Kifer Ou Bizin Interese ar Rwayom Bondie?

Plizir milyon dimounn atraver lemond met zot lespwar dan Rwayom Bondie. Zot swiv model Jésus, ki ti ansegn so bann disip pou priye: “Ki to regn vini. Ki to volonte fer lor later.”​—Matthieu 6:10, Louis Segond 1910.

Boukou dimounn vremem interese ar Rwayom Bondie. Me li paret ki laplipar relizion pa pe tro donn linportans sa Rwayom-la. An rapor avek sa, istorien H. G. Wells ti trouv sa extraordiner ki Jésus ti donn enn “gran linportans . . . lansegnman ki li ti apel Rwayom dan Lesiel,” ek pourtan Wells ti dir ki sa lansegnman-la “pena gran linportans dan . . . lansegnman laplipar bann legliz Kretien.”

Kontrerman ar sa bann legliz-la, bann Temwin Jéhovah donn boukou linportans Rwayom Bondie. Par exanp, nou magazinn prinsipal ki ou pe lir la, li pibliye dan 220 lang. Pou sak nimero ki sorti, inprim apepre plis ki 46 milyon kopi, seki fer li vinn magazinn pli distribie dan lemond. Ki so mesaz prinsipal? Remark so tit konple: Latour Degard Pe Anons Rwayom Jéhovah.a

Kifer bann Temwin Jéhovah fer tou sa zefor-la pou proklam Rwayom Bondie? Enn rezon, se parski nou krwar ki Rwayom Bondie se mesaz prinsipal ki ena dan liv pli inportan dan lemond​—Labib. Anplis, nou sir ki Rwayom Bondie se sel vre solision pou bann problem ki limanite pe gagne azordi.

Kan bann Temwin Jéhovah atir latansion lor Rwayom Bondie, zot montre ki zot pe fer zefor pou swiv lexanp Jésus. Kan li ti lor later, Jésus ti montre ki Rwayom Bondie ti kitsoz pli inportan dan so lavi ek dan so minister. (Luc 4:43) Kifer Rwayom Bondie ti vremem inportan pou Jésus? Ek ki bienfe li pou fer ou gagne? Nou invit ou examinn repons ki Labib done dan bann prosin lartik.