personnalité Bondié. Bann leson ki nou aprann ladan fortifié nou la-foi ek aide nou pou saisi bien “la vie veritable,” la vie eternel dan nouveau lé-monde ki Bondié inn promette nou. (1 Timothée 6:12, 19; 2 Pierre 3:13) Bann action ki Jéhovah inn faire pou sauve so peuple, donne nou enn l’idée concernant sa pli grand delivrance ki so Garson, Jésus Christ pou amené dan l’avenir.

KIFER TI BIZIN BANN JUGE?

((Juges 1:1-3:6)

Apré ki zot inn gagne la victoire lor bann lé-roi Canaan, enba direction Josué, chaque tribu ti al dan so l’heritage ki li finn gagné ek ti prend possession so la-terre. Seulement, bann Israélite pa ti pousse bann habitant-la en-dehors zot pays. Sa ti vinn enn vrai piege pou Israël.

Generation ki apré lepok Josué “pa ti konn Jéhovah ni bann action ki Li ti finn faire pou Israël.” (Juges 2:10) En plus, le peuple ti commence faire bann l’alliance mariage avek bann Cananéen ek ti servi zot bann bondié. Alors Jéhovah ti laisse bann Israélite tombe dan la main zot bann l’ennemi. Kan bannla ti faire trop dominere avek zot, bann Israélite ti demann vrai Bondié secours. C’est dan sa contexte religieux, social ek politik-la ki zistoire deroulé lor enn serie juge ki Jéhovah etabli parmi so peuple pou delivré zot dan la main zot bann l’ennemi.

Reponse pou Bann Question Biblik:

1:2, 4—Kifer ti choisir Juda couma premier tribu pou prend possession pays ki li finn herité? Normalement, tribu Ruben, premier-né Jacob, ti pou gagne sa privilege-la. Mais dan prophetie ki li ti faire lor so lili la-mort, Jacob ti predire ki Ruben pa ti pou superieur, parski li ti finn perdi so droit premier-né. Siméon ek Lévi, ki toulé-deux ti agir dan enn fason cruel, ti pou dispersé en Israël. (Genèse 49:3-5, 7) Alors, prochain lor la liste ti Juda, quatrieme garson Jacob. Siméon ki ti monte ensam avek Juda, ti gagne bann ti portion la-terre dispersé dan territoire Juda ki ti bien grand.a—Josué 19:9.

1:6, 7—Kifer ti coupe pouce la-main ek pouce lipié bann lé-roi ki ti’nn perdi enn la-guerre? Li parette ki enn dimoune ki ti perdi so pouce la-main ek so pouce lipié ti nepli kapav laguerre. Sans so pouce la-main, couma enn soldat ti pou trappe so l’epée ou-soit so lance? Ek kan li ti perdi so pouce lipié, li pa ti pou kapav garde so l’equilibre facilement.

Bann Leson pou Nou:

2:10-12. Nou bizin ena enn program pou etudié la Bible regulierement pou ki nou ‘pa blié bann action Jéhovah.’ (Psaume 103:2) Bann parent bizin faire la verité Parole Bondié rentre bien dan leker zot bann zenfant.—Deutéronome 6:6-9.

2:14, 21, 22. Kan zot desobeir Li, Jéhovah laisse certain mauvais kitsoz arrive so peuple par expré—pou puni zot, pou raffine zot, ek pou pousse zot pou retourne vers Li.

JÉHOVAH ETABLI BANN JUGE

(Juges 3:7–16:31)

Zistoire bien interessant lor seki bann juge inn faire, commence avek Othniel, ki ti arrete huit an soumission ar enn lé-roi Mésopotamie. Avek courage, Juge Éhoud ti trouve enn maniere pou touye Églôn, enn lé-roi Moabite ki ti bien gros. Shamgar ki ti ena grand courage, ti abatte 600 Philistin li tousel, avek enn baton ki pointe ek ki servi pou pik bann boeuf. Avek l’encouragement ki li ti gagné avek Débora, ki ti enn prophetesse, ek avek soutien Jéhovah, Baraq ek so l’armée dix mille soldat ki pa ti bien equipé, ti gagne la victoire lor l’armée Sisera ki ti fort, ek ti faire zot sauvé. Jéhovah ti nomme Guidéôn ek ti donne li ek so 300 zom la victoire lor bann Madianite.

A travers Yiphtah, Jéhovah ti delivré Israël dan la main bann Ammonite. Tola, Yaïr, Ibtsân, Élôn, ek Abdôn ti aussi parmi bann 12 zom ki ti juge Israël. Period bann juge ti fini avek Samson, ki laguerre kont bann Philistin.

Reponse pou Bann Question Biblik:

4:8—Kifer Baraq ti insisté pou ki prophetesse Débora accompagne li ziska kot bann l’armée ti pé laguerre? Apparemment, Baraq pa ti senti-li kapav, par li tousel, faire face ar l’armée Sisera. Presence Débora ti pou donne li ek so bann zom l’assurance ki Bondié ti pé dirige zot ek sa ti pou donne zot confiance. Kan Baraq ti insisté pou ki Débora accompagne li, sa pa ti enn signe faiblesse mais sa ti montré so la-foi solide.

5:20—Couma eski bann zetoile ti laguerre pou Baraq depuis dan le ciel? La Bible pa dire si sa ti implik l’aide bann ange, enn la-pluie meteorite ki ti interpreté couma enn mauvais signe par bann zom Sisera, ou-soit kitfois bann prediction l’astrologie ki ti concerne Sisera ek ki ti finalement fausse. Seulement, nou sur ki dan enn certaine fason Jéhovah inn faire kitsoz.

7:1-3; 8:10—Kifer Jéhovah ti dire ki sa 32,000 soldat ki ti avek Guidéôn-la ti trop beaucoup pou al laguerre kont enn l’armée 135,000 soldat? C’est parski Jéhovah ti pé donne Guidéôn ek so bann zom, la-victoire. Li pa ti oulé ki zot pensé ki zot ti remporte la victoire lor bann Madianite par zot prop la-force.

11:30, 31—Kan li ti faire so promesse, eski Yiphtah ti pé pense pou offert enn dimoune en sacrifice? Yiphtah pa ti pou kapav pense enn kitsoz coumsa parski la Loi ti dire: “Fodé ki parmi zot, pena personne ki passe so garson ou-soit so tifi dan difé.” (Deutéronome 18:10) Seulement, li vrai ki Yiphtah ti pé pense enn dimoune, pa enn zanimo. Surement bann Israélite pa ti garde bann zanimo ki ti kapav offert en sacrifice, dan zot lakaz. Ek li pa ti pou enn sacrifice special si Yiphtah ti offert enn zanimo. Yiphtah ti koné ki sa kikenn ki ti pou sorti dan so lakaz pou vinn joinde li-la, ti pou kitfois so tifi. Li ti pou offert li “couma enn sacrifice ki brulé” dan sens ki sa dimoune-la ti pou consacré so la-vie entierement dan service Jéhovah dan tabernacle.

Bann Leson pou Nou:

3:10. Pou nou reussi nou bann objectif spirituel, sa pa depann lor nou sagesse, mais lor l’esprit Jéhovah.—Psaume 127:1.

3:21. Éhoud ti konn servi so l’epée couma bizin ek li ti faire sa avek courage. Nou bizin konn bien couma pou servi “l’epée l’esprit, setadir, parole Bondié.” Sa vedir ki nou bizin servi la Bible avek courage dan predication.—Éphésiens 6:17; 2 Timothée 2:15.

6:11-15; 8:1-3, 22, 23. Guidéôn ti modeste: Li ti reconette so limite. So l’exemple montré nou trois leson important: (1) Kan nou gagne enn privilege, nou bizin reflechi lor responsabilité ki vinn avek sa, au lieu ki nou pense grandeur ki sa pou donne nou. (2) Kan nou gagne zaffaire avek bann ki content laguerre, nou pou agir avek sagesse si nou manifesté modestie. (3) Kan nou reconette nou limite, sa empeche nou pou trop casse la tête ar nou position.

6:17-22, 36-40. Nou aussi nou bizin prudent ek pa “croire tou parole inspiré.” Au contraire, nou bizin “verifié bann parole inspiré pou guetté si vrai-mem zot sorti kot Bondié.” (1 Jean 4:1) Pou li sur ki conseil ki li pé al donné, vrai-mem basé lor la Bible, enn Chrétien ki fek nommé ancien pou agir avek sagesse si li consulté enn ancien ki ena plus l’experience.

6:25-27. Guidéôn ti faire attention pou li pa faire so bann l’ennemi en colere plus ki bizin. Kan nou preche la bonne nouvel, nou bizin faire attention pou pa offense lezot par nou fason kozé.

7:6. Dan nou service pou Jéhovah, nou bizin pareil couma sa 300 zom Guidéôn-la—nou bizin toujours veillé ek faire attention.

9:8-15. Li bien bête pou agir avek l’orgueil, ek ena l’envie pou gagne position ou-soit pouvoir!

11:35-37. Bon l’exemple ki Yiphtah inn donné, ti surement aide so tifi pou developpe enn la-foi solide ek enn l’esprit sacrifice. Zordi bann parent kapav donne sa mem qualité l’exemple-la zot bann zenfant.

11:40. Kan nou felicite enn dimoune ki manifesté enn l’esprit ki bien disposé dan service Jéhovah, sa encourage li.

13:8. Pou kapav enseigne zot bann zenfant, bann parent bizin prié Jéhovah pou guide zot ek zot bizin suive so direction.—2 Timothée 3:16.

14:16, 17; 16:16. Kan nou faire pression lor enn kikenn setadir nou ploré ek laguerre, sa kapav gate bann relation.—Proverbes 19:13; 21:19.

LEZOT PECHÉ KI BANN ISRAÉLITE TI FAIRE

(Juges 17:1–21:25)

Ena deux zistoire frappant dan dernier partie livre Juges. Premier-la concerne enn missié ki ti appel Mika ki ti installe enn idole dan so lakaz ek ti employe enn Lévite pou servi couma pretre pou li. Apré ki zot inn detruire la ville, Laïsh ou-soit Léshem, bann Danite ti construire zot prop la-ville ek ti appel li Dân. Zot inn servi zidole ki Mika ti ena ek so pretre aussi pou etabli enn lot forme l’adoration dan la ville Dân. Li parette ki zot ti prend la ville Laïsh avant la mort Josué.—Josué 19:47.

Deuxieme evenement ti arrivé pa trop longtemps apré la mort Josué. Certain zom dan la ville Guibéa, ki dan territoire tribu Benjamin ti commette enn crime sexuel en group; a cause sa preské tou tribu Benjamin ti perdi la vie—zis 600 zom sapé. Mais grace a enn l’arrangement pratik, zot ti reussi gagne bann madame pou marié, ek dan lepok kot David ti pé regné, zot ti finn arrivé ena preské 60,000 soldat.—1 Chroniques 7:6-11.

Reponse pou Bann Question Biblik:

17:6; 21:25—Si ‘tou dimoune ti ena l’habitude pou faire seki bon dan zot prop lizié,’ eski sa pa ti crée desordre partout parski personne pa ti obeir la loi? Non, parski Jéhovah ti prend enn quantité disposition pou guide so peuple. Li ti donne zot la Loi, ek bann pretre pou enseigne zot dan so chemin. A travers Ourim ek Thoummim, grand pretre ti kapav koné ki Bondié ti pensé lor bann kitsoz important. (Exode 28:30) Dan chaque la-ville ti ena aussi bann ancien qualifié pou donne bann bon conseil. Kan enn Israélite ti profite sa bann disposition-la, li ti ena enn bon guide pou dirige so conscience. Kan li ti faire ‘seki bon devant so prop lizié,’ sa ti donne bon resultat. Lot coté, si enn dimoune ti ignore la Loi ek ti prend so prop decision concernant conduite ek l’adoration, resultat pa ti bon.

20:17-48—Kifer Jéhovah ti laisse bann Benjaminite gagne la victoire deux fois lor bann lezot tribu mem si tribu Benjamin ti merite enn punition? Letan Li finn laisse bann tribu fidel konn bann grand la-perte en premier, Jéhovah ti testé zot determination pou tire tou seki mauvais en Israël.

Bann Leson pou Nou:

19:14, 15. Kan peuple Guibéa pa ti disposé pou montré zot l’hospitalité, sa ti montré ki zot ti ena enn problem lor plan moral. Bann Chrétien encouragé pou “contigne manifesté l’hospitalité.”—Romains 12:13.

Delivrance Devant Nou

Dan enn l’avenir bien proche, Royaume Bondié ki dan la main Jésus Christ pou detruire sa mauvais lé-monde-la ek pou amenn enn grand delivrance pou bann ki droite. (Proverbes 2:21, 22; Daniel 2:44) ‘Lerla tou bann l’ennemi Jéhovah pou mort, ek bann ki content Li pou vinn couma kan soleil levé ek faire senti tou so la-force.’ (Juges 5:31) Anou montré ki nou parmi bann ki content Jéhovah letan nou mette en pratik seki nou finn aprann dan livre Juges.

Ena enn verité bien simple ki nou retrouvé plusieurs fois dan livre Juges: L’obeissance ar Jéhovah amenn bann grand benediction, desobeissance amenn bann consequence bien grave. (Deutéronome 11:26-28) Li bien important ki nou ‘obeir [volonté Bondié] avek nou leker’!—Romains 6:17; 1 Jean 2:17.

[Note]

[Map page 9]

(Guette publication)

“Jéhovah ti etabli bann juge, ek bannla ti delivré zot dan la main bann ki ti pé faire ravage kot zot.”—Juges 2:16

JUGE

1. Othniel (Tribu Manassé)

2. Éhoud (Tribu Juda)

3. Shamgar (Tribu Juda

4. Baraq (Tribu Naphtali

5. Guidéôn (Tribu Issakar

6. Tola (Tribu Manassé)

7. Yaïr (Tribu Manassé

8. Yiphtah (Tribu Gad)

9. Ibtsân (Tribu Asher)

10. Élôn (Tribu Zéboulôn)

11. Abdôn (Tribu Éphraïm)

12. Samson (Tribu Juda)

DÂN

MANASSÉ

NAPHTALI

ASHER

ZÉBOULÔN

ISSAKAR

MANASSÉ

GAD

ÉPHRAÏM

DÂN

BENJAMIN

RUBEN

JUDA

[Zimage page 10]

Baraq ti insisté pou ki Débora al kot l’armée ti pé laguerre. Ki leson ou finn aprann ladan?