“Ki To Rwayom Vini”—Me Kan?

1, 2. (a) Ki kapav fer nou vinn koumadir aveg? (b) Ki nou kone lor Rwayom Bondie?

SIRMAN ou finn remarke ki, si plizir dimounn inn temwin enn levennman, pa zot tou ki pou rapel mem detay. Li parey osi kan enn dimounn al get enn dokter pou kone ki li gagne. Kitfwa li kapav trouv sa difisil pou rapel exakteman seki dokter-la inn dir li. Li kapav arive osi ki enn dimounn pa trouv so lakle ouswa so linet, mem si sa devan li. Tou sa bann sitiasion-la kitfwa arive parski, dapre bann dimounn ki fer resers, koumadir nou vinn aveg kan nou rod fer plizir kitsoz a la fwa. Zot inn dekouver ki kitfwa nou servo kapav konsantre bien zis lor enn sel kitsoz a la fwa.

² Zordi, boukou dimounn zot koumadir aveg dan mem fason konsernan sinifikasion bann levennman ki pe arive dan lemond. Kitfwa zot rekonet ki lemond inn bien sanze depi 1914, me zot pa konpran vre sinifikasion sa bann levennman-la. Antan ki bann etidian Labib, nou kone ki, dan enn sertin sans, Rwayom Bondie inn vini an 1914, kan Jésus inn vinn Lerwa dan lesiel. Selman, lapriyer “Ki to Rwayom vini. Ki to volonte fer lor later parey kouma dan lesiel,” pa ti realiz net sa lane-la. (Mat. 6:10) Li pou realiz net kan sa move sistem-la pou disparet. Se zis kan sa pou arive ki volonte Bondie pou akonpli lor later parey kouma dan lesiel.

3. Ki nou letid Labib ed nou pou trouve?

³ Nou etidie Parol Bondie regilierman, akoz sa nou trouve ki bann profesi pe realize zordi. Ena enn gran diferans ant nou ek bann dimounn an zeneral! Zot telman okipe avek zot lavi ek bann kitsoz ki zot anvi, ki zot pa trouve ki Christ inn koumans regne depi 1914 ek ki biento li pou detrir sa move lemond-la. Selman, poz oumem sa kestion-la: ‘Si sa fer plizir dizenn lane depi ki mo pe servi Bondie, eski mo touzour krwar ki lafin pre ek ki bann levennman ki pe arive zordi montre sa?’ Si sa pa fer lontan depi ki ou enn Temwin, ki ou priorite dan lavi? Ninport ki repons nou pou done, anou examinn trwa rezon inportan kifer nou kapav sir ki biento, Lerwa ki Bondie inn swazir, pou veye ki volonte Bondie fer lor later.

BANN KAVALIE INN SORTI

4, 5. (a) Ki Jésus inn fer depi 1914? (Get zimaz dan koumansman lartik.) (b) Ki sa trwa kavalie ki pe swiv Jésus la reprezante, ek kouma sa profesi-la inn realize?

⁴ An 1914, Jésus inn vinn Lerwa dan Rwayom Bondie, dan lesiel. Dapre Révélation sapit 6, Jésus pe mont lor enn seval blan. Apre ki li’nn vinn Lerwa, deswit li’nn sorti pou konplet so viktwar lor move lemond Satan. (Lir Révélation 6:1, 2.) Dapre sa profesi-la, apre ki Rwayom Bondie ti etabli, bann kondision dan lemond ti pou deteryore bien vit​—ti pou ena lager, lafaminn, maladi ek bann lezot maler ki ti pou fer dimounn mor. Tousala reprezante par trwa kavalie ki pe vinn zis deryer Jésus Christ.​—Rév. 6:3-8.

⁵ Parey kouma sa profesi-la ti anonse, lape ti pou disparet lor later, mem si boukou nasion ti promet pou korpere ek pou fer lape. Premie Lager Mondial ti zis enn koumansman plizir lager ki finn tir lape lor later. Malgre bann progre ekonomik ek siantifik ki bann dimounn inn fer depi 1914, lafaminn inn kontign menas sekirite mondial. Anplis, tou dimounn bizin rekonet ki bann maladi, bann katastrof natirel ek lezot maler pe kontign tir lavi plizir milyon dimounn sak lane. Sa bann levennman-la pe vinn pli danzere, pe arive pli souvan, ek pe touy pli boukou dimounn ki avan. Eski ou realize seki sa vedir?

6. Kisannla ti pran kont realizasion bann profesi Labib, ek ki sa ti pous zot pou fer?

⁶ Kan Premie Lager Mondial ti koumanse ek kan ti ena lagrip Espagnol, sa ti detourn latansion boukou dimounn. Pourtan, bann Kretien ki ena lesperans pou al dan lesiel, ti atann ki an 1914, “letan fixe bann nasion” ti pou fini. (Luc 21:24) Zot pa ti kone exakteman ki ti pou arive. Pourtan, zot ti kone ki an 1914, ti pou ena enn levennman inportan an rapor avek Rwayom Bondie. Deswit kouma zot ti konpran kouma bann profesi Labib ti pe realize, avek kouraz zot ti anonse ki regn Bondie ti’nn koumanse. Boukou proklamater ki ti anons Rwayom Bondie ti gagn enn gran persekision. Sa persekision-la osi ti realiz enn profesi Labib. Pandan plizir dizenn lane apre sa, bann lennmi Rwayom Bondie inn “prepar maler o nom lalwa.” Zot ti servi violans fizik, zot ti met bann frer dan prizon, zot ti pandi bann frer, touy zot par bal, ouswa dekapit zot, pou esey aret predikasion.​—Ps. 94:20; Rév. 12:15.

7. Kifer mazorite dimounn pa konpran sinifikasion bann levennman ki pe pase dan lemond zordi?

⁷ Malgre sa kantite prev ki Rwayom Bondie inn etabli dan lesiel la, kifer mazorite dimounn pa trouv sa? Kifer zot pa trouve ki bann levennman mondial pe realiz bann profesi Labib exakteman kouma bann serviter Bondie pe anonse depi plizir lane? Eski zot trouv zis seki zot anvi trouve? (2 Cor. 5:7) Eski zot telman absorbe ar zot prop lavi ki zot pa trouve seki Bondie pe fer? (Mat. 24:37-39) Eski bann lide ek bann lobzektif ki ena dan lemond Satan pe detourn latansion sertin? (2 Cor. 4:4) Nou bizin ena lafwa pou trouv seki pe pase dan lesiel ek pa zis seki ena devan nou lizie. Nou bien kontan ki nou pa aveg ek ki nou kapav trouve seki ki pe pase vremem dan lemond!

LEMAL PE OGMANTE

8-10. (a) Kouma 2 Timothée 3:1-5 finn realize? (b) Kifer nou kapav dir ki lemal pe ogmante?

⁸ Ena enn deziem rezon kifer nou kone ki Rwayom Bondie biento pou diriz later: Lemal pe ogmante dan lemond. Sa fer preske 100 an ki bann kondision ki mansione dan 2 Timothée 3:1-5 pe realize. Partou dan lemond nou trouv latitid ki dekrir dan sa bann verse-la. Eski ou osi ou trouve ki bann kondision ki ena dan lemond pe vinn pli pir? Anou examinn sertin lexanp ki montre sa bien.​—Lir 2 Timothée 3:1, 13.

⁹ Fer enn diferans ar seki ti sok bann dimounn dan bann lane 1940 ek 1950, ek seki pe pase zordi dan travay, dan bann divertisman, dan spor ek lamod. Zordi, partou nou trouv enn gran violans ek enn limoralite inkrwayab. Bann dimounn met paryaz pou gete kisannla ki pli violan, pli imoral ek pli kriel. Bann program televizion ki bann dimounn ti trouv move dan bann lane 1950, zordi boukou konsider sa kouma bann program akseptab pou bann fami. Boukou finn remarke ki bann omosexiel ena enn gran linflians dan domenn divertisman ek lamod, ek zot fer tou dimounn konn zot fason viv. Nou bien rekonesan ki nou konn panse Bondie konsernan sa bann kitsoz-la!​—Lir Jude 14, 15.

¹⁰ Nou kapav osi konpar kondwit rebel ki enn zenn ti ena dan bann lane 1950 ek seki bann zenn pe fer zordi. Par exanp, dan sa lepok-la bann paran ti trakase​—ek zot ti ena rezon​—pangar zot zanfan ti pe fime, bwar lalkol, ouswa danse dan enn fason indesan. Me zordi, souvan nou tann bann nouvel ki sok nou: Enn zelev 15 an inn tir kout bal lor so bann kamarad lekol, li’nn touy 2 zanfan ek 13 inn blese. Enn group adolesan ki ti sou, ti asasinn enn tifi nef an san okenn pitie ek ti bat so papa ek so kouzin. Dan enn pei l’Asie, lor enn peryod di-z-an, lamwatie bann krim, inn komet par bann zenn. Eski kikenn kapav dir ki bann kondision zordi pa pe vinn pli pir?

11. Kifer boukou dimounn pa realize ki bann kondision pe vinn pli pir?

¹¹ Lapot Pierre ti dir: “Dan bann dernie zour pou ena bann moker avek zot mokri, ki pou azir dapre zot prop dezir ek ki pou dir: ‘Kot sa prezans ki li ti promet la? Wi, depi lamor nou bann anset, tou kitsoz pe kontigne parey kouma zot ti ete depi koumansman kreasion.’” (2 Pierre 3:3, 4) Kifer sertin dimounn reazir koumsa? Li paret ki plis nou trouv enn kitsoz, mwins nou pran li kont. Par exanp, si kondwit enn bon kamarad sanze enn sel kout, sa kapav sok nou. Me si latitid ek moralite bann dimounn dan lasosiete sanze tigit par tigit lor enn long peryod letan, kitfwa nou pa pou remark sa. Selman, sa sanzman dan moralite bann dimounn la, bien danzere.

12, 13. (a) Kifer fode pa nou dekouraze par bann levennman ki pe pase dan lemond? (b) Ki pou ed nou fer fas ar bann dernie zour ki “difisil pou siporte”?

¹² Lapot Paul ti averti nou ki “dan bann dernie zour,” bann kondision mondial pou “difisil pou siporte.” (2 Tim. 3:1) Me sa pa vedir ki li inposib pou siport sa bann kondision-la, alor fode pa nou per pou fer fas ar sa realite-la. Avek led Jéhovah, so lespri sin, ek kongregasion, nou kapav reisi fer fas ar ninport ki sitiasion ki dekouraz nou ek ki fer nou per, ek kontign res fidel anver Jéhovah. Nou pou reisi fer sa gras-a “pwisans ki plis ki seki normal” ki Bondie donn nou, pa par noumem.​—2 Cor. 4:7-10.

¹³ Li bon nou remarke ki Paul ti koumans so profesi lor bann dernie zour par lexpresion “mazinn sa bien.” Sa bann parol-la donn nou garanti ki sa profesi-la pou realize. Pena dout ki sa move lemond-la pou kontign vinn pli pir ziska ki Jéhovah amenn lafin. Bann istorien finn remarke ki, kan bann prinsip lebien ek lemal finn perdi valer pou bann dimounn, sa finn rwinn sertin sosiete ouswa sertin nasion. Me zame avan dan listwar, bann prinsip moral lemond antie finn perdi valer kouma zordi. Boukou dimounn kitfwa pa kone seki sa vedir, me bann levennman ki pe arive depi 1914 bizin konvink nou ki Rwayom Bondie pou biento tir tou lemal ki existe.

SA ZENERASION-LA PA POU DISPARET

14-16. Sit enn trwaziem rezon kifer nou krwar ki Rwayom Bondie pou “vini” biento.

¹⁴ Ena enn trwaziem rezon kifer nou kapav sir ki lafin pre. Seki finn pase parmi pep Bondie montre ki lafin pre. Par exanp, avan ki Rwayom Bondie etabli dan lesiel, enn group Kretien ki ena lesperans pou al dan lesiel ti bien aktif dan zot servis pou Bondie. Kan sertin kitsoz ki zot ti pe atann pou arive an 1914 pa finn arive, ki zot ti fer? Laplipar ti montre zot fidelite malgre bann leprev ek bann persekision ek zot ti kontign servi Jéhovah. Avek letan, laplipar​—sinon zot tou​—parmi bann ki ti ena lesperans pou al dan lesiel, ti res fidel ziska zot lamor.

¹⁵ Dan profesi ki Jésus ti done konsernan bann dernie zour, li ti dir: “Sa zenerasion-la pa pou disparet avan ki tou sa bann kitsoz-la arive.” (Lir Matthieu 24:33-35.) Nou konpran ki dan “sa zenerasion-la” ena de group Kretien ki ena lesperans pou al dan lesiel. Premie group-la ti vivan an 1914 ek zot ti bien konpran ki Christ ti vinn Lerwa sa lane-la. Bann ki ti form parti dan sa group-la pa ti zis vivan an 1914, me zot ti osi bann garson Bondie ki ti’nn gagn lespri sin, swa sa lane-la, swa avan sa lane-la.​—Rom. 8:14-17.

¹⁶ Tou bann Kretien ki dan deziem group ek ki form parti dan “sa zenerasion-la” pa ti zis vivan kan premie group ti lor later. Me Bondie ti swazir zot par so lespri sin dan lepok ki sertin manb dan sa premie group-la ti ankor vivan lor later. Alor, pa tou Kretien ki ena lesperans pou al dan lesiel ki form parti dan “sa zenerasion” ki Jésus ti mansione la. Zordi, bann ki dan deziem group zot bien aze. Pourtan, seki Jésus ti dir dan Matthieu 24:34 donn nou lasirans ki omwin sertin dan “sa zenerasion-la pa pou disparet” avan ki zot trouv gran detres koumanse. Sa bizin donn nou plis lasirans ki res zis enn tigit letan avan ki Lerwa Rwayom Bondie detrir bann move dimounn ek amenn enn lemond nouvo kot pou ena lazistis.​—2 Pierre 3:13.

BIENTO CHRIST POU KONPLET SO VIKTWAR

17. Ki konklizion nou kapav tire lor sa trwa prev ki nou finn examine la?

¹⁷ Ki konklizion nou kapav tire lor sa trwa prev ki nou finn examine la? Jésus ti averti nou ki nou pa pou konn ni zour ni ler exakt kan lafin pou vini. (Mat. 24:36; 25:13) Me Paul ti dir ki nou konn “sa lepok-la” setadir nou kone kan bann dernie zour ti pou koumanse. (Lir Romains 13:11.) Nou pe viv dan sa lepok-la. Si nou pran kont bann profesi Labib ek seki Jéhovah ek Jésus pe fer, nou pou trouv bann prev bien kler ki lafin sa move lemond-la bien pre.

18. Ki pou ariv bann ki refiz aksepte Jésus Christ kouma zot Lerwa?

¹⁸ Bann ki refiz pou rekonet gran lotorite ki Bondie inn donn Jésus Christ, Kavalie ki pe mont lor enn seval blan, biento pou bizin admet zot erer. Zot pa pou kapav sape. Boukou dan sa lepok-la pou per ek zot pou kriye: “Kisannla ki kapav tini debout?” (Rev. 6:15-17) Pourtan, dan prosin sapit liv Révélation nou gagn enn repons. Bann Kretien ki ena lesperans pou al dan lesiel, ek bann manb “gran lafoul” ki ena lesperans pou viv lor later, pou kapav “tini debout” sa zour-la parski zot pou ena faver Bondie. Apre sa, sa ‘gran lafoul-la’ pou gagn lavi sov pandan gran detres.​—Rév. 7:9, 13-15.

19. Si ou sir ki lafin pre, ki ou pe atann pou lavenir?

¹⁹ Si nou kontign pran kont bann profesi Labib ki pe realize dan nou lepok, nou pa pou les lemond Satan detourn nou. Nou pa pou aveg konsernan vre sinifikasion bann levennman ki pe pase dan lemond. Biento, Christ pou konplet so viktwar ek li pou detrir sa move lemond-la kan li pou fer lager final avek lazistis. (Rév. 19:11, 19-21) Mazine ki kantite nou pou kontan apre sa!​—Rév. 20:1-3, 6; 21:3, 4.