LARTIK KOUVERTIR | BANN TEMWIN ZEOVA—KISANNLA ZOT ETE?

Bann Temwin Zeova—Ki Kalite Dimounn Zot Ete?

Nou enn lorganizasion internasional ki pena okenn lien avek lezot relizion. Mem si nou biro mondial trouv l’États-Unis, laplipar bann Temwin Zeova res dan lezot pei. Nou anviron wit milyon ek nou ansegn bann dimounn Labib dan plis ki 230 pei. Nou fer sa an-akor avek seki Zezi ti dir: “Bonn Nouvel Rwayom Bondie pou anonse partou dan lemonn, kouma enn temwagnaz pou tou bann nasion.”—Matie 24:14.

Mem si nou res dan diferan pei, nou obeir lalwa. Anmemtan, nou fer tou pou pa partisip dan bann zafer politik parski nou anvi swiv lord Zezi. Li ti dir: “Pa fer parti dan lemond.” Akoz sa nou pa partisip dan bann deba ek bann aktivite politik ouswa pran par dan bann lager. (Zan 15:19; 17:16) Par exanp, pandan Deziem Lager Mondial, ti met bann Temwin Zeova dan prizon, zot ti gagn bate, ek zot ti konn lezot kitsoz pli pir ankor parski zot pa ti partisip dan lager. Enn ansien levek ti ekrir: “Zot ena tou drwa pou dir ki pandan Trwaziem Reich zot ti sel group ki ti refiz lager akoz zot konsians.”

“[Bann Temwin Zeova] ena enn gran lafors moral. Nou ti kapav servi zot dan bann gran pos politik parski zot pa rod zot prop lintere. Me zame zot pou aksepte. . . . Zot respekte lotorite ki bann gouvernman ena, me zot krwar ki se zis Rwayom Bondie ki pou kapav regle bann problem limanite.”—Zournal Nová Svoboda, République Tchèque.

Selman nou pa viv separe ar lezot. Zezi ti priye so Papa konsernan so bann disip: “Mo pa pe dimann twa, tir zot dan lemonn.” (Zan 17:15) Se akoz sa ki dan lasosiete, kitfwa ou pou trouv nou pe travay, pe fer shopping, pe al lekol parey kouma tou dimounn.