Bann Kretyin Ki Separe ar Lemond dan Lepok Lafin

“Zot pa fer parti dan lemond, parey kuma mwa mo pa fer parti dan lemond.”—ZAN 17:16.

1, 2. Ki Zezi ti dir konsernan relasyon ki so bann disip bizin ena avek lemond, ek ki bann kestyon sa suleve?

ZEZI ti fer enn long lapriyer dan dernye lanwit ki li ti pase antan ki enn dimunn parfe lor later. So bann disip ti pe ekut li. Dan sa lapriyer la li ti dir enn kitsoz ki dekrir lavi tu bann vre Kretyin. Konsernan so bann disip, li ti dir: “Mo finn donn zot to parol, me lemond finn ayir zot, parski zot pa fer parti dan lemond, parey kuma mwa mo pa fer parti dan lemond. Mo pa pe demann twa tir zot dan lemond, me vey lor zot akoz sa kikenn ki move la. Zot pa fer parti dan lemond, parey kuma mwa mo pa fer parti dan lemond.”—Zan 17:14-16.

² De fwa Zezi ti dir ki so bann disip pa ti pu fer parti dan lemond. Anplis, sa separasyon la ti pu amenn bann problem. Ki sa bann problem la sa? Lemond ti pu ayir zot. Me mem sa, fode pa ki bann Kretyin dekuraze. Zeova pu vey lor zot. (Proverb 18:10; Matye 24:9, 13) Dapre bann parol ki Zezi ti dir, li bon nu poz numem sa bann kestyon la: ‘Kifer eski bann vre Kretyin pa fer parti dan lemond? Ki vedir pa fer parti dan lemond? Si lemond ayir bann Kretyin, kuma eski zot konsider sa lemond la? Ek sirtu, kuma eski zot konsider bann guvernman sa lemond la?’ Li byin inportan ki nu kone ki Labib dir lor sa bann kestyon la. Kifer? Parski zot konsern nu tu.

“Nu pu Bondye”

3. (a) Ki kitsoz ki separ nu ar sa lemond la? (b) Ki prev nu ena ki lemond li “dan puvwar sa kikenn ki move la”?

³ Enn rezon kifer nu pa fer parti dan lemond, se akoz nu relasyon byin pros ki nu ena avek Zeova. Lapot Zan ti ekrir: “Nu kone ki nu pu Bondye, me lemond antye li dan puvwar sa kikenn ki move la.” (1 Zan 5:19) Li kler ki seki Zan pe dir konsernan lemond li byin vre. Zordi, partu nu truv lager, krim, bann move aksyon, bann dimunn dominn zot kamarad, zot fer bann kitsoz malonet ek zot ena enn lavi imoral. Sa se enn prev ki se Satan ki pe inflyans sa lemond la, pa Bondye. (Zan 12:31; 2 Korintyin 4:4; Efezyin 6:12) Kan enn kikenn vinn Temwin Zeova, li pa pratik ni li apruv sa bann move kitsoz la. Donk sa fer li vinn enn kikenn ki pa fer parti dan lemond.—Romin 12:2; 13:12-14; 1 Korintyin 6:9-11; 1 Zan 3:10-12.

4. Kuma eski nu montre ki nu pu Zeova?

⁴ Zan ti koz lor diferans ki ena ant bann Kretyin ek lemond. Li ti dir ki bann Kretyin ‘zot pu Bondye.’ Tu bann ki angaz zot lavi ar Zeova, zot pu Li. Lapot Pol ti dir: “Si nu viv, nu viv pu Zeova ek si nu mor, nu mor pu Zeova. Donk, ki nu viv uswa ki nu mor, nu pu Zeova.” (Romin 14:8; Psom 116:15) Nu ador zis Zeova, parski nu pu Li. (Egzod 20:4-6) Donk, enn vre Kretyin pa angaz so lavi dan bann proze sa lemond la. Li vre ki li respekte bann lanblem nasyonal. Me li pa ador sa bann lanblem la ki li par bann aksyon, uswa dan so leker. Li pa ador bann vedet spor uswa bann lezot zidol modern. Byinsir, li respekte drwa ki lezot ena pu fer seki zot anvi. Me li, li ador zis so Kreater. (Matye 4:10; Revelasyon 19:10) Sa se enn lot kitsoz ki separ li ar sa lemond la.

“Mo Rwayom Pa Fer Parti dan Sa Lemond La”

5, 6. Kuma eski kan nu sumet ar Rwayom Bondye sa separ nu ar lemond?

⁵ Bann Kretyin zot bann disip Zezi Kris ek zot sumet zot ar Rwayom Bondye. Akoz sa zot pa fer parti dan lemond. Pandan so zizman devan Pons Pilat, Zezi ti dir: “Mo rwayom pa dan sa lemond la. Si mo rwayom ti dan sa lemond la, mo bann serviter ti pu lager pu ki pa livre mwa ar bann Zwif. Me, mo rwayom pa isi.” (Zan 18:36) Sa Rwayom la, se mwayin ki Zeova pu servi pu fer sanktifye so non. Grasa sa Rwayom la, Li pu pruve ki li ena drwa pu reyne ek Li pu akonpli so volonte lor later parey kuma dan lesyel. (Matye 6:9, 10) Kan li ti prese, Zezi ti anons bon nuvel lor Rwayom. Ek li ti dir ki so bann disip pu anons sa mem mesaz la ziska lafin sa lemond la. (Matye 4:23; 24:14) An 1914, sa bann parol ki truv dan Revelasyon 11:15 la ti realize: “Rwayom lemond finn vinn rwayom nu Senyer ek rwayom Kris, ek li pu reyne kuma lerwa pu tuletan.” Byinto, sa Rwayom ki dan lesyel la pu sel guvernman ki pu reyne lor tu bann dimunn. (Danyel 2:44) Pu ariv enn lepok kot mem bann dirizan sa lemond la pu bizin rekonet so lotorite.—Psom 2:6-12.

⁶ Zordi, bann vre Kretyin zot konsyan tu sa bann kitsoz la, akoz sa zot sumet zot ar Rwayom Bondye. Zot swiv usi konsey Zezi pu ‘kontiyn rod avan tu rwayom Bondye ek so lazistis.’ (Matye 6:33) Sa pa fer zot azir kuma bann tret anver peyi kot zot viv. Me, lor plan spirityel sa separ zot avek lemond. Travay prinsipal bann Kretyin zordi, parey kuma dan premye syek, se ‘rann enn gran temwaynaz lor rwayom Bondye.’ (Akt 28:23) Okenn guvernman imin pena drwa anpes sa travay ki Bondye finn donn lord pu fer la.

7. Kifer eski bann Kretyin pa pran par dan bann lager, ek kuma eski zot finn montre sa?

⁷ Bann Temwin Zeova pa finn pran par dan bann lager nasyonal ek internasyonal ki ti ena dan 20em ek 21em syek. Zot finn fer sa parski zot pu Zeova. Anplis, zot bann disip Zezi ek zot sumet zot ar Rwayom Bondye. Zot pa pran par personn dan bann lager. Zot pa finn lev bann zarm kont personn, ni zot finn fann bann propagann dan sa lemond la. Zot finn swiv bann prinsip ki zot ti dir bann dirizan Nazi dan l’Allemagne an 1934: “Nu pa interese ar bann zafer politik. Me nu byin devwe ar Rwayom Bondye kot Zezi Kris lerwa. Nu pa pu fer personn ditor. Nu ti pu kontan viv dan lape ek fer dibyin anver tu dimunn sak fwa nu gayn lokazyon.” Sa bann Kretyin la finn swiv sa bann prinsip la avek enn gran lafwa malgre bann gran lopozisyon.

Bann Anbasader ek Bann Reprezantan pu Kris

8, 9. Kuma eski zordi bann Temwin Zeova zot bann anbasader ek bann reprezantan, ek kuma eski sa inflyans zot relasyon avek lezot nasyon?

⁸ Pol ti koz lor limem ek lor bann lezot Kretyin ki ti swazire pu al viv dan lesyel, kuma “bann anbasader pu Kris.” (2 Korintyin 5:20; Efezyin 6:20) Depi 1914, sa bann Kretyin la finn kalifye kuma bann anbasader Rwayom Bondye. Zot bann “garson” dan sa rwayom la. (Matye 13:38; Filipyin 3:20; Revelasyon 5:9, 10) Anplis, pu sutenir sa bann Kretyin ki’nn swazire la dan zot travay anbasader, Zeova finn swazir parmi bann nasyon, “enn gran laful” ki Labib apel bann “lezot muton.” Sa bann Kretyin la, zot ena lespwar pu viv lor later. (Revelasyon 7:9; Zan 10:16) Nu kapav apel sa bann Kretyin ki pu viv lor later la bann “reprezantan” Rwayom Bondye.

⁹ Normalman enn anbasader ek bann dimunn ki travay avek li, zot pa mel zot dan bann zafer sa peyi kot zot travay la. Se kumsa mem ki bann Kretyin usi fer. Zot pa partisip dan bann zafer politik bann nasyon. Zot pa pran par, ni zot kont kit grup nasyonal, rasyal, sosyal, uswa ekonomik. (Akt 10:34, 35) Okontrer, zot “fer dibyin anver tu dimunn.” (Galat 6:10) Bann Temwin Zeova pa pran par personn. Donk sa vedir ki personn pa kapav rezet zot mesaz ek pretann ki se parski bann Temwin asosye avek enn lot parti opozan dan bann divizyon rasyal, nasyonal, uswa ant bann tribi.

Idantifye par Lamur

10. Ki linportans lamur ena pu enn Kretyin?

¹⁰ Ena enn lot rezon kifer bann Kretyin pa pran par dan bann zafer lemond. Se akoz zot relasyon avek bann lezot Kretyin. Zezi ti dir so bann disip: “Par sa tu pu kone ki zot mo bann disip, si zot ena lamur ant zot.” (Zan 13:35) Pu enn Kretyin, lamur se enn kitsoz ki byin inportan. (1 Zan 3:14) Relasyon ki enn Kretyin ena avek bann lezot Kretyin li byin pros, parski sa li ena enn rapor avek so relasyon ar Zeova ek Zezi. Li pa kontan zis bann frer ek ser ki dan so prop kongregasyon, me “tu bann frer partu dan lemond.”—1 Pyer 5:9.

11. Kuma eski kondwit bann Temwin Zeova li inflyanse par lamur ki zot ena ant zot?

¹¹ Zordi, bann Temwin Zeova montre zot lamur pu zot bann frer ek ser kan zot realiz bann parol Izai 2:4: “Zot pu forz zot lepe, ek fer li vinn enn zuti ki fuy later. Zot pik, zot pu fer li vinn sizay. Okenn nasyon pa pu lev lepe kont enn lot nasyon, ek personn pa pu aprann lager ankor.” Parski bann vre Kretyin zot anseyne par Zeova, zot res anpe avek Li ek ant zot. (Izai 54:13) Zot kontan Bondye ek zot bann frer. Akoz sa, li inposib pu zot al lager kont bann lezot Kretyin parey kuma zot, ni mem kont ninport kisannla dan lezot peyi. Lape ek linite ki zot ena parmi zot li enn kitsoz inportan dan zot ladorasyon. Sa montre ki vremem zot ena lespri Bondye. (Psom 133:1; Mika 2:12; Matye 22:37-39; Kolosyin 3:14) Zot “rod lape . . . ek zot kontiyn fer li,” parski zot kone ki “lizye Zeova li lor bann dimunn drwat.”—Psom 34:14, 15.

Kuma Bann Kretyin Konsider Lemond

12. Ki latitid ki Zeova ena, bann Temwin Zeova usi ena anver bann dimunn dan lemond, ek kuma eski zot imit Zeova?

¹² Zeova finn pronons enn move zizman kont sa lemond la. Me Li pankor ziz tu bann dimunn. Kan So ler pu arive, Li pu servi Zezi pu fer sa. (Psom 67:3, 4; Matye 25:31-46; 2 Pyer 3:10) Anatandan, Li montre so gran lamur anver tu bann dimunn. Li finn mem donn so sel Garson ki Li’nn kre direkteman pu ki zot tu kapav gayn lavi pu tuletan. (Zan 3:16) Antan ki bann Kretyin, nu imit lamur Bondye. Kuma? Se kan nu fer bann dimunn kone ki bann dispozisyon Zeova finn pran pu sap zot. Nu kontiyn fer sa mem si suvan ena dimunn ki pa apresye bann zefor ki nu fer.

13. Kuma eski nu bizin konsider bann dirizan dan sa lemond la?

¹³ Kuma eski nu konsider bann dirizan sa lemond la? Pol finn reponn sa kestyon la kan li finn ekrir: “Tu dimunn bizin sumet ar bann guvernman. Parski se Bondye ki permet bann lotorite egziste. Sakenn okip so pozisyon kot Bondye finn met li.” (Romin 13:1, 2) Bann dirizan ‘okip sakenn zot pozisyon lotorite’ (ki li enn pozisyon inportan uswa mwin inportan konpare ar enn lot, me zot tuzur inferyer ar Zeova) parski Bondye Tu-Pwisan ki permet zot ena sa lotorite la. Enn Kretyin sumet li ar bann lotorite sa lemond la parski sa li enn fason pu montre so lobeisans ar Zeova. Me ki arive kan ena enn dezakor ant seki Bondye pe demande ek seki bann guvernman pe demann nu pu fer?

Lalwa Bondye ek Lalwa Sezar

14, 15. (a) Kuma eski Danyel ti kapav evit enn dezakor an seki konsern so lobeisans pu lerwa ek Bondye? (b) Ki pozisyon sa trwa Ebre la finn pran kan zot pa finn kapav evit enn dezakor ant zot lobeisans pu lerwa ek pu Bondye?

¹⁴ Danyel ek so trwa kamarad finn donn nu enn bon legzanp. Dan ki domenn? Zot finn montre nu kuma nu kapav ena lekilib ant nu sumisyon anver bann guvernman imin ek sumisyon anver lotorite Bondye. Kan sa kat Ebre la ti al an Babilonn kuma bann prizonye, zot finn obeir bann lalwa sa peyi la. Byin vit, bannla finn swazir zot pu zot gayn enn formasyon spesyal. Danyel finn realize ki sa formasyon la ti pu kapav fer zot al kont Lalwa Zeova. Ki li finn fer? Li finn diskit sa avek ofisye ki ti ansarz. Rezilta: Bannla finn fer bann laranzman spesyal pu respekte konsyans sa kat Ebre la. (Danyel 1:8-17) Bann Temwin Zeova swiv legzanp Danyel. Dan ki fason? Se kan, avek respe, zot explik zot pozisyon ar bann ofisye guvernman. Kumsa zot evit bann problem initil.

¹⁵ Me, dan enn lot lokazyon, bann kamarad Danyel pa finn kapav evit dezakor ki ti leve ant zot sumisyon pu lerwa ek zot sumisyon pu Bondye. Lerwa Babilonn ti fer konstrir enn gran idol dan laplenn Dura. Li ti donn lord tu bann gran ofisye, parmi ti ena usi bann sef dan bann distrik, pu rasanble pu sa linogirasyon la. Sa lepok la, trwa kamarad Danyel ti deza bann sef dan prinsipal distrik Babilonn. Donk, sa lord la ti aplik pu zot usi. Enn moman pandan linogirasyon, tu bann ki ti rasanble ti pu bizin azenu devan sa zimaz la. Me sa bann Ebre la ti kone ki sa lord la li kont lalwa Bondye. (Deteronom 5:8-10) Donk, kan tu dimunn ti’nn azenu devan sa stati la, zot, zot finn res debut. Parski zot finn dezobeir lord ki lerwa ti done, zot finn met zot lavi an danze kot zot ti pu al brile vivan. Se grasa enn mirak ki zot finn sape. Me zot finn swazir pu riske zot lavi olye ki zot dezobeir Zeova.—Danyel 2:49–3:29.

16, 17. Ki bann zapot finn fer kan zot finn gayn lord pu aret prese, ek kifer?

¹⁶ Dan premye syek, bann zapot Zezi Kris ti bizin prezant devan bann sef Zwif dan Zerizalem. Bannla ti donn zot lord pu aret prese ek aret servi non Zezi kan zot prese. Ki zot ti fer? Zezi ti donn zot lord pu fer bann dimunn dan tu bann nasyon vinn bann disip, parmi ti ena usi bann dimunn ki ti dan Zide. Li ti dir zot usi ki zot bizin vinn so bann temwin dan Zerizalem ek partu dan lemond antye. (Matye 28:19, 20; Akt 1:8) Bann zapot ti kone ki bann lord ki Zezi ti donn zot ti reprezant seki Bondye ti ule zot fer. (Zan 5:30; 8:28) Donk, zot finn dir: “Nu bizin obeir Bondye kuma enn sef plito ki bann zom.”—Akt 4:19, 20; 5:29.

¹⁷ Bann zapot pa ti pe rebele kan zot finn dir sa. (Proverb 24:21) Me, kan bann dirizan imin ti anpes zot pu fer volonte Bondye, zot ti zis kapav dir: ‘Nu bizin obeir Bondye, pa bann dimunn.’ Zezi ti dir ki nu bizin “rann Sezar bann kitsoz ki pu Sezar, me rann Bondye bann kitsoz ki pu Bondye.” (Mark 12:17) Si nu dezobeir enn lord Bondye parski se enn dimunn ki pe demann nu pu fer sa, se kumadir nu pe donn li seki pu Bondye. Olye nu fer sa, nu rann Sezar tu bann kitsoz ki pu li. Me an mem tan, nu rekonet ki Zeova, Limem ki pli gran lotorite. Limem ki Lerwa dan liniver, Limem ki Kreater, ek Lasurs tu lotorite.—Revelasyon 4:11.

Nu Pu Tini Ferm

18, 19. Ki bon pozisyon enn kantite nu bann frer finn pran, ek kuma eski nu kapav swiv zot legzanp?

¹⁸ Zordi, laplipar bann guvernman dan lemond rekonet ki bann Temwin Zeova pa pran par dan politik. Nu byin rekonesan pu sa. Me, dan sertin peyi, bann Temwin finn fer fas ar bann persekisyon byin-byin dir. Pandan 20em syek, ek ziska zordi, sertin nu bann frer ek ser finn bizin lite avek tu zot lafors. Dan enn sans spirityel zot finn bizin lager “sa bon lager pu lafwa la.”—1 Timote 6:12.

¹⁹ Kuma eski nu kapav tini ferm kuma zot? Dabor, nu rapel ki nu bizin atann pu gayn persekisyon. Fode pa nu gayn sok kan nu konn sa bann sityasyon difisil la. Lapot Pol ti donn sa lavertisman la Timote: “Tu bann ki ule viv dan latasman avek Bondye kuma enn disip Zezi Kris, zot usi, zot pu gayn persekisyon.” (2 Timote 3:12; 1 Pyer 4:12) Kuma eski nu kapav pa gayn persekisyon dan enn lemond kot linflyans Satan byin for? (Revelasyon 12:17) Tank nu res fidel, pu tuzur ena sertin ki ‘pu truv sa drol ek ki pu koz nu an mal.’—1 Pyer 4:4.

20. Ki lankurazman ki nu deza kone, pe rapel nu isi?

²⁰ Dezyeman, nu sir ki Zeova ek so bann anz pu sutenir nu. Elisa, enn profet lepok lontan limem ti dir “bann seki ar nu pli buku ki bann ki ar zot.” (2 Lerwa 6:16; Psom 34:7) Li kapav arive ki Zeova les persekisyon kontiyne pu enn tigit letan, pu realiz so bon proze. Me, Li pu tuletan donn nu lafors ki nu bizin pu andire. (Izai 41:9, 10) Sertin finn mem perdi zot lavi. Me fode pa ki sa dekuraz nu. Zezi ti dir: “Pa per bann ki tuy lekor me ki pa kapav tuy nam. Me plito per sa Kikenn ki kapav detrir nam ek lekor dan Zeenn.” (Matye 10:16-23, 28) Nu zis “bann abitan tanporer” dan sa lemond la. Nu servi nu letan dan sa lemond la ‘pu nu kapav gayn enn vre lavi,’ setadir lavi eternel dan nuvo lemond Bondye. (1 Pyer 2:11; 1 Timote 6:19) Tank ki nu res fidel ar Bondye, personn pa kapav anpes nu gayn sa rekonpans la.

21. Ki kitsoz nu bizin tuzur rapel?

²¹ Donk, anu tuzur rapel bann bon relasyon ki nu ena avek Bondye Zeova. Anu tuzur apresye benediksyon ki nu ena pu vinn bann disip Zezi ek bann ki sumet ar Rwayom Bondye. Anu kontan nu bann frer ek ser avek tu nu leker. Ek anu tuzur apresye lamur ki zot ena pu nu. Ek pli inportan ankor, anu ekut bann parol ki enn ekrivin Psom finn ekrir: “Atann Zeova avek pasyans, gard kuraz ek ki to leker res for. Wi, atann Zeova avek pasyans.” (Psom 27:14; Izai 54:17) Se kumsa ki, parey kuma enn kantite Kretyin avan nu, nu pu tini ferm ek gard nu lespwar sir. Nu pu bann Kretyin fidel ki pa fer parti dan lemond.

Eski U Kapav Explike?

• Kuma eski sa relasyon ki nu ena avek Zeova la separ nu avek sa lemond la?

• Antan ki bann ki sumet ar Rwayom Bondye, kuma eski nu pa pran par dan sa lemond la?

• Kuma eski lamur ki nu ena pu nu bann frer fer nu res separe ar sa lemond la?

[Zimaz lor paz 25]

Kuma eski nu sumisyon ar Rwayom Bondye li inflyans nu relasyon avek lemond?

[Zimaz lor paz 26]

Enn Utu ek enn Tutsi pe travay ansam dan lazwa

[Zimaz lor paz 27]

Bann frer Kretyin Zwif ek Arab

[Zimaz lor paz 27]

Bann Kretyin Serb, Bosni, ek Kroat pe profit konpayni zot kamarad

[Zimaz lor paz 28]

Ki nu bizin fer kan bann dirizan donn nu lord pu dezobeir lalwa Bondye?