Ena enn Lespwar pou Bann Ki’nn Mor—Kifer Ou Kapav Sir?

Eski li bet pou krwar ki bann ki’nn mor pou reviv enn zour? Lapot Pol pa ti pans sa. Bondie ti inspir li pou ekrir: “Si lesperans ki nou ena dan Lekris li zis pou sa lavi la, noumem bann dimounn pli malere ki kapav ena. Me non; Lekris finn resisite depi bann mor, limem premie resisite.” (1 Korintien 15:19, 20) Pol ti sir ki pou ena enn rezireksion. An realite, rezireksion Zezi ti donn sa garanti-la.a (Zistwar Bann Apot 17:31) Se akoz sa ki Pol ti apel Zezi “premie resisite”​—limem premie ki’nn resisite pou viv pou touletan. Si Zezi ti premie resisite, alor li lozik ki ti pou ena lezot apre.

Get enn lot rezon kifer ou kapav sir ki pou ena enn rezireksion. Zeova Li enn Bondie ki koz laverite. “Bondie zame koz manti.” (Tit 1:2) Zeova zame inn koz manti, ek zame Li pou koz manti. Alor, eski Li pou promet ki pou ena rezireksion, montre ki Li kapav resisit bann dimounn, ek apre pa fer kouma Li’nn promet? Inposib!

Kifer Zeova inn pran bann dispozision pou ki ena rezireksion dan lavenir? Parski Li kontan bann dimounn. Zob ti demande: “Si enn zom mor, eski li kapav reviv? . . . To pou apel mwa, ek mwa mo pou reponn twa. To pou atann avek inpasians pou trouv travay ki to lame finn fer.” (Zob 14:14, 15) Zob ti sir ki so Papa ki dan lesiel pou bien anvi resisit li. Eski Bondie inn sanze? Labib dir: “Momem Zeova; mo pa sanze.” (Malaki 3:6) Kan enn paran perdi so zanfan ki li bien kontan, li ena enn gran dezir pou ki li releve. Parey, Bondie ankor ena enn gran dezir pou trouv bann mor resisite, an bonn sante ek ere. Me kontrerman ar bann dimounn, Bondie Li, Li ena pouvwar pou fer seki Li anvi.​—Psom 135:6.

Zeova pou donn so Garson enn gran pouvwar. Gras-a sa, Zezi pou kapav donn bann dimounn ki an-dey enn gran lazwa. Me ki santiman Zezi ena konsernan rezireksion? Avan ki li resisit Lazar, Zezi ti trouve kouma bann ser ek bann kamarad Lazar ti bien tris, ek akoz sa li ti “plore.” (Zan 11:35) Enn lot fwa, Zezi ti zwenn enn vev ki sorti Nainn. Sa vev-la so sel garson ti mor. “Leker [Zezi] ti fer mal, e li [ti] dir mama la, ‘pa plore.’” Deswit Zezi ti resisit so garson. (Lik 7:13) Sa montre ki Zezi bien tris kan li trouv bann dimounn sagrin ouswa mor. Esey mazine ki kantite li pou kontan kan li pou donn bann dimounn enn rezon pou zot dan lazwa olie ki zot sagrin!

Eski ou’nn perdi enn kikenn dan lamor? Kitfwa pou ou, lamor se enn problem ki pena solision. Me ena enn solision​—Bondie pou resisit bann dimounn par mwayin so Garson. Rapel ki Bondie anvi ki ou trouv sa rezireksion-la. Kan pou ena rezireksion, Li anvi ki ou la pou may bann ki ou kontan. Esey mazine zot pe fer bann plan ansam konsernan enn lavenir ki pou dire touletan, kot zame zot pou dir zot kamarad adieu!

Lionel, ki nou ti mansione dan premie lartik, dir: “Finalman, mo ti aprann lor lesperans rezireksion. O-koumansman, li ti difisil pou krwar, ek mo pa ti fer konfians sa dimounn ki ti dir mwa sa la. Me mo’nn verifie dan Labib ek mo’nn trouve ki sa ti vre! Mo pe atann avek inpasians zour kot mo pou retrouv mo granper.”

Eski ou ti pou kontan konn plis? Bann Temwin Zeova pou bien kontan montre ou dan ou prop Labib kifer zot sir ki pou ena rezireksion dan lavenir.b