Rwayom Bondie​—Ki Bienfe Li Pou Fer Ou Gagne?

Kan ou’nn lir bann lartik avan, kitfwa ou’nn arive konpran ki Rwayom Bondie ena enn gran linportans pou bann Temwin Jéhovah. Ek sirman ou ti anvi konn plis lor sertin benediksion ki sa Rwayom-la pou amene dan lavenir. Anmemtan, kitfwa ou’nn demann oumem si sa bann promes-la vremem pou realize.

Li bon ki ou pridan olie ki ou krwar tou seki ou tande. (Proverbes 14:15) Dan enn sertenn fason, kan ou pridan, ou pe azir parey kouma bann Béréen dan lepase.a Kan premie fwa zot ti tann bon nouvel lor Rwayom Bondie, bann Béréen ti aksepte seki zot ti tande, pa zis parski zot ti anvi ki sa li vre. Okontrer, zot ti examinn bann Lekritir an profonder “pou gete si sa bann kitsoz-la ti exakt.” (Actes 17:11) Savedir ki bann Béréen ti konpar bon nouvel ki zot ti tande avek seki bann Lekritir dir. Avek letan, zot ti sir ki bon nouvel ti vremem baze lor Parol Bondie.

Bann Temwin Jéhovah ankouraz ou pou fer parey. Gras-a enn letid Labib gratis, nou donn ou lokazion pou konpar seki bann Temwin Jéhovah krwar lor Rwayom Bondie avek seki Labib ansegne.

Kan ou pou etidie Labib, anplis ki ou pou aprann lor Rwayom Bondie ou pou kapav gagn repons sertin kestion inportan.

• Kotsa nou sorti?

• Kifer nou lor later?

• Kifer Bondie permet soufrans?

• Ki arive kan nou mor?

• Eski later pou detrir?

• Ki bizin fer pou ena enn lavi fami ki ere?

Me seki pli inportan, kan ou etidie Labib, sa pou ed ou “vinn pros ar Bondie.” (Jacques 4:8) Ek plis ou vinn pros ar Bondie, plis ou pou trouve ki bann bienfe ou kapav gagne gras-a Rwayom Bondie​—pa zis asterla me pou touletan. Dan enn lapriyer ki li ti fer ar so Papa, Jésus ti dir: “Samem ki vedir lavi eternel, ki zot arive konn twa, sel vre Bondie, ek sa kikenn ki to finn avoye la, Jésus Christ.”​—Jean 17:3.