“Bondie Ki Rekonpans Bann Ki Fer Gran Zefor pou Rod Li”

Eski Jéhovah apresie zefor ki so bann adorater fer pou esey fer Li plezir? Sertin kitfwa pou dir non, parski dapre zot Bondie pa interese ar nou. Me enn rezonnman koumsa, ankouraz bann dimounn pou ena enn move lopinion lor Bondie. So Parol Labib, montre kouma bann kitsoz ete vremem. Li rasir nou ki Jéhovah apresie zefor ki so bann adorater fidel fer. Anou examinn seki lapot Paul dir dan Hébreux 11:6.

Ki nou bizin fer pou fer Jéhovah plezir? Paul ekrir: “San lafwa li inposib pou fer [Bondie] plezir.” Remarke ki Paul pa dir ki san lafwa li difisil pou fer Bondie plezir. Okontrer, lapot Paul dir ki li inposib pou fer sa. Savedir, lafwa se enn kitsoz bien inportan pou fer Bondie plezir.

Ki kalite lafwa fer Jéhovah plezir? Nou lafwa dan Bondie anglob de kitsoz. An premie, nou “bizin krwar ki Li existe.” Enn lot tradiksion dir: “Krwar ki Li reel.” Kouma nou kapav fer Bondie plezir, si nou pa sir ki Li existe? Me, enn vre lafwa pa inplik zis sa, parski mem bann demon krwar ki Jéhovah existe. (Jacques 2:19) Kan nou krwar ki Bondie Li reel, sa bizin pous nou pou azir, setadir viv dan enn fason ki fer Li plezir.​—Jacques 2:20, 26.

Deziemman, nou “bizin krwar ki” Bondie Li “rekonpans” bann dimounn. Enn dimounn ki ena enn vre lafwa ena enn konfians total ki bann zefor ki li fer pou viv dan enn fason ki fer Bondie plezir, pa dan vid. (1 Corinthiens 15:58) Kouma nou pou fer Jéhovah plezir si nou pa sir ki Li ena kapasite ouswa dezir pou rekonpans nou? (Jacques 1:17; 1 Pierre 5:7) Enn dimounn ki panse ki Bondie pa gagn nou traka, pena rekonesans, ek pa zenere, an realite pa konn sa Bondie lor ki Labib koze la.

Kisannla Jéhovah rekonpanse? Paul dir ki Li “rekonpans bann ki fer gran zefor pou rod Li.” Enn liv referans pou bann tradikter Labib dir ki mo Grek ki’nn servi pou tradir “fer gran zefor pou rod Li” pa vedir “al rode pou trouve,” me plito, sa inplik vinn ver Bondie “dan ladorasion.” Enn lot liv referans explike ki sa verb Grek la donn lide kontign fer enn gran zefor. Wi, Jéhovah rekonpans bann ki zot lafwa pous zot pou ador Li avek enn leker ranpli ar lamour ek avek zel.​—Matthieu 22:37.

Kouma Jéhovah rekonpans so bann adorater ki fidel? Li’nn promet zot ki dan lavenir zot pou viv pou touletan lor later ki pou vinn enn paradi; enn rekonpans ki pena pri ek ki montre ki Li bien zenere ek ki Li ena enn gran lamour. (Révélation 21:3, 4) Depi azordi, bann ki pe fer gran zefor pou rod Jéhovah pe gagn boukou benediksion. Gras-a led lespri sin Jéhovah ek sazes ki ena dan so Parol, zot pe gagn bann bienfe ek pe amenn enn lavi ki fer zot gagn satisfaksion.​—Psaume 144:15; Matthieu 5:3.

Vremem, Jéhovah se enn Bondie ki ena rekonesans ek ki apresie servis so bann adorater fidel. Kan ou konn sa, eski sa pa pous ou vinn pli pros ar Li? Si wi, eski ou pa ti pou kontan aprann plis kouma ou kapav devlop ek manifeste enn lafwa ki pou fer Jéhovah rekonpans ou?