REPONS POU BANN KESTION BIBLIK

Kouma ou kapav vinn enn bon paran?

Enn lakaz kot bann paran kontan ek respekte sakenn so kamarad, se enn plas ideal pou enn zanfan grandi (Kolosien 3:14, 19) Bann bon paran kontan zot zanfan ek felisit zot, parey kouma Zeova ti felisit so Garson.​—Lir Matie 3:17.

Nou Papa ki dan lesiel ekout so bann serviter, ek Li pran kont zot bann santiman. Li bon ki bann paran imit Zeova ek ekout seki zot bann zanfan ena pou dir. (Zak 1:19) Zot bizin pran kont santiman zot bann zanfan, mem si li negatif.​—Lir Nonb 11:11, 15.

Kouma ou kapav elve bann zanfan ek fer zot vinn responsab?

Antan ki enn paran, ou ena drwa pou met bann lalwa dan ou lakaz. (Efezien 6:1) Swiv lexanp Bondie. Li montre lamour pou so bann zanfan kan Li etabli bann lalwa ek Li fer zot kone ki bann konsekans zot pou gagne si zot dezobeir Li. (Zenez 3:3) Me Bondie pa fors bann dimounn pou obeir Li. Okontrer, Li montre zot ki bann bienfe zot pou gagne kan zot fer seki bien.​—Lir Izai 48:18, 19.

Ou bizin ena lobzektif pou ed ou bann zanfan pou kontan Bondie. Lerla zot pou konport zot bien mem kan ou pa avek zot. Parey kouma Bondie ansegn nou par so lexanp, ed ou bann zanfan pou kontan Bondie par ou lexanp.​—Lir Deteronom 6:5-7; Efezien 4:32; 5:1.