« Eurêka-Drame » Ti Ed Boukou Dimounn pou Trouv Laverite ki Ena dan Labib

« EURÊKA! » Sa mo-la vedir “Mo’nn trouve!” Dan 19^em siek, boukou dimounn ti pe al rod lor dan Californie, l’États-Unis. Kan enn dimounn ti trouv lor, li ti kriye « Eurêka! » Selman, Charles Russell avek bann Etidian Labib ti trouv enn kitsoz ki ti ena boukou plis valer: laverite ki ena dan Labib, ek zot ti bien anvi partaz sa avek lezot.

An 1914, plizir milyon dimounn dan bann gran lavil ti get « Photo-Drame de la Création, » enn prozeksion wit-er tan ki ti kouver enn peryod plizir milye lane ek ki Asosiasion Internasional Bann Etidian Labib (I.B.S.A.) ti prodir. Dan sa prozeksion Biblik-la, ti ena bann diapozitiv an kouler, bann ti fim inpresionan, enn bon narater ki ti koze, ek enn zoli lamizik klasik. Tousala ti rakont listwar limanite, sa ti fer bann spektater vwayaze dan letan, depi lepok kreasion ziska lafin Regn Mil an Jésus Christ.​—Rév. 20:4.a

Me kouma bann dimounn ki ti res dan bann ti lavil ek dan lakanpagn ti pou kapav get sa fim-la? Pou fer sir ki pa bliye okenn dimounn ki kontan laverite, an Out 1914, I.B.S.A. ti fer « Eurêka-Drame, » enn version portab « Photo-Drame, » me san bann fim. Ti ena trwa kalite « Eurêka-Drame, » ek sakenn ti disponib an plizir lang. Premie-la ti apel « Eurêka X » kot ti ena tou seki narater ti dir ek lamizik. Deziem-la ti apel « Eurêka Y, » ladan ti ena tou bann lanrezistreman ek bann zoli diapozitiv bien kolore. Trwaziem-la ti fer pou bann fami servi ek li ti apel « Eurêka-Drame pour les familles » kot ti ena sertin parti seki narater ti dir ek bann kantik. Li ti posib pou aste bann fonograf ek bann prozekter bomarse.

Bann Etidian Labib pa ti bizin servi enn prozekter ouswa enn gran lekran, alor, zot ti kapav fer sa prezantasion-la gratis dan bann lakanpagn ek sa ti permet zot pou anons mesaz lor Rwayom Bondie dan bann nouvo teritwar. « Eurêka X » ti zis enn anrezistreman odio ki bann Etidian Labib ti kapav pase pandan lazourne ouswa aswar. Ti kapav servi prozekter ki ti pas « Eurêka Y » san servi kouran, me ti kapav servi enn lalanp ki ti mars avek gaz acétylène. Latour Degard an Finwa ti dir: “Nou kapav montre sa bann diapozitiv-la dan preske ninport ki landrwa!” Ek vremem zot ti kapav fer sa!

Olie ki bann Etidian Labib ti lwe bann gran lasal kot ti fer bann spektak, zot ti fer tou pou gagn bann lasal gratis kouma par exanp bann lasal klas, bann tribinal, bann lagar trin, ek mem bann salon dan bann gran lakaz. Zot ti pas plizir prozeksion anplener. Zot ti met enn gran dra blan lor miray enn lagranz, ek sa ti servi kouma enn “lekran.” Anthony Hambuch, enn manb parmi lekip prozeksion « Eurêka » ti ekrir: “Bann fermie ti ranz enn ti stad dan zot verze kot zot ti met bann rondin pou bann dimounn asize ek get sa prezantasion-la.” Sa lekip-la ti servi enn “saret-dram” pou transport zot ekipman, zot bagaz, ek bann materyel pou kanpe.

Dan lasistans, ti kapav ena enn tigit dimounn ouswa plizir santenn dimounn. An Amérique, dan enn lavil kot ena 150 abitan, 400 dimounn ti vinn asiste enn prozeksion ki ti fer dan enn lekol. Dan lezot landrwa, sertin finn mars apepre 16 kilomet ale-retour pou get « Eurêka-Drame. » An Suède, bann vwazin Charlotte Ahlberg ti vinn dan so ti lakaz pou ekout bann anrezistreman. Sa ti “bien tous zot.” Dan enn lavil bien izole an Australie, 1,500 dimounn ti vinn asiste enn prozeksion. Latour Degard ti dir ki bann “profeser ek bann zelev [dan bann kolez ek bann liniversite,] ti bien apresie bann zimaz ek lanrezistreman ki ti pase lor fonograf.” Mem dan bann landrwa kot ti ena bann sinema, « Eurêka-Drame » ti popiler.

KILTIV BANN LAGRIN LAVERITE

Bann Etidian Labib ti servi « Eurêka-Drame » kan zot ti organiz bann klas ki apel « Oeuvre d’extension des classes. » Zot ti avoy bann orater dan bann landrwa kot zot ti form bann nouvo klas setadir bann kongregasion. Li difisil pou dir komie dimounn ti get « Eurêka-Drame. » Ti pe servi plizir « Eurêka-Drame » dan enn fason permanan. Pourtan, an 1915, zis 14 lekip « Eurêka-Drame » lor 86 ti avoy enn rapor regilierman. Dan rapor ki bann frer ti fer lafin lane, zot ti bien sagrin ki bann sif ti inkonple, me zot ti dir ki kanmem, plis ki enn milyon dimounn ti get « Eurêka-Drame. » Parmi zot, anviron 30,000 dimounn ti demann bann piblikasion baze lor Labib.

Kitfwa « Eurêka-Drame » pa finn les enn gran souvenir dan listwar, me depi l’Australie ziska l’Argentine, depi l’Afrique du Sud ziska bann lil Britanniques, l’Inde ek bann lil Caraïbes, li paret ki plizir milyon dimounn inn get sa prezantasion extraordiner-la. Boukou parmi zot finn trouv laverite ki ena dan Labib​—enn trezor ki ena plis valer ki lor​—ek zot ti kapav kriye « Eurêka! »