“Mo ti ena enn comportement violent”

MO PASSÉ:

Mo ti grandi dan enn quartier pauvre dan enn lavil ki ti appel Turku kot ena enn le port. Mo papa ti enn champion la boxe, ek mo ti frere ek moi nou ti bien actif dan la boxe. Kan mo ti ankor lekol, souvent bann zeleve ti provok moi pou la guerre ek jamais mo pa ti hesité pou servi mo coute poing. Kan mo ti enn adolescent, mo ti faire partie dan enn groupe bandit ki ti pousse moi pou rente dan bann bagarre pli violent ankor. Ek sa lepok-la-mem ki mo’nn commence konn la musik heavy-metal ek rêve pou vinn enn grand chanteur rock.

Mo ti acheté bann batterie, forme enn groupe, ek mo pa ti tardé pou vinn chanteur principal sa groupe-la. Mo ti content comporte-moi couma enn fou lor la scene. Nou groupe ti ena enn comportement violent ek enn l’apparence debraillé, ek tigit-tigit sa ti faire bann dimoune konn nou plis. Nou ti commence joué devant bann grand publik ek nou ti faire deux-trois l’enregistrement. Bann dimoune ti bien apprecié dernier l’enregistrement ki nou ti faire. Vers lafin bann l’année 80, nou ti al l’États-Unis pou faire publicité pou nou groupe. Nou ti joué enn-deux fois dan New York ek Los Angeles ek nou ti etablir deux-trois contact avek bann professionnel dan domaine la musik avant ki nou retourne Finlande.

Malgré ki mo ti content mo dan sa groupe-la, mo ti bien envie ki mo lavi ena plis sens. Mo ti deçu par l’esprit competition ek l’attitude egoïste ki certain ki ti travail dan domaine la musik ti ena, ek mo ti agacé parski mo ti amenn mo lavi dan enn fason ki pa serieux. Mo ti ena l’impression ki mo ti enn mauvais dimoune, ek mo ti peur pou al brulé dan l’enfer. Mo ti essaye rod certain reponse dan tou sorte qualité livre religieux, ek mo ti faire beaucoup la priere pou gagne l’aide Bondié, mem si mo ti pensé ki jamais mo pa ti pou kapav faire Li plaisir.

COUMA LA BIBLE INN CHANGE MO LAVI:

Pou gagne seki mo bizin pou vive, mo ti travail dan la poste dan mo l’endroit. Enn jour, mo ti aprann ki enn mo bann collegue travail ti enn Témoin de Jéhovah. Alors, mo ti bombarde li ar question. So bann reponse logik ek basé lor la Bible ti faire moi envie konn plis, ek mo ti accepté ki li etudié la Bible avek moi. Apré ki mo ti’nn etudié pendant deux-trois semaine, mo groupe ti gagne enn contrat bien interessant ki kitfois ti pou permette nou lance enn nouveau album dan l’États-Unis. Mo ti pensé ki nou bizin pa rate sa l’occasion-la parski nou pa ti pou ré-gagne enn chance coumsa ankor.

Mo ti dire sa Témoin ki ti pé etudié la Bible avek moi-la ki mo ti vrai-mem envie faire enn dernier album ek ki apré sa, mo ti pou applik avek serieux bann principe la Bible dan mo lavi. Li pa ti dire moi ki li pensé; li ti zis demann moi pou lire bann parole Jésus ki ena dan Matthieu 6:24. Sa verset-la dire: “Personne pa kapav travail couma enn esclave pou deux maitre.” Mo ti gagne enn sok kan mo ti realisé seki sa bann parole-la vedir. Mais apré deux-trois jour, c’est mo enseignant la Bible ki ti gagne enn sok! Mo ti dire li mo’nn quitte mo groupe parski mo envie suive Jésus!

La Bible ti couma enn la glace ki ti faire moi trouve mo bann defaut. (Jacques 1:22-25) Mo ti trouvé ki mo ti ena enn comportement violent: Mo ti enn dimoune fiere, ek mo ti rempli ar bann l’ambition ki jamais mo pa ti pou kapav realisé. Mo ti ena enn langage grossier, ek mo ti la guerre, fumé, ek boire beaucoup. Kan mo ti realisé ki quantité mo lavi pa ti en accord avek bann principe la Bible, mo ti deçu ar mo-mem. Malgré sa, mo ti pré pou faire bann changement ki bizin.​—Éphésiens 4:22-24.

Surtout au commencement, mo ti ena beaucoup remords a cause bann mauvais kitsoz ki mo ti faire dan le passé. Mais sa Témoin ki ti pé etudié la Bible avek moi-la ti aide moi beaucoup. Li ti montré moi seki la Bible dire dan Isaïe 1:18: “Mem si zot peché rouge vif, sa bann peché-la pou vinn blanc couma la neige.” Sa verset-la ek lezot verset ankor ti convaink moi ki nou Papa ki dan le ciel ena misericorde ek ki Li envie gueri blessure bann ki’nn faire erreur ek ki repenti.

Kan mo finn aprann konn Jéhovah ek content Li, mo ti envie voué mo lavi ar Li. (Psaume 40:8) Mo ti prend bapteme en 1992 dan enn l’assemblée international bann Témoins de Jéhovah ki ti faire dan Saint-Pétersbourg, dan la Russie.

KI BENEDICTION MO FINN GAGNÉ:

Mo’nn gagne beaucoup bon camarade parmi bann adorateur Jéhovah. De temps en temps, nou zwenn ensam pou joué bann la musik ki convenable ek pou apprecié sa don Bondié-la. (Jacques 1:17) Enn benediction special ki mo’nn gagné c’est kan mo’nn marié avek mo madame Kristina, ki mo bien content. Avek li, mo finn partage beaucoup kitsoz​—bann la joie ek bann difficulté lavi, ek aussi mo bann sentiment pli profond.

Si mo pa ti vinn enn Témoin de Jéhovah, kitfois mo ti pou nepli la zordi. Dan le passé, chaque fois mo ti pé ré-tombe dan probleme ek dan bann grand difficulté. Asterla mo ena enn vrai but dan lavi, ek mo senti ki tou inn rente dan l’ordre.