Lepep Pli Ere Ki Ena lor Later
1 “Ere lepep ki ena Zeova pu Bondye!” (Psom 144:15) Sa bann parol la dekrir bann Temwin Zeova kuma lepep pli ere ki kapav ena lor later. Pena pli gran lazwa apart lazwa ki gayne kan servi sel vre Bondye vivan, Zeova. Pwiski Li enn “Bondye ere,” bann ki ador Li reflekte so gran lazwa. (1 Tim. 1:11) Ki detrwa kitsoz dan nu ladorasyon rann nu ere kumsa?
2 Bann Rezon pu Ena Lazwa: Zezi ti donn nu lasirans ki nu ere kan nu “konsyan [nu] bezwin spirityel.” (Mat. 5:3) Nu pran kont nu bezwin spirityel kan nu kontiyn etidye Labib ek asiste tu nu bann reynion Kretyin. Kan nu’nn aprann laverite ki ena dan Parol Bondye, sa finn liber nu ar bann foste ek erer ki egziste dan bann relizyon. (Zan 8:32) Labib finn usi anseyn nu meyer fason viv. (Izai 48:17) Akoz sa, dan sa gran fami nu bann frer ki ere la, nu profit konpayni bann lezot Kretyin, ek sa li bon pu nu.—1 Tes. 2:19, 20; 1 Pyer 2:17.
3 Nu gayn buku lazwa kan nu obeir bann prinsip moral elve Bondye, parski nu kone ki sa protez nu ek sa fer Zeova kontan. (Pro. 27:11) Enn zurnalis finn fer sa remark la: “Malgre tu zot bann prinsip strik, bann temwin Zeova pa paret malere. Okontrer, ki zot zenn uswa aze, zot tu paret tuletan dan lazwa ek byin ekilibre.” Kuma eski nu kapav ed lezot pu viv ere parey kuma nu?
4 Ed Lezot pu Konn Boner: Lemond ranpli ar tristes, ek bann dimunn an zeneral pena enn gran lespwar pu lavenir. Purtan nu, nu get lavenir avek konfyans parski nu kone ki enn zur dimunn pu nepli tris. (Rev. 21:3, 4) Ala kifer, nu byin devwe dan nu minister pu rod bann dimunn sinser avek ki nu kapav partaz nu lesperans ek nu bann krwayans lor Zeova.—Eze. 9:4.
5 Enn ser pyonye ti dir: “Pena nanyin ki donn plis lazwa ki kan ed bann dimunn pu konn Zeova ek so laverite.” Anu fer tu seki nu kapav pu ankuraz plis dimunn ankor pu aksepte letid Labib. Servi Zeova ek donn nu mem pu ed lezot pu servi Li, sa mem ki donn pli gran boner ki kapav ena.—Akt 20:35.