Anou aprann ar Parole Bondié

Sa lartik-la souleve bann question ki kitfois ou finn deja demann-ou-mem ek li montré kot-sa ou kapav trouve bann reponse dan ou la Bible. Bann Témoins de Jéhovah pou bien content pou examine sa bann reponse-la avek ou.

1. Couma le mal ti commencé?

Le mal ti commencé lor la terre kan Satan ti koz premier menti. Satan pa ti mauvais kan ti crée li. Li ti enn ange parfait, mais li “pa’nn tini ferme dan la verité.” (Jean 8:44) Li ti developpe enn desir pou gagne l’adoration ki zis Bondié tousel merité. Satan ti koz menti ar Ève, premier femme, ek ti convaink li pou obeir li plutot ki Bondié. Adam ti suive Ève kan li aussi li ti desobeir Bondié. Decision ki Adam ti prend ti amenn souffrance ek la mort.​—Lire Genèse 3:1-6, 17-19.

Kan Satan ti conseil Ève pou desobeir Bondié, li ti pé monte enn rebellion kont droit ki Bondié ena pou dirigé. La plupart bann dimoune finn suive Satan kan zot pa finn accepté Bondié couma zot Dirigeant. C’est coumsa ki Satan inn vinn “chef le monde.”​—Lire Jean 14:30; Révélation 12:9.

2. Eski creation Bondié ti ena enn defaut?

Bann humain ek bann ange, bann creature ki Bondié ti crée, ti kapav obeir bann principe Bondié dan enn fason parfait. (Deutéronome 32:5) Bondié inn crée nou avek liberté pou choisir pou faire seki bon ek seki mauvais. Sa liberté-la permette nou pou montré nou l’amour pou Bondié.​—Lire Jacques 1:13-15; 1 Jean 5:3.

3. Kifer Bondié finn permette souffrance?

Pendant enn temps, Jéhovah finn tolere rebellion kont droit ki Li ena pou dirigé. Kifer? Pou montré ki tou zeffort ki bann dimoune faire pou dirigé sans Li, pa finn amenn bann bon resultat. (Jérémie 10:23) Apré ki 6,000 an finn passé dan l’histoire l’humanité, sa question-la finn reglé. Bann dirigeant humain pa finn reussi elimine la guerre, crime, l’injustice ek maladie.​—Lire Ecclésiaste 7:29; 8:9; Romains 9:17.

Parkont, bann ki accepté Bondié couma zot Dirigeant, gagne bann bienfait. (Isaïe 48:17, 18) Bientot, Jéhovah pou detruire tou bann gouvernement humain. Zis bann dimoune ki choisir pou laisse Bondié dirige zot ki pou reste lor la terre.​—Isaïe 2:3, 4; 11:9; lire Daniel 2:44.

4. Patience Bondié donne nou l’occasion pou faire ki kitsoz?

Satan ti pretann ki Jéhovah pa kapav gagne l’obeissance fidele okenn dimoune. Patience Bondié donne nou tou l’occasion pou montré si nou content pou laisse-nou dirigé par Bondié ou-soit par bann dimoune. Nou montré choix ki nou’nn faire par fason ki nou vive.​—Lire Job 1:8-11; Proverbes 27:11.

5. Couma nou choisir Bondié couma nou Dirigeant?

Nou choisir Bondié couma nou Dirigeant kan nou rod vrai l’adoration ki basé lor So Parole, la Bible, ek nou pratik sa. (Jean 4:23) Nou aussi evite prend part dan politik ek dan la guerre, pareil couma Jésus ti faire.​—Lire Jean 17:14.

Satan servi so pouvoir pou encourage bann pratik immoral, ki kapav faire nou di-tort. Kan nou rejette sa bann qualité pratik-la, certain parmi nou bann camarade ek nou bann famille kapav bouffonne nou ou-soit opposé ar nou. (1 Pierre 4:3, 4) Alors, nou tou nou bizin faire enn choix. Eski nou pou associé-nou avek bann dimoune ki content Bondié? Eski nou pou obeir so bann la loi ki sage ek ki rempli ar l’amour? Si nou faire sa, nou pou montré ki Satan ti koz menti kan li ti dire ki personne pa pou faire seki Bondié dire.​—Lire 1 Corinthiens 6:9, 10; 15:33.

Pou gagne plus renseignement, guette chapitre 11 dan livre Ki la Bible enseigné vrai-mem?, publié par bann Témoins de Jéhovah.

[Zimage page 12]

Adam ti faire enn mauvais choix

[Zimage page 13]

Nou bann choix montré si nou envie ki Bondié dirige nou