Enn royaume bann pretre, amenn bann benediction
“Zot, zot ‘enn race ki Bondié finn choisir, enn groupe pretre ki pou vinn le roi, enn nation saint, enn peuple ki pou vinn enn di-bien special.’”—1 PIERRE 2:9.
1. Kifer appel aussi “repas nou Seigneur,” Mémorial, ek dan ki but Jésus ti etabli sa l’evenement-la?
DAN la soirée 14 Nisan l’an 33 nou lepok, pou enn dernier fois, Jésus Christ ek so 12 zapotre ti faire Pâque, enn fête ki bann Juif ti habitué faire. Apré ki Jésus ti renvoye Judas Iscariote, ki ti pou trahir li, Jésus ti etabli enn nouveau celebration, ki plitar ti appel “repas nou Seigneur.” (1 Cor. 11:20) Deux fois Jésus ti dire: “Contigne faire sa en mo memoire.” Nou appel aussi sa l’evenement-la, Mémorial, parski c’est enn l’evenement ki faire en memoire Christ ek ki mette l’accent lor so la mort. (1 Cor. 11:24, 25) Pou obeir sa l’ordre-la, bann Témoins de Jéhovah dan le monde entier celebré Mémorial toulé-l’année. En 2012, le 14 Nisan dan calendrier biblik, pou commencé apré coucher soleil, jeudi 5 avril.
2. Ki Jésus ti dire lor di-pain ek di-vin?
2 Dan deux verset, Luc, enn disciple Jésus, ti faire enn resumé lor seki Jésus ti faire ek ti dire dan sa l’occasion-la: “Li ti prend . . . enn di-pain, li ti remercié Bondié, li ti casse di-pain-la, li ti donne zot, ek li ti dire: ‘Sa represente mo lekor ki pou bizin donné en sacrifice pou zot. Contigne faire sa en mo memoire’. Li ti faire pareil avek enn coupe aussi kan zot ti fini prend zot repas, ek li ti dire: ‘Sa coupe-la represente nouveau l’alliance ki existé grace a mo di-sang, ki pou versé pou zot.’” (Luc 22:19, 20) Couma bann zapotre ti comprend sa bann parole-la?
3. Kan Jésus ti koz lor di-pain ek di-vin, ki bann zapotre ti comprend?
3 Bann zapotre ti bann Juif, alors, zot ti konn bien tou seki bann pretre ti faire kan zot ti offert Bondié bann sacrifice zanimo dan temple Jérusalem. Bann pretre ti faire sa bann sacrifice-la pou gagne faveur Jéhovah. Beaucoup sa bann sacrifice-la ti offert pou gagne pardon bann peché. (Lév. 1:4; 22:17-29) Alors, bann zapotre ti comprend ki, kan Jésus ti dire ki li ti pou ‘donne so lekor ek li ti pou verse so di-sang pou zot,’ li ti pé rod dire ki li ti pou donne so la vie parfait couma enn sacrifice. Sa sacrifice-la ti pou ena enn pli grand valeur ki bann sacrifice zanimo.
4. Ki Jésus ti rod dire par “sa coupe-la represente nouveau l’alliance ki existé grace a mo di-sang”?
4 Ki Jésus ti rod dire par “sa coupe-la represente nouveau l’alliance ki existé grace a mo di-sang”? Bann zapotre ti konn prophetie Jérémie lor enn nouveau l’alliance, prophetie ki trouve dan Jérémie 31:31-33. (Lire.) Bann parole Jésus ti montré ki li ti pé etabli sa nouveau l’alliance-la ek sa ti pou remplace l’alliance la Loi ki Jéhovah ti faire avek nation Israël par l’intermediaire Moïse. Eski ti ena enn rapport entre sa deux l’alliance-la?
5. Ki bann privilege l’alliance la Loi ti donne nation Israël?
5 Oui, ti ena enn grand lien entre l’objectif toulé-deux l’alliance. Kan Jéhovah ti etabli l’alliance la Loi, Li ti dire nation Israël: “Si zot obeir tou seki mo dire zot, ek zot garde mo l’alliance, lerla vrai-mem zot pou vinn mo di-bien special parmi tou bann lezot peuple, parski la terre entier pou moi. Ek zot, zot pou vinn enn royaume bann pretre ek enn nation saint pou moi.” (Ex. 19:5, 6) Couma bann Israélite ti comprend sa bann parole-la?
PROMESSE KI POU ENA ENN ROYAUME BANN PRETRE
6. Ki promesse l’alliance la Loi ti pou realisé?
6 Bann Israélite ti bien comprend sa mot “l’alliance[-la],” parski dan le passé Jéhovah ti faire bann l’alliance avek zot bann ancetre Noé ek Abraham. (Gen. 6:18; 9:8-17; 15:18; 17:1-9) Dan l’alliance ki Li ti faire avek Abraham, Jéhovah ti promette: “Par moyen to descendance, tou bann nation lor la terre pou vrai-mem attire benediction lor zot.” (Gen. 22:18) Jéhovah ti faire l’alliance la Loi pou ki sa promesse-la kapav realisé. Grace a sa l’alliance-la, nation Israël ti kapav vinn “di-bien special parmi tou bann lezot peuple” pou Jéhovah. Dan ki but? Pou ki zot ‘vinn enn royaume bann pretre pou Jéhovah.’
7. Ki sa vedir “enn royaume bann pretre”?
7 Bann Israélite ti koné ki travail enn pretre ou-soit enn le roi ti faire. Selman, Melkisédec ti sel dimoune dan le passé ki ti faire toulé-deux travail en mem temps avek faveur Jéhovah. (Gen. 14:18) Asterla Jéhovah ti offert bann Israélite privilege pou vinn “enn royaume bann pretre.” Plitar, bann l’Ecriture inspiré ti koz lor zot couma enn groupe pretre ki ti pou aussi bann le roi.—1 Pierre 2:9.
8. Ki travail enn pretre ti faire?
8 Bien sur, enn le roi so travail c’est pou gouverné. Mais, enn pretre ki travail li faire? Hébreux 5:1 expliké: “Parski chaque grand pretre ki finn choisir parmi bann zom finn etabli en faveur bann zom lor bann kitsoz ki concerne Bondié, pou ki li kapav offert bann don ek bann sacrifice pou bann peché.” Alors, enn pretre ki Jéhovah ti etabli ti agir couma enn representant pou bann dimoune ki ti faire peché, devant Jéhovah. Li ti demann Jéhovah pou pardonne zot peché kan li ti offert bann sacrifice en zot faveur. Enn pretre ti agir aussi couma enn representant Jéhovah devant bann dimoune kan li ti enseigne zot la loi Bondié. (Lév. 10:8-11; Mal. 2:7) Dan sa bann fason-la, enn pretre ti travail pou reconcilié bann dimoune ar Bondié.
9. (a) Ki bann Israélite ti bizin faire pou produire “enn royaume bann pretre”? (b) Kifer Jéhovah ti etabli bann pretre dan nation Israël? (c) Kifer nation Israël pa ti kapav produire enn “royaume bann pretre” enba l’alliance la Loi?
9 Alors, l’alliance la Loi ti offert bann Israélite possibilité pou produire enn royaume bann pretre ki ti pou faire “tou bann lezot peuple” gagne bann bienfait. Mais selman, zot ti bizin faire enn kitsoz pou gagne sa grand privilege-la. Bondié ti dire: “Si zot obeir tou seki mo dire zot, ek [si] zot garde mo l’alliance.” Eski bann Israélite ti pou kapav obeir ‘tou seki Jéhovah ti dire zot’? Oui, mais pa dan enn fason parfait. (Rom. 3:19, 20) C’est pou sa raison-la ki Jéhovah ti’nn etabli pou enn certain temps, bann pretre dan nation Israël. Mais, sa bann pretre-la pa ti bann le roi. Zot ti offert bann sacrifice zanimo pou peché bann Israélite. (Lév. 4:1–6:7) Parmi ti ena peché bann pretre aussi. (Héb. 5:1-3; 8:3) Mem si Jéhovah ti accepté sa bann sacrifice-la, zot pa ti kapav tire completement peché bann Israélite. Bann pretre ki ti servi enba l’alliance la Loi pa ti kapav reconcilié net bann Israélite ki ti sincere avek Bondié. L’apotre Paul ti dire: “Li impossible ki di-sang taureau ek bouc tire bann peché.” (Héb. 10:1-4) Parski bann Israélite ti desobeir la Loi, zot ti vinn enba enn malediction. (Gal. 3:10) Dan sa condition-la, li ti pou difficile pou zot vinn enn “royaume bann pretre” pou servi bann dimoune.
10. Kifer Jéhovah ti donne l’alliance la Loi?
10 Alors, eski sa promesse ki Jéhovah ti faire concernant “enn royaume bann pretre[-la]” ti fausse? Non. Si zot ti faire tou seki zot ti kapav pou obeir Jéhovah, zot ti pou gagne sa privilege-la—mais pa enba la Loi. Kifer pa enba la Loi? (Lire Galates 3:19-25.) Parski, l’objectif la Loi c’est pou protege bann Israélite fidele pou ki zot pa tombe dan fausse l’adoration. La Loi ti pou aide zot aussi pou prend conscience ki zot faire peché ek ki zot bizin enn pli grand sacrifice ki seki grand pretre ti kapav offert. Li ti enn tuteur ki ti pou amenn zot vers Christ, ou Messie, ki vedir “Oint.” Selman, kan le Messie ti pou arrivé, li ti pou etablir nouveau l’alliance ki Jérémie ti predire. Bann ki ti accepté le Messie, ti pou faire partie dan sa nouveau l’alliance-la ek zot ti pou vinn “enn royaume bann pretre.” Anou guetté couma sa ti arrivé.
NOUVEAU L’ALLIANCE PRODUIRE ENN ROYAUME BANN PRETRE
11. Couma Jésus ti pose enn base pou ki enn groupe dimoune vinn bann pretre ek bann le roi ensam avek li?
11 En l’an 29 nou lepok, Jésus ki ti sorti Nazareth, ti vinn le Messie. Li ti ena environ 30 an kan li ti prend so bapteme ek sa ti montré ki li ti disposé pou faire travail special ki Jéhovah ti ena pou li. Pendant so bapteme, Jéhovah ti dire: “Li-mem mo Garson ki mo bien content,” ek Jéhovah ti oint li, pa avek de l’huile, mais avek l’esprit saint. (Mat. 3:13-17; Actes 10:38) Kan Jéhovah ti oint Jésus, Li ti etabli li couma Grand Pretre pou tou dimoune ki ti pou ena la foi en li, ek couma zot le Roi dan l’avenir. (Héb. 1:8, 9; 5:5, 6) Jésus ti pose enn base pou ki dan l’avenir enn groupe dimoune kapav vinn bann pretre ek bann le roi ensam avek li.
12. Ki ti vinn possible grace a sacrifice Jésus?
12 En tant ki Grand Pretre, ki sacrifice Jésus ti kapav offert pou pardonne net peché bann dimoune? Jour ki li ti etabli Mémorial, Jésus ti dire ki li ti pou offert so prop la vie ki parfait en sacrifice. (Lire Hébreux 9:11, 12.) A partir so bapteme, en l’an 29 nou lepok, Jésus en tant ki Grand Pretre ti accepté pou passe par bann l’epreuve ek laisse-li formé, ziska so la mort. (Héb. 4:15; 5:7-10) Apré so resurrection, li ti monte dan le ciel ek li ti presente valeur so sacrifice devant Jéhovah. (Héb. 9:24) Apré sa, Jésus ti kapav plaide ar Jéhovah en faveur bann ki ena la foi dan so sacrifice ek aide zot pou servi Jéhovah avek l’esperance pou gagne la vie eternel. (Héb. 7:25) So sacrifice ti permette aussi ki nouveau l’alliance vinn possible.—Héb. 8:6; 9:15.
13. Ki l’esperance bann ki ti forme partie dan nouveau l’alliance ti ena?
13 Bann ki ti gagne privilege pou forme partie dan nouveau l’alliance, zot aussi zot ti bizin oint avek l’esprit saint. (2 Cor. 1:21) Parmi ti ena bann Juif ki ti fidele ek bann non-juif. (Éph. 3:5, 6) Ki l’esperance bann ki ti forme partie dan sa nouveau l’alliance-la ti ena? Zot ti pou gagne enn vrai pardon pou zot peché. Jéhovah ti faire sa promesse-la: “Mo pou pardonne zot erreur ek mo pou nepli rappel zot peché.” (Jér. 31:34) Kan Bondié ti pou pardonne zot peché, zot ti pou kapav vinn “enn royaume bann pretre.” Dan enn lettre ki Pierre ti ecrire bann chretien oint, li ti dire: “Zot, zot ‘enn race ki Bondié finn choisir, enn groupe pretre ki pou vinn le roi, enn nation saint, enn peuple ki pou vinn enn di-bien special, pou ki zot annonce bann grand qualité’ sa kikenn ki finn appel zot pou tire zot dan noirté-la ek finn faire zot vinn dan so la lumiere extraordinaire.” (1 Pierre 2:9) Ici, Pierre pé cite bann parole ki Jéhovah ti dire nation Israël kan Li ti donne zot la Loi ek Pierre pé applik sa bann parole-la ar bann chretien ki ti forme partie dan nouveau l’alliance.—Ex. 19:5, 6.
ENN ROYAUME BANN PRETRE KI POU FAIRE TOU DIMOUNE GAGNE BANN BIENFAIT
14. Kot-sa bann ki forme partie dan royaume bann pretre, servi?
14 Kot-sa bann ki forme partie dan nouveau l’alliance, servi? Lor la terre kot en tant ki enn groupe, zot servi couma bann pretre. Zot represente Jéhovah devant bann dimoune kan zot ‘annonce so bann grand qualité’ ek kan zot donne nourriture spirituel. (Mat. 24:45; 1 Pierre 2:4, 5) Apré zot la mort ek zot resurrection, zot pou servi avek Christ dan le ciel en tant ki le roi ek pretre toulé-deux. Ek zot pou kapav rempli bien toulé-deux fonction. (Luc 22:29; 1 Pierre 1:3-5; Rév. 1:6) Pou confirme sa, dan enn vision, l’apotre Jean ti trouve enn groupe creature spirituel pré ar trone Jéhovah dan le ciel. Dan “enn nouveau chanté” ki zot ti pé chante ar “l’Agneau,” zot ti dire: “Ek avek to di-sang, to finn acheté bann dimoune dan tou tribu, ek langue ek peuple ek nation pou Bondié, ek to finn faire zot vinn enn royaume ek bann pretre pou nou Bondié, ek zot pou regne couma bann le roi ki dirige la terre.” (Rév. 5:8-10) Dan enn lot vision ki li ti gagné plitar, Jean ti dire concernant sa bann le roi-la: “Zot pou vinn pretre Bondié ek Christ, ek zot pou regne couma bann le roi avek li pendant mille an.” (Rév. 20:6) Ensam avek Christ, zot pou vinn enn royaume bann pretre ek zot pou faire bann dimoune gagne bann bienfait.
15, 16. Ki bann bienfait sa groupe pretre ki pou vinn le roi-la pou faire bann dimoune gagné?
15 Ki bann bienfait bann 144,000 pou faire bann dimoune ki lor la terre gagné? Livre Révélation chapitre 21 decrire zot couma enn la ville ki trouve dan le ciel, Nouvelle Jérusalem, ki appel “femme l’Agneau.” (Rév. 21:9) Verset 2-4 dire: “Mo ti trouve aussi la ville saint, Nouvelle Jérusalem, ki ti pé sorti dan le ciel kot Bondié ek ti pé desann, ek ki’nn preparé couma enn la marié ki’nn faire-li joli pou so mari. Avek sa mo finn tann enn la voix fort ki sorti kot trone dire: ‘Guetté! La tente Bondié avek bann dimoune, ek Li pou reste avek zot, ek zot pou vinn so peuple. Ek Bondié Li-mem pou avek zot. Li pou souye tou larme dan zot lizié, ek la mort nepli pou existé. Dimoune nepli pou en deuil, zot nepli pou ploré ek nepli pou ena douleur. Bann kitsoz avant finn disparette.’” C’est vrai-mem bann benediction extraordinaire, pa vrai? Bann dimoune pou nepli en deuil, zot nepli pou ploré ek nepli pou ena douleur, parski la mort pou nepli existé. Lerla, tigit par tigit bann dimoune pou vinn parfait ek pou reconcilié net avek Bondié.
16 Dan Révélation 22:1, 2 nou trouve lezot benediction ki sa bann pretre ki pou vinn le roi-la pou faire bann dimoune gagné. Li dire: “Li’nn montré moi enn la riviere de l’eau la vie ki clair couma cristal, ek ki sorti dan trone Bondié ek l’Agneau, ki coulé au millieu grand la rue [Nouvelle Jérusalem]. Ek lor enn coté sa la riviere-la ek lor lot coté ti ena bann pié la vie ki ti produire douze recolte fruit, ki ti donne zot fruit chaque mois. Bann feuille lor sa bann pié-la, ti pou guerison bann nation.” Avek sa bann disposition symbolik-la, “bann nation,” setadir bann dimoune different l’origine pou gagne enn guerison complet. Zot pou liberé ar l’imperfection ki zot inn herité ar Adam. Vrai-mem, ‘bann kitsoz ancien pou’nn disparette.’
ROYAUME BANN PRETRE FINI ZOT TRAVAIL
17. Finalement, ki sa royaume bann pretre-la pou accompli?
17 A la fin 1,000 an, sa royaume bann pretre-la pou fini faire bann dimoune vinn parfait. Lerla en tant ki Grand Pretre ek le Roi, Christ pou presente Jéhovah enn famille humain parfait. (Lire 1 Corinthiens 15:22-26.) Sa royaume bann pretre-la pou’nn accompli net so l’objectif.
18. Apré ki zot pou fini faire zot travail, couma Jéhovah pou servi bann associé Christ?
18 Apré sa, couma Jéhovah pou servi sa bann associé Christ-la? Dapré Révélation 22:5, “zot pou regné pou touletan.” Lor kisannla? La Bible pa dire nou. Mais, zot pou ena enn la vie immortel ek enn lekor ki pa kapav pourri. Zot pou’nn gagne aussi l’experience apré ki zot inn aide bann dimoune imparfait. Tousala pou permette Jéhovah contigne servi zot couma bann le roi pou touletan.
19. Ki nou pou rappel kan nou pou assisté Mémorial?
19 Kan nou pou rassemblé pou celebré Mémorial la mort Jésus, jeudi 5 avril 2012, sa bann pensée biblik-la pou dan nou l’esprit. Sa ti groupe chretien oint ki encore lor la terre-la, pou prend di-pain sans levain ek pou boire di-vin rouge, ek sa pou montré ki zot forme partie dan nouveau l’alliance. Sa bann l’embleme-la pou rappel zot bann grand privilege ek bann grand responsabilité ki zot ena dan projet eternel Bondié. Nou bien apprecié disposition ki Jéhovah inn prend concernant enn royaume bann pretre ki pou faire bann dimoune gagne bann bienfait. Anou montré nou reconnaissance pou sa disposition-la kan nou assisté Mémorial.
[Zimage page 31]
Royaume bann pretre pou faire bann dimoune gagne bann bienfait pou touletan