Kan Ou Konzwin Infidel

“Kan mo misie ti dir mwa ki li pe kit mwa pou al avek enn fam ki pli zenn, mo ti anvi mor. Sa ti paret telman inzis, sirtou kan mo mazinn tou bann sakrifis ki mo’nn fer pou li.”—Maria, l’Espagne.

“Kan mo madam ti kit mwa san ki mo atann, koumadir enn parti dan mwa ti mor. Nou bann rev, nou bann lespwar, ek nou bann proze inn tom dan delo. Sertin zour, mo ti ena linpresion ki tou korek, me apre mo ti santi mwa bien-bien tris ankor.”—Bill, l’Espagne.

ENN kikenn kapav santi li bien abat kan so konzwin tronp li. Li vre ki sertin finn kapav pardonn zot konzwin ki’nn repanti ek zot finn fer zefor pou rekonstrir zot relasion.a Me mem si zot res marye ouswa non, bann dimounn ki aprann ki zot konzwin inn tronp zot, zot bien soufer. Me kouma eski zot kapav fer fas ar sa lapenn-la?

BANN VERSE LABIB KI KAPAV ED OU

Malgre zot gran tristes, boukou konzwin inosan inn gagn rekonfor gras-a Labib. Zot finn aprann ki Bondie trouv zot larm ek konpran zot lapenn.—Malaki 2:13-16.

“Sak fwa mo ena traka ek problem to konsol mwa pou mo regagn lazwa.”—Psom 94:19.

Bill rakonte: “Kan mo lir sa verse-la, mo trouv Zeova pe soulaz mo lapenn avek boukou tandres, parey kouma enn papa ki ena konpasion ti pou fer avek so zanfan.”

“To fidel ar seki montre limem fidel.”—Psom 18:25.

Carmen so misie ti tronp li pandan plizir mwa. Carmen rakonte: “Mo misie pa ti fidel. Me mo ena konfians ki Zeova pou fidel ar mwa. Zame Li pa pou desevwar mwa.”

“Napa bizin zot trakase ditou, me dan ninport ki sitiasion, avek enn leker rekonesan, ofer zot lapriyer ek siplikasion Bondie. Lape Bondie ki depas tou lintelizans, pou gard zot lekor [“protez zot leker,” NW].”—Filipien 4:6, 7.

Sasha rakonte: “Mo ti lir sa bann verse-la plizir fwa, ek amezir ki mo ti kontign priye, Bondie ti donn mwa lape.”

Tou bann dimounn ki mansione lao, par moman, zot ti anvi bes lebra. Me zot ti ena konfians an Zeova ek zot ti gagn lafors gras-a so Parol. Bill azoute: “Mem kan tou lezot kitsoz ti paret pe kraze otour mwa, gras-a mo lafwa, mo lavi ti ena enn sans. Mem si, pandan enn tan, mo ti ‘travers vale bien som,’ Bondie ti avek mwa.”—Psom 23:4.

a Pou gagn plis ransegnman lor pardon dan bann ka infidelite, get seri lartik ki trouv dan Réveillez-vous ! 22 Avril 1999, « L’infidélité conjugale. »

Seki Sertin Dimounn Inn Fer dan sa Sitiasion-la

Lir ek reflesi lor bann verse rekonfortan.

Bill rakonte: “Mo’nn lir liv Zob ek liv Psom, ek mo’nn soulign tou bann verse ki adapte ar mo sitiasion. Mo’nn realize ki sa bann ekrivin Labib la ti ena mem lapenn ki mwa.”

Rod rekonfor dan lamizik.

Carmen rakonte: “Aswar, kan mo pa ti pe kapav dormi, mo ti ekout lamizik. Sa ti vremem ed mwa.” Daniel dir: “Mo ti aprann zwe lagitar ek lamizik-la ti ed mwa pou santi mwa anpe.”

Partaz ou santiman.

Daniel dir “Mo pa abitie koz lor mo bann santiman. Me mo ena bann bon kamarad, ek mo ti koz ar zot toulezour. Mo ti dir zot seki mo resanti kan mo ti koz ar zot ek mo ti ekrir zot bann let. Sa ti vremem ed mwa.” Sasha dir: “Led ki mo ti gagne ar mo fami ti vremem bien inportan. Mo mama ti touletan la pou mwa. Kan mo ti anvi koze, li ti pran letan pou ekout mwa. Mo papa ti rasir mwa ek ti fer mwa santi mwa an sekirite. Li ti donn mwa mo letan pou retabli.”

Kontigne priye.

Carmen dir: “Mo ti priye touletan. Mo ti santi ki Bondie ti pre ar mwa, Li ti pe ekout mwa ek ed mwa. Dan sa moman difisil-la, mo finn vinn pli pros ar Bondie.”