“Gard enn Bon Kondwit Devan Tu Bann Dimunn”

“Donn tu bann dimunn loner, kontan tu bann frer.”—1 PYER 2:17.

1, 2. (a) Ki enn zurnalis finn dir konsernan bann Temwin Zeova? (b) Kifer eski bann Temwin Zeova sey fer tu pu gard enn bon kondwit?

PLIZIR lane finn pase depi ki enn zurnalis dan Amarillo, Texas, États-Unis, ti vizit diferan legliz dan sa landrwa la. Apre sa, li ti fer enn rapor lor rezilta sa lanket la. Enn grup ti byin inpresyonn li parski zot ti diferan avek lezot. Li dir: “Pandan trwazan, mo’nn asiste lasanble ki bann Temwin Zeova fer sak lane dan Amarillo Civic Center. Pandan ki mo’nn ansam avek zot, mo pa finn truv personn alim enn sigaret, uver enn kann labyer, uswa zure. Zot ti byin prop, ek zot ti ena bon manyer. Zot ti byin abiye, ek zot ti byin abordab. Zame dan mo lavi mo finn zwenn enn grup dimunn kuma zot.” Suvan finn inprim bann komanter kumsa lor bann Temwin Zeova. Me kifer eski bann dimunn ki pena mem krwayans ki bann Temwin Zeova, suvan koz an byin lor zot?

² Bann dimunn suvan koz an byin lor bann serviter Bondye, parski zot ena enn bon kondwit. Zordi, bann prinsip an zeneral pe vinn pli pabon. Me mem sa, bann Temwin Zeova konsider bann bon prinsip lor kondwit kuma enn kitsoz ki zot oblize swiv. Li form parti dan zot ladorasyon. Zot kone ki seki zot fer ena enn lefe lor Zeova ek lor zot bann frer ek ser Kretyin. Zot bon kondwit fer lezot aksepte laverite ki zot pe prese. (Zan 15:8; Tit 2:7, 8) Donk, anu gete kuma nu kapav gard enn bon kondwit ek lerla kontiyn defann bon repitasyon Zeova ek so bann serviter. Nu pu gete usi ki byinfe nu gayne kan nu fer sa.

Dan Lafami

3. Kont ki kitsoz bann fami Kretyin bizin protez zot ?

³ Anu gete ki kondwit nu bizin ena dan lafami. Enn liv lor liberte pu pratik bann relizyon (Die Neuen Inquisitoren: Religionsfreiheit und Glaubensneid) ekrir par Gerhard Besier ek Erwin K. Scheuch dir: “Pu bann Temwin Zeova, lafami se enn kitsoz ki bizin byin proteze.” Sa li byin vre. Bann fami byin bizin proteksyon zordi, parski ena enn kantite danze. Ena bann zanfan ki ‘pa ekut zot paran,’ ek bann adilt ki ‘pena lafeksyon’ uswa ki ‘pa konn metriz zotmem.’ (2 Timote 3:2, 3) Se dan bann fami ki bann mari bat zot fam, uswa bann fam bat zot mari. Bann paran maltret zot zanfan, uswa negliz zot. Bann zanfan vinn rebel, zot tom dan ladrog ek zot amenn enn move lavi uswa zot kit lakaz zot ale. Tusala arive akoz linflyans “latitid sa lemond la” ki kapav detrir enn fami. (Efezyin 2:1, 2) Donk, nu bizin protez nu fami kont sa move latitid la. Kuma nu kapav fer sa? Se kan nu pran kont konsey ki Zeova donn sak manb enn fami.

4. Ki responsabilite sak manb enn fami Kretyin ena anver zot kamarad?

⁴ Bann kup Kretyin rekonet ki zot ena responsabilite pu donn zot konzwin seki li bizin lor plan afektif, spirityel, ek fizik. (1 Korintyin 7:3-5; Efezyin 5:21-23; 1 Pyer 3:7) Bann paran Kretyin ena bann gran responsabilite anver zot zanfan. (Proverb 22:6; 2 Korintyin 12:14; Efezyin 6:4) Amezir ki zot grandi, bann zanfan Kretyin aprann ki zot usi zot ena bann responsabilite. (Proverb 1:8, 9; 23:22; Efezyin 6:1; 1 Timote 5:3, 4, 8) Pu nu ranpli bann responsabilite la, nu bizin fer buku zefor. Nu bizin ena usi determinasyon, ek nu fer li avek lamur ek enn lespri sakrifis. Kan bann manb enn fami ranpli bann responsabilite ki Bondye finn done, zot vinn enn benediksyon pu zot fami ek pu kongregasyon. Pli inportan ankor, zot donn loner Bondye Zeova ki finn etabli maryaz.—Zenez 1:27, 28; Efezyin 3:15.

Nu Bann Frer ek Ser

5. Ki bann benediksyon nu gayne kan nu frekant nu bann frer ek ser?

⁵ Antan ki bann Kretyin, nu ena usi sertin responsabilite anver tu bann manb dan kongregasyon. Donk nu ena usi bann responsabilite anver ‘tu bann frer dan lemond antye.’ (1 Pyer 5:9) Pu nu lasante spirityel, li byin inportan ki nu frekant nu kongregasyon. Kan nu zwenn ansam avek nu bann frer ek ser, nu profit zot konpayni ek sa ankuraz nu. Nu profit usi manze spirityel ki “esklav fidel” donn nu. (Matye 24:45-47) Si nu ena problem, nu kapav al ver nu bann frer ki pu donn nu bann bon konsey baze lor bann prinsip Labib. (Proverb 17:17; Eklezyast 4:9; Zak 5:13-18) Nu bann frer pa abandonn nu kan nu dan bann sityasyon difisil. Wi, li vremem enn benediksyon pu form parti dan lorganizasyon Bondye!

6. Kuma eski Pol finn montre ki nu ena responsabilite anver bann lezot Kretyin?

⁶ Me, nu pa dan kongregasyon zis pu gayn kitsoz. Nu la usi pu done. Zezi ti dir: “Ena buku plis boner kan done ki kan gayne.” (Akt 20:35) Lapot Pol ti atir latansyon lor enn latitid ki nu bizin ena; setadir done volonterman. Li ti ekrir: “Anu tini ferm deklarasyon piblik nu lesperans san nu ezite, parski sa kikenn ki finn promet la, li fidel. Anu pans sakenn nu bann frer, pu pus nu pu ena lamur ek pu fer bann bon aksyon. Pa negliz nu bann reynion, parey kuma sertin ena labitid fer. Me ankuraz nu kamarad, ek ankor plis kan nu truv zur la pe koste.”—Ebre 10:23-25.

7, 8. Kuma eski nu kapav montre ki nu kontan fer bann don pu nu bann frer ek ser dan nu kongregasyon ek bann Kretyin dan lezot peyi?

⁷ Dan kongregasyon nu fer “deklarasyon lor nu lesperans.” Kuma? Se kan nu donn bann komanter uswa kan nu partisipe dan program reynion. Nu sir ki sa bann zefor la ankuraz nu bann frer. Nu ankuraz zot usi kan nu koz avek zot avan ek apre reynion. Se enn moman kot nu kapav donn kuraz bann ki feb, konsol bann dimunn ki deprime, ek ankuraz bann dimunn malad. (1 Tesalonisyin 5:14) Bann Kretyin sinser, kontan done dan sa domenn la. Ek se akoz sa ki buku dimunn ki asiste nu bann reynion pu premye fwa, zot byin tuse par lamur ki ena parmi nu.—Psom 37:21; Zan 15:12; 1 Korintyin 14:25.

⁸ Nu pa zis kontan bann frer ek ser ki dan nu kongregasyon. Nu kontan tu nu bann frer ek ser dan lemond antye. Se akoz sa ki ena enn bwat ki apel Fonds spécial de la Société pour Salles du Royaume dan sertin Lasal DiRwayom. Li posib ki nu Lasal DiRwayom li dan enn bon leta. Me, nu kone ki enn kantite Kretyin dan sertin lezot peyi pena enn bon plas kot zot kapav reyni. Kan nu fer sa bann kontribisyon la, nu montre ki nu kontan sa bann frer ek ser la, mem si nu pa konn zot.

9. Pu ki rezon byin inportan bann Temwin Zeova kontan zot kamarad?

⁹ Me kifer eski bann Temwin Zeova kontan zot kamarad? Se parski Zezi ti donn zot lord pu fer sa. (Zan 15:17) Ek lamur ki zot ena ant zot li enn prev ki lespri Bondye pe azir lor sakenn parmi zot, ek lor zot tu antan ki enn grup. Lamur form parti dan “frwi lespri.” (Galat 5:22, 23) Li vre ki nu pe viv dan enn lemond kot ‘lamur enn kantite dimunn finn diminye.’ Me mem sa, amezir ki bann Temwin Zeova etidye Labib, asiste bann reynion, ek priye Bondye regilyerman, zot manifeste sa lamur la dan enn fason natirel.—Matye 24:12.

Nu Relasyon Avek Lemond

10. Ki responsabilite nu ena anver bann dimunn dan lemond ?

¹⁰ “Deklarasyon piblik lor nu lesperans” ki Pol ti mansyone, rapel nu ki nu ena enn lot responsabilite. Li konsern usi predikasyon labonn nuvel ar bann dimunn ki pankor vinn nu bann frer ek ser. (Matye 24:14; 28:19, 20; Romin 10:9, 10, 13-15) Kan nu prese, se enn lot fason kot nu done. Nu bizin donn nu letan, nu lenerzi, nu bizin prepar nu, gayn formasyon, ek servi nu bann dibyin. Ala kifer, Pol ti ekrir usi: “Mo dwa bann Grek ek bann Etranze, bann ki saz ek bann ki dan linyorans; akoz sa, mo ena enn gran dezir pu anons zot enn bon nuvel, zot usi ki dan lavil Rom.” (Romin 1:14, 15) Parey kuma Pol, nu bizin pa tini-tini kan nu pey sa “det” la.

11. Ki de prinsip biblik ki inflyans nu relasyon avek lemond, me kan mem sa ki nu rekonet?

¹¹ Eski nu ena bann lezot responsabilite anver bann dimunn ki pa krwayan? Wi. Byinsir nu rekonet ki “lemond antye li dan puvwar sa kikenn ki move la.” (1 Zan 5:19) Nu kone ki Zezi ti dir so bann disip: “Zot pa fer parti dan lemond, parey kuma mwa mo pa fer parti dan lemond.” Me kan mem sa, nu travay dan sa lemond la ek nu profit bann fasilite ki li donn nu. (Zan 17:11, 15, 16) Donk, nu ena bann responsabilite dan sa lemond la. Ki sa bann responsabilite la sa? Lapot Pol reponn sa kestyon la dan enn let ki li ti ekrir bann Kretyin dan l’Asie Mineure, enn tipe avan ki Zerizalem detrir. Dan sa let la ena enn prinsip ki ed nu pu gard enn relasyon ekilibre avek lemond.

12. Kuma eski bann Kretyin zot “bann etranze ek bann abitan tanporer,” ek akoz sa, ki kitsoz zot bizin evite?

¹² Dabor, Pyer ti dir: “Mo bann kamarad, antan ki bann etranze ek bann abitan tanporer, mo konsey zot pu evit bann move dezir zot lekor, bann dezir ki fer lager avek nu lavi.” (1 Pyer 2:11) Dan enn sans spirityel, bann vre Kretyin zot kuma “etranze ek bann abitan tanporer.” Kifer? Parski lespwar pu viv pu tuletan sa se kitsoz ki pli inportan dan zot lavi. Bann manb 144,000 zot, zot ena lespwar pu viv dan lesyel, alor ki bann “lezot muton” zot, zot ena lespwar pu viv dan enn paradi lor later. (Zan 10:16; Filipyin 3:20, 21; Ebre 11:13; Revelasyon 7:9, 14-17) Me, ki ete sa bann move dezir la? Parmi, ena dezir pu vinn ris, dezir pu vinn enn gran dimunn. Ena usi bann dezir pu ena enn move kondwit, ek bann dezir pu ena parey kuma lezot ek dezir pu gayn seki lezot ena.—Kolosyin 3:5; 1 Timote 6:4, 9; 1 Zan 2:15, 16.

13. Kuma eski bann move dezir zot “fer lager avek nu lavi”?

¹³ Sa bann kalite dezir la zot “fer lager avek nu lavi.” Zot detrir nu relasyon avek Bondye. Ek donk, zot met nu lesperans an danze. Par egzanp, kuma eski nu pu kapav prezant nu lekor kuma “enn sakrifis vivan, sin, akseptab pu Bondye” si nu kiltiv enn dezir pu bann kitsoz imoral? Kuma eski nu pu kapav ‘rod rwayom avan tu kitsoz,’ si nu galup deryer kas? (Romin 12:1, 2; Matye 6:33; 1 Timote 6:17-19) Pli bon kitsoz ki nu kapav fer se swiv legzanp Moiz. Setadir, rezet bann tantasyon sa lemond la, ek met nu servis pu Zeova an premye dan nu lavi. (Matye 6:19, 20; Ebre 11:24-26) Sa se enn kitsoz byin-byin inportan si nu’le gard enn relasyon ekilibre avek lemond.

‘Gard enn Bon Kondwit’

14. Kifer eski nu, antan ki bann Kretyin, nu fer zefor pu gard enn bon kondwit?

¹⁴ Nu kapav truv enn lot konsey dan bann lezot parol ki Pyer finn dir: “Gard enn bon kondwit devan tu bann dimunn. Kumsa, mem si bannla koz an mal lor zot ek dir ki zot bann move dimunn, akoz zot bann bon aksyon, zot kapav donn Bondye loner kan zur so zizman vini.” (1 Pyer 2:12) Antan ki bann Kretyin, nu bizin fer zefor pu donn legzanp. Dan lekol, nu aprann byin. Dan travay, nu bann bon travayer ek nu onet, mem si nu patron azir dan enn move fason. Dan enn fami kot enn konzwin pa dan laverite, enn mari uswa enn fam Kretyin sey fer bann gran zefor pu swiv bann prinsip Labib. Li vre ki li pa tuletan fasil pu fer sa. Me nu kone ki nu bon kondwit fer Zeova plezir, ek suvan sa ena enn bon lefe lor bann dimunn ki pa Temwin.—1 Pyer 2:18-20; 3:1.

15. Kuma eski nu kone ki dan lemond antye bann dimunn rekonet ki bann Temwin Zeova ena enn bon kondwit?

¹⁵ Laplipar Temwin Zeova reysi gard enn bon kondwit. Nu kapav truv sa dan plizir komanter ki finn fer lor zot, ek ki finn pibliye pandan plizir lane. Par egzanp, enn lagazet dan l’Italie, Il Tempo dir: “Bann dimunn ki travay avek bann Temwin Zeova, dir ki zot bann travayer onet. Zot dir usi ki zot telman sir lor zot bann krwayans, ki zot donn linpresyon ki zot fanatik. Me, zot merit respe pu zot fidelite.” Herald, enn lot zurnal dan Buenos Aires, Argentine, dir: “Bann Temwin Zeova finn donn prev ki zot bann sitwayin ki travay dir, ki serye, ki pa fer gaspiyaz ek ki ena lakrint pu Bondye.” Sergei Ivanenko, enn spesyalis dan letid Labib dan La Russie, finn dir: “Dan lemond antye bann dimunn rekonet ki bann Temwin Zeova zot bann dimunn ki obeir lalwa san fot, ek sirtu zot pey zot tax kuma bizin.” Dan Zimbabwe, manejer enn lanplasman ki bann Temwin Zeova suvan servi pu zot fer zot lasanble, finn dir: “Mo finn truv sertin Temwin pe ramas papye ek pe netway twalet. Kan zot finn ale, zot finn kit sa lanplasman la pli prop ki avan. Zot bann zenn ena bon manyer. Mo ti pu kontan si lemond antye ti ranpli ar bann Temwin Zeova.”

Sumisyon Bann Kretyin

16. Ki relasyon nu ena avek bann lotorite sa lemond la, ek kifer?

¹⁶ Lapot Pyer ti koz usi lor nu relasyon avek bann lotorite dan sa lemond la. Li dir: “Akoz nu Senyer, sumet zot ar tu bann dimunn. Sumet zot ar lerwa parski li siperyer, ar bann guverner ki Li’nn avoye pu pini bann move dimunn, me usi pu felisit bann ki fer dibyin. Parski Bondye anvi ki, par zot bann bon aksyon zot kapav fer bann dimunn ki dan linyorans ek ki dir bann kitsoz ki pa rezonab, res trankil.” (1 Pyer 2:13-15) Nu apresye tu bann servis ki nu gayne ar guvernman. An akor avek bann parol Pyer, nu obeir bann lalwa guvernman ek nu pey nu tax. Nu rekonet ki Bondye finn donn bann guvernman drwa pu pini bann ki pa obeir lalwa. Me selman, rezon prinsipal kifer nu sumet ar bann guvernman, se “akoz nu Senyer.” Se seki Bondye anvi. Anplis, nu pa anvi sali non Zeova. Sa kapav arive si nu gayn enn pinisyon parski nu’nn fer enn move kitsoz.—Romin 13:1, 4-7; Tit 3:1; 1 Pyer 3:17.

17. Kan ‘bann dimunn ki dan linyorans’ kont nu, ki lasirans nu kapav ena?

¹⁷ Malerezman, ena sertin ‘dimunn ki dan linyorans’ dan guvernman, ki persekit nu dan plizir fason. Par egzanp zot fann bann fos rimer uswa bann mansonz lor nu. Me, kan ler ki Zeova finn fixe vini, tuletan zot bann mansonz devwale. Ek bann dimunn ki dir bann kitsoz ki pa rezonab, bizin res trankil. Nu bon kondwit montre kisannla ki pe koz laverite. Akoz sa mem, bann ofisye guvernman ki onet suvan felisit nu parski nu bann dimunn ki fer seki bon.—Romin 13:3; Tit 2:7, 8.

Bann Esklav Bondye

18. Antan ki bann Kretyin, kuma eski nu kapav evit servi nu liberte dan enn move fason?

¹⁸ Asterla, Pol donn sa lavertisman la: “Fer kuma bann zom lib, me pa servi zot liberte kuma enn vwal pu kuver seki move, me azir kuma bann esklav Bondye.” (1 Pyer 2:16; Galat 5:13) Zordi, nu konesans lor Labib liber nu ar bann fos lanseynman relizye. (Zan 8:32) Anplis, nu ena enn liberte ki permet nu swazir. Me, nu pa servi nu liberte dan enn move fason. Parfwa nu bizin fer bann swa konsernan nu frekantasyon, nu labiyman, nu laparans, uswa nu bann divertisman, uswa mem lor seki nu manze ek nu bwar. Kan nu fer sa bann swa la, nu rapel ki bann vre Kretyin zot bann esklav Bondye. Nu pa fer zis nu tusel plezir. Nu swazir pu servi Zeova olye ki nu vinn esklav nu bann prop dezir uswa esklav lamod sa lemond la.—Galat 5:24; 2 Timote 2:22; Tit 2:11, 12.

19-21. (a) Kuma nu konsider bann dimunn ki ena enn pozisyon dan guvernman? (b) Kuma sertin finn montre ki zot “kontan tu bann frer dan lemond antye”? (c) Ki pli gran responsabilite nu ena?

¹⁹ Pyer kontiyn dir: “Donn tu kalite dimunn loner, kontan tu bann frer, ena lakrint pu Bondye ek donn lerwa loner.” (1 Pyer 2:17) Bondye Zeova permet ki bann dimunn okip plizir pozisyon dan guvernman. Akoz sa, nu donn sa bann dimunn la loner ki zot merite. Nu mem priye pu zot pu ki zot kapav les nu kontiyn prese dan lape ek avek latasman pu Bondye. (1 Timote 2:1-4) Me, an mem tan, nu “kontan tu nu bann frer dan lemond antye.” Nu fer tu pu ed nu bann frer ek ser, me pa pu fer zot ditor.

²⁰ Anu pran enn legzanp. Enn peyi l’Afrique ti divize par bann lager rasyal. Me mem dan sa sityasyon la, kondwit bann Temwin Zeova ti remarkab. Reformierte Presse, enn zurnal Suisse finn ekrir: “An 1995, African Rights, enn lorganizasyon lor drwa bann dimunn ki etabli dan Londres, finn reysi pruve ki tu bann legliz ti partisip dan sa lager la, exepte bann Temwin Zeova.” Kan bann Temwin Zeova dan l’Europe ti’nn tann sa bann levennman difisil la, vit-vit zot finn avoy manze ek bann medsinn pu zot bann frer ek ser dan sa landrwa. (Galat 6:10) Zot finn pran kont bann parol ki truv dan Proverb 3:27: “Pa refiz fer dibyin anver bann dimunn ki merite sak fwa ki to truve to kapav fer li.”

²¹ Li vre ki nu ena responsabilite pu donn loner ninport ki lotorite dan sa lemond la. Nu bizin usi kontan nu bann frer ek ser. Me nu ena enn lot pli gran responsabilite. Ki sa responsabilite la sa? Lapot Pyer dir: “Ena lakrint pu Bondye.” Nu dwa Zeova buku plis ki seki nu dwa bann dimunn. Dan ki sans? Ek kuma eski nu kapav ekilibre nu responsabilite anver Bondye ek nu responsabilite anver bann lotorite? Nu pu gayn repons sa bann kestyon la dan prosin lartik.

Eski U Ankor Rapel?

• Ki responsabilite bann Kretyin ena dan zot fami?

• Dan kongregasyon, kuma nu kapav montre ki nu kontan done?

• Ki responsabilite nu ena anver bann dimunn dan lemond?

• Ki bann byinfe nu gayne kan nu gard enn bon kondwit?

[Zimaz lor paz 19]

Kuma eski enn fami Kretyin kapav vinn enn landrwa kot gayn lazwa?

[Zimaz lor paz 20]

Kifer eski bann Temwin Zeova kontan zot kamarad?

[Zimaz lor paz 20]

Eski nu kapav montre ki nu kontan nu bann frer ek ser mem si nu pa konn zot?