La Bible change bann dimoune

Kifer enn madame ki ti’nn nepli ena confiance dan religion asterla passe beaucoup le temps pou aide lezot pou aprann konn Bondié? Ki ti pousse enn missié ki ti content bann sport violent pou vinn enn kikenn ki content la paix? Couma enn missié ki ti pé prend la drogue, ki ti pé boire, ek ki ti pé participe dan bann combat lor la rue, inn reussi change so fason vive? Anou guette seki zot ena pou dire.

BANN L’INFORMATION PERSONNEL

NOM: PENELOPE TOPLICESCU

AGE: 40

PAYS KOT LI’NN NÉ: AUSTRALIE

SO ZISTOIRE: DECOURAGÉ AVEK LA RELIGION

MO PASSÉ: Mo ti né dan Sydney, en Australie, mais kan mo ti ena deux an, mo famille ti al reste dan Nouvelle Guinée. Nou ti reste environ deux an dan Rabaul ek apré sa huit an lor l’île Bougainville. Sa lepok-la pa ti ena television dan Nouvelle Guinée, alors mo frere ek moi, nou ti passe tou nou l’enfance pou joué dehors—nou ti al nagé, faire bann plongé, ek al campé.

Kan mo ti ena dix an, mo ti commence interessé avek la religion. Mo mama ti enn catholique, alors li ti encourage moi pou suive enn cours la Bible avek enn bann religieuse ki ti reste dan nou l’endroit. Mo ti accepté pou vinn catholique ek mo ti prend mo bapteme l’age 10 an.

Mais, kan nou ti retourne l’Australie, pendant mo l’adolescence, mo ti commence ena doute lor mo bann croyance religieux. Kan mo ti dan college, mo ti etudié l’Histoire, ek mo papa avek moi ti gagne bann longue conversation concernant l’origine la religion, ek lor bann zistoire ki ena dan la Bible ki nou ti considere couma bann zistoire ki’nn inventé. Finalement, mo ti rejette religion catholique.

Kan mo ti ena 16 an, mo bann parent ti separé. Mo mama ti pé passe par enn moment difficile, ek finalement mo ti al vive avek mo papa ek so fiancé. Mo frere ti reste avek mo mama, ek zot ti al vive dan enn lot region dan l’Australie. Sa lepok-la mo ti senti-moi bien tousel. Sa ti prend deux an avant ki mo retabli bann relation amical avek mo mama. Mo ti commence boire, prend la drogue, ek al dan bann fête. Mo ti quitte lekol, mo ti gagne enn travail ek mo ti gaspille mo jeunesse kan mo ti amenn enn la vie immoral.

Kan mo ti gagne 25 an, mo ti recommence pense lor la Bible. Mo ti commence enn nouveau travail ek mo ti joinde Liene, enn tifi ki ti ena bann bon maniere, li ti touletan gentil envers so patron, mem si li, li ti bien dure envers Liene. Kan mo ti demann li kifer li pa ti reponn so patron, li ti explik moi ki li ti pé etudié la Bible avek bann Témoins de Jéhovah ek li ti pé essaye applik bann principe la Bible dan so la vie. Liene ti propose moi pou etudié la Bible avek li. Parski mo pa ti bien comprend seki li ti dire moi, mo ti croire ki mo ti pou kapav aprann tou seki li ti koné lor la Bible dan enn heure temps. Sa soir-la Liene ti passe trois heure temps pou reponn mo bann question lor la Bible. Mo ti impressionné ki li ti appuye tou bann reponse ki li ti donne moi par bann verset la Bible.

Mo rappel ki apré mo discussion avek Liene sa soir-la, mo ti pé retourne lakaz dan l’auto ek mo ti en colere avek Bondié parski Li pa’nn laisse moi aprann la verité lor Li pli boner. Mo ti koné ki bann Témoins ti amenn enn la vie pur lor plan moral ek mo ti pensé ki li ti trop tard pou moi change mo bann l’habitude. Mo ti pensé aussi ki jamais mo ti pou kapav al preché porte en porte couma bann Témoins ti faire. Mo ti contigne etudié la Bible avek bann Témoins, mais avek l’objectif pou trouve bann erreur dan zot bann l’enseignement, coumsa avek enn conscience clair mo ti pou kapav coupe contact avek zot. Mais, enn jour mo ti realisé ki mo pa ti pou trouve kit erreur dan zot l’enseignement.

COUMA LA BIBLE TI CHANGE MO LA VIE: A mesure ki mo ti pé aprann plus lor bann principe moral ki ena dan la Bible, mo conscience ti pé fatigue moi. Pou soulage mo conscience, mo ti arrete prend la drogue. Mais apré mo ti al enn lot pays pendant enn moment ek mo ti recommence al dan bann fête ek boire. Li ti parette ki a chaque fois ki mo ti essaye faire bann progré pou vive en accord avek bann principe Bondié, mo ti recommence mo ancien fason vive. Avek la honte, mo ti prié Jéhovah, mais malgré sa, sa ti contigne fatigue moi.

Kan mo ti aprann lor fason ki le roi David ti agir avek Bath-Shéba ek couma Jéhovah ti montré misericorde envers zot, sa ti aide moi. David ti ena assez courage pou reconette so faute kan li ti gagne conseil, sans ki li rod trouve excuse pou so bann action. Ek avek humilité li ti accepté discipline ki li ti gagné. (2 Samuel 12:1-13) Chaque fois ki mo ti faire erreur mo ti pense lor sa recit-la ek li ti pli facile pou dire Jéhovah ki mo ti regretté. Apré sa mo ti decide pou prié avant ki mo laisse-moi tenté au lieu apré, ek sa ti faire enn grand difference.

KI BENEDICTION MO FINN GAGNÉ: Mo ti toujours ena enn mauvais caractere. Mais bann pensé ki trouve dan Éphésiens 4:29-31 ti aide moi pou trouve l’importance pou evite “vinn amer envers lezot, arrete faire la rage, [ek] en colere.” A mesure ki mo ti aprann pou controle mo mauvais caractere, mo ti aprann pou controle mo la langue. En plus, conseil Jésus ki dire “ki zot Oui vedir Oui” ti aide moi pou vinn enn dimoune ki pli determiné.—Matthieu 5:37.

Mo mama ki au commencement pa ti daccord ki mo frequente bann Témoins, plitar ti dire moi ki li ti fiere pou moi. Li ti mem dire: “Mo koné ki si to’nn vinn enn madame coumsa zordi, c’est pa a cause l’education ki to’nn gagné, mais c’est grace a seki to’nn aprann lor Jéhovah.” Sa ti faire moi bien content pou tann li dire sa.

Asterla mo senti ki mo la vie ena enn but ek enn sens. Pendant sa neuf l’année ki finn passé-la, mo mari ek moi finn enseigne la Bible a plein temps. Oui, mo al preché de porte en porte, ek asterla mo pensé ki dan tou travail ki mo’nn faire c’est sa travail-la ki donne moi plus satisfaction.

BANN L’INFORMATION PERSONNEL

NOM: DENIS BOUSSIGUINE

AGE: 30

PAYS KOT LI’NN NÉ: RUSSIE

SO ZISTOIRE: LI TI CONTENT KARATÉ

MO PASSÉ: Mo ti né dan la ville Perm ek mo ti grandi dan Fourmanov, enn la ville kot ena environ 40,000 habitant dan region Ivanovo, dan la Russie. Fourmanov c’est enn la ville kot ena beaucoup joli vue avek beaucoup joli pié ki vinn jaune ek rouge en automne. Pendant bann l’année 1980 ek 1990, crime ti augmenté dan sa la ville-la. Mo famille ti vive dan enn fason bien modeste avek enn ti la paye. Mo ti vive avek mo bann parent ek mo jeune frere dan enn appartement kot ti ena zis enn la chambre pou dormi, alors nou ti vive plutot serre-serré.

Kan mo ti ena sept an, mo ti commence faire karaté. Mo ti content sa sport-la; tou mo la vie ti tourne autour karaté. Mo ti passe tou mo bann le temps libre dan gym, alors tou mo bann camarade ti bann sportif. Kan mo ti ena 15 an mo ti gagne mo ceinture rouge dan karaté ek enn l’année plitar, mo ti gagne mo ceinture marron. Mo ti forme partie dan enn l’equipe karaté ki ti participe dan bann competition dan bann pays l’Europe ek l’Asie. Mo l’avenir ti parette assuré, mais kan mo ti ena 17 an mo la vie ti changé net.

Avek deux-trois camarade, nou ti faire enn kitsoz kont la loi ek ti arrete nou. Mo ti condamné pou deux an prison. La vie dan prison ti difficile. Mais selman, c’est kan mo ti dan prison ki pou premier fois mo ti trouve enn la bible. Mo ti lire Genèse, Psaumes, ek Nouveau Testament. Mo ti mem aprann la priere Notre Père par coeur ek chaque soir mo ti recite li avant ki mo al dormi, avek l’idée ki kan mo faire sa, sa ti pou aide moi dan kit fason.

Mo ti sorti prison en l’an 2000, mais mo pa ti koné ki mo envie faire avek mo la vie ek mo ti senti ki mo la vie pa ti ena okenn but. Mo ti commence prend la drogue. Vers sa lepok-la, mo mama ti mort. Li-mem ki ti compte plus pou moi, ek li ti difficile pou moi pou supporte so la mort. Mais, mo ti reussi arrete prend la drogue ek mo ti recommence al gym. Mo ti aussi al reste dan la ville Ivanovo. La-bas mo ti gagne enn travail dan enn la boutik. Mo responsable ti enn Témoin de Jéhovah. Sa madame-la ti explik moi certain pensé important ki ena dan la Bible ek li ti faire l’arrangement ki enn missié Témoin de Jéhovah vinn etudié la Bible regulierement avek moi.

COUMA LA BIBLE TI CHANGE MO LA VIE: Pendant mo l’etude la Bible, mo ti bien touché kan mo ti aprann lor projet ki Bondié ena pou faire la terre vinn enn paradis ek mo ti envie faire seki bizin pou profite sa l’avenir-la. Bien vite mo ti realisé ki Jéhovah ena bann principe bien haute ki li envie bann dimoune suive. Mo finn passe beaucoup le temps pou pense zis lor mo-mem. Mais mo ti aprann ki Jéhovah ti envie ki mo pense lor lezot ek ki mo developpe bann qualité ki sa lepok-la mo pa ti ena—bann qualité couma la bonté ek enn l’amour pou la paix.

Mo ti medite lor tou seki Jéhovah ti’nn faire pou moi—par exemple Li’nn donne so garson couma enn sacrifice pou libere moi ar peché—mo reconnaissance pou l’amour Bondié ti pousse moi pou faire bann changement dan mo la vie. Par exemple, mo ti aprann dan Psaume 11:5 ki Jéhovah pa content violence. Alors mo ti arrete guette bann programme dan television ki donne valeur violence ek la haine. Ek avek beaucoup difficulté, mo ti arrete faire bann sport violent. Principe ki trouve dan 1 Corinthiens 15:33 ti aide moi trouvé ki bann dimoune ki mo choisir pou frequenté ti pou ena enn grand l’influence lor moi. Parski mo ti retrouve-moi dan prison, sa montré ki sa principe-la li vrai. Alors mo ti decide pou arrete frequente bann dimoune ki zot la vie ti tourne autour bann sport violent.

KI BENEDICTION MO FINN GAGNÉ: Kan mo’nn frequente bann Témoins de Jéhovah ek mo’nn etudié la Bible sa finn aide moi pou vinn enn dimoune honnete. Par exemple, dan Hébreux 13:5, mo ti aprann l’importance pou contente moi ar seki mo ena ek lutte kont l’amour pou l’argent. Kan mo finn applik sa conseil-la sa finn aide moi pou arrete koz menti ek kokin.

Bann camarade finn toujours ena enn grand l’importance pou moi. Dan le passé, mo finn trouve bann l’amitié detruire a cause l’envie pou gagne plus ou-soit la peur. Bann Témoins de Jéhovah zot pa parfait, mais mo finn aprann ki zot respecté bann principe Bondié ek zot faire bann grand zeffort pou applik so conseil dan fason ki zot traite lezot. Azordi parmi zot, mo finn faire bann vrai camarade.

Mo pa kapav maziné couma mo la vie ti pou été si mo pa ti aprann pou vive en accord avek bann principe la Bible. Kitfois mo ti pou retourne dan prison ou-soit mo ti pou faire lezot dimoune la peine ek souffert. Mais, asterla, mo ena enn bon madame ek deux garson, ek en tant ki famille, nou trouve enn vrai la joie pou aide lezot aprann la verité lor Bondié.

BANN L’INFORMATION PERSONNEL

NOM: JOSÉ CARLOS PEREIRA DA SILVA

AGE: 31

PAYS KOT LI’NN NÉ: BRÉSIL

SO ZISTOIRE: PARTICIPE DAN BANN COMBAT LOR LA RUE

MO PASSÉ: Mo ti grandi dan bann cité bien sale ek bien pauvre dan São Paulo, dan l’Americana. Nou pa ti gagne de l’eau prop pou boire ni ti ena enn bon systeme sanitaire. Sa l’endroit-la ti ena reputation enn l’endroit kot ena violence ek rempli avek crime.

A mesure ki mo ti pé grandi mo ti vinn violent ek agressif. Mo ti toujours pé prend part dan bann combat lor la rue, alors bann dimoune dan mo l’entourage ti peur moi. Mo fason habillé, mo l’apparence, ek mo comportement envers lezot, ti donne l’impression ki mo ti dangereux. Mo ti boire beaucoup, parfois ziska ki mo ti nepli koné ki mo pé faire. Pareil couma mo bann frere, mo ti prend la drogue. En realité, enn mo bann frere ti mort a cause enn overdose.

COUMA LA BIBLE TI CHANGE MO LA VIE: Kan mo ti joinde bann Témoins de Jéhovah, zot ti montré moi dan la Bible ki Bondié pou faire la terre entier vinn enn paradis. (Luc 23:42, 43; Révélation 21:3, 4) Mo ti aprann aussi ki bann mort pa konn nanyin, alors Bondié pa puni bann mauvais dimoune dan l’enfer. (Ecclésiaste 9:5, 6) Sa ti enn grand soulagement pou moi. Seki mo ti aprann lor Bondié ti faire moi envie change mo fason vive. Mais li pa ti facile pou faire sa bann changement-la—pou arrete prend la drogue, boire, laguerre, ek servi bann mauvais langage ki mo ti habitué ena.

Mais, mo ti gagne enn grand l’encouragement kan mo ti lire bann parole ki l’apotre Paul ti ecrire dan 1 Corinthiens 6:9-11. Sa bann verset-la montré ki certain parmi bann chretien ki ti vive dan premier siecle, enn moment, ti ena certain bann mauvais l’habitude ki mo ti’nn developpé. Mais sa bann verset-la dire aussi: “C’est coumsa ki certain parmi zot ti été. Mais finn purifié zot, mais finn faire zot vinn saint, mais finn declare zot juste au nom nou Seigneur Jésus Christ ek avek l’esprit nou Bondié.” Sa bann parole-la bien encourageant-la ti donne moi l’espoir ki moi aussi mo ti pou kapav faire bann grand changement ki bizin dan mo la vie pou faire Bondié plaisir.

Kan mo ti commence frequente bann Témoins de Jéhovah, mo ti sur ki zot ti pé pratik vrai religion. Zot ti koné ki dan le passé mo ti ena enn comportement violent ek agressif, pourtant zot ti accueil moi avek enn grand l’amour.

KI BENEDICTION MO FINN GAGNÉ: Si mo pa ti etudié la Bible ek change mo fason vive, kitfois zordi mo ti pou deja mort. Au lieu-sa, mo finn ena la joie pou aide enn mo bann frere pou aprann seki ena dan la Bible ek pou nepli esclave la drogue. Ek mo finn aussi encourage lezot famille proche pou commence etudié la Bible. Mo bien reconnaissant ki mo finn kapav voué mo la vie pou servi Bondié, ki tellement interessé ar nou!

[Commentaire lor page 23]

“Mo ti decide pou prié avant ki mo laisse moi tenté au lieu apré, ek sa ti faire enn grand difference”