Eski resurrection li réel pou ou?
“Pou ena enn resurrection.” —Actes 24:15.
1. Kifer la mort li enn kitsoz ki parette sur, ki nou pa kapav barré?
“Dan sa lé-monde-la, a part la mort ek taxe, nanyin pa sur.” C’est Benjamin Franklin ki ti ecrire sa en 1789, ek sa ti marque beaucoup dimoune. Pourtant, beaucoup dimoune malhonnete triké lor zot taxe. Mais la mort li, li parette enn kitsoz ki sur, ki nou pa kapav barré. Par nou-mem, nou pa kapav empeche la mort vini. Li suive nou tou. Shéol, ki represente tombe kot tou dimoune allé, prend bann dimoune ki nou content, ek jamais li pa assez. (Proverbes 27:20) Mais anou guette enn pensée encourageant.
2, 3. (a) Mem si beaucoup pa realisé, kifer nou dire ki la mort li enn kitsoz ki kapav barré? (b) Ki nou pou examiné dan sa lartik-la?
2 Parole Jéhovah donne nou enn l’esperance sur ki enn jour pou ena enn resurrection, ki bann dimoune pou regagne la vie. C’est pa enn rêve, ek pena okenn la-force dan l’univers ki kapav empeche Jéhovah realise sa l’esperance-la. Mais beaucoup pa realisé ki pou certain dimoune, la mort li enn kitsoz ki kapav barré. Kifer nou dire sa? Parski enn “grand la-foule” ki personne pa kapav compté, pou survive pendant “la grande tribulation” ki pré pou vini. (Révélation 7:9, 10, 14) Apré sa, zot pou ena l’espoir pou vive pou touletan. Alors, pou zot, la mort li pa enn kitsoz ki obligé arrivé. En plus, “la mort pou detruire net.”—1 Corinthiens 15:26.
3 Pareil couma l’apotre Paul, nou bizin sur ki pou ena enn resurrection. Paul ti dire: “Pou ena enn resurrection bann dimoune ki juste ek bann dimoune ki pa juste, toulé-deux.” (Actes 24:15) Anou examine trois question en rapport avek resurrection. Premier question c’est kifer sa l’esperance-la li sur? Deuxieme, couma sa l’esperance-la kapav encourage ou personnellement? Ek troisieme, ki l’influence sa l’esperance-la kapav ena lor ou la-vie depuis asterla-mem?
Resurrection—Enn l’espoir ki sur
4. Couma resurrection li enn kitsoz fondamental dan projet Jéhovah?
4 Ena plusieurs kitsoz ki faire ki resurrection li enn l’esperance sur. Premierement, li enn kitsoz fondamental dan projet Jéhovah. Pa blié ki Satan finn pousse bann dimoune dan peché, ek zot gagne enn consequence ki zot pa kapav barré: la mort. A cause sa, Jésus ti dire lor Satan: “Kan li ti commencé, li ti enn criminel.” (Jean 8:44) Mais Jéhovah ti promette ki so “femme,” setadir so l’organisation dan le ciel, ti pou produire enn “descendance” ki ti pou crase la-tête “sa serpent originel-la,” setadir detruire Satan net. (Genèse 3:1-6, 15; Révélation 12:9, 10; 20:10) A mesure ki Jéhovah ti faire konn so projet ki ti concerne sa Descendance messianik-la, li ti clair ki sa Descendance-la ti pou faire plus ki zis detruire Satan. Parole Bondié dire: “C’est pou sa raison-la ki Garson Bondié finn manifesté, pou detruire seki Satan finn faire.” (1 Jean 3:8) A cause peché ki nou finn herité ar Adam, nou mort, ek la mort li principal kitsoz ki Satan finn faire ek ki Jéhovah pou detruire par Jésus Christ. Pou realise sa, sacrifice Jésus ek resurrection, zot bien important.—Actes 2:22-24; Romains 6:23.
5. Kifer resurrection pou glorifié nom Jéhovah?
5 Jéhovah bien decidé pou glorifié so nom ki saint. Satan inn sali nom Bondié ek li’nn fann bann fausseté. Li ti koz menti kan li ti dire ki Adam ek Ève “pa pou mort” si zot mange fruit ki Bondié ti defann zot mangé. (Genèse 2:16, 17; 3:4) Depuis sa, Satan inn faire tou pou ki bann fausseté coumsa fané. Par exemple, ena sa fausse l’enseignement ki faire croire ki kan enn dimoune mort, so nâme pa mort. Mais selman, grace a resurrection, Jéhovah pou faire koné ki tou sa bann l’enseignement-la fausse. Li pou prouvé pou touletan ki c’est Li tousel ki kapav garde enn dimoune vivant, ek redonne li la vie.
6, 7. Ki Jéhovah pensé lor resurrection bann dimoune, ek couma nou konn so bann sentiment?
6 Jéhovah bien envie ressuscite bann dimoune. La Bible bien clair lor sentiment ki Jéhovah ena lor sa sujet-la. Par exemple, guette seki Job, enn serviteur fidel ti dire: “Si enn zom fort, mort, eski li kapav revive encore? Toulé-jour pendant mo travail forcé, mo pou attann, ziska ki vinn largue moi. To pou appel moi, ek moi mo pou reponn toi. To pou attann avek impatience pou trouve travail ki to la-main finn faire.” (Job 14:14, 15) Ki sa bann parole-la vedir?
7 Job ti koné ki apré so la-mort, li ti pou bizin attann enn period lé-temps kot li ti pou dormi dan la mort. Li ti considere sa period-la couma enn “travail forcé,” kot li ti pou obligé attann ziska ki vinn largue li. Pou li, li ti sur ki sa pou arrivé. Job ti koné ki so soulagement ti pou vini. Kifer? Parski li ti konn bann sentiment Jéhovah. Jéhovah ti pou “attann avek impatience” pou retrouve so serviteur fidel. Oui, Bondié bien envie redonne la vie tou bann dimoune juste. Jéhovah pou donne aussi lezot dimoune possibilité pou vive pou touletan dan Paradi lor la terre. (Luc 23:43; Jean 5:28, 29) Parski c’est volonté Bondié pou faire sa, kisannla ki kapav arrete Li?
8. Couma Jéhovah inn ‘donne garantie’ concernant l’esperance ki nou ena pou l’avenir?
8 Nou l’esperance li garanti par resurrection Jésus. Kan Paul ti faire enn discours dan Athènes, li ti dire: “[Bondié] finn fixé enn jour kot Li pou juge bann habitant la terre avek la justice par enn zom ki Li finn choisir, ek Li finn donne tou dimoune enn garantie, kan Li finn ressuscite li.” (Actes 17:31) Certain parmi bann ki ti pé ecoute Paul ti bouffonne li kan zot ti tann koz lor resurrection. Mais enn tigit parmi zot ti vinn bann croyant. Kitfois kan zot ti tann dire ki sa l’esperance-la li garanti, sa ti attire zot l’attention. Kan Jéhovah ti ressuscite Jésus, Li ti faire pli grand mirak ki ena. Li ti redonne so Garson la vie couma enn l’esprit bien puissant. (1 Pierre 3:18) Kan Jésus ti ressuscité, li ti mem gagne enn pli grand position ki li ti ena dan le ciel avant li vinn lor la terre. Li ti gagne enn la-vie immortel ek li ti vinn deuxieme personnage pli grand dan l’univers, zis apré Jéhovah. Alors, Jésus li dan enn position pou prend bann responsabilité extraordinaire ki so Papa donne li. C’est par moyen Jésus ki Jéhovah faire tou bann lezot resurrection, resurrection pou vive dan le ciel ou-soit pou vive lor la terre. Jésus li-mem ti dire: “Mo-mem resurrection ek la vie.” (Jean 5:25; 11:25) Kan Jéhovah inn ressuscite so Garson, Li’nn donne garantie ki tou bann dimoune fidel pou ressuscité zot aussi.
9. Couma bann recit ki ena dan la Bible montré nou ki resurrection li enn kitsoz ki sur?
9 Bann resurrection ti passé devant bann temoin ek finn ecrire sa dan Parole Bondié. La Bible koz lor huit resurrection en detail, resurrection bann dimoune ki’nn regagne la vie lor la terre. Sa bann resurrection-la pa ti arrive en secret, mais en publik, souvent devant beaucoup dimoune. Par exemple, Lazare ti’nn mort depuis quatre jour ek Jésus ti ressuscite li devant enn la-foule dimoune ki ti pé ploré. Surement là ti ena famille Lazare, so bann camarade ek so bann voisin. Sa mirak-la ti prouvé ki Bondié ti envoye Jésus. Sa ti enn preuve tellement puissant ki so bann l’ennemi, bann chef religieux, jamais pa ti nié ki sa ti arrivé. Au contraire, zot ti faire plan pa zis pou touye Jésus, mais aussi pou touye Lazare! (Jean 11:17-44, 53; 12:9-11) Oui, nou kapav ena confiance ki resurrection li enn kitsoz ki sur. Bondié inn faire ecrire bann resurrection ki ti arrivé dan le passé pou encourage nou ek pou fortifié nou la-foi.
Trouve reconfort dan l’esperance resurrection
10. Ki pou aide nou pou gagne enn l’encouragement ar bann resurrection ki mentionné dan la Bible?
10 Eski ou bien envie gagne l’encouragement kan la mort pé menace ou? Ou kapav sur ki ou pou gagne enn reconfort dan bann recit ki ena dan la Bible lor resurrection. Kan ou lire ek ou medite lor sa bann recit-la, ek kan ou faire vision bann l’evenement ki ti arrivé, sa kapav faire l’esperance resurrection vinn pli sur pou ou. (Romains 15:4) C’est pa zis bann zistoire. C’est bann kitsoz ki finn arrive bann dimoune couma nou, ki finn vrai-mem existé, ek ki finn vive dan bann lepok ek bann l’endroit ki bien réel. Anou examine enn l’exemple—premier resurrection ki la Bible raconté.
11, 12. (a) Ki malheur ti arrive enn veuve ki ti reste Tsarphath, ek couma li ti reagir au commencement? (b) Raconté ki prophete Éliya ti faire pou sa veuve-la grace a pouvoir Jéhovah.
11 Mazinn sa scene-la. Pendant plusieurs semaine, prophete Éliya ti pé reste kot enn veuve dan la ville Tsarphath, dan enn la-chambre la-haut lor so lakaz. Sa lepok-la ti vrai-mem difficile parski ti ena la secheresse ek la famine dan sa l’endroit-la. Beaucoup dimoune ti pé mort. Jéhovah ti’nn deja servi prophete Éliya pou faire enn mirak ki ti duré pendant enn bon lé-temps pou recompense la foi sa veuve ki ti pauvre-la. Sa veuve-la ek so garson ti pou konn la famine parski zot ti reste zis enn dernier repas. Mais Bondié ti donne Éliya pouvoir pou faire enn mirak pou ki so la-farine ek so de l’huile pa fini. Mais enn coute inn arrive sa veuve-la enn malheur! Enn coup, so garson ti tombe malade ek ti’nn arrete respiré. Pena doute ki sa veuve-la ti bien abatte! Sa ti deja dur pou li vive sans l’aide ek soutien enn mari, mais asterla, li ti perdi so sel zenfant. Dan so la-peine, li ti mem blame Éliya ek so Bondié, Jéhovah! Ki prophete Éliya ti faire?
12 Éliya pa ti reproche sa veuve-la parski li ti faire bann fausse l’accusation. Au contraire, li ti dire li: “Donne moi to garson.” Éliya ti amenn garson-la dan la chambre la-haut, ek li ti prié plusieurs fois pou ki so la-vie retourné. Finalement, Jéhovah ti agir! Nou mazinn la joie ki ti ena lor figure Éliya kan li ti trouve sa garson-la recommence respiré. Apré sa, lizié garson-la ti ouvert—oui, li ti regagne la vie! Éliya ti desann avek garson-la, li ti donne li so mama, ek li ti dire: “Guetté, to garson vivant.” La joie sa mama-la ti extraordinaire! Li ti dire Éliya: “Asterla mo koné vrai-mem ki to enn zom ki Bondié inn envoyé ek ki parole Jéhovah ki sorti dan to la-bouche, li vrai.” (1 Rois 17:8-24) So la-foi dan Jéhovah ek dan so representant ti vinn pli fort ki avant.
13. Kifer sa recit lor Éliya ki ti ressuscite garson enn veuve-la, encourage nou zordi?
13 Kan ou medite lor enn recit coumsa, sa vrai-mem donne ou enn grand l’encouragement. Li vrai-mem clair ki Jéhovah ena pouvoir pou combatte nou l’ennemi, la mort! Zis mazinn jour kan plusieurs millier dimoune lor la terre pou ressenti mem la-joie ki sa veuve-la, jour kot pou ena resurrection bann dimoune mort! Dan le ciel aussi pou ena enn grand la-joie kan, avek plaisir, Jéhovah pou donne l’ordre so Garson pou ressuscite bann dimoune partout lor la terre. (Jean 5:28, 29) Eski ou finn perdi enn kikenn ki ou bien content? Li extraordinaire pou koné ki Jéhovah kapav ek pou redonne sa dimoune-la la vie!
Ou l’esperance ek ou la-vie asterla
14. Couma l’esperance resurrection kapav influence ou la-vie?
14 Couma l’esperance resurrection kapav influence ou la-vie depuis asterla-mem? Ou kapav gagne la force dan sa l’esperance-la kan ou faire face ar bann l’epreuve, bann problem, persecution ek danger. Satan envie ki ou tellement peur la mort ki ou disposé pou change ou fidelité kont bann promesse ki dan vide ki faire ou croire ki ou pou en securité. Rappel bien ki Satan ti dire Jéhovah: “Tou seki enn dimoune ena, li pou donne sa pou sap so nâme.” (Job 2:4) Kan Satan ti dire enn kitsoz coumsa, li ti pé koz en mal lor nou tou, lor ou aussi. Eski li vrai ki ou pou arrete servi Bondié si ou en danger? Si ou medite lor l’esperance resurrection, ou pou kapav garde bien ferme ou decision pou contigne faire volonté ou Papa ki dan le ciel.
15. Couma seki Jésus ti dire dan Matthieu 10:28 kapav encourage nou kan nou en danger?
15 Jésus ti dire: “Pa peur bann ki touye lekor mais ki pa kapav touye nâme; mais plutot, peur sa kikenn ki kapav detruire nâme ek lekor toulé-deux dan la géhenne.” (Matthieu 10:28) Fodé pa nou peur Satan ek so bann agent ki lor la terre. Li vrai ki certain kapav ena pouvoir pou faire nou di-tort, mem pou touye nou. Mais mem pli pire kitsoz ki zot kapav faire, li temporaire. Jéhovah kapav ek Li pou repare n’importe ki di-tort ki kapav arrive so bann serviteur, Li kapav mem ressuscite zot. Zis Jéhovah tousel ki merite nou la-crainte ek nou grand respé. Li tousel ki ena pouvoir pou tire la vie ek tou l’espoir pou regagne la vie encore, parski Li kapav detruire lekor ek nâme toulé-deux dan la géhenne. Mais heureusement, Jéhovah pa envie ki sa arrive ou. (2 Pierre 3:9) Parski nou ena l’esperance resurrection, en tant ki bann serviteur Bondié, nou kapav toujours senti-nou en securité. Tant ki nou reste fidel, nou ena l’esperance la vie eternel devant nou, ek Satan ek so bann agent pa pou kapav faire nanyin pou empeche sa.—Psaume 118:6; Hébreux 13:6.
16. Couma fason ki nou considere resurrection ena enn l’influence lor bann priorité ki nou fixé dan nou la-vie?
16 Si l’esperance resurrection li réel pou nou, sa kapav influence nou l’attitude lor la vie. Ena enn kitsoz ki nou koné: “Ki nou vive ou-soit ki nou mort, nou pou Jéhovah.” (Romains 14:7, 8) Alors, kan nou fixé bann priorité dan nou la-vie, nou applik sa conseil l’apotre Paul-la: “Arrete faire pareil couma sa lé-monde-la, mais transforme zot, ek renouvelé zot fason pensé. Coumsa zot pou kapav verifié par zot-mem ki volonté Bondié, li bon, li acceptable ek li parfait.” (Romains 12:2) Beaucoup dimoune pressé pou satisfaire chaque desir, chaque l’ambition ek chaque l’envie ki zot ena. Parski pou zot, la vie courte, zot parette bien determiné pou rod bann plaisir, ek si zot dire ki zot adore Bondié, zot pa pé faire li en accord avek ‘volonté Bondié ki parfait.’
17, 18. (a) Couma Parole Jéhovah montré ki la vie enn dimoune li courte, mais ki projet Bondié ena pou nou? (b) Kifer nou envie loué Jéhovah toulé-jour?
17 Li vrai ki la vie courte. Li “passe vite, ek nou envolé,” kitfois dan 70 ou-soit 80 an. (Psaume 90:10) Bann dimoune vini ek allé pareil couma l’herbe vert, pareil couma enn l’ombrage ki passé, pareil couma enn la-vapeur. (Psaume 103:15; 144:3, 4) Mais Bondié pa ti ena projet ki bann dimoune passe dé-trois dizaine l’année pou grandi ek pou gagne enn certaine sagesse ek l’experience, ek apré sa passe encore dé-trois dizaine l’année pou deterioré ek pou tombe malade ek mort. Jéhovah ti crée bann dimoune avek desir pou vive pou touletan. La Bible dire: “Mem l’eternité, Li finn mette dan zot leker.” (Ecclésiaste 3:11) Eski Bondié Li cruel, Li mette enn desir coumsa dan leker bann dimoune ek apré sa, rann sa impossible pou realisé? Non. Kifer? Parski “Bondié Li l’amour.” (1 Jean 4:8) Grace a resurrection, Li pou faire la vie pou touletan vinn possible pou bann dimoune ki finn mort.
18 Grace a l’esperance resurrection, nou kapav ena enn l’avenir assuré. Li pa necessaire ki asterla-mem nou trop pressé, ou-soit nou senti ki nou bizin developpe tou bann capacité ki nou ena. Pa necessaire ki nou rod “profite tou seki ena” dan sa lé-monde ki pé al fini-la. (1 Corinthiens 7:29-31; 1 Jean 2:17) Nou pa couma bann dimoune ki pena enn vrai l’esperance. Nou, nou ena sa joli cadeau-la: Nou koné ki, si nou reste fidel ar Jéhovah, nou pou ena l’eternité pou loué Li ek pou profite la vie. Alors, anou faire tou seki nou kapav pou loué Jéhovah toulé-jour, nou Bondié ki faire resurrection vinn enn l’esperance ki sur!
Couma ou pou reponn?
• Ki sentiment nou bizin ena lor resurrection?
• Ki kitsoz faire l’esperance resurrection vinn enn kitsoz ki sur?
• Couma nou kapav gagne l’encouragement ar l’esperance resurrection?
• Couma l’esperance resurrection kapav influence fason ki ou vive?
[Zimage, page 20]
Job ti koné ki Jéhovah bien envie ressuscite bann dimoune juste
[Zimage, page 23]
“Guetté, to garson vivant”