L’esperance la resurrection—Ki sa representé pou ou?

“To ouvert to la-main, ek to satisfaire desir tou seki vivant.” —Psaume 145:16.

1-3. Ki l’espoir certain dimoune ena pou l’avenir? Donne bann l’exemple.

CHRISTOPHER enn jeune garson neuf an, ti sorti predication enn gramatin, ensam avek so frere, so tonton, so ma-tante ek so deux cousin, dan la ville Manchester, en Angleterre. Réveillez-vous ! raconté seki finn arrivé apré: “Dan l’apré-midi, zot tou ensam ti al visite Blackpool, enn la-ville dan bord la mer. Mais toulé-six, avek six lezot dimoune, ti mort dan enn accident lor l’auto-route. La police ti dire ki sa accident-la ti couma ‘enn la-fournaise difé.’”

² La veille sa malheur-la, tou la famille finn assisté l’etude de livre, ek ti ena enn discussion lor la mort. Papa Christopher raconté: “Christopher ti toujours enn garson ki bien reflechi. Sa soir-la, li ti koz dan enn fason bien clair lor le monde nouveau ek l’espoir ki li ena pou l’avenir. Apré, pendant sa discussion-la, enn coup Christopher ti dire: ‘Seki bon kan nou enn Témoin de Jéhovah, seki mem si arrivé nou mort, nou koné ki nou pou retrouve-nou enn jour lor la terre.’ Kan nou ti tann li dire sa, jamais nou ti pou pensé ki sa bann parole-la pou reste gravé dan nou l’esprit pou longtemps.”a

³ En 1940, Franz, enn jeune Témoin de Jéhovah autrichien, ti condamné a mort, parski li ti refusé pou desobeir Jéhovah. Dan prison, en Berlin, Franz ti ecrire sa lettre-la so mama: “Avek connaissance ki mo finn gagné, si mo ti faire sa serment-la (enn serment militaire), mo ti pou faire enn peché ki ti pou faire moi merite la mort. Mo ti pou faire enn mauvais kitsoz, ek mo pa ti pou ressuscité. . . . Asterla, mama, ek tou mo bann frere ek soeur, pa bizin zot peur, zordi bannla finn dire moi ki mo finn condamné a mort, zot pou touye moi demain gramatin. Jéhovah pé donne moi la force necessaire, pareil couma Li finn donne sa, tou bann vrai chrétien dan le passé. . . . Si zot reste fidel ziska la mort, nou pou retrouve nou encore kan nou pou ressuscité. . . . A bientot.”b

4. Ki ou ressenti kan ou lire sa deux zistoire ki mentionné-la? Ki nou pou examiné dan sa lartik-la?

⁴ L’esperance resurrection ti ena enn grand signification pou Christopher ek Franz. Sa l’esperance-la ti réel pou zot. Sa deux zistoire-la touche nou beaucoup, pa vrai? Pou augmente nou reconnaissance pou Jéhovah ek pou faire nou l’esperance dan la resurrection vinn pli solid, anou guetté kifer pou ena enn resurrection, ek couma sa connaissance-la bizin ena enn l’influence lor nou personnellement.

Enn vision lor resurrection ki pou ena lor la terre

5, 6. Dan Révélation 20:12, 13, ki l’apotre Jean ti trouvé dan enn vision?

⁵ L’apotre Jean ti gagne enn vision lor resurrection ki pou ena lor la terre pendant Regne mille an Jésus Christ. Li ti raconte seki li ti trouvé: “Mo finn trouve bann dimoune mort, bann grand dimoune ek bann ti-dimoune. . . . La mer finn rann bann dimoune mort ki li ti prend, ek la mort ek l’hadès finn rann bann mort ki zot ti prend.” (Révélation 20:12, 13) N’importe ki position zot ti ena, ki zot ti bann “grand dimoune” ou-soit bann “ti-dimoune,” tou seki dan l’hadès (shéol), setadir dan tombe kot tou dimoune mort allé, pou ressuscité. Bann dimoune ki finn mort dan la mer aussi pou ressuscité. Sa grand mirak-la faire partie dan projet Jéhovah.

⁶ Kan Jésus Christ pou commence so Regne mille an, li pou attache Satan ek li pou jette li dan enn l’abîme (enn grand trou), kot li nepli pou kapav faire nanyin. Lerla, Satan pa pou kapav embete bann ki pou ressuscité, ni bann ki pou traverse la grande tribulation. (Révélation 20:1-3) Kitfois mille an parette bien longue pou ou, mais rappel ki pou Jéhovah, li “couma enn jour.”—2 Pierre 3:8.

7. Lor ki base pou juge bann dimoune pendant Regne mille an Jésus Christ?

⁷ Dapré sa vision-la, Regne mille an Jésus Christ pou enn period kot pou ena enn jugement. L’apotre Jean ti ecrire: “Mo ti trouve bann dimoune mort, bann grand dimoune ek bann ti-dimoune, ek zot ti pé deboute devant trone, ek ti ouvert bann rouleau. Mais ti ouvert enn lot rouleau: rouleau la vie. Ek ti juge bann mort dapré bann kitsoz ki ti ecrire dan bann rouleau, dapré zot bann action. . . . Ek ti juge sakenn dapré so bann action.” (Révélation 20:12, 13) Nou remarké ki pa pou juge chaque ressuscité dapré seki li finn faire ou-soit seki li pa finn faire avant li mort. (Romains 6:7) Mais plutot, sa jugement-la pou basé lor bann rouleau ki pou ouvert. Seki enn dimoune faire apré ki li finn gagne enn connaissance lor seki ena dan sa bann rouleau-la, c’est sa ki pou montré si so nom pou ecrire dan “rouleau la vie.”

“Ressuscité pou gagne la vie,” ou-soit “ressuscité pou enn jugement”

8. Ki deux possibilité ena devant bann ki pou ressuscité?

⁸ Avant, dan vision ki Jean ti gagné, li ti trouve Jésus avek “la clé la mort ek l’hadès.” (Révélation 1:18) Jésus li-mem ki “principal Agent ki faire gagne la vie” ek Jéhovah inn donne li pouvoir pou juge bann “vivant ek bann mort.” (Actes 3:15; 2 Timothée 4:1) Couma li pou faire sa? Kan li pou ressuscite bann dimoune ki finn mort. Enn jour, Jésus ti dire avek enn la-foule: “Pa bizin zot etonné, parski l’heure pé vini kot tou seki dan tombe pou tann so la-voix, ek pou sorti.” Apré li ti ajouté: “Bann dimoune ki finn faire bann bon kitsoz, pou ressuscité pou gagne la vie, bann ki finn faire le mal, pou ressuscité pou enn jugement.” (Jean 5:28-30) Alors, ki pou arrive bann zom ek bann femme fidel ki ti vive dan le passé?

9. (a) Kan bann serviteur fidel ki ti vive dan le passé pou ressuscité, ki kitsoz zot pou surement aprann? (b) Ki grand travail l’enseignement pou faire lor la terre?

⁹ Kan sa bann fidel serviteur Jéhovah-la pou ressuscité, bien vite zot pou trouvé ki bann promesse dan ki zot ti croire, finn realisé. Zot pou bien interessé pou aprann kisannla ki Descendance femme Bondié, ki mentionné dan premier prophetie, en Genèse 3:15! Zot pou bien content kan zot pou aprann ki Jésus, Messie ki ti promette, finn reste fidel ziska so la-mort, seki finn permette li pou donne so la-vie en sacrifice! (Matthieu 20:28) Bann dimoune ki pou accueillir sa bann fidel-la pou ena la joie pou explik zot ki sa ranson-la montré ki quantité Jéhovah ena l’amour ek la misericorde pou nou. Kan zot pou trouvé seki Royaume Bondié pé faire pou realise So projet pou la terre, surement zot pou tellement touché ki zot pa pou fini loué Jéhovah. Zot pou gagne beaucoup l’occasion pou montré ki quantité zot content zot Papa ki dan le ciel, ek so Garson aussi. Tou dimoune ki pou vive lor la terre dan sa lepok-la, pou participe avek plaisir dan enn grand travail pou enseigne tou bann milliard dimoune ki pou ressuscité, ek ki pou bizin zot aussi, accepté la ranson.

10, 11. (a) Ki l’occasion tou seki pou vive lor la terre pendant Regne mille an, pou gagné? (b) Ki l’effet sa bizin ena lor nou?

¹⁰ Kan Abraham pou ressuscité, “la ville” ki li ti pé attann, pou gouverne la terre. Surement li pou bien content pou trouvé ki sa inn vinn enn realité. (Hébreux 11:10) Job pou bien content kan li pou aprann ki so fidelité finn aide beaucoup serviteur Jéhovah pou reste fidel, zot aussi, dan bann l’epreuve! Daniel pou bien envie koné couma bann prophetie ki Bondié finn faire li ecrire, finn realisé!

¹¹ En realité, tou bann ki vive dan le monde nouveau, bann ki ressuscité ek aussi bann ki traverse la grande tribulation, zot pou ena beaucoup pou aprann lor bann projet ki Jéhovah ena pou la terre, ek pou so bann habitant aussi. Li pou enn plaisir pou gagne sa l’enseignement-la pendant Regne mille an Jésus, parski tou dimoune pou ena possibilité vive pou touletan, ek loué Jéhovah pou l’eternité. Seulement, si nou envie profite sa personnellement, tou depann lor seki nou faire apré ki nou aprann seki ena dan bann rouleau. Eski nou pou mette en pratik seki nou aprann? Eski nou pou medite lor l’enseignement ki nou gagné, ek prend sa au serieux pou ki lerla nou kapav reste ferme ek resisté, kan Satan rod detourne nou enn dernier fois ar la verité?

12. Ki pou permette tou dimoune pou bien participé dan travail l’enseignement, ek aussi pou faire la terre vinn enn paradi?

¹² Fodé pa nou blié tou bann benediction extraordinaire ki nou pou gagné grace a sacrifice Jésus. Bann ressuscité pa pou ena okenn problem la santé couma seki nou pé gagné zordi. (Isaïe 33:24) Tou bann ki pou vive dan le monde nouveau, pou ena enn bon la-santé, ek zot pou ena possibilité pou gagne enn la-santé parfait. Sa pou permette zot participe dan sa grand travail l’enseignement ki pou ena lerla, kot zot pou enseigne bann milliard ressuscité. Zot pou aussi gagne l’occasion pou participe dan enn travail ki jamais pa finn faire avant: faire la terre entier vinn enn paradi, pou la gloire Jéhovah.

13, 14. Dan ki but pou ena l’epreuve final kan Satan pou liberé, ek ki choix sakenn pou kapav faire?

¹³ Kan Satan pou liberé dan l’abîme, li pou essaye mette bann dimoune dan l’erreur encore enn dernier fois; appel sa, l’epreuve final. Dapré Révélation 20:7-9, tou bann ‘nation ki pou laisse zot trompé’ setadir bann group dimoune ki pou tombe dan piege Satan, pou konn enn destruction. La Bible dire: ‘Difé pou sorti dan le ciel ek pou touye zot.’ Alors, pou tou bann parmi zot ki ti’nn ressuscité pendant regne mille an, sa destruction-la pou montré ki zot finn ressuscité pou enn jugement condamnation. Mais bann ressuscité ki reste fidel, zot, zot pou gagne la vie eternel. Dan zot cas, zot resurrection pou enn “resurrection pou gagne la vie.”—Jean 5:29.

¹⁴ Couma l’esperance resurrection kapav encourage nou depuis asterla-mem? Ek seki pli important, ki nou bizin faire pou nou sur ki nou pou profite so bann bienfait dan l’avenir?

Bann leson pou nou

15. Couma l’esperance resurrection kapav aide ou asterla-mem?

¹⁵ Kitfois ou finn fek perdi enn kikenn ki ou bien content, sa finn faire ou bien chagrin ek ou pé bizin faire face ar enn grand vide dan ou la-vie. Mais l’esperance la resurrection aide ou pou ressenti enn grand calme, ek li donne ou enn grand la-force. Bann dimoune ki pa konn la verité, zot pena sa. Paul ti encourage bann chrétien dan Thessalonique, li ti dire zot: “Nou pa’lé ki zot reste dan l’ignorance concernant bann dimoune ki pé dormi dan la mort, coumsa zot pa bouleversé pareil couma bann dimoune ki pena l’esperance.” (1 Thessaloniciens 4:13) Eski ou kapav faire vision ki ou dan monde nouveau, ek ou pé assisté resurrection bann dimoune mort? Si oui, asterla-mem ou kapav gagne enn grand l’encouragement, kan ou medite lor possibilité ki ou ena pou retrouve bann dimoune ki ou content.

16. Ki sentiment ou pou surement ena kan pou ena resurrection?

¹⁶ Kitfois, a cause rebellion Adam, ou pé souffert parski ou malade. Pa laisse ou souffrance faire ou blié l’esperance extraordinaire ki ou ena pou ressuscité dan enn lekor ki en bonne santé ek ki rempli ar la force, dan le monde nouveau. Lerla, kan ou lizié pou ouvert, ek kan ou pou trouve la joie lor figure bann dimoune ki content pou trouve ou ressuscité, ou pa pou manké pou remercié Bondié pou so l’amour fidel.

17, 18. Ki deux leson important nou bizin toujours rappel?

¹⁷ Pendant ki nou pé attann le monde nouveau, anou guette deux leson ki nou bizin rappel. Premierement, depuis asterla-mem, nou bizin servi Jéhovah avek tou nou leker. Si nou amenn enn la-vie sacrifice pareil couma nou Maitre Jésus Christ, sa montré ki nou content Jéhovah ek nou prochain. Mem si l’opposition ou persecution faire nou perdi tou, ou-soit faire nou perdi nou liberté, nou pou bien decidé pou reste ferme dan la foi, malgré n’importe ki l’epreuve nou kapav gagné. Si nou bann adversaire menace pou touye nou, alors l’esperance resurrection donne nou courage ek la force necessaire pou reste fidel envers Jéhovah ek envers so Royaume. Oui, nou zèle pou preche Royaume Bondié ek pou faire bann disciple, donne nou possibilité pou gagne bann benediction eternel ki Jéhovah pé gardé pou bann dimoune droite.

¹⁸ Enn deuxieme leson concerne la fason ki nou faire face ar bann tentation ki nou lekor imparfait faire nou gagné. Nou connaissance lor la resurrection ek nou reconnaissance pou bonté ki Jéhovah manifesté envers nou, sa donne nou la force pou reste ferme dan la foi. L’apotre Jean ti donne sa l’avertissement-la: “Pa content le monde, ni bann kitsoz ki ena dan le monde. Si kikenn content le monde, li pena l’amour [nou] Papa en li; parski tou seki ena dan le monde, desir la chair, desir lizié, ek faire l’etalage ar bann kitsoz ki li ena, tousala pa sorti kot [nou] Papa, mais sorti dan le monde. En plus, le monde pé al fini ek so desir aussi, mais celui ki faire volonté Bondié pou reste pou toujours.” (1 Jean 2:15-17) Kan nou compare “la vie veritable” avek materialisme ki ena dan le monde, nou pa pou attiré par sa lé-monde-la. (1 Timothée 6:17-19) Nou pou tini ferme pou pa tombe dan tentation pou commette l’immoralité sexuel. Si jamais nou mort avant Har–Maguédôn, ek ki asterla nou pé persisté pou amenn enn la-vie ki Jéhovah pa content, sa kapav mette nou dan mem situation ki bann dimoune ki pa pou gagne enn resurrection.

19. Ki grand privilege nou ena, ki fodé jamais nou blié?

¹⁹ Mais avant tou, fodé jamais nou blié ki nou ena enn grand privilege pou faire leker Jéhovah content, asterla ek pou touletan. (Proverbes 27:11) Nou fidelité ziska la mort, ou-soit ziska la fin sa system mauvais-la, montré nou position concernant droit ki Bondié ena pou gouverné. Lerla, nou pou ena la joie pou vive dan paradi lor la terre, soit parski nou finn traverse la grande tribulation, soit parski nou pou ressuscité dan le monde nouveau!

Nou desir pou satisfait

20, 21. Ki pou aide nou pou reste fidel, mem si nou pa’nn gagne tou reponse lor la resurrection? Expliké.

²⁰ Seki nou finn examiné concernant la resurrection pa finn reponn tou bann question. Ki Jéhovah pou faire pou bann ki ti deja marié avant zot mort? (Luc 20:34, 35) Eski bann dimoune pou ressuscité dan mem place kot zot ti mort? Eski bann dimoune pou ressuscité pré kot zot famille? Ena beaucoup lezot question encore ki nou kapav posé lor la resurrection. Seulement, nou bizin rappel seki Jérémie ti dire: “Jéhovah bon envers enn kikenn ki ena l’espoir en Li, ek ki contigne rod Li. Li bon ki enn kikenn attann, mem en silence, delivrance ki Jéhovah pou amené.” (Lamentations 3:25, 26) L’heure ki Jéhovah pou decidé, nou pou gagne reponse pou tou nou bann question. Couma eski nou kapav sur?

²¹ Reflechi lor seki sa ecrivain Psaume-la ti chanté: “To ouvert to la-main, ek to satisfaire desir tou seki vivant.” (Psaume 145:16) Nou bann desir changé avek l’age. Seki nou ti envie kan nou ti zenfant, li pa pareil avek seki nou envie zordi. La fason ki nou guette la vie, li pa zis influencé par nou bann l’espoir, mais aussi par l’experience ki nou faire. Mais, dan le monde nouveau, Jéhovah pou satisfaire tou nou bann desir ki en accord avek so volonté.

22. Kifer nou ena enn bon raison pou loué Jéhovah?

²² Seki pli important zordi, c’est ki nou reste fidel. “Enn qualité ki bann responsable bizin ena, c’est ki zot montré zot fidel.” (1 Corinthiens 4:2) Nou ena responsabilité pou preche la bonne nouvelle lor Royaume Bondié. Si nou zélé pou preche sa nouvel-la avek tou dimoune ki nou joinde, sa pou aide nou pou reste lor chemin ki amenn vers la vie. Pa blié ki ‘bann evenement ki nou pa attann’ kapav arrive nou tou. (Ecclésiaste 9:11) Nou pa koné ki la vie reservé, alors pou diminué bann tracas inutile ki ou pou kapav gagné, garde ou la-foi ferme dan la resurrection. Si li parette ki ou pou mort avant Regne mille an Jésus Christ commencé, sa pou encourage ou pou rappel l’espoir ki ou ena dan la resurrection. Dan l’heure ki Jéhovah finn fixé, ou pou kapav dire Jéhovah, pareil couma Job ti dire: “To pou appel moi ek mo pou reponn toi.” Nou loué Jéhovah, ki attann avek impatience moment pou ressuscite tou bann dimoune ki dan so memoire!—Job 14:15.

[Note]

Eski ou rappel?

• Lor ki base, pou juge bann dimoune pendant Regne mille an Jésus Christ?

• Kifer certain pou gagne enn ‘resurrection pou la vie’ ek lezot enn ‘resurrection pou enn jugement’?

• Couma la resurrection kapav encourage nou zordi?

• Couma Psaume 145:16 kapav aide nou, si nou pa finn gagne reponse ar tou nou bann question lor la resurrection?

[Zimage, page 27]

Couma l’esperance resurrection kapav aide nou asterla-mem?