La Garde Prétorienne Gagne enn Temoignage

En l’an 59 nou lepok, bann soldat ti amenn plusieurs prisonnier dan Rome. Apré enn longue voyage, zot ti bien fatigué. Zot ti passe par la Porte Capène pou rente dan la ville. Lor Colline Palatin, zot ti kapav trouve palais l’Empereur Néron ki bann soldat la Garde Prétorienne ti pé veillé. Sa bann soldat-la ti ena enn toge (l’habillement bann soldat Prétorien) lor zot, ki ti cachiette zot l’epée.a Julius, enn centurion, setadir enn officier ki ti dirige cent soldat, avek so bann prisonnier ti traverse Forum Romain pou monte ziska Colline Viminal. Zot ti passe dan enn jardin kot ti ena plusieurs l’autel ki ti consacré pou bann bondié Romain. Zot ti aussi traverse enn grand terrain kot bann soldat Romain ti faire zot parade ek zot l’entrainement militaire.

L’apotre Paul ti parmi sa bann prisonnier-la. Plusieurs mois avant sa, kan li ti lor enn bateau dan enn tempete lor la mer, enn ange ti dire li: “Pa peur Paul, to pou bizin al presente devant César.” (Actes 27:24) Eski Paul ti pré pou faire sa l’experience-la? Kan li ti guette la ville tout autour, surement li ti ré-pense bann parole ki Jésus ti dire li kan li ti dan la Tour Antonia, dan Jérusalem. Jésus ti dire li: “Bon courage! Parski, pareil couma to’nn rann temoignage a fond lor bann kitsoz ki concerne moi dan Jérusalem, pareil aussi to bizin rann temoignage dan Rome.”​—Actes 23:10, 11.

Li possible ki Paul ti arreté enn ti moment pou guette camp Prétorien (Castra Praetoria)​—enn grand forteresse avek bann muraille bien haute ki ti faire avek bann brick rouge ek kot la-haut ti ena bann rempart ek bann la tour. Bann soldat ki ti forme partie dan la Garde Prétorienne ek ki ti bann garde du corps l’empereur, ek aussi bann la police ki ti travail dan la ville, ti reste dan sa forteresse-la. A part sa 12 cohorteb Prétorien-la ek bann la police, dan sa forteresse-la ti ena aussi plusieurs millier soldat, parmi ti ena bann cavalier. Alors, sa forteresse-la ti montré ki quantité l’empereur ti puissant. La Garde Prétorienne ti responsable bann prisonnier ki ti sorti dan bann l’endroit en dehors Rome. Alors, Julius, ki ti enn officier Prétorien, ti faire so groupe prisonnier passe par enn parmi quatre la porte principal ki ti ena. Apré ki li ti faire enn voyage bien dangereux pendant plusieurs mois, finalement li ti amenn so bann prisonnier dan Rome.​—Actes 27:1-3, 43, 44.

L’APOTRE PAUL TI PRECHÉ ‘SANS KI NANYÉ TI EMPECHE LI’

Paul ti lor enn bateau ki ti pé faire naufrage. Pendant sa voyage-la, li ti gagne enn vision ki ti faire li koné ki zot tou lor sa bateau-la ti pou gagne la vie sauve. Kan enn serpent ti morde li, sa pa ti faire li okenn di-tort. Li ti gueri bann dimoune malade ki ti lor l’île Malte, ek bann dimoune ki ti la-bas ti dire ki li ti enn bondié. Li possible ki bann soldat dan la Garde Prétorienne, ki ti croire dan superstition, ti gagne nouvelle sa bann l’evenement-la.

Paul ti fini zwenn bann frere ki ti reste dan Rome parski zot ‘ti vinn zwenn li ziska la Place Bazar Appius ek Trois-Tavernes.’ (Actes 28:15) Mais Paul ti enn prisonnier, alors couma li ti pou kapav realise so desir pou preche la bonne nouvelle dan Rome? (Rom. 1:14, 15) Certain pensé ki d’abord, ti livré bann prisonnier ar enn commandant. Si sa ti vrai, alors li possible ki zot ti amenn Paul ar chef soldat la Garde Prétorienne ki ti appel Afranius Burrus. Kitfois apré l’empereur, li-mem ki ti pli important.c En tout cas, asterla, c’est pa bann centurion ki ti pou veille Paul, mais zis enn simple soldat Prétorien. Zot ti laisse Paul rod enn l’endroit pou li resté ek li ti gagne droit recevoir bann visiteur ek preche ar zot ‘sans ki nanyé ti empeche li.’​—Actes 28:16, 30, 31.

PAUL TI RANN TEMOIGNAGE AR BANN TI DIMOUNE EK BANN GRAND DIMOUNE

Kitfois Burrus ti pose Paul bann question, soit dan palais, soit dan camp Prétorien, avant ki li ti amenn li devant Néron. Paul pa ti laisse sa l’occasion-la passé, li ti “rann temoignage ar bann ti dimoune ek bann grand dimoune.” (Actes 26:19-23) Nou pa koné ki Burrus ti pensé lor Paul, si li ti innocent ou-soit coupable, mais nou koné ki li pa ti envoye Paul dan prison ki ti dan camp Prétorien.d

Paul ti loué enn lakaz ki ti assez grand pou li recevoir “bann zom ki ti ena enn grand position parmi bann Juif” ek li ti rann zot temoignage. Li ti rann aussi temoignage ar ‘beaucoup plus dimoune ki ti vinn kot li ti pé resté.’ Bann soldat la Garde Prétorienne aussi ti tann li preché kan li ti “rann temoignage a fond” ar bann Juif lor Royaume Bondié ek lor Jésus, “depuis gramatin ziska tantot.”​—Actes 28:17, 23.

Chaque jour, lor huitieme ler, ti ena enn different groupe soldat Prétorien ki ti veille palais. Soldat ki ti veille Paul-la aussi ti changé regulierement. Pendant deux an ki Paul ti en captivité, bann soldat ti tann li dicté bann lettre ki li ti envoye bann Éphésiens, bann Philippiens, bann Colossiens, ek bann chretien Hébreux. Zot ti trouve li ecrire enn lettre pou enn chretien ki ti appel Philémon. Kan Paul ti en captivité, li ti aide personnellement enn esclave ki ti’nn sauvé, ki ti appel Onésime. Li ‘ti vinn enn papa pou li, alors ki li ti dan prison,’ ek li ti faire li retourne kot so maitre. (Philém. 10) Surement Paul ti interesse-li personnellement ar bann soldat ki ti veille li. (1 Cor. 9:22) Par exemple, kitfois li ti gagne enn conversation avek enn soldat lor different partie l’equipement ki ti ena lor li ek Paul ti servi sa bann renseignement important-la dan enn parmi bann zimage ki li ti servi.​—Éph. 6:13-17.

“PA PEUR POU ANNONCE PAROLE BONDIÉ”

Kan Paul ti en captivité, sa ti “faire la bonne nouvelle progressé” parmi tou bann soldat dan la Garde Prétorienne ek parmi lezot dimoune encore. (Phil. 1:12, 13) Bann ki ti reste dan camp Prétorien ti ena contact avek bann dimoune partout dan l’Empire Romain ek aussi avek l’empereur ek tou bann ki ti reste dan so palais. Parmi, ti ena bann membre famille l’empereur, so bann servante, ek so bann esclave, ek certain parmi zot ti vinn chretien. (Phil. 4:22) Grace a temoignage ki Paul ti donné avek zele, bann frere dan Rome ti gagne courage ek zot “pa [ti] peur pou annonce parole Bondié.”​—Phil. 1:14.

Temoignage ki Paul ti donné dan Rome encourage nou aussi pou ‘preche la parole dan lepok favorable ek dan lepok difficile.’ (2 Tim. 4:2) Certain parmi nou obligé reste dan enn home, ou-soit dan l’hopital, ou-soit mem dan prison a cause nou la foi. N’importe ki situation nou été, kitfois nou kapav preche ar bann dimoune ki vinn visite nou pou occupe nou, ou-soit pou vinn rann nou different service. Kan nou rann temoignage avek zele dan n’importe ki l’occasion, nou montré ki “parole Bondié pa dan la chaine.”​—2 Tim. 2:8, 9.