Kifer Ena Tou Sa Soufrans-La?

Pou konpran kifer ena tou sa soufrans-la ek kifer bann dimounn pa finn reisi eliminn soufrans, mem si zot finn fer bann gran zefor, nou bizin kone vremem akoz ki kitsoz bann dimounn soufer. Mem si ena plizir kitsoz ki fer bann dimounn soufer ek li difisil pou idantifie zot, nou kontan ki Labib ed nou pou kone ki sa bann kitsoz-la sa. Dan sa lartik-la, nou pou examinn sink rezon prinsipal kifer ena sa kantite soufrans-la. Nou ankouraz ou pou examinn seki Labib dir lor la ek pou trouve kouma li ed nou pou idantifie bann vre rezon kifer bann dimounn soufer.—2 Timothée 3:16.

BANN MOVE GOUVERNMAN

Labib dir: “Kan enn kikenn ki move dirize, lepep plengne.”—Proverbes 29:2.

Toutlong listwar finn ena bann diktater ki finn dirize dan enn fason kriel, ek finn fer zot pep bien soufer. Biensir, pa tou bann dirizan ki move. Sertin anvi fer dibien zot pep. Me, enn fwa ki zot gagn pouvwar, souvan zot trouve ki zot bann zefor dan vid parski ena bann konfli ant zotmem ek sakenn rod gagn plis pouvwar. Zot servi osi zot pouvwar pou zot prop lavantaz, ouswa pou fer ditor lezot. Enn ansien Sekreter Leta Amerikain, Henry Kissinger, ti dir: “Pandan listwar, boukou zefor finn tom dan delo, ek boukou rev pa finn realize.”

Labib dir osi: “Enn dimounn ki pe marse pa finn kree pou diriz so pa.” (Jérémie 10:23) Bann dimounn inparfe pena ase sazes ek pena kapasite pou konn lavenir, se akoz sa ki zot pa reisi akonpli tou bann desizion ki zot pran. Si bann dimounn pa kapav diriz zot prop pa, kouma zot pou kapav diriz enn nasion an antie? Eski ou trouve kifer bann ki pe dirize pena kapasite pou eliminn soufrans? Avredir, bien souvan se bann move gouvernman, ouswa bann dimounn ki pe mal servi zot pouvwar, ki amenn soufrans!

LINFLIANS BANN FOS RELIZION

Jésus ti dir: “Par sa tou dimounn pou kone ki zot mo bann disip, si zot ena lamour ant zot.”—Jean 13:35.

Bann sef relizie dan tou relizion pres lape ek linite. Me an realite, zot pa’nn reisi ed bann dimounn ki frekant zot relizion pou devlop enn lamour ase for pou eliminn favoritism. Olie sa, bann relizion souvan inn kree divizion, inn ankouraz lespri fanatik, ek inn met lager ant bann pep ek bann nasion. Dan konklizion so liv Christianity and the World Religions, Hans Küng, enn profeser dan domenn relizion ti ekrir: “Bann lager politik pli fanatik ek pli kriel ki finn ena, se bann lager kot larelizion finn ena enn linflians, finn ankouraze, ek finn fer pas pou normal.”

Anplis, dan boukou relizion bann sef relizie finn montre ki zot aksepte bann move pratik, kouma fornikasion, ladilter, ek lomosexialite. Sa bann pratik-la finn ogmant bann maladi sexiel, lavortman, ek bann groses non dezire. Sa finn osi kas bann maryaz ek bann fami, ek finn amenn boukou sagrin ek soufrans.

LINPERFEKSION BANN DIMOUNN EK BANN DEZIR EGOIS

“Enn dimounn tante kan li les so prop dezir antrenn li. Apre, kan sa dezir-la inn devlope, sa fer li fer pese.”—Jacques 1:14, 15.

Nou tou, parski nou’nn erit linperfeksion, nou ena tandans pou fer bann erer ek nou bizin lager pou pa “fer bann kitsoz ki nou lekor . . . pous nou pou fer.” (Éphésiens 2:3) Me kan enn dimounn gagn lokazion pou satisfer so bann move dezir, li pli difisil pou li lit kont sa. Ek si nou satisfer bann dezir ki fer nou ditor, nou kapav gagn bann move konsekans.

Enn ekrivin ki apel Phiroz Mehta ti ekrir: “Bien souvan, nou soufer parski nou ena bann lanvi exazere, nou touletan pe rod fer noumem plezir ek satisfer nou bann dezir egois, nou zame satisfe ar seki nou ena ek touletan pe rod plis.” Boukou “dimounn respektab” finn vinn esklav tou sort kalite kitsoz kouma labwason, ladrog, bann zwe, sex, ek lezot kitsoz ankor. Ek akoz sa, zot finn tom lor lapay ek finn fer zot fami, zot bann kamarad ek lezot dimounn soufer. Akoz linperfeksion bann dimounn, nou bizin rekonet ki Labib ena rezon kan li dir: “Nou kone ki ziska zordi, kreasion an antie pe plengne ek pe soufer.”—Romains 8:22, Bible à la Colombe.

POUVWAR BANN MOVE LESPRI

Labib fer nou kone ki Satan li “bondie sa sistem-la” ek ansam avek li ena bann move lespri bien pwisan ki apel bann demon.—2 Corinthiens 4:4; Révélation 12:9.

Parey kouma Satan, bann demon osi pe fer tou pou kontrol bann dimounn ek pou met zot dan lerer. Lapot Paul ti rekonet sa kan li ti dir: “Nou bizin lite, pa kont disan ek laser, me kont bann gouvernman, kont bann lotorite, kont bann dirizan lemond ki dan sa nwarte-la, kont bann move lespri ki trouv dan lesiel.”—Éphésiens 6:12.

Mem si bann demon kontan pou fer bann dimounn ditor, se pa sa zot lobzektif prinsipal. Zot anvi ki bann dimounn aret servi Bondie ki Pli Gran, Jéhovah. (Psaume 83:18) Bann pratik kouma lastrolozi, mazik, sorselri, ek get lavenir, se zis sertin mwayin ki bann demon servi pou anbet ek pou kontrol bann dimounn. Se akoz sa ki Jéhovah met nou an gard kont sa bann danze-la ek protez tou bann ki opoz zot ar Satan ek so bann demon.—Jacques 4:7.

NOU PE VIV DAN “BANN DERNIE ZOUR”

Finn gagn anviron de mil an, Labib ti anonse: “Mazinn sa bien, ki dan bann dernie zour pou ena bann lepok kritik ki difisil pou siporte.”

Pou montre kifer lepok pou kritik, li dir osi: “Bann dimounn pou kontan zotmem, zot pou kontan larzan, zot pou vantar, zot pou ena lorgey, . . . zot pa pou ena okenn lafeksion natirel, zot pa pou dakor ant zotmem, zot pou met bann fos akizasion lor lezot, zot pa pou konn kontrol zot, zot pa pou ena okenn pitie, zot pa pou kontan seki bien, zot pou tret, zot pou ena latet dir, zot pou ranpli ar lorgey, zot pou kontan plezir plito ki Bondie.” Pena dout, enn bann rezon kifer nou trouv sa kantite soufrans-la zordi, se parski nou pe viv dan “bann dernie zour.”—2 Timothée 3:1-4.

Apre ki nou finn examinn sa bann pwin-la, eski li pa kler ki bann dimounn pa pou kapav eliminn soufrans, mem si zot ena bann bon lintansion? Alor, kot sa nou kapav gagn led? Nou bizin tourn nou ver nou Kreater ki finn promet pou “detrir bann travay ki Lediab finn fer” ek bann ki pe swiv Lediab. (1 Jean 3:8) Prosin lartik pou montre nou kouma Bondie pou eliminn tou bann soufrans.