Ed Nou Bann Konpagnon Kretien Ki’nn Divorse​—Kouma?

Kitfwa ou konn enn ouswa mem plizir dimounn ki’nn divorse. Se parski divors ase komin azordi. Par exanp, enn resers ki’nn fer dan Pologne montre ki bann dimounn ki ena plis tandans pou divorse, se bann ki ena 30 an ek ki ena ant trwa ek si-z-an maryaz. Me se pa zis bann dimounn sa laz-la ki divorse.

Ofet, Linstitision Kod Familial dan l’Espagne dir: “Bann sif montre ki [dan l’Europe] lamwatie bann ki marye pou divorse.” Li parey osi dan lezot pei devlope.

ZOT FER FAS AR TOU SORT KALITE SANTIMAN

Ki arive kan enn dimounn divorse? Dan Les l’Europe, enn konseye lor maryaz ki ena lexperyans dir: “Divors zis rann ofisiel seki’nn fini arive​—enn relasion ki’nn kase ek ki’nn fini par enn separasion, enn sitiasion ki fer soufer lor plan afektif.” Li ti azoute ki apre divors, souvan “ena tou sort kalite santiman bien for​—koler, regre, desepsion, dezespwar, ek laont” ki fatig bann ki divorse. Parfwa, sa bann santiman-la fer zot pans swisid. Li kontigne: “Kan lakour finn aksepte zot divors, zot bizin fer fas ar lezot santiman. Sitan enn dimounn ki’nn divorse santi li initil ek abandone, kitfwa li demann limem: ‘Aster ki mo’nn divorse, ki mo pou devini? Ki mo pou fer ar mo lavi?’”

Kan li rapel seki li ti resanti de-trwa lane avan, Ewa dir: “Kan mo divors ti vinn ofisiel, mo ti gagn extra onte kan mo bann vwazin ek mo bann koleg ti pe apel mwa ‘enn divorse.’ Mo ti bien ankoler. Mo de zanfan ti res avek mwa apre divors, alor mo ti bizin amenn rol mama-papa toulede.”a Adam ki ti servi kouma ansien pandan 12 an ek ki lezot ti respekte, dir: “Mo’nn telman perdi lestim pou momem ki parfwa mo extra ankoler, ek mo anvi elwagn mwa ar zot tou.”

ZOT GAGN DIFIKILTE POU REVINN STAB

Sertin ti telman trakase ar seki pe atann zot dan lavenir, ki zot inn gagn difikilte pou revinn stab​—mem apre plizir lane divors. Kitfwa zot panse ki lezot pa interese ar zot. Anplis, enn zournalis dan sa domenn-la dir ki apre divors zot bizin “sanz zot bann labitid ek aprann regle bann problem par zotmem.”

Stanisław rapel: “Kan nou ti divorse, mo ex-fam ti anpes mwa vinn get mo de tifi. Sa ti fer mwa panse ki personn nepli interese ar mwa ek ki mem Jéhovah ti’nn abandonn mwa. Mo ti nepli anvi viv. Avek letan, mo ti realize ki mo ti ena enn move fason panse.” Wanda osi, enn ser divorse, ti trakase parski li pa ti kone ki pou ariv li dan lavenir. Li dir: “Mo ti sir ki apre enn sertenn tan, bann dimounn​—mem mo bann konpagnon Kretien​—pa ti pou interese ar mwa ek mo bann zanfan. Selman, se asterla ki mo rann mwa kont ki kantite bann frer ti soutenir nou ek ti ed mwa amezir ki mo ti pe fer zefor pou elve mo bann zanfan pou ki zot vinn bann adorater Jéhovah.”

Atraver sa bann lexanp-la, nou konpran ki apre zot divors, sertin bien afekte par bann santiman negatif. Zot ena bann panse negatif lor zotmem parski zot panse ki zot pena valer ek ki zot pa merite ki lezot pran zot kont. Anplis, zot kapav mem koumans kritik lezot. Alafin, zot kapav koumans panse ki bann dan kongregasion pena santiman ek pa konpran zot. Me, lexanp Stanisław ek Wanda montre ki bann ki’nn divorse, avek letan, kapav realize ki zot bann frer ek ser vremem interese ar zot. Ofet, bann Kretien inn ed dan enn fason extraordiner bann ki’nn divorse, mem si o-koumansman bannla pa finn remark seki sa bann Kretien-la inn fer pou zot.

ZOT SANTI ZOT TOUSEL EK REZETE

Pa bliye ki mem si nou fer tou seki nou kapav pou ed bann ki’nn divorse, kitfwa detanzantan zot pou santi zot tousel. Sirtou bann ser ki’nn divorse kapav ena linpresion ki bien tigit dimounn interese ar zot. Alicja rekonet: “Sa fer wit an depi ki mo’nn divorse. Kanmem sa, parfwa mo ankor santi ki mo pena valer. Dan sa bann moman-la, mo ena tandans pou al dan mo kwin tousel pou plore akoz mo sitiasion.”

Li vre ki enn dimounn divorse kapav ena sa bann santiman-la, me Labib pa konsey li pou res tousel dan sa bann moman-la. Si li pa ekout sa konsey-la, sa kapav amenn li rezet “sazes ki pratik.” (Prov. 18:1) Me enn dimounn ki santi li tousel bizin konpran ki li pou azir avek sazes si li evit rod konsey ek rekonfor a-sak fwa ar enn dimounn lot sex. Koumsa, li pa pou gagn lokazion pou devlop bann santiman romantik ki pa apropriye.

Nou bann konpagnon Kretien ki’nn divorse kitfwa touletan pe bizin fer fas ar tou sort kalite santiman, par exanp zot trakase pou lavenir, santi zot tousel ouswa rezete. Nou rekonet ki li normal ki zot ena sa bann santiman-la ek anmemtan li difisil pou zot siport sa. Alor, nou pou imit Jéhovah kan nou soutenir sa bann frer ek ser la avek fidelite. (Ps. 55:22; 1 Pierre 5:6, 7) Nou kapav sir ki zot pou apresie ninport ki led ki nou donn zot. Ofet, se dan kongregasion ki zot pou gagn led ar bann vre kamarad!​—Prov. 17:17; 18:24.