Servi Bondié Sans Okenn Regret

1-3. (a) Ki sa vedir ena bann regret, ek couma sa kapav affecté nou? (b) Couma l’exemple Paul kapav aide nou pou servi Bondié sans okenn regret?

ENN poete ti ecrire: “Parmi tou bann parole ki nou finn dire ou-soit ecrire, bann parole ki pli triste c’est: ‘Si mo ti koné!’” Sa poete-la ti appel J.G. Whittier ek li ti pé faire reference ar bann kitsoz ki nou regretté, ki nou ti pou content ré-faire mais dan enn lot fason. “Regretté” c’est kan nou bien chagrin, nou ena la peine pou enn kitsoz ki nou finn faire ou-soit ki nou pa finn faire, ek sa kapav vedir “ré-ploré.” Nou tou nou finn faire bann kitsoz ek nou ti pou content kapav retourne en arriere pou ré-faire zot dan enn lot fason. Ki kitsoz ou regretté?

² Certain dimoune finn faire bann erreur bien grave dan zot la vie, zot finn mem commette bann peché grave. Ena lezot ki pa finn faire nanyé mauvais, mais zot demann-zot-mem si certain decision ki zot finn prend ti vrai-mem bon. Certain dimoune finn reussi arrete pense bann kitsoz ki zot inn faire dan le passé ek zot contigne vive zot la vie. Ena lezot ki pé contigne fatigue-zot ar bann decision ki zot inn prend ek zot pa arrete dire “si mo ti koné!” (Ps. 51:3) Mais ou, ki ou ressenti? Eski ou ti pou content, au moins a partir zordi, servi Bondié sans ki ou contigne fatigue-ou avek bann erreur ki ou finn faire dan le passé? Eski ena enn l’exemple ki kapav aide nou pou faire sa? Oui, nou ena l’exemple l’apotre Paul.

³ Dan so la vie, Paul ti faire bann erreur bien grave, mais li ti prend aussi bann bon decision. Li ti bien regretté pou bann erreur ki li ti faire, mais li ti aussi aprann pou reussi so la vie dan service Bondié. Anou guetté couma so l’exemple kapav aide nou pou servi Bondié sans okenn regret.

PAUL TI REGRETTE SEKI LI TI FAIRE

4. Ki qualité kitsoz Paul ti faire dan le passé?

⁴ Kan Paul ti enn jeune Pharisien, li ti faire bann kitsoz ki plitar li ti regretté. Par exemple, li ti persecute bann disciple Christ sans pitié. La Bible dire ki desuite apré ki bann Juif ti touye Étienne, “Saul [ki plitar ti appel Paul] ti commence servi violence kont la congregation. Li ti rente dan bann lakaz enn apré lot, ek li ti traine bann zom ek bann femme dehors ek li ti livré zot pou ki mette zot dan prison.” (Actes 8:3) Albert Barnes, enn bibliste, ti dire ki mot Grec ki’nn traduire par “servi violence kont” c’est “enn l’expression bien fort ki montré ki quantité [Saul] ti bien decidé pou persecute [la congregation] ek li ti faire sa avek la rage.” Barnes ti ajouté: “Alors, Saul ti attak la congregation avek violence pareil couma enn zanimo sauvage.” Saul ti enn Juif bien devoué, li ti croire ki li ti pé faire travail Bondié kan li ti pé essaye faire vrai religion chretien disparette. Li ti persecute bann chretien avek violence, li ti “pé faire enn tas menace pou touye . . . bann zom ek bann femme, toulé-deux.”​—Actes 9:1, 2; 22:4.a

5. Expliké couma Saul ti arrete persecute bann chretien pou commence preche lor Jésus Christ.

⁵ Saul ti ena l’intention pou al Damas pou tire bann chretien dan zot lakaz, pou traine zot dehors ek amenn zot Jérusalem pou ki Sanhédrin puni zot. Selman, li pa ti reussi, parski Chef congregation ti arrete li. (Éph. 5:23) Kan Saul ti lor chemin pou al Damas, Jésus ti koz ar li ek par enn mirak, ti faire enn la lumiere faire Saul vinn aveugle. Apré sa, Jésus ti envoye Saul Damas ek ti dire li attann pou gagne plus renseignement. Apré, nou koné ki’nn arrivé.​—Actes 9:3-22.

6, 7. Couma nou koné ki Paul ti bien conscient bann erreur ki li ti faire dan le passé?

⁶ Paul ti changé desuite couma li ti vinn enn chretien. Li ti nepli enn grand l’ennemi vrai religion chretien, au contraire, li ti defann bann disciple Jésus avek zele. Mais kan-mem, plitar li ti ecrire lor li-mem: “Surement zot inn tann koz lor seki mo ti faire kan mo ti pé suive religion Juif, ek zot koné ki mo ti contigne persecute congregation Bondié ek ravage li ziska depasse limite.” (Gal. 1:13) Plitar, li ti ré-mentionne seki li ti faire dan le passé kan li ti ecrire bann Corinthien, bann Philippien, ek Timothée. (Lire 1 Corinthiens 15:9; Phil. 3:6; 1 Tim. 1:13) Paul pa ti fiere pou ecrire sa bann kitsoz-la lor li, mais li pa ti faire coumadir nanyé pa ti arrivé. Li ti bien conscient ki li ti faire bann erreur bien grave.​—Actes 26:9-11.

⁷ Frederic W. Farrar, enn bibliste, ti ecrire couma Saul ti persecute congregation dan enn fason bien cruel. Farrar ti ajouté ki c’est selman kan nou reflechi lor la, ki nou kapav comprend ki quantité li ti regretté ek ki quantité so bann l’ennemi ti critik li. Li possible aussi ki parfois, dan bann congregation ki Paul ti visité, bann frere ki ti zwenn li pou premier fois ti dire li: ‘Alors to-mem sa Paul-la, to-mem ki ti persecute nou!’​—Actes 9:21.

8. Ki sentiment Paul ti ena lor misericorde ek l’amour ki Jéhovah ek Jésus ti manifesté envers li, ek ki nou aprann ar so l’exemple?

⁸ Mais, Paul ti realisé ki c’est zis grace a faveur Bondié ki personne pa merité, ki li ti kapav accompli so ministere. Li mentionne sa qualité-la apepré 90 fois dan so 14 lettre​—plus ki n’importe ki lezot ecrivain la Bible. (Lire 1 Corinthiens 15:10.) Paul ti bien apprecié misericorde ki Bondié ti manifesté envers li. Li ti envie faire sur ki li pa ti gagne faveur Bondié dan vide. Alors, li “ti travail plus” ki tou bann lezot zapotre. L’exemple Paul montré bien couma, si nou confesse nou bann peché ek nou change nou conduite, Jéhovah disposé pou efface mem nou bann peché grave lor base sacrifice Jésus Christ. C’est enn bon rappel pou tou bann ki trouve sa difficile pou croire ki personnellement, zot kapav gagne bann bienfait ar sacrifice Jésus Christ! (Lire 1 Timothée 1:15, 16.) Mem si Paul ti enn grand persecuteur Christ, li ti kapav ecrire: “Garson Bondié . . . finn content moi ek finn donne-li-mem pou moi.” (Gal. 2:20; Actes 9:5) Oui, Paul ti aprann pou faire tou seki li ti kapav dan service Bondié, pou ki li pa gagne encore regret. Eski ou aussi ou finn aprann pou faire sa?

ESKI OU ENA BANN REGRET?

9, 10. (a) Kifer certain serviteur Jéhovah ena bann regret? (b) Kifer li pa bon ki nou touletan tracassé a cause bann erreur ki nou finn faire dan le passé?

⁹ Eski ou finn faire certain kitsoz ki ou regretté asterla? Eski ou finn gaspille ou la force ek ou le temps pou bann kitsoz ki pa important? Eski ou finn agir dan enn fason ki finn faire di-tort lezot dimoune? Ou-soit li possible ki ou ena bann regret pou lezot raison encore. Mais asterla, ki ou kapav faire?

¹⁰ Ena dimoune ki touletan tracassé. Enn dimoune ki touletan tracassé, faire-li-mem di-tort, li faire-li-mem la peine, ek li persecute-li-mem. Sa faire li bien bouleversé. Eski nou probleme pou reglé si nou prend tracas? Non! Maziné ki ou pé envie avance devant ek pou faire sa, pendant plusieurs ler, ou pé balance lor enn fauteuil. En realité, ou pé gaspille tou ou la force pou nanyé parski ou pa pou avance ditou! Au lieu ki ou tracassé, ou bizin faire tou seki ou kapav pou reglé ou probleme. Ou kapav demann excuse sa dimoune ki ou finn offensé-la, ek kitfois retabli bann bon relation avek li. Ou kapav evite ré-faire bann kitsoz ki finn amenn ou pou offense sa dimoune-la, ek lerla sa pou empeche ou ré-gagne probleme encore. Mais li possible ki ou pou bizin supporte consequence ou bann erreur. Mais sa pa pou aide ou si ou tracassé a cause bann erreur ki ou finn faire dan le passé. En realité, sa kapav mem empeche ou pou faire tou seki ou kapav dan service Bondié. Oui, li pa vaut la peine ki nou tracassé!

11. (a) Ki nou bizin faire pou Jéhovah manifesté so misericorde ek so l’amour fidele envers nou? (b) Dapré la Bible, ki nou bizin faire pou gagne la paix l’esprit?

¹¹ Certain ena tendance pou laisse bann erreur ki zot finn faire, tellement accablé zot, ki zot pensé ki zot pa digne devant lizié Bondié. Kitfois zot pensé ki zot pa pou gagne misericorde Bondié parski zot finn faire soit bann peché trop grave, ou-soit trop beaucoup peché. Mais en realité, n’importe ki peché ki zot finn faire dan le passé, zot kapav repenti, faire bann changement ek demann pardon. (Actes 3:19) Jéhovah kapav manifesté so misericorde ek so l’amour fidele envers zot, pareil couma Li finn faire ar beaucoup lezot serviteur. Avek bonté, Jéhovah pou pardonne enn kikenn ki humble, ki sincere, ek ki repenti avek tou so leker. C’est seki Bondié ti faire avek Job, ki ti dire: “Mo repenti [“regretté,” note] dan la poussiere ek dan lasann.” (Job 42:6) La Bible faire nou koné seki nou bizin faire exactement pou nou gagne la paix l’esprit: “Kikenn ki cachiette so bann peché pa pou reussi, mais si li confesse ek arrete faire sa bann peché-la, li pou gagne misericorde.” (Prov. 28:13; Jacq. 5:14-16) Alors, nou kapav confesse nou bann peché ar Bondié, prié pou Li pardonne nou, ek prend bann disposition pou corrige nou erreur. (2 Cor. 7:10, 11) Si nou faire sa, lerla nou pou gagne misericorde Jéhovah parski so “pardon bien grand.”​—Is. 55:7.

12. (a) Couma nou kapav imite l’exemple David kan nou ena enn conscience troublé? (b) Dan ki sens Jéhovah ti regretté, ek kan nou konn sa, couma sa kapav aide nou? (Guette l’encadré.)

¹² La priere ena beaucoup pouvoir; ek par sa moyen-la Bondié aide nou. David ti exprime so bann sentiment profond dan enn la priere sincere ki li ti ecrire dan enn joli psaume. (Lire Psaume 32:1-5.) David ti reconette ki, kan li ti essaye touffe so conscience ki ti pé reproche li, sa ti pé fini li net! Li possible ki li ti bien souffert lor plan mental ek physik ek li ti perdi so la joie parski li pa ti confesse so bann peché. Ki kitsoz David ti faire pou Bondié pardonne li ek pou senti-li soulagé? Li ti confesse so bann peché ar Bondié. Jéhovah ti reponn bann la priere David ek ti fortifié li pou li contigne faire seki droite. Ou aussi pareil, si ou prié Jéhovah avek tou ou leker, ou kapav sur ki Li pou prend compte ou bann supplication. Si bann peché ki ou finn faire dan le passé pé fatigue ou, faire tou seki ou kapav pou repare ou bann erreur ek apré, ena l’assurance ki Jéhovah inn pardonne ou!​—Ps. 86:5.

GUETTE L’AVENIR

13, 14. (a) Ki kitsoz bizin plus tracasse nou zordi? (b) Ki bann question kapav aide nou pou examine seki nou pé faire zordi?

¹³ Certain finn dire ki, pou comprend la vie, nou kapav guette le passé, mais pou nou vive nou la vie, nou bizin guette devant nou. Alors, au lieu ki nou tracassé a cause bann kitsoz ki nou finn faire dan le passé, nou bizin guette bien seki nou pé faire zordi, ek guette l’avenir. Demann-ou-mem: ‘Eski dan deux-trois l’année, mo pou regrette bann decision ki mo pé prend asterla? Eski mo pou souhaité ki mo ti’nn faire bann kitsoz dan enn lot fason? Eski mo pé servi Bondié avek fidelité pou ki mo pa bizin regretté dan l’avenir?’

¹⁴ A mesure ki la grande tribulation pé kosté, nou pa envie faire-nou-mem di-tort avek bann pensée ki tracasse nou, couma par exemple: ‘Eski mo ti kapav faire plus dan service Bondié? Kifer mo pa ti faire pionnier kan mo ti gagne l’occasion? Ki kitsoz ti empeche moi rempli bann condition pou vinn enn assistant ministeriel? Eski mo finn vrai-mem faire bann zeffort pou mette nouveau personnalité lor moi? Eski mo enn dimoune ki Jéhovah pou accepté dan so monde nouveau?’ Au lieu ki nou tracasse-nou concernant seki nou pa finn reussi faire dan le passé, anou reflechi lor seki nou pé faire asterla ek faire sur ki nou pé faire tou seki nou kapav dan service Jéhovah. Sinon, nou pou contigne faire bann kitsoz ki pou faire nou regretté encore plus dan l’avenir.​—2 Tim. 2:15.

JAMAIS PA REGRETTE SEKI OU FAIRE DAN SERVICE BONDIÉ

15, 16. (a) Ki bann sacrifice beaucoup finn faire pou mette service Bondié en premier dan zot la vie? (b) Kifer fodé pa nou regrette bann sacrifice ki nou finn faire pou mette Royaume Bondié en premier?

¹⁵ Ki nou kapav dire lor certain parmi nou ki finn faire bann sacrifice pou servi Jéhovah a plein temps? Kitfois ou finn refuse pou faire enn grand carriere ou-soit ou finn quitte enn business ki ti pé bien marché pou simplifié ou la vie ek pou faire plus dan service Bondié. Li possible aussi ki ou finn reste celibataire ou-soit si ou marié, ou finn decidé pou pena zenfant, pou ou kapav faire service a plein temps. Sa finn permette ou kitfois servi dan Béthel, dan construction international, dan circonscription, ou-soit pou vinn missionnaire. Eski ou bizin regrette sa bann decision-la asterla ki ou pé vieilli dan service Jéhovah? Eski ou bizin pensé ki sa bann sacrifice ki ou finn faire-la pa ti necessaire ou-soit li pa ti dan bon moment? Non pa ditou!

¹⁶ Ou finn prend sa bann decision-la parski ou ti ena enn grand l’amour pou Jéhovah ek enn grand desir pou aide bann dimoune ki ti envie servi Li. Fodé pa ou pensé ki ou la vie ti pou pli bon si ou ti vive dan enn lot fason. Ou kapav bien satisfait avek bann decision ki ou finn prend parski, dan ou cas, ou finn choisir pli bon fason pou servi Jéhovah. Ou kapav content parski ou finn faire tou seki ou kapav pou servi Jéhovah. Li pa pou blié bann sacrifice ki ou finn faire dan ou la vie. Kan ou pou gagne “vrai la vie” dan l’avenir, Li pou recompense ou avek bann benediction ki ou pa mem kapav maziné asterla!​—1 Tim. 6:19; Ps. 145:16.

COUMA NOU KAPAV SERVI BONDIÉ SANS OKENN REGRET?

17, 18. (a) Ki ti aide Paul pou servi Bondié sans okenn regret? (b) Ki ou bien decidé pou faire concernant ou passé, concernant seki ou pé faire asterla, ek concernant ou l’avenir dan service Jéhovah?

¹⁷ Ki Paul ti faire pou li kapav servi Bondié sans okenn regret? Dapré traduction J. B. Phillips, Paul ti ecrire: “Mo finn quitte le passé par derriere, ek n’importe ki kitsoz ki ena devant, mo pé avance vers mo l’objectif.” (Lire Philippiens 3:13, 14.) Paul pa ti contigne pense bann mauvais kitsoz ki li ti faire dan religion Juif. Au contraire, li ti servi tou so la force pou li kapav gagne la vie eternel.

¹⁸ Nou tou nou kapav mette en pratik seki Paul ti dire. Au lieu ki nou fatigue-nou ar seki nou finn faire dan le passé ek ki nou contigne pense bann kitsoz ki nou pa pou kapav changé, nou bizin avance vers seki pé attann nou dan l’avenir. Li vrai ki nou pa pou kapav blié net nou bann erreur, mais fodé pa ki nou contigne tourmente-nou ar sa. Nou kapav faire zeffort pou arrete tracasse-nou ar le passé, faire tou seki nou kapav pou servi Bondié, ek pense sa l’avenir extraordinaire ki ena devant nou-la!