Si Bondié ecoute la priere, kifer Li permette la souffrance?
MEM si beaucoup dimoune kitfois prié, certain douté ki Bondié existé. Kifer zot douté? Kitfois c’est parski zot trouve trop beaucoup souffrance dan le monde. Eski ou finn deja demann ou-mem kifer Bondié permette la souffrance?
Eski vrai-mem Bondié ti crée bann dimoune couma zot été zordi—imparfait ek pou zot souffert? Li ti pou difficile pou nou respecté enn bondié ki’nn crée bann dimoune pou souffert. Mais essaye reflechi lor sa l’exemple-la: si ou pé faire le tour enn l’auto neuf pou admire li, ek ou remarké ki lot coté inn cabossé, eski ou pou pensé ki sa dimoune ki’nn faire sa l’auto-la inn faire li coumsa? Non, bien sur! Ou pou tire conclusion ki sa dimoune-la inn faire sa l’auto-la “parfait,” ek ki enn dimoune ou-soit enn kitsoz finn endommage li.
Li pareil, kan nou admire l’ordre extraordinaire ek fason ki bann kitsoz inn crée dan la nature ek apré nou remark desordre ek bann mauvais kitsoz ki faire bann dimoune souffert, ki conclusion nou tiré? La Bible enseigné ki Bondié ti crée premier couple humain parfait mais plitar zot ti faire zot-mem di-tort. (Deutéronome 32:4, 5) Mais ena enn bon nouvelle: Bondié finn promette pou repare sa di-tort-la—Li pou faire bann dimoune obeissant vinn parfait. Selman, kifer Li pé attann tou sa le temps-la?
Kifer tou sa le temps-la?
Reponse sa question-la ena enn rapport avek enn lot question: kisannla ena droit pou dirige bann dimoune? Jamais Jéhovah pa ti crée bann dimoune pou ki zot dirige-zot par zot-mem. C’est Li ki ti bizin dirige zot. La Bible dire: “Enn dimoune ki pé marché pa finn crée pou dirige so pas.” (Jérémie 10:23) Malheureusement, nou bann premier parent ti choisir pou rebelle kont domination Bondié. Kan zot ti desobeir la loi Bondié, zot ti vinn bann dimoune ki faire peché. (1 Jean 3:4) Lerla, zot ti vinn imparfait ek zot ti faire zot-mem ek zot bann descendant di-tort.
Pendant plusieurs millier l’année, Jéhovah finn permette bann dimoune pou dirige zot par zot-mem, ek l’Histoire finn montré ki bann dimoune pena capacité pou faire sa. L’Histoire montré ki tou bann gouvernement humain faire dimoune souffert. Pena enn ki finn reussi tire la guerre, crime, l’injustice, ou-soit maladie.
Couma Bondié pou repare sa di-tort-la?
La Bible promette ki bientot Bondié pou faire enn monde nouveau kot pou ena la justice. (2 Pierre 3:13) Zis bann ki choisir par zot-mem pou montré l’amour sakenn pou so prochain ek pou Bondié ki pou kapav vive dan sa le monde-la.—Deutéronome 30:15, 16, 19, 20.
La Bible dire aussi ki dan “jour jugement” ki bien pré, Bondié pou tire souffrance ek bann ki faire lezot souffert. (2 Pierre 3:7) Apré sa, Dirigeant ki Bondié inn etabli, Jésus Christ, pou gouverne bann dimoune obeissant. (Daniel 7:13, 14) Ki domination Jésus pou faire? La Bible dire: “Bann ki ena l’humilité pou herite la terre, ek vrai-mem zot pou trouve enn grand la joie dan l’abondance la paix.”—Psaume 37:11.
En tant ki le Roi dan le ciel, Jésus pou repare bann di-tort—parmi ena la maladie, la vieillesse ek la mort—ki finn existé parski nou bann premier parent ti rebellé kont Jéhovah, “la source la vie.” (Psaume 36:9) Jésus pou gueri tou bann ki accepté so domination. Enba so domination, sa bann promesse biblik-la pou realisé:
◼ “Okenn habitant pa pou dire: ‘Mo malade.’ Le peuple ki reste dan sa pays-la pou gagne pardon pou so faute.”—Isaïe 33:24.
◼ “[Bondié] pou souye tou larme dan zot lizié, ek la mort nepli pou existé. Dimoune nepli pou en deuil, zot nepli pou ploré ek nepli pou ena douleur. Bann kitsoz avant finn disparette.”—Révélation 21:4.
Eski sa pa reconforte nou pou koné ki bientot Bondié pou realise so promesse pou tire tou souffrance? Pendant ki nou pé attann sa lepok-la, fodé pa nou perdi confiance ek pensé ki Li pa ecoute nou bann la priere zis parski Li pé permette la souffrance.
Ena enn Bondié. Li kapav tann ou, mem kan ou faire Li konn ou la peine ek ou chagrin. Ek Li bien envie trouve ou vive dan sa lepok kot tou ou bann doute ek ou bann souffrance pou disparette-la.