Nou kapav tire profit si nou enduré kan nou souffert
“Nou declare heureux tou bann ki finn enduré.”—JACQUES 5:11.
1, 2. Ki montré nou ki Jéhovah pa ti crée dimoune pou souffert?
OKENN dimoune normal pa content souffert. Nou Createur Jéhovah aussi pa content ki bann dimoune souffert. Nou kapav trouve sa kan nou examine so Parole inspiré ek kan nou guette seki ti arrivé apré ki Li ti crée premier zom ek premier femme. Premierement, Bondié ti crée Adam. “Jéhovah ti forme zom avek la poussiere la terre ek Li ti soufflé souffle la vie dan so néné, ek zom-la ti vinn enn nâme vivant.” (Genèse 2:7) Adam ti ena enn lekor ek enn l’esprit parfait, ek li pa ti supposé tombe malade ni mort.
2 Dan ki condition Adam ti vive? “Jéhovah ti faire enn jardin en Éden, vers l’est, ek là Li ti mette zom ki Li ti’nn formé. Jéhovah ti faire tou qualité pié ki joli pou guetté ek ki bon pou mangé, poussé lor la terre.” (Genèse 2:8, 9) Oui, Adam ti reste dan enn place extraordinaire. Pa ti ena okenn souffrance en Éden.
3. Ki bann possibilité premier couple ti ena?
3 Genèse 2:18 dire nou: “Jéhovah ti dire: ‘Li pa bon ki zom reste tousel. Mo pou faire enn l’aide pou li, enn kikenn ki al bien ar li.’ ” Jéhovah ti faire enn femme parfait pou Adam, ek sa ti pou donne li l’occasion pou konn enn la-vie famille heureux. (Genèse 2:21-23) La Bible ajouté: “Bondié ti beni zot ek Li ti dire zot: ‘Gagne beaucoup zenfant, multiplié, rempli la terre ek ena control lor li.’ ” (Genèse 1:28) Premier couple ti pou ena privilege pou agrandi jardin Éden ek avek le temps, la terre entier ti pou vinn enn grand paradi. Zot ti pou gagne bann zenfant heureux, ki pa ti pou konn la souffrance. Oui, sa ti vrai-mem enn commencement extraordinaire!—Genèse 1:31.
Souffrance commencé
4. Kan nou guette condition bann dimoune a travers l’histoire, ki kitsoz ki bien clair?
4 Pourtant, kan nou guette condition bann dimoune a travers l’histoire, li bien clair ki ena enn kitsoz ki’nn bien mal tourné. Bann mauvais kitsoz finn arrivé, ek tou bann dimoune finn bien souffert. A travers bann siecle, tou bann descendant Adam ek Ève finn tombe malade, finn vinn vié ek a la fin, zot finn mort. En tou cas, zordi la terre pa enn paradi ki rempli avek bann dimoune heureux. Romains 8:22 montré bien couma situation été zordi: “Ziska zordi creation entier pé contigne plaigné ensam ek souffert ensam.”
5. Ki part responsabilité nou bann premier parent ti ena pou souffrance ki’nn commencé dan jardin Éden?
5 Jéhovah pa responsable pou bann souffrance terrible ki existé lor la terre depuis tou sa lé-temps-la. (2 Samuel 22:31) Bann dimoune ena zot part responsabilité dan seki’nn arrivé. “Zot finn agir dan enn fason ki pa droite, zot finn ena enn conduite detestable.” (Psaume 14:1) Nou bann premier parent ti gagne tou seki bizin pou commence enn bon la-vie. Pou ki sa contigné, zot ti bizin zis obeir Bondié, mais Adam ek Ève ti choisir pou vinn independant ar Jéhovah. Parski zot ti rejette Jéhovah, zot ti pou nepli reste parfait. Zot ti pou deperi ziska zot mort. C’est coumsa ki nou finn herite l’imperfection.—Genèse 3:17-19; Romains 5:12.
6. Ki part responsabilité Satan ti ena pou souffrance ki’nn commencé dan jardin Éden?
6 Souffrance inn commencé aussi a cause sa creature spirituel ki finn vinn Satan le Diable-la. Li ti ena liberté pou agir. Selman, li ti mal servi sa liberté-la kan li ti essaye rod l’adoration. Mais c’est zis Jéhovah ki nou tou bizin adoré, pa seki Li’nn crée. C’est Satan ki ti pousse Adam ek Ève pou rod l’independance ar Jéhovah, coumadir lerla zot ti pou kapav ‘vinn couma Bondié, ek konn seki bon ek seki pa bon.’—Genèse 3:5.
Zis Jéhovah ki ena droit pou dirigé
7. Ki bann consequence rebellion kont Jéhovah inn montré?
7 Bann mauvais consequence ki rebellion inn amené montré ki zis Jéhovah, pli grand le Roi dan l’univers, ki ena droit pou dirigé ek zis so domination ki juste. Satan le Diable finn vinn “chef sa lé-monde-la.” (Jean 12:31) Bann millier l’année ki’nn passé montré bien ki so domination mauvais, injuste, violent ek sa pa’nn faire nanyin ki bon. Bann dimoune finn gouverné enba direction Satan pendant bien longtemps, ek zot gouvernement aussi finn amenn beaucoup malheur. Oui, zot inn montré ki zot pena capacité pou gouverne avek justice. (Jérémie 10:23) Alors, a part domination Jéhovah, n’importe ki qualité gouvernement ki bann dimoune pou kapav etabli, jamais pa pou reussi. L’histoire finn montré sa bien.
8. Ki projet Jéhovah ena en rapport avek toute sorte gouvernement ki ena lor la terre, ek couma Li pou realise so projet?
8 Pendant plusieurs millier l’année, Jéhovah inn permette bann dimoune essaye dominé sans Li. Alors, asterla Li ena bann bon raison pou tire toute sorte qualité domination ki ena lor la terre ek remplace zot par so prop gouvernement. En rapport avek sa, enn prophetie dire: “Dan lepok sa bann lé-roi-la [bann gouvernement humain], Bondié ki dan le ciel pou etabli enn royaume [so gouvernement dan le ciel ki dirigé par Jésus Christ] ki jamais pa pou detruire. . . . Li pou crase tou bann lezot royaume ek li pou fini zot, ek li pou regné pou touletan.” (Daniel 2:44) Lerla, domination bann demon ek domination bann dimoune pou disparette, ek zis Royaume Bondié dan le ciel ki pou existé ek ki pou dirige la terre. Jésus Christ pou le Roi, ek pou ena 144,000 dimoune fidel ki pou dirigé avek li, bann dimoune ki li’nn prend lor la terre.—Révélation 14:1.
Souffrance kapav amenn bann bienfait
9, 10. Couma Jésus inn tire profit ar bann souffrance ki li’nn koné?
9 Li bon ki nou examiné ki bann capacité bann ki pou règne dan Royaume Bondié ena. Premierement, Jésus Christ ti montré ki quantité li bien qualifié pou rempli so role le roi. Li finn passe enn quantité lé-temps avek Jéhovah pou faire So volonté, ek li ti so “zouvrier qualifié.” (Proverbes 8:22-31) Kan Jéhovah ti faire l’arrangement pou envoye li lor la terre, Jésus ti obeir avek tou so leker. Là lor la terre, li ti faire tou seki li kapav pou koz lor domination universel Jéhovah ek lor So Royaume. Jésus inn laisse enn bon l’exemple pou nou tou kan li’nn soumette-li net ar sa domination-la.—Matthieu 4:17; 6:9.
10 Jésus ti souffert a cause persecution, ek a la fin, so bann l’ennemi ti touye li. Pendant so ministere, li ti gagne l’occasion trouve souffrance bann dimoune tout autour li. Eski li’nn tire profit kan li’nn trouve sa ek kan li’nn souffert personnellement? Oui. Hébreux 5:8 dire “Mem si li ti Garson Bondié, li ti aprann l’obeissance par bann kitsoz ki li ti enduré.” Bann kitsoz ki Jésus inn supporté lor la terre inn faire li pli comprend souffrance bann dimoune ek ena plus pitié pou zot. Kan li ti lor la terre, li’nn koné dan ki condition bann dimoune vive, parski li-mem li’nn passe par la. Li ti kapav comprend bann dimoune ki souffert, ek li ti kapav comprend pli bien responsabilité ki li ti pou ena pou delivré zot. Guetté couma Paul attire l’attention lor la dan livre Hébreux: “Li ti necessaire ki li vinn couma so bann ‘frere’ dan tou kitsoz, pou ki li kapav vinn enn grand pretre ki ena misericorde ek ki fidel dan bann kitsoz ki concerne Bondié, ek lerla offert enn sacrifice ki couvert peché bann dimoune. Parski li-mem li finn souffert kan li’nn passe par l’epreuve, li kapav vinn au secours bann ki pé passe par l’epreuve.” “Parski grand pretre ki nou ena, li pa enn kikenn ki pa kapav comprend nou bann faiblesse, mais enn kikenn ki finn passe par l’epreuve dan tou kitsoz pareil couma nou, mais selman li pa ti ena okenn peché. Alors, anou approche sa trone kot nou kapav gagne faveur ki personne pa merité-la avek franchise, pou ki nou kapav gagne misericorde ek trouve faveur ki personne pa merité pou gagne l’aide dan l’heure ki bizin.”—Hébreux 2:17, 18; 4:14-16; Matthieu 9:36; 11:28-30.
11. Couma l’experience ki bann futur lé-roi ek pretre inn faire lor la terre, pou aide zot kan zot pou dirigé?
11 Nou kapav dire mem zaffaire pou bann 144,000 dimoune ki Bondié “finn acheté” lor la terre pou ki zot règne avek Jésus Christ dan so Royaume dan le ciel. (Révélation 14:4) Zot tou finn né couma bann dimoune lor la terre, zot finn grandi dan enn lé-monde rempli ar souffrance ek zot-mem zot finn souffert. Beaucoup parmi zot finn gagne persecution, ek certain finn mem mort parski zot finn garde zot fidelité envers Jéhovah ek finn accepté pou suive Jésus. Mais zot ‘pa ti honté a cause temoignage ki zot ti bizin donné lor zot Seigneur, zot ti accepté zot part souffrance pou la bonne nouvelle.’ (2 Timothée 1:8) L’experience ki zot faire lor la terre qualifié zot bien pou juge bann dimoune depuis le ciel. Zot inn aprann pou comprend bann dimoune pli bien, pou montré plus bonté, ek plus disposé pou aide lezot.—Révélation 5:10; 14:2-5; 20:6.
La joie bann ki ena l’esperance pou vive lor la terre
12, 13. Couma bann ki ena l’esperance pou vive lor la terre kapav tire profit ar la souffrance?
12 Bann dimoune ki ena l’esperance pou vive dan Paradi lor enn la-terre kot pa pou ena maladie, chagrin ek la mort, eski zot kapav tire profit ar la souffrance? Bien sur, nou pa content bann douleur ek bann tracas ki souffrance faire nou gagné. Mais kan nou supporte sa qualité souffrance-la, nou ameliore bann qualité ki nou ena ek sa faire nou heureux.
13 Guette seki Parole Bondié dire lor la: “Mem si zot bizin souffert a cause la justice, zot heureux.” “Si pé koz en mal lor zot a cause nom Christ, zot heureux.” (1 Pierre 3:14; 4:14) “Zot bizin heureux kan dimoune koz en mal lor zot, persecute zot ek koz menti pou dire tou sorte qualité mauvais kitsoz lor zot, a cause moi. Zot bizin content ek saute dan la joie, parski zot ena enn grand recompense dan le ciel.” (Matthieu 5:11, 12) “Heureux enn dimoune ki contigne supporte bann l’epreuve, parski kan li vinn enn dimoune approuvé, li pou gagne couronne la vie.”—Jacques 1:12.
14. Dan ki sens souffrance kapav faire bann serviteur Jéhovah heureux?
14 C’est pa sa souffrance ki nou pé gagné-la ki faire nou heureux. Nou heureux ek nou ena satisfaction parski nou koné kifer nou pé souffert: parski nou pé faire volonté Jéhovah ek nou pé suive l’exemple Jésus. Par exemple, dan premier siecle, certain zapotre ti al dan prison ek zot l’ennemi ti amenn zot devant la cour supreme juif ek ti accuse zot parski zot ti pé preche lor Jésus Christ. Bannla ti fouette zot ek apré ti largue zot. Couma zot ti reagir? La Bible dire ki zot “ti sorti devant Sanhédrin, dan la joie parski ti’nn juge zot digne pou gagne deshonneur a cause so nom.” (Actes 5:17-41) Zot ti heureux, pa parski ti fouette zot ek parski zot ti souffert, mais parski zot ti comprend ki, si ti arrive sa, c’est parski zot ti garde zot fidelité envers Jéhovah ek zot ti suive l’exemple Jésus.—Actes 16:25; 2 Corinthiens 12:10; 1 Pierre 4:13.
15. Couma kan nou endure bann souffrance asterla sa kapav aide nou dan l’avenir?
15 Si nou supporte l’opposition ek persecution avek enn bon l’attitude, sa kapav faire nou l’endurance vinn pli fort. Sa pou aide nou pou endure bann lezot souffrance dan l’avenir. Nou lire sa: “Considere sa couma enn grand la-joie mo bann frere, kan zot konn tou sorte qualité l’epreuve, parski maziné ki kan zot passe ladan, zot la-foi, apré ki li’nn passe par l’epreuve, produire l’endurance.” (Jacques 1:2, 3) Romains 5:3-5 aussi dire nou pareil: “Nou bizin fiere kan nou pé passe dan bann l’epreuve, parski nou koné ki l’epreuve produire l’endurance, ek l’endurance en retour faire nou vinn enn dimoune ki Bondié approuvé; sa condition approuvé-la produire l’esperance ek l’esperance pa faire nou gagne deception.” Alors, plus nou endure bann l’epreuve zordi parski nou attaché ar bann principe biblik, plus nou pou kapav endure encore lezot l’epreuve dan sa mauvais lé-monde-la.
Jéhovah pou dedommage nou
16. Couma Jéhovah pou recompense bann ki pou vinn le roi ek pretre, pou bann souffrance ki zot inn supporté?
16 Mem si nou perdi bann kitsoz materiel a cause l’opposition ou-soit a cause persecution parski nou pé vive dapré bann principe biblik, nou content pou koné ki Jéhovah pou recompense nou beaucoup. Par exemple, l’apotre Paul ti ecrire certain chrétien ki ti ena l’esperance pou al vive dan le ciel: “Zot ti accepté avek joie ki prend zot di-bien, parski zot ti koné ki seki zot ena zot, li pli bon ek li durable,” setadir ki zot ti pou vinn bann lé-roi dan Royaume Bondié. (Hébreux 10:34) Ek mazinn la joie ki sa bann chrétien-la pou ena kan, enba direction Jéhovah ek Jésus Christ, zot aussi zot pou donne bann benediction extraordinaire bann dimoune ki pou reste dan le monde nouveau lor la terre. Seki l’apotre Paul ti dire bann chrétien fidel, li bien vrai: “Mo considere bann souffrance ki nou pé gagné asterla couma enn nanyin ditou comparé ar la gloire ki pou manifesté dan nou.”—Romains 8:18.
17. Ki Jéhovah pou faire pou bann ki ena l’esperance pou vive lor la terre ek ki pé reste fidel envers Li asterla?
17 Li pareil aussi pou bann ki ena l’esperance pou vive lor la terre. N’importe ki zot kapav perdi ou-soit abandonné volontairement asterla parski zot servi Jéhovah, Li pou recompense zot beaucoup plus par seki Li pou faire dan l’avenir. Li pou donne zot enn la-vie parfait, la vie eternel dan enn paradi lor la terre. Dan sa lé-monde nouveau-la, Jéhovah “pou souye tou larme dan zot lizié, ek la mort nepli pou existé. Dimoune nepli pou en deuil, zot nepli pou ploré ek nepli pou ena douleur.” (Révélation 21:4) Sa li vrai-mem enn promesse extraordinaire, pa vrai? Dan sa lé-monde zordi-la, n’importe ki kitsoz ki nou kapav renoncé volontairement ou-soit non a cause l’amour ki nou ena pou Jéhovah, pa vaut la vie extraordinaire ki Jéhovah pou donne so bann serviteur fidel ki endure bann souffrance.
18. Ki promesse encourageant Jéhovah faire dan so Parole?
18 N’importe ki souffrance ki kitfois nou pé bizin supporté asterla, sa pa pou affecté la joie ki nou pou ena pou vive pou touletan dan le monde nouveau. Bann condition extraordinaire ki pou ena lerla pou faire nou blié net tou bann souffrance ki nou’nn koné. Isaïe 65:17, 18 dire : “Personne pa pou rappel bann kitsoz avant, ek sa pa pou vinn dan zot leker. Mais zot bizin content ek reste dan la joie pou touletan dan seki mo pé crée.” A cause sa, disciple Jacques, demi-frere Jésus, ti ena raison pou dire: “Nou declare heureux tou bann ki finn enduré.” (Jacques 5:11) Oui, si nou endure avek fidelité bann souffrance ki nou pé gagné zordi, nou pou kapav gagne bann bienfait asterla ek dan l’avenir.
Couma ou pou reponn?
• Couma bann dimoune inn commence souffert?
Ki profit bann futur dirigeant ek bann ki pou reste lor la terre kapav tiré ar la souffrance?
• Kifer nou kapav heureux asterla, mem si nou souffert?
[Zimage, page 18]
Nou bann premier parent ti ena enn l’avenir extraordinaire devant zot
[Zimage, page 20]
Kan Jésus ti prend compte souffrance bann dimoune, sa ti prepare li pou vinn enn bon lé-Roi ek Grand Pretre
[Zimage, page 22]
Bann zapotre ti “dan la joie parski ti’nn juge zot digne pou gagne deshonneur” a cause zot la-foi