Kan la guerre Har-Maguédôn pou arrivé?

“Mo finn trouvé, ek, guetté! enn grand la foule, ki personne pa ti kapav compté, ki sorti dan tou nation, ek tribu, ek peuple ek langue . . . [ek] ki sorti dan la grande tribulation.”​—RÉVÉLATION 7:9, 14.

INN fini prepare terrain pou la guerre Har-Maguédôn. Couma sa?

Ena deja enn l’organisation ki trouve dan le monde entier kot beaucoup dimoune pé servi Jéhovah ek pé vive en accord avek bann principe biblik ki ena enn niveau bien haute. Avek l’aide Bondié, sa bann million dimoune-la, ki sorti dan tou nation, tribu, ek langue, pé rassemblé pou forme enn grand famille bann frere ek soeur kot ena l’amour ek l’unité. Oui, sa l’amour-la existé parmi bann Témoins de Jéhovah.​—Jean 13:35.

Bientot, Satan pou rassemblé so bann l’armée ek pou lance so pli grand l’attak lor sa bann dimoune ki pé vive en paix-la ek ki parette sans okenn defense. (Ézékiel 38:8-12; Révélation 16:13, 14, 16) Couma ou kapav sur ki sa pou arrivé? La Bible decrire bann l’evenement bien precis ki aide nou pou koné kan la guerre Har-Maguédôn pou arrivé. Beaucoup parmi bann l’evenement ki la Bible annoncé pé realisé zordi.

Bann l’evenement ki ou trouvé pé realisé

Bann disciple Jésus ti demann li couma bann dimoune pou koné kan “conclusion sa systeme-la” pou commencé. (Matthieu 24:3) Kan Jésus ti reponn zot, li ti attire l’attention lor enn lepok kot “nation pou leve kont nation ek royaume kont royaume, pa pou ena assez mangé ek pou ena bann tremblement de terre dan enn l’endroit apré lot.” Apré sa li ti dire: “Tou sa bann kitsoz-la zot enn commencement bann douleur.” (Matthieu 24:7, 8) L’apotre Paul ti decrire sa mem periode-la couma “bann dernier jour.” Li ti dire ki sa “bann dernier jour[-la]” pou “bann lepok critik ki difficile pou supporté.” (2 Timothée 3:1) Kan ou guette seki pé arrivé zordi, eski ou pa trouvé ki sa bann prophetie-la pé realisé?

Kifer sa periode-la pou difficile coumsa? L’apotre Jean ti donne enn raison. Li ti annoncé ki Satan ek so bann demon pou ena “zis enn tigit le temps-mem” pou concentré zot l’activité lor la terre. Dapré la Bible, pendant sa periode-la, Satan dan “enn grand colere.” (Révélation 12:7-12) Eski ou pa trouvé ki zordi beaucoup dimoune ena tendance pou mette-zot en colere ek pou vinn violent, pa zis dan enn pays, mais dan le monde entier?

Jésus ti dire aussi ki pendant sa periode bien difficile-la, pou ena enn travail extraordinaire ki pou faire. Li ti dire: “Sa bon nouvelle lor royaume [Bondié-la] pou preché partout kot dimoune resté lor la terre couma enn temoignage pou tou bann nation; ek lerla la fin pou vini.” (Matthieu 24:14) Zordi, dan plus ki 235 pays, bann Témoins de Jéhovah pé preche la bonne nouvelle lor Royaume Bondié dan plus ki 500 langue. Ena deux magazine ki zot imprimé ek ki basé lor la Bible: La Tour de Garde ek Réveillez-vous ! Sa bann magazine-la zot plus distribué ki tou lezot magazine dan le monde entier. Bann Témoins de Jéhovah finn aussi traduire la Bible dan apepré 100 langue. Travail ki zot pé faire, li accompli par bann volontaire ek li soutenir par bann donation volontaire. Eski li possible ki sa grand travail predication-la pé realise prophetie Jésus?

La Bible ti annonce aussi bann l’evenement ki pou amenn directement ziska la guerre ki pou ena entre Jéhovah ek bann ki opposé ar Li. Anou examine trois parmi bann prophetie ki ou pou trouve realisé bientot.

Bann l’evenement ki ou pou trouvé bientot

Prophetie 1. La Bible dire ki bann chef sa le monde-la pou faire enn declaration ki ena enn grand l’importance lor “la paix ek securité.” Kitfois zot pou pensé ki zot pré pou reglé bann pli grand probleme ki le monde pé faire face. Mais selman, bann l’evenement ki pou ena zis apré sa declaration-la pou montré ki en realité pena la paix.​—1 Thessaloniciens 5:1-3.

Prophetie 2. Apré sa, plusieurs gouvernement pou attak bann religion ki ena partout lor la terre. Dan la Bible, sa bann gouvernement-la zot representé par enn bete sauvage; ek bann fausse religion zot representé par enn madame ki pé monte sa bete sauvage-la. (Révélation 17:3, 15-18) Kan sa bete sauvage symbolik-la pou detruire bann fausse religion ki pretann zot represente Bondié, sans ki li rann-li compte, li pou faire seki Bondié envie li faire.

Dan enn fason symbolik, l’apotre Jean decrire sa scene-la coumsa: “Sa dix corne ki to finn trouvé-la, ek la bete sauvage, zot pou detesté sa prostitué-la, ek zot pou prend tou seki li ena ek zot pou mette li touni; zot pou mange so la chair ek zot pou brule li dan difé ziska ki li fini net. Parski Bondié inn mette dan zot leker pou realise so pensée.”​—Révélation 17:16, 17.

Prophetie 3. Apré ki sa bann gouvernement-la pou gagne la victoire lor fausse religion, Satan pou rassemblé bann systeme politik ek militaire ek pou faire zot la guerre kont bann ki adore Jéhovah.​—Révélation 7:14; Matthieu 24:21.

Couma sa pou affecté ou?

Si ou pa finn gagne l’occasion etudié la Bible en profondeur, kitfois ou trouve sa difficile pou croire ki sa bann l’evenement-la pou vrai-mem arrivé. Mais nou ena bann bon raison pou croire ki chaque detail sa bann prophetie-la pou realisé ek ki sa bann l’evenement-la pou arrivé bientot. Beaucoup prophetie ki ena dan la Bible inn fini realisé, alors sa donne nou l’assurance ki sa bann lezot prophetie-la aussi pou realisé.a

Kifer ou pa reserve inpé le temps pou guetté kifer bann Témoins de Jéhovah zot sur ki “la guerre grand jour Bondié Tout-Puissant” bien pré, ek kifer fodé pa ou peur sa la guerre-la? Demann zot, dapré la Bible ki ou bizin faire pou ou trouve-ou parmi bann ki Jéhovah pou protegé. (Révélation 16:14) Seki ou pou aprann kitfois pou change fason ki ou trouve l’avenir.

[Note]

[L’encadré page 8]

Eski travail ki bann Témoins de Jéhovah pé faire, pé realise enn prophetie biblik?