Sapit Dizwit

“Zot Pa Fer Parti dan Lemond”

1. (a) Avan so lamor, ki Zezi ti demande dan lapriyer ki li ti fer pu so bann disip? (b) Kifer eski li inportan “pa fer parti dan lemond”?

LANWIT lavey so lamor, Zezi ti priye pu so bann disip. Pwiski li ti kone ki Satan ti pu fer buku presyon lor zot, Zezi ti dir so Papa: “Mo pa pe demann twa tir zot dan lemond, me vey lor zot akoz sa kikenn ki move la. Zot pa fer parti dan lemond, parey kuma mwa mo pa fer parti dan lemond.” (Zan 17:15, 16) Kifer eski li inportan res separe ar lemond? Parski Satan limem ki pe diriz lemond. Bann Kretyin pa ti pu kontan fer parti dan enn lemond ki dan lamin Satan.—Lik 4:5-8; Zan 14:30; 1 Zan 5:19.

2. Dan ki bann fason Zezi pa ti fer parti dan lemond?

² Pwiski Zezi pa ti fer parti dan lemond, sa pa vedir ki li ti mank lamur pu lezot. Okontrer, li ti geri bann malad, redonn bann mor lavi, ek anseyn bann dimunn lor Rwayom Bondye. Li ti mem donn so lavi pu limanite. Me, li pa ti kontan bann latitid ek bann aksyon ki bann ki ti ena lespri lemond Satan, ti reflekte. Akoz sa, li ti dir fer atansyon ar bann dezir imoral, enn fason viv materyalis, ek dezir pu gayn grander. (Matye 5:27, 28; 6:19-21; Lik 20:46, 47) Alor, li pa etonan ki Zezi ti evit politik lemond. Mem ki li ti enn Zwif, li pa ti partisip dan bann dispit politik ant bann Romin ek bann Zwif.

“Mo Rwayom Pa Fer Parti dan Lemond”

3. (a) Ki akizasyon bann sef relizye Zwif ti met lor Zezi devan Pilat, ek kifer? (b) Ki montre ki Zezi pa ti interese pu vinn enn lerwa lor later?

³ Gete ki ti arive kan bann sef relizye Zwif ti fer aret Zezi ek ti amenn li devan guverner Romin Pons Pilat. Avredir, bann sef relizye la ti agase parski Zezi ti devwale kuma zot ti ipokrit. Pu fer guverner pran sanksyon kont Zezi, zot ti met enn akizasyon lor li, zot ti dir: “Nu finn truv sa zom la pe bulvers nu nasyon ek li pe defann pey Sezar tax ek li pe dir ki limem Kris, enn lerwa.” (Lik 23:2) Me, li kler ki zot ti pe koz manti parski enn an avan, letan bann dimunn ti rod fer Zezi vinn lerwa, li ti refize. (Zan 6:15) Li ti kone ki dan lavenir li ti pu vinn Lerwa dan lesyel. (Lik 19:11, 12) Anplis, Zeova ki ti pu fer li vinn lerwa, pa bann dimunn.

4. Ki latitid Zezi ti ena anver pey tax?

⁴ Zis trwa zur avan ki aret Zezi, bann Farizyin ti rod fer li dir enn kitsoz lor zafer pey tax, pu zot akiz li. Me, Zezi ti dir zot: “Montre mwa enn denye [enn pyes lamone Romin]. Zimaz ek linskripsyon kisannla ena lor sa pyes la?” Apre ki zot finn reponn: “Sezar,” Li dir zot: “Alor, pa manke pu rann Sezar bann kitsoz ki pu Sezar, me rann Bondye bann kitsoz ki pu Bondye.”—Lik 20:20-25.

5. (a) Ki leson Zezi ti anseyn so bann disip kan bann solda ti vinn aret li? (b) Kuma eski Zezi ti explik rezon pu seki li ti’nn fer? (c) Ki ti arive alafin sa prose la?

⁵ Non, Zezi pa ti anseyn bann dimunn pu rebel kont bann guvernman. Kan bann solda ek bann lezot zom ti vinn aret Zezi, Pyer ti tir so lepe ek li ti sot zorey enn parmi sa bann zom la. Me Zezi ti dir li: “Remet to lepe dan so plas, parski tu seki pran lepe pu mor par lepe.” (Matye 26:51, 52) Landemin Zezi ti explik Pilat rezon so bann aksyon kan li ti dir: “Mo rwayom pa fer parti dan sa lemond la. Si mo rwayom ti fer parti dan sa lemond la, mo bann serviter ti pu lager pu ki mo pa livre ar bann Zwif.” (Zan 18:36) Pilat ti admet ki li pa ti truv “okenn rezon pu akiz” Zezi. Selman, parski li ti sede devan sa laful ki ti eksite la, Pilat ti fer kulut Zezi lor enn poto.—Lik 23:13-15; Zan 19:12-16.

Bann Disip Swiv Legzanp Zezi

6. Kuma eski bann premye Kretyin ti montre ki mem si zot ti rezet lespri lemond zot ti kontan bann dimunn?

⁶ Alor, bann disip Zezi ti’nn konpran seki vedir pa fer parti dan lemond. Sa ti vedir rezet lespri ek bann aksyon lemond ki Bondye kondane, kuma par egzanp bann distraksyon vyolan ek imoral ki ti ena dan bann larenn ek teat Romin. Akoz bann disip ti rezet sa, bann dimunn ti apel zot bann ki ayir limanite. Me, sa pa ti vre parski zot ti travay pu ed lezot pu profit bann dispozisyon ki Bondye ti’nn pran pu zot gayn lavi.

7. (a) Ki bann premye disip ti gayne parski zot pa ti fer parti dan lemond? (b) Kuma eski zot ti konsider bann dirizan politik ek ki ti zot lopinyon lor pey tax, ek kifer?

⁷ Bann disip Zezi ti gayn persekisyon, parey kuma Zezi limem, suvan par bann ofisye guvernman ki mal informe. Purtan, ver 56 N.L., lapot Pol ti ekrir bann Kretyin dan Rom pu ankuraz zot pu “sumet ar bann lotorite siperyer [dirizan politik], parski pena okenn lotorite amwin ki Bondye permet li.” Sa pa vedir ki Bondye ki etabli bann guvernman imin, me Li les zot egziste ziska ki so Rwayom tusel diriz later antye. Ala kifer Pol ti ankuraz bann Kretyin pu respekte bann ofisye guvernman ek pu pey bann tax.—Romin 13:1-7; Tit 3:1, 2.

8. (a) Ziska ki pwin bann Kretyin bizin sumet ar bann lotorite siperyer? (b) Kuma eski bann premye Kretyin ti swiv legzanp Zezi?

⁸ Me, sumisyon ki nu donn bann dirizan politik ena enn limit. Kan bann lalwa ki zom finn fer pa an akor avek bann lalwa Zeova, bann ki servi Zeova bizin obeir So bann lalwa. Not seki liv On the Road to Civilization—A World History (Lor Semin Sivilizasyon—Enn Listwar Lemond) dir lor bann premye Kretyin: “Bann Kretyin ti refiz akonpli sertin devwar ki bann sitwayin Romin ti bizin fer. Pu bann Kretyin . . . , fer servis militer ti enn kitsoz ki kont zot lafwa. Zot pa ti pu okip okenn fonksyon politik. Zot pa ti pu ador lanperer.” Kan lakur siprem Zwif ti ‘donn zot enn lord expre’ pu aret prese, bann disip ti reponn: “Nu bizin obeir Bondye kuma sef plito ki bann zom.”—Akt 5:27-29.

9. (a) Kifer eski bann Kretyin dan Zerizalem ti kit lavil dan lane 66 N.L.? (b) Kuma eski sa li enn legzanp ki ena gran valer pu nu?

⁹ Bann disip pa ti partisip dan okenn konfli politik ek militer. Dan lane 66 N.L., bann Zwif dan Zida ti revolte kont Sezar. Larme Romin pa ti’nn tarde pu anserkle Zerizalem. Ki bann Kretyin dan lavil ti fer? Zot ti rapel konsey Zezi ki ti dir zot kit lavil ale. Kan bann Romin ti ale pu enn ti peryod letan, bann Kretyin ti sove, zot ti travers Larivyer Zurdin pu zot al Pela, enn rezyon kot ena montayn. (Lik 21:20-24) Pwiski zot pa finn partisip dan bann zafer politik, zot enn legzanp pu bann Kretyin fidel ki vini apre.

Dan Sa Bann Dernye Zur La Bann Kretyin Pa Partisip dan Bann Zafer Lemond

10. (a) Avek ki travay bann Temwin Zeova byin okipe, ek kifer? (b) Dan ki kitsoz zot pa partisipe?

¹⁰ Eski listwar montre ki dan sa bann dernye zur kot nu pe viv la ena enn grup ki pa partisip dan bann zafer lemond, parey kuma bann premye Kretyin? Wi, bann Temwin Zeova. Pandan tu sa letan ki finn pase la, zot finn kontiyn prese ki Rwayom Bondye li sel mwayin pu amenn lape, prosperite, ek boner pu bann ki kontan lazistis. (Matye 24:14) Me, zot pa finn partisip ditu dan okenn konfli ki finn ena ant bann nasyon.

11. (a) Ki diferans ena ant pozisyon bann Temwin dan bann zafer politik ek bann pratik bann pret? (b) Kuma bann Temwin Zeova konsider seki lezot fer dan politik?

¹¹ Parkont, bann pret bann relizyon dan sa lemond la fer tu lekontrer; zot partisip buku dan bann zafer politik. Dan sertin peyi, zot finn fer kanpayn swa an faver, swa kont bann kandida politik. Ena mem ki okip bann fonksyon politik. Lezot finn fer presyon lor bann zom politik pu favoriz bann plan ki bann pret apruve. Me, bann Temwin Zeova pa mel zot dan politik. Ni zot mel zot avek seki bann dimunn fer, ki bannla rant dan enn parti politik, ki zot okip enn fonksyon politik, uswa ki zot vote dan bann eleksyon. Zezi ti dir ki so bann disip pa pu fer parti dan lemond, alor bann Temwin Zeova pa pran par dan politik.

12. Ki konsekans finn ena etandone ki bann relizyon sa lemond la partisip dan bann zafer lemond?

¹² Kuma Zezi ti anonse, suvan bann nasyon finn lager ant zot. Mem bann grup rebel ki dan mem nasyon finn lager ant zot. (Matye 24:3, 6, 7) Bann sef relizye finn preske tuletan sutenir enn nasyon uswa enn grup rebel kont enn lot, ek zot ankuraz bann ki swiv zot pu fer parey. Ki bann rezilta sa finn ena? Bann manb mem relizyon tuy zot kamarad dan lager sinpleman parski zot pa mem nasyon uswa tribi ki zot. Sa pa an akor avek volonte Bondye.—1 Zan 3:10-12; 4:8, 20.

13. Ki bann fe montre lor pozisyon bann Temwin Zeova dan bann zafer lemond?

¹³ Me bann Temwin Zeova zot, zot finn res andeor tu bann lager ki finn ena. Latur Degard 1 Novam 1939 an Angle ti dir: “Tu bann ki dan kote Senyer pa pu partisip avek bann nasyon ki pe lager.” Bann Temwin Zeova dan tu bann nasyon ek dan ninport ki sityasyon pe kontiyn gard sa pozisyon la. Zot pa les politik ek bann lager lemond ki diviz bann nasyon, kas zot fraternite ki zot ena dan lemond antye. Zot “forz zot lepe an lam ki tras siyon ek zot pik an sizay.” Pwiski zot pa partisip dan bann zafer lemond, zot nepli aprann lager ankor.—Izai 2:3, 4; 2 Korintyin 10:3, 4.

14. Ki finn ariv bann Temwin Zeova akoz zot pa fer parti dan lemond?

¹⁴ Ki enn bann konsekans ki bann Temwin Zeova finn gayne parski zot pa partisip dan bann zafer lemond? Zezi ti dir: “Parski zot pa fer parti dan lemond, . . . lemond ena laenn pu zot.” (Zan 15:19) Buku Temwin Zeova finn al dan prizon parski zot bann serviter Bondye. Finn martiriz zot ek mem tuy zot parey kuma bann Kretyin premye syek. Tusala parski Satan,“bondye sa sistem ki egziste la,” kont bann serviter Zeova, ki pa fer parti dan sa sistem la.—2 Korintyin 4:4; Revelasyon 12:12.

15. (a) Ver ki kitsoz bann nasyon pe marse, ek ki kitsoz bann Temwin fer byin atansyon pu evite? (b) Kifer eski res separe ar lemond li enn kitsoz byin serye?

¹⁵ Bann serviter Zeova kontan ki zot pa fer parti dan lemond, parski tu bann nasyon pe mars ver Armagedonn, kot zot pu konn zot lafin. (Danyel 2:44; Revelasyon 16:14, 16; 19:11-21) Nu, nu pa pu konn sa sor la parski nu res separe ar lemond. Kuma enn pep ki ini partu lor later, nu fidel ar Rwayom Bondye ki dan lesyel. Li vre ki dimunn bufonn nu ek persekit nu parski nu pa fer parti dan lemond. Me, byinto sa pu arete parski sa move lemond Satan la pu detrir pu tuletan. Lot kote, kan Rwayom Bondye pu guverne, bann ki servi Zeova pu viv pu tuletan dan so nuvo lemond lazistis.—2 Pyer 3:10-13; 1 Zan 2:15-17.

Kestyon Revizyon

• Kuma eski Zezi finn montre seki vedir “pa fer parti dan lemond”?

• Ki ti latitid bann premye Kretyin anver (a) lespri lemond? (b) bann dirizan lemond, ek (c) pey tax?

• Dan ki bann fason bann Temwin Zeova lepok modern finn montre ki zot pa partisip dan bann zafer lemond?

[Zimaz paz 165]

Zezi ti explike ki li ek so bann disip pa “fer parti dan lemond”