Vinn proche ar Bondié

GUETTE zimage ki trouve lor sa page-la. Eski ou kapav ressenti securité ki sa ti mouton ki lor l’estomac sa berger-la pé ressenti? Dan Psaume 23, la Bible servi comparaison enn berger ek so mouton pou montré l’affection ki Jéhovah manifesté envers so bann adorateur. Li envie ki nou ressenti mem securité ki Li donne bann ki, pareil couma psalmiste David, kapav dire avek confiance: “C’est Jéhovah ki mo Berger.”a​—Verset 1.

David, ecrivain sa psaume-la, ti enn berger kan li ti jeune. Li ti koné seki bann mouton bizin ek ki bann responsabilité enn berger ena. David, ki ti trouvé couma toute longue so la vie Bondié ti prend li soin, ti ecrire seki appel “enn psaume ki donne l’assurance ou-soit confiance.” Nom Bondié, Jéhovah, apparette dan commencement ek a la fin sa psaume-la. (Verset 1, 6) Bann parole ki ena au millieu decrire trois fason couma Jéhovah prend soin so peuple pareil couma enn berger prend soin so bann mouton.​—Psaume 100:3.

Jéhovah guide so bann brebis. Bann mouton ki pena berger ena tendance pou perdi. Nou aussi nou bizin l’aide pou trouve chemin kot nou bizin marché dan la vie. (Jérémie 10:23) Jéhovah guide so peuple vers “bann la plaine kot ena beaucoup l’herbe” ek “bann place kot ena bien de l’eau ek kot kapav reposé.” Li guide zot “lor bann chemin la justice.” (Verset 2, 3) Sa description ki faire lor bann berger-la rassure nou ki nou kapav faire Bondié confiance. Kan nou suive direction so l’esprit, couma nou trouvé dan la Bible, nou kapav ena enn fason vive ki faire nou gagne satisfaction, reconfort ek securité.

Jéhovah protege so bann brebis. Kan zot berger pa la, bann mouton peur-peur ek zot pa kapav defann zot. Jéhovah dire so peuple ki fodé pa zot peur, mem kan zot “marche dan enn vallée kot faire bien noir,” setadir pendant seki kapav parette bann moment pli dur dan zot la vie. (Verset 4) Jéhovah veille lor zot, ek touletan Li pré pou aide zot. Li kapav donne so bann adorateur sagesse ek la force ki zot bizin pou ki zot kapav faire face ar bann l’epreuve.​—Philippiens 4:13; Jacques 1:2-5.

Jéhovah nourri so bann brebis. Bann mouton depann lor zot berger pou rod mangé pou zot. Nou ena enn besoin spirituel ki Bondié tousel kapav aide nou pou satisfaire. (Matthieu 5:3) Heureusement, Jéhovah Li enn Papa ki genereux, ki mette devant so bann serviteur enn la table bien garni. (Verset 5) La Bible ek bann publication ki basé lor la Bible, couma par exemple sa magazine ki ou pé lire-la, donne nou la nourriture spirituel ki satisfaire besoin ki nou ena pou konn but la vie ek projet ki Bondié ena pou nou.

David ti senti-li en securité parski li ti koné ki si li reste proche ar so Berger ki dan le ciel, Jéhovah ti pou prend li bien soin “toulé-jour dan [so] la vie.” (Verset 6) Eski ou aussi ou envie sa qualité securité-la? Si oui, alors aprann couma ou kapav vinn proche ar Jéhovah. Coumsa ou kapav senti-ou en securité dan lé-bras nou Grand Berger ki dirige, protege ek nourri bann ki reste fidele ar Li.​—Isaïe 40:11.

[Note]