Tou souffrance pou Disparette Bientot!

Surement ou finn deja demann ou-mem: ‘Kifer ena tou sa souffrance-la?’ Pendant plusieurs millier l’année, bann dimoune finn bien souffert a cause la guerre, la pauvreté, bann catastrophe, crime, l’injustice, maladie, ek la mort. Pendant sa dernier cent an ki finn passé-la, bann dimoune finn souffert beaucoup plus ki avant. Eski tousala pou arreté enn jour?

La reponse pou sa question-la, li oui, bientot tou souffrance pou disparette. La Bible, Parole Bondié dire: “Mauvais dimoune nepli pou existé . . . Mais bann dimoune ki ena l’humilité pou possede la terre, ek zot pou konn enn grand la-joie parski pou ena la paix en abondance.” Pou comié lé-temps? “Bann dimoune juste pou possede la terre, ek zot pou reste lor là pou touletan.”—Psaume 37:10, 11, 29.

Apré ki Bondié finn tire tou mechanceté ek tou souffrance, la terre pou transformé en enn paradi. Lerla, bann dimoune pou kapav vive heureux, pou touletan ek en bonne santé. Parole Bondié dire: “[Bondié] pou souye tou larme dan zot lizié, ek la mort nepli pou existé. Dimoune nepli pou en deuil, zot nepli pou ploré ek nepli pou ena douleur.”—Révélation 21:4.

Dan sa nouveau lé-monde-la, mem bann dimoune mort pou ressuscité, pou ki zot aussi, zot profite sa bann benediction-la. “Pou ena enn resurrection bann ki juste ek bann ki pa juste, toulé-deux.” (Actes 24:15) C’est pou sa raison-la ki Jésus Christ ti kapav dire sa bandit ki ti repenti ek ki ti ena la foi en li-la: “To pou avek moi dan Paradi.”—Luc 23:43.

Kifer souffrance finn commencé?

Si Bondié ti envie ki bann dimoune vive heureux coumsa, alors kifer Li’nn permette ki souffrance commencé? Kifer Li’nn laisse sa contigné sa quantité lé-temps-la?

Kan Bondié ti crée Adam ek Ève, Li ti crée zot avek enn lekor ek enn l’esprit parfait. Li ti mette zot dan enn paradi ek Li ti donne zot enn travail interessant pou faire. La Bible dire: “Apré sa, Bondié ti trouve tou seki Li ti’nn faire, ek guetté! tou ti bien bon.” (Genèse 1:31) Si zot ti’nn obeir Bondié, zot ti pou gagne bann zenfant parfait, ek zordi la terre entier ti pou enn paradi, kot dimoune ti pou vive heureux ek dan la paix, pou touletan.

Kan Bondié ti crée Adam ek Ève, Li ti donne zot liberté pou choisir. Li pa ti crée zot couma bann robot, ki pa kapav prend okenn decision. Seulement, pou zot kapav contigne vive heureux, zot ti pou bizin servi zot liberté dan enn bon fason—obeir bann la-loi Bondié. Bondié ti dire zot: “Moi, Jéhovah, Mo-mem to Bondié, Celui ki pé enseigne toi pou to prop profit, Celui ki pé faire toi marche lor chemin kot to bizin marché.” (Isaïe 48:17) Si bann dimoune ti mal servi zot liberté, zot ti pou konn beaucoup malheur, parski Bondié pa ti crée zot pou zot reussi zot la-vie sans so direction. La Bible dire: “Enn dimoune pa finn faire pou decidé ki chemin li pou prend. Enn dimoune pa finn faire pou dirige so pas kan li pé marché.”—Jérémie 10:23.

Malheureusement, nou premier parent ti pensé ki zot ti pou kapav vive sans Bondié, ek kan-mem reussi zot la-vie. Mais kan zot ti rejette direction Bondié, zot ti perdi zot perfection, parski Bondié ti nepli avek zot. Alors, finalement zot inn vinn vié ek zot inn mort. Parski nou zot bann descendance, nou aussi nou né imparfait, ek nou aussi, nou mort.—Romains 5:12.

Enn grand question —Kisannla gagne droit dirigé?

Kifer Bondié pa ti touye Adam ek Ève ek ti crée enn lot couple? Parski seki finn passé dan jardin Éden, ti mette en doute droit legal ki Bondié ena pou dirige l’univers. Sa ti souleve plusieurs question: Kisannla ena droit pou dirigé, ek kisannla ki kapav dirige bien? Ek aussi, eski bann dimoune kapav vive pli bien sans direction Bondié? Si Bondié ti donne zot assez lé-temps pou dirige zot-mem sans so direction, Li ti pou montré enn fois pou tou si bann dimoune kapav vive pli bien kan Li, Li dirige zot, ou-soit kan zot dirige zot par zot-mem. Mais sa lé-temps-la ti pou bizin assez longue pou ki bann dimoune kapav essaye tou sorte qualité system politik, social, economik ek religieux, sans okenn direction Bondié.

Ki consequence sa finn ena? L’histoire montré ki pendant plusieurs millier l’année, dimoune finn souffert, ek zot pé contigne souffert. Pendant sa dernier siecle-la, finn ena pli beaucoup souffrance ki jamais avant dan le passé. Bann dimoune par million finn assassiné pendant Holocauste ki ti ena pendant deuxieme guerre mondial. Plus ki 100 million dimoune finn mort dan bann la guerre. Partout ena crime, violence ek la drogue. Bann maladie ki transmette par relation sexuel, pé contigne affecté pli beaucoup dimoune. Chaque l’année, plusieurs million dimoune pé mort ar maladie ek famine. Partout la-vie famille finn deterioré, ek dimoune nepli ena bann bon valeur moral. Pena okenn gouvernement humain ki ena solution pou tou sa bann problem-la. Pena enn ki’nn kapav tire la vieillesse, maladie ek la mort.

Nou pé konn bann condition ki la Bible ti predire pou nou lepok. Parole Bondié appel nou lepok: “dernier jour” sa lé-monde-la, kot pou ena “bann period critik ki difficile pou supporté.” Ek pareil couma la Bible ti dire, bann ‘mauvais dimoune ek bann faussaire finn vinn pli pire.’—2 Timothée 3:1-5, 13.

Souffrance pou disparette bientot

Tousala montré ki l’experience ki bann dimoune finn faire sans direction Bondié, pré pou fini. Li clair ki bann dimoune pa kapav dirige zot-mem sans Bondié. Zis gouvernement Bondié ki kapav amenn la paix, ek faire dimoune vive heureux ek en bonne santé pou touletan. Mechanceté ek souffrance ki Jéhovah finn permette, pré pou disparette. Bientot, Bondié pou agir, ek Li pou detruire tou sa lé-monde mauvais-la.

Bann prophetie la Bible dire: “Dan lepok sa bann lé-roi-la [bann gouvernement ki existé zordi], Bondié ki dan le ciel pou etabli enn royaume [dan le ciel] ki jamais pa pou detruire. . . . Li pou crase tou bann lezot royaume [bann gouvernement zordi], ek li pou regné pou touletan.” (Daniel 2:44) Jéhovah pou servi so Royaume ki dan le ciel pou montré ki Li ena droit pou dirigé. Sa-mem l’enseignement principal ki ena dan la Bible. Jésus ti koz lor enn partie important ki pou ena dan signe “dernier jour,” li ti dire : “Sa bon nouvel lor royaume-la pou preché partout kot dimoune resté lor la terre, couma enn temoignage pou tou bann nation; ek lerla la fin pou vini.”—Matthieu 24:14.

Kan la fin pou vini, kisannla ki pou sapé? La Bible reponn nou: “C’est bann zom droite ki pou reste lor la terre, ek bann zom ki fidel ki pou reste lor la. Concernant bann mauvais dimoune, zot pou disparette lor la terre.” (Proverbes 2:21, 22) Bann dimoune droite, c’est bann dimoune ki aprann volonté Bondié, ek mette sa en pratik. Jésus Christ ti dire: “Sa-mem ki vedir la vie eternel: ki zot aprann konn toi, sel vrai Bondié, ek celui ki to finn envoyé, Jésus Christ.” (Jean 17:3) Oui, “le monde pé al fini ek so desir aussi, mais celui ki faire volonté Bondié, pou reste pou toujours.”—1 Jean 2:17.

A moins indiké, tou bann text la Bible ki cité, finn traduire a partir New World Translation of the Holy Scriptures—With References.