Kifer Bondié ena enn l’organisation?

Sa lartik-la examine bann question ki kitfois ou finn demann-ou-mem ek li montré kot-sa ou kapav trouve bann reponse dan la Bible. Bann Témoins de Jéhovah pou bien content pou examine sa bann reponse-la avek ou.

1. Kifer Bondié ti organise nation Israël?

Bondié ti organise bann descendant Abraham couma enn nation ek Li ti donne zot bann la loi. Li ti appel sa nation-la Israël ek Li ti donne zot responsabilité pou protege vrai l’adoration ek so Parole, bann l’Ecriture Sacré. (Psaume 147:19, 20) Coumsa, bann dimoune dan tou nation inn gagne bann bienfait.​—Lire Genèse 22:18.

Bondié ti choisir bann Israélite pou vinn so bann temoin. Tant ki zot ti obeir la loi Bondié, zot ti gagne bann bienfait. (Deutéronome 4:6) Kan nou etudié l’histoire bann Israélite, nou kapav aprann plus lor vrai Bondié.​—Lire Isaïe 43:10, 12.

2. Kifer bann vrai chretien organisé?

Avek le temps, nation Israël ti perdi faveur Bondié ek Jéhovah ti remplace sa nation-la par congregation chretien. (Matthieu 21:43; 23:37, 38) Avant sa, bann Israélite ti bann temoin Bondié. Asterla, c’est bann vrai chretien ki bann temoin Jéhovah.​—Lire Actes 15:14, 17.

Jésus ti organise so bann disciple pou rann temoignage lor Jéhovah ek pou faire bann disciple dan tou bann nation. (Matthieu 10:7, 11; 24:14; 28:19, 20) Sa travail-la inn arrive so point pli important. Zordi, Jéhovah finn rassemblé bann million dimoune dan tou bann nation pou servi Li dan vrai l’adoration. (Révélation 7:9, 10) Jésus inn organise aussi bann vrai chretien pou ki zot kapav encourage ek aide sakenn so camarade. Partout lor la terre, zot ena mem programme l’enseignement la Bible dan zot bann reunion.​—Lire Hébreux 10:24, 25.

3. Couma l’activité bann Témoins de Jéhovah ti commencé dan nou lepok?

L’organisation moderne bann Témoins de Jéhovah ti commencé dan bann l’année 1870. Enn ti groupe etudiant la Bible ti commence ré-decouvert bann verité ki ena dan la Bible, ki bann dimoune ti’nn blié depuis longtemps. Zot ti koné ki Jésus ti organise congregation chretien pou al preché. Alors zot ti commence enn campagne predication international. En 1931, zot ti adopté nom Témoins de Jéhovah.​—Lire Actes 1:8; 2:1, 4; 5:42.

4. Couma bann Témoins de Jéhovah organisé zordi?

Dan premier siecle, bann congregation chretien dan beaucoup l’endroit ti gagne bann bienfait grace a enn college central, ki ti reconette Jésus couma Chef congregation. (Actes 16:4, 5) Zordi aussi pareil, bann Témoins de Jéhovah reconette Jésus couma zot Guide. (Matthieu 23:9, 10) Zot gagne bann bienfait ar direction ki College central donne zot. Dan sa College central-la ena bann ancien ki ena l’experience. Zot dirige ek zot donne l’encouragement ki basé lor la Bible, plus ki 100,000 congregation. Dan chaque congregation, ena bann zom qualifié ki servi couma ancien, ou-soit surveillant. Sa bann zom-la prend soin avek amour troupeau Bondié.​—Lire 1 Pierre 5:2, 3.

Bann Témoins de Jéhovah organisé pou preche la bonne nouvelle ek faire bann disciple. Pou zot kapav aide bann dimoune partout lor la terre, zot traduire, zot imprime, ek zot distribué bann publication pou etudié la Bible dan plus ki 500 langue. Pareil couma bann zapotre, zot preché de porte en porte. (Actes 20:20) Zot offert pou etudié la Bible avek chaque dimoune ki sincere ek ki content la verité. Parski bann serviteur Jéhovah faire tou pou faire Bondié plaisir ek pou aide lezot, zot forme enn l’organisation kot ena bann dimoune ki heureux.​—Lire Psaume 33:12; Actes 20:35.

Pou gagne plus renseignement, guette chapitre 19 dan livre Ki la Bible enseigné vrai-mem?, publié par bann Témoins de Jéhovah.