Eski Bann Temwin Jéhovah Krwar an Jésus?

LAFWA AN JÉSUS LI BIEN INPORTAN

Anthony: Bonzour Tim, kontan retrouv twa.

Tim: Mwa si parey Anthony.

Anthony: Mo’nn amenn bann dernie nimero Latour Degard ek Réveillez vous ! pou twa. Mo panse to pou bien kontan bann lartik ki ena ladan.

Tim: Mersi. Ofet, mo kontan to’nn vinn get mwa parski mo ti ena enn kitsoz pou demann twa.

Anthony: OK, ki to ti pou demann mwa?

Tim: To kone lot zour la mo ti pe koz avek mo koleg travay lor bann panfle ki to’nn donn mwa, mo ti pe dir li kouma sa bien interesan. Me, li’nn dir mwa fode pa mo lir sa parski bann Temwin Jéhovah pa krwar an Jésus. Mo’nn dir mo koleg prosin fwa to vini, mo pou demann twa sa. Eski li vre sa?

Anthony: Mo bien kontan to’nn koz sa ar mwa. An realite, li pli bon to demann enn Temwin Jéhovah limem ki to al demann enn lot dimounn. Apre tou, si to anvi konn krwayans enn dimounn, meyer mwayin se demann dimounn-la, pa vre?

Tim: Samem mo’nn panse.

Anthony: Laverite se ki bann Temwin Jéhovah krwar an Jésus. An realite, nou mem panse ki li bien inportan ki nou ena lafwa an Jésus pou nou gagn delivrans.

Tim: Se seki mo’nn panse mo’si. Me kan mo koleg inn dir mwa sa, enn kantite kestion inn vinn dan mo lespri. Mo krwar zame nou’nn koz lor la avan.

Anthony: To permet mwa montre twa de-trwa verse Labib ki montre linportans pou ena lafwa an Jésus? Se bann verse ki bann Temwin Jéhovah souvan servi dan zot predikasion.

Tim: OK.

Anthony: Pou koumanse nou kapav get seki Jésus limem ti dir dan Jean 14:6. Sa bann parol-la form parti enn konversasion ki Jésus ti gagne avek enn so bann zapot. Nou lir: “Momem semin, ek laverite ek lavi. Personn pa kapav vinn kot mo Papa san ki li pas par mwa.” Dapre sa verse-la, ki sel mwayin nou ena pou apros Jésus so Papa?

Tim: Atraver Jésus.

Anthony: Bien bon. Bann Temwin Jéhovah krwar sa. An realite, sak lapriyer ki mo fer, mo fer li o-nom Jésus. Tou bann Temwin Jéhovah fer parey.

Tim: Interesan sa.

Anthony: Enn lot text ki nou kapav gete se Jean 3:16. Sa verse-la li telman inportan ki finn mem apel li Levanzil an miniatir. Si to ti kapav pran tou seki inn ekrir lor lavi Jésus lor later, lor so minister ek fer li vinn enn sel verse, se sa verse-la ki to ti pou gagne. To ti pou kontan lir sa text-la?

Tim: OK. Li dir “Parski Bondie finn telman kontan lemond ki Li finn donn so sel Garson ki Li finn kree direk, pou ki tou seki ena lafwa an li pa detrir, me gagn lavi eternel.”

Anthony: Mersi. Eski to konn sa verse-la?

Tim: Wi, plizir fwa mo’nn tann sa, ek souvan mo trouv sa lor bann lafis, lor bann stikerz.

Anthony: Se enn verse ki boukou dimounn kone. Si to examinn li bien to pou remarke ki Jésus inn dir ki se gras-a lamour Bondie ki bann imin kapav enn zour gagn lavi pou touletan. Me ki zot bizin fer?

Tim: Nou bizin ena lafwa.

Anthony: Wi, sirtou lafwa an so Sel Garson ki Li’nn kree direk, setadir Jésus Christ. Ek sa pwin-la, setadir ki lafwa an Jésus permet nou gagn lavi eternel, nou trouv sa zisteman lor paz 2 sa magazinn ki mo’nn donn twa la. Konsernan lobzektif sa magazinn Latour Degard la, get enn kitsoz ki sa magazinn-la fer: Li “ankouraz nou pou ena lafwa dan Jésus Christ, ki’nn mor pou ki nou kapav gagn lavi pou touletan ek ki pe regne zordi kouma Lerwa dan Rwayom Bondie.”

Tim: Get sa hein, dan zot magazinn mem ena prev ki zot, bann Temwin Jéhovah, zot krwar an Jésus.

Anthony: Exakt.

Tim: Be alor, kifer bann dimounn dir ki zot pa krwar an Jésus?

Anthony: Ena plizir rezon kifer. Dan sertin ka, zot zis repet seki zot inn tann lezot dimounn dir. Ouswa zot pret ki’nn ansegn zot sa.

Tim: Sa fer mwa pans enn zafer. Li posib ki bann dimounn dir sa parski zot port nom Temwin Jéhovah, pa Temwin Jésus.

Anthony: Li posib.

Tim: Be kifer zot koz lor Jéhovah sa kantite-la?

‘MO’NN FER KONN TO NOM’

Anthony: Enn rezon, se parski nou krwar ki li bien inportan ki nou servi nom personel Bondie, setadir Jéhovah, parey kouma so Garson, Jésus, ti fer. Get seki Jésus ti dir kan li ti priye so Papa. Nou trouv sa dan Jean 17:26. Eski to ti pou kontan lir sa verse-la?

Tim: Biensir. “Mo’nn fer zot konn to nom ek mo pou fer konn sa, pou ki lamour ki to finn ena pou mwa, kapav dan zot, ek pou ki mwa mo ini avek zot.”

Anthony: Mersi. Remarke ki Jésus inn dir. Li’nn dir ki li’nn fer konn nom Bondie. Dapre twa, kifer li’nn fer sa?

Tim: Hmm. Mo pa kone.

Anthony: Pou nou konpran sa pli bien, kitfwa nou kapav get enn lot verse. Mo pe pans Actes 2:21. Li dir: “Tou seki invok nom Jéhovah pou sove.” To pou dakor avek mwa si mo dir twa ki si invok nom Jéhovah li enn kondision bien inportan pou ki enn dimounn gagn delivrans, alor sirman Jésus ti bizin konn sa kondision-la.

Tim: Be wi, biensir.

Anthony: Alor si Jésus ti bien anvi ki so bann disip konn ek servi nom Bondie, se sirtou parski zot delivrans ti depann lor la. Ek se enn parmi bann rezon prinsipal kifer nou koz lor Jéhovah sa kantite-la. Nou panse ki li inportan ki nou fer bann dimounn konn nom personel Bondie ek ed zot pou invok sa nom-la.

Tim: Me, mem si bann dimounn pa konn nom Bondie, ouswa pa servi sa nom-la, zot kone lor kisannla zot pe koze kan zot fer referans ar Bondie.

Anthony: Li posib. Malgre sa, kan Bondie inn fer nou konn so nom, Li’nn ouver enn semin pou ki nou kapav apros ar Li pli fasilman.

Tim: Ki to pe rod dir?

Anthony: Reflesi enn ti kout: Nou pa ti oblize konn nom Moïse. Nou ti kapav konn li zis kouma sa zom ki ti separ Lamer Rouge ouswa sa zom ki ti gagn Dis Komannman la. Li parey pou Noé osi. Kifer nou bizin konn so nom? Labib ti kapav zis koz lor li kouma sa zom ki ti ranz lars la ek ki ti sov so fami ek bann zanimo. An realite, mem Jésus Christ osi, nou ti kapav zis konn li kouma sa kikenn ki’nn sorti dan lesiel ki’nn vinn mor pou nou bann pese la, pa vre?

Tim: Mo sipoze.

Anthony: Me Bondie inn fer sir ki nou konn nom sa bann dimounn-la. Sa sanz tou kan nou konn nom enn dimounn. Mem si zame nou pa’nn zwenn Moïse, Noé, ouswa Jésus, lefe ki nou konn zot nom sa rann zot pli reel devan nou lizie.

Tim: Zame mo’nn pans sa, me li ena sans!

Anthony: Ek sa se enn lot rezon kifer bann Temwin Jéhovah servi nom Bondie sa kantite-la. Nou anvi ed bann dimounn pou devlop lafwa an Jéhovah ek konsider Li kouma enn Kikenn ki reel, enn Kikenn avek ki zot kapav vinn pros. Anmemtan, nou met bien laksan lor rol ki Jésus ena dan nou delivrans. Mo ti pou kontan montre twa enn lot verse ki met bien laksan lor sa pwin-la.

Tim: OK.

Anthony: Enn tipe avan to rapel nou ti lir Jean 14:6 kot Jésus ti dir ki limem “semin, ek laverite ek lavi.” Anou get de-trwa verse avan ek remarke ki li dir dan Jean 14:1. Eski to ti pou kontan lir seki Jésus dir dan dernie parti sa verse-la?

Tim: Li dir: “Exers lafwa an Bondie ek exers lafwa an mwa.”

Anthony: Mersi. Alor, dapre sa verse-la, eski nou bizin swazir ant sa de kitsoz-la; swa nou ena lafwa an Jésus swa nou ena lafwa an Jéhovah?

Tim: Non. Jésus inn dir ki nou bizin ena toulede.

Anthony: Exakteman. Ek mo sir ki to pou dakor avek mwa, ki zis dir nou ena lafwa an Bondie ek an Jésus, li pa ase. An realite, nou bizin viv dan enn fason ki montre sa.

Tim: Sa se sir.

Anthony: Me kouma enn kikenn kapav montre ki li ena vremem lafwa an Bondie ek an Jésus? Kitfwa nou kapav koz lor la enn lot fwa.a

Tim: Wi, mo ti pou bien kontan.