La Bible change bann dimoune

KI TI pousse enn rasta pou coupe so cheveux rasta ek pou surmonte so prejugé kont bann blanc? Ek ki ti permette enn jeune homme ki ti violent ek ki ti ramasse kass ar bann dimoune pou bann trafiquant la drogue, pou change so fason vive? Guetté ki sa bann dimoune-la ena pou dire.

“Mo finn surmonte mo bann prejugé.”—HAFENI NGHAMA

AGE: 34

PAYS KOT LI’NN NÉ: ZAMBIE

SO ZISTOIRE: RASTA

MO PASSÉ: Mo ti né dan enn camp refugié dan Zambie. Mo mama ti’nn quitte Namibie kan ti ena la guerre ek ti’nn rente membre dan l’Organisation du peuple du Sud-Ouest africain (SWAPO). Sa l’organisation-la ti pé lutte kont partie sud africain ki ti pé dirige Namibie sa lepok-la.

Mo ti reste dan plusieurs camp refugié pendant 15 premier l’année mo la vie. Dan bann camp SWAPO, ti prepare bann jeune pou ki zot propage sa mouvement liberation-la. Zot ti rempli nou la tête avek bann l’enseignement politik ek ti aprann nou pou ena la haine pou bann blanc.

Kan mo ti ena 11 an, mo ti envie faire mo confirmation couma enn chretien dan enn l’eglise dan sa camp-la. Sa l’eglise-la ti englobe bann catholique, bann luthérien, bann anglican ek lezot religion. Mais sa pasteur avek ki mo ti kozé-la, ti decourage moi pou faire sa. Depuis sa, mo ti nepli croire dan Bondié. Mais selman, kan mo ti ena 15 an, mo l’amour pou la musik reggae ek mo desir pou repare certain l’injustice ki bann Africain noir ti pé gagné, ti faire moi rente dan mouvement rasta. Mo ti garde cheveux rasta, mo ti fume marijuana, mo ti arrete mange la viande, ek mo ti la guerre pou liberté bann Noir. Mais selman, mo pa ti change mo fason vive ki ti immoral, ni mo ti arrete guette bann film violent. Ek mo ti contigne servi enn langage grossier.

COUMA LA BIBLE TI CHANGE MO LA VIE: En 1995, kan mo ti ena environ 20 an, mo ti commence reflechi dan enn fason serieux lor seki mo envie faire avek mo la vie. Mo ti pé etudié tou bann publication rasta ki mo ti kapav trouvé. Certain sa bann publication-la ti faire reference ar la Bible, mais bann explication-la pa ti clair pou moi. Alors, mo ti decide pou lire la Bible par mo-mem.

Plitar, enn camarade rasta ti donne moi enn livre pou etudié la Bible, publié par bann Témoins de Jéhovah. Par mo-mem mo ti etudié sa publication-la ek mo ti guette bann verset dan la Bible. Apré, mo ti joinde bann Témoins de Jéhovah ek mo ti contigne mo l’etude la Bible avek zot.

Avek beaucoup zeffort, mo ti arrete fumé ek boire beaucoup. (2 Corinthiens 7:1) Mo ti change mo l’apparence, coupe mo cheveux rasta, mo ti arrete guette bann zimage porno ek bann film violent, ek mo ti arrete servi enn langage grossier. (Éphésiens 5:3, 4) Avek le temps, mo ti mem reussi surmonte mo prejugé kont bann blanc. (Actes 10:34, 35) Pou faire sa bann changement-la, mo’nn bizin arrete ecoute bann la musik ki ti encourage bann dimoune pou vinn raciste ek mo ti arrete frequente bann ancien camarade ki ti pou essaye influence moi pou retourne dan mo ancien fason vive.

Apré ki mo ti faire sa bann changement-la, mo ti rod enn la Salle du Royaume bann Témoins de Jéhovah ek mo ti demann pou faire partie sa religion-la. Kan mo ti decide pou baptisé couma enn Témoin de Jéhovah, mo famille pa ti content. Mo mama ti dire moi choisir n’importe ki lot religion “chretien” mais pa Témoins de Jéhovah. Enn mo bann tonton, ki ti enn membre bien important dan gouvernement, ti touletan critik moi pou mo decision pou frequente bann Témoins de Jéhovah.

Mais selman, kan mo ti aprann couma Jésus ti agir avek bann dimoune ek kan mo ti applik so bann conseil, sa ti aide moi pou endure l’opposition ek bann moquerie. Kan mo ti compare seki bann Témoins ti enseigné avek seki la Bible dire, mo ti sur ki mo ti’nn trouve vrai religion. Par exemple, zot suive commandement la Bible ki dire preche avek lezot. (Matthieu 28:19, 20; Actes 15:14) Et zot pa mele-zot dan politik.—Psaume 146:3, 4; Jean 15:17, 18.

KI BENEDICTION MO FINN GAGNÉ: Kan mo’nn aprann vive en accord avek bann principe biblik sa inn aide moi dan bann fason pratik. Par exemple, parski mo’nn arrete fume marijuana, mo nepli gaspille par centaine dollar chaque mois. Mo nepli gagne bann hallucination, ek mo la santé mental ek physik inn amelioré.

Enfin, azordi mo koné ki direction mo bizin prend ek mo la vie ena enn but. Sa-mem ki mo ti pé rodé depuis ki mo jeune. Ek pli important dan tousala, asterla mo senti ki mo finn kapav vinn proche ar Bondié.—Jacques 4:8.

“Mo finn aprann controle mo colere.”—MARTINO PEDRETTI

AGE: 43

PAYS KOT LI’NN NÉ: AUSTRALIE

SO ZISTOIRE: TRAFIQUANT LA DROGUE

MO PASSÉ:Kan mo ti encore tipti, souvent mo famille ti demenagé. Mo ti reste dan bann village, enn grand la ville, ek pendant enn le temps dan enn batiment dan la brousse kot bann religieux aborigene resté. Mo ena bann bon souvenir concernant sa lepok-la avek mo bann cousin, cousine ek tonton—nou ti la peche, la chasse, faire bann boomerang, ek sculpté lezot kitsoz.

Mo papa ti enn boxer ek depuis mo ti bien jeune li ti commence aprann moi laguerre. Souvent mo ti laguerre avek bann dimoune. Dan mo l’adolescence, mo ti passe beaucoup le temps pou boire dan bann bar. Moi ek mo bann camarade ti al rod laguerre. Nou ti servi couteau ek bat base-ball pou attak enn groupe 20 dimoune ou-soit plus.

Mo ti gagne beaucoup kass kan mo ti vann la drogue ek bann kitsoz ki bann travailleur ki ti travail lor le port ti kokin. Mo ti aussi servi bann fusil ek bann pistolet pou mette pression lor bann dimoune ki ti doit bann trafiquant la drogue pou faire zot paye zot dette. Mo ti ena l’objectif pou vinn enn criminel. Mo ti dire mo-mem, soit mo touye lezot ou-soit lezot touye moi.

COUMA LA BIBLE TI CHANGE MO LA VIE: Mo ti’nn tann koz lor bann Témoins de Jéhovah kan mo ti pé grandi. Kan mo ti ena enn ti pé plus ki 20 an, mo rappel mo ti demann mo mama si li ti koné kot-sa mo kapav trouve bann Témoins. Deux jour plitar, enn Témoin ki ti appel Dixon ti tape mo la porte. Apré ki nou ti kozé pendant enn moment, li ti invite moi pou vinn enn reunion bann Témoins de Jéhovah. Mo ti al sa reunion-la ek azordi sa faire plus ki 20 an ki mo pé assisté sa bann reunion-la. Tou question ki mo ti ena, bann Témoins ti kapav reponn moi a travers la Bible.

Mo ti content pou aprann ki Jéhovah Li interessé ar bann dimoune, mem bann ki pa respecté Bondié. (2 Pierre 3:9) Mo ti decouvert ki Li enn Papa ki rempli ar l’amour ek ki Li pou prend moi soin, mem kan personne pa pou faire sa. Mo ti aussi soulagé pou aprann ki Li ti pou pardonne mo bann peché si mo ti change mo bann mauvais maniere. Bann verset la Bible ki trouve dan Éphésiens 4:22-24 ti ena enn grand l’effet lor moi. Sa passage-la ti encourage moi pou “rejette vié personnalité” ek “mette lor [moi] nouveau personnalité ki finn crée dapré volonté Bondié.”

Mo ti prend le temps pou change mo fason vive. Mo ti kapav passe enn semaine entier sans touche la drogue, mais pendant week-end, kan mo ti avek mo bann camarade, mo ti cedé. Mo ti realisé ki si mo ti envie purifié mo la vie, mo ti bizin al loin ar mo bann camarade, alors mo ti decide pou al dan enn lot region. Deux-trois camarade ti propose pou accompagne moi pendant mo voyage, ek mo ti accepté. Pendant sa voyage-la, zot ti commence fume marijuana ek zot ti propose moi inpé. Mo ti dire zot ki mo ti pé arrete sa bann l’habitude-la, ek nou chemin ti separé kan nou ti arrive kot la frontiere. Plitar mo ti aprann ki enn tigit le temps apré ki zot ti quitte moi, mo bann camarade ti attak enn la banque avek enn fusil.

KI BANN BENEDICTION MO FINN GAGNÉ: Apré ki mo ti nepli frequente sa bann camarade-la, mo ti trouve sa pli facile pou faire bann changement necessaire dan mo la vie. En 1989, mo ti vinn enn Témoin baptisé. Apré ki mo ti baptisé, mo soeur, mo mama, ek mo papa ti commence servi Jéhovah ensam avek moi.

Sa faire 17 an depuis ki mo’nn marié ek mo ena trois zenfant. Mo finn aprann controle mo colere, mem kan pé provok moi. Mo finn aprann content bann dimoune dan ‘tou tribu, race, ek langue.’ (Révélation 7:9) Mo senti ki sa bann parole Jésus-la inn realisé dan mo cas: “Si zot contigne garde mo parole, zot vrai-mem mo bann disciple, ek zot pou konn la verité, ek la verité pou libere zot.”—Jean 8:31, 32.

[L’encadré page 9]

Pou faire sa bann changement-la mo’nn bizin arrete ecoute bann la musik ki ti encourage bann dimoune pou vinn raciste

[L’encadré page 10]

Moi ek mo bann camarade ti al rod laguerre. Nou ti servi bann couteau ek bat base-ball pou attak enn groupe 20 dimoune ou-soit plus