“Enfin mo finn trouve vrai liberté”

MO PASSÉ:

Mo’nn né dan Moundsville, enn la ville trankil pré ar la Riviere Ohio dan nord Virginie-Occidentale. Mo ti deuxieme dan enn famille quatre zenfant, nou ti a trois garson, alors jamais la vie ti monotone kot nou. Mo bann parent ti travail dur, zot ti bann dimoune honnete ki ti content zot prochain. Nou pa ti riche, mais touletan nou ti ena seki nou bizin. En tant ki Témoins de Jéhovah, mo bann parent ti faire tou seki zot kapav pou faire bann principe la Bible rente dan nou leker kan nou ti tipti.

Mais selman, dan mo l’adolescence mo leker ti’nn fini commence detourne-li ar seki mo ti aprann. Mo ti pé demann-mo-mem si enn la vie ki basé lor bann principe Biblik ti pou kapav ena enn sens ou-soit donne moi satisfaction. Pou moi enn la vie heureux ti egal enn liberté total. Bien vite, mo finn arrete assisté bann reunion. Mo grand frere ek mo ti soeur aussi ti prend mem mauvais chemin ki moi. Nou bann parent ti faire tou seki zot kapav pou aide nou, mais nou ti refuse zot l’aide.

Mo pa ti pensé ki sa soi-disant liberté ki mo ti pé rodé-la ti pou faire moi vinn enn esclave. Enn jour apré lekol, alors ki mo ti pé retourne lakaz, enn camarade ti propose moi enn cigarette ki mo ti accepté. A partir sa jour-la, mo finn commence goute beaucoup lezot mauvais pratik. Avek le temps, mo’nn commence drogué, boire beaucoup la boisson fort, ek amenn enn la vie immoral. Dan bann l’année apré, tigit-tigit mo’nn commence prend bann la drogue pli fort ek mo’nn vinn enn esclave plusieurs sa bann la drogue-la. Pli allé mo ti vinn esclave sa bann pratik-la, alors mo’nn commence vann la drogue pou ki mo kapav contigne amenn sa qualité la vie-la.

Mem si mo ti faire bann grand zeffort pou prend compte mo conscience, regulierement li ti rappel moi ki fason ki mo ti pé vive pa ti bon. Mais moi, mo ti pensé ki ti’nn trop tard ek pa kapav retourne en arriere. Malgré ki mo ti entouré ar bann dimoune dan bann fête ek bann concert, souvent mo ti senti-moi tousel ek deprimé. Parfois, mo ti pensé couma mo bann parent ti bann dimoune respectable ek bon, ek mo ti demann-moi couma mo’nn eloigne-moi sa quantité-la ar la verité.

COUMA LA BIBLE TI CHANGE MO LA VIE:

Mem si mo ti baisse lé-bras, lezot pa ti faire sa. En l’an 2000, mo bann parent ti invite moi pou assisté enn l’assemblée district bann Témoins de Jéhovah. Mo’nn allé ki a faire. Mo ti etonné pou trouvé ki mo frere ek mo soeur, ki zot aussi ti quitte la verité, ti vinn sa l’assemblée-la.

Dan l’assemblée, mo’nn rappel ki apepré enn an avant mo ti vinn dan sa mem place-la pou assisté enn concert rock. Bann difference ki ti ena entre sa deux l’evenement-la ti bien touche moi. Dan sa concert-la, ti ena saleté partout ek place-la ti rempli ar la fumé cigarette. La plupart bann dimoune ki ti assisté sa concert-la pa ti amical, ek message ki ti ena dan la musik-la pa ti encourageant. Mais dan l’assemblée, mo ti entouré avek bann dimoune ki ti vrai-mem heureux​—bann dimoune ti bien accueillir moi, mem si sa ti faire plusieurs l’année ki mo pa ti’nn trouve zot. Place-la ti prop, ek ti pé koz lor enn l’avenir positif. Kan mo’nn trouve l’effet positif ki la verité Biblik ena, mo’nn demann-moi kifer mo ti rejette li!​—Isaïe 48:17, 18.

Desuite apré l’assemblée, mo’nn decide pou retourne dan la verité. Mo frere ek mo soeur aussi ti touché par seki zot ti trouvé dan l’assemblée, alors zot aussi zot ti decide pou retourné. Nou toulé-trois ti accepté enn l’etude la Bible.

Enn verset la Bible ki’nn surtout encourage moi ti Jacques 4:8, ki dire: “Vinn proche ar Bondié, ek Li pou vinn proche ar zot.” Mo ti rann moi compte ki si mo ti envie vinn proche ar Bondié, mo ti bizin faire bann changement dan mo la vie. Parmi bann changement ki mo ti bizin faire, mo ti bizin arrete fumé, arrete prend la drogue, ek arrete boire trop beaucoup la boisson fort.​—2 Corinthiens 7:1.

Mo’nn coupe contact avek mo bann ancien camarade ek mo’nn faire camarade ar bann adorateur Jéhovah. Frere ki ti etudié la Bible avek moi ti bien aide moi. Souvent li ti telephoné ek ti passe guette moi pou prend mo nouvelle. Ziska zordi, li enn parmi mo bann pli bon camarade.

En 2001, mo’nn prend bapteme pou montré ki mo finn voué mo la vie ar Bondié, mo frere ek mo soeur aussi ti faire pareil. Maziné ki quantité mo bann parent ek mo jeune frere, ki ti fidele, ti dan la joie kan nou tou ensam ti reuni pou adore Jéhovah.

KI BENEDICTION MO FINN GAGNÉ:

Avant mo ti croire ki bann principe Biblik ti trop strict, mais asterla mo considere zot couma enn grand protection. La Bible inn donne moi la force pou arrete prend la drogue ek vann la drogue, ek inn faire moi vinn enn pli bon dimoune.

Mo ena privilege pou forme partie dan la famille international bann adorateur Jéhovah. Sa bann dimoune-la vrai-mem content sakenn zot camarade, ek zot servi Bondié dan l’unité. (Jean 13:34, 35) En plus sa famille-la mo’nn gagne enn benediction special​—mo madame Adrianne, ki mo bien content ek ki compte beaucoup pou moi. Sa rann nou heureux pou servi nou Createur ensam.

Au lieu ki mo amenn enn la vie egoïste, asterla volontairement mo pé servi Bondié a plein temps, mo enseigne bann dimoune couma zot aussi zot kapav gagne bann bienfait avek Parole Bondié. Sa travail-la inn donne moi pli grand la joie ki mo’nn kapav gagné. Avek enn grand l’assurance mo kapav dire ki la Bible finn change mo la vie. Enfin mo finn trouve vrai liberté!