Ki Nous Bizin Vrai-Même pou Trouve le Bonheur?

JÉHOVAH, Li “enn Bondié heureux” ek Jésus Christ, li “heureux et seul Souverain.” Zot pli koné ki n’importe kisannla séki nous bizin faire pou nous heureux. (1 Timothée 1:11; 6:15) Donc, li pa étonnant ki la Bible faire nous koné ki nous bizin faire pou trouve le vrai bonheur.—Révélation 1:3; 22:7.

Dans so Sermon lor Montagne, Jésus Christ expliqué seki nous bizin pou trouve le bonheur. Li dire: “Heureux bann dimoune” (1) ki conscient zot pauvreté spirituel, (2) ki en deuil, (3) ki éna la douceur, (4) ki faim ek soif la justice, (5) ki éna miséricorde, (6) ki éna léker pur, (7) ki favorise la paix, (8) ki gagne persécution à cause la justice, ek (9) ki gagne maltraité, ek ki gagne persécution à cause li.—Matthieu 5:3-11.a

Eski Li Vrai Séki Jésus Ti Dire?

Nous pa bizin enn grand l’explication pou comprend kifer certaines kitsoz ki Jésus ti dire, zot vrai. Kisannla kapav démenti ki enn dimoune ki éna la douceur, ki éna miséricorde, ek ki favorise la paix parski li éna enn léker pur, li enn dimoune beaucoup plus heureux ki enn kikenn ki toujours en colère, ki content faire la guerre ek ki pa content pardonne so camarade?

Mais kitfois, nous demann nous couma li possible ki bann dimoune ki faim ek soif la justice, ek ki en deuil, zot kapav heureux. Sa bann dimoune-la, zot éna enn l’attitude réaliste lor bann conditions ki existé dans le monde. Zot pé ‘souffert ek pé plaigné à cause bann kitsoz détestable ki pé arrivé’ dans nou l’époque. (Ézékiel 9:4) C’est pa sa ki faire zot heureux. Mais plutôt, kan zot aprann ki Bondié pou amène la justice lor la terre pou bann dimoune ki pé souffert, c’est sa ki faire zot konn enn grand la joie.—Isaïe 11:4.

Bann dimoune ki content la justice, zot chagrin aussi parski souvent zot pa réussi faire séki droite. Donc, zot conscient zot pauvreté spirituel. Sa bann dimoune-la prêt pou rod direction Bondié parski zot koné ki c’est seulement Li tousel ki kapav aide zot pou surmonte zot défauts.—Proverbes 16:3, 9; 20:24.

Bann dimoune ki en deuil, ki faim ek soif la justice, ek ki conscient zot pauvreté spirituel, c’est bann dimoune ki reconnaite ki zot bizin éna bann bon relations avec zot Créateur. Déjà, kan nous éna bann bon relations avec nou prochain, sa rann nous heureux. Donc, kan nous éna bann bon relations avec Bondié, nous pou plus heureux encore, pa vrai? Oui, kapav vrai-même dire ki tou bann dimoune ki sérieux, ki content la justice, ek ki disposé pou accepté direction Bondié dans zot la-vie, zot bann dimoune heureux.

Mais, sûrement ou trouve sa difficile pou croire ki enn dimoune ki gagne persécution ek ki gagne maltraité, kapav heureux. Mais pourtant, sa bizin vrai parski c’est Jésus li-même ki’nn dire sa. Mais comment nous kapav comprend séki li’nn dire?

Heureux Malgré Persécution —Couma?

Remarqué ki Jésus pa ti dire ki kan enn dimoune gagne maltraité ou-soit li persécuté, sa rann li heureux. Li ti dire: “Heureux bann ki gagne persécution à cause la justice, . . . kan dimoune koz en mal lor zot ek persécute zot . . . à cause moi.” (Matthieu 5:10, 11) Donc, enn dimoune pou heureux, seulement si li pé souffert parski li enn disciple Jésus ek parski li pé suive bann principes justes ki Jésus inn enseigné.

L’exemple bann premier Chrétiens montré nous sa bien. Bann membres Sanhédrin, la cour suprême Juif, “ti faire bann zapôtres vini, ti fouette zot, ek ti donne zot l’ordre pou arrête koz lor nom Jésus, ek après ti largue zot.” Ki bann zapôtres ti faire? “Zot ti sorti devant Sanhédrin, dans la joie parski zot ti’nn déshonoré à cause so nom. Ek toulé-jours dans temple, ek de maison-en-maison, zot ti contigné enseigne ek annonce la bonne nouvelle lor Christ Jésus, sans arrêté.”—Actes 5:40-42; 13:50-52.

L’apôtre Pierre ti donne nous plus détails pou montré couma enn dimoune kapav heureux kan lézot koz en mal lor li. Li ti écrire: “Si pé koz en mal lor zot à cause nom Christ, zot heureux, parski l’esprit ki rempli ar la gloire, oui l’esprit Bondié, lor zot.” (1 Pierre 4:14) Oui, kan enn dimoune pé souffert parski li pé faire le bien, même si li pa facile pou supporte sa souffrance-la, li heureux parski li koné ki li pé gagne l’esprit saint Bondié. Ki rapport éna entre l’esprit saint Bondié ek le bonheur?

Oeuvres de la Chair ou-soit Fruit de l’Esprit?

Bondié donne so l’esprit-saint seulement bann dimoune ki obéir Li couma enn chef. (Actes 5:32) Jéhovah pa donne so l’esprit-saint bann ki pratique “les oeuvres de la chair.” Sa bann pratiques-la, c’est “la fornication, l’impureté, conduite dévergondé, l’idolâtrie, pratique la sorcellerie, la haine, bagarre, jalousie, crise colère, disputes, divisions, sectes, envié lézot, soûlézon, orgies, ek bann lézot kitsoz ki pareil.” (Galates 5:19-21) Li vrai ki zordi dans le monde, “les oeuvres de la chair” bien courant. Pourtant bann ki pratique sa, pa konn enn bonheur durable. Au contraire, zot gâte bann bon relations ki zot éna avec zot famille ek zot camarades. En plus, Parole Bondié dire ki bann dimoune ki “pratique sa bann mauvais kitsoz-la, pa pou gagne royaume Bondié.”

Mais, Bondié donne so l’esprit-saint bann dimoune ki développe “fruit de l’esprit” dans zot la-vie. Bann qualités ki éna dans sa fruit-la c’est: “l’amour, la joie, la paix, la patience, la bienveillance, la bonté, la foi, la douceur, la maîtrise de soi.” (Galates 5:22, 23) Kan nous manifesté sa bann qualités-la, nous crée bann bon relations avec lézot ek avec Bondié, ek en retour, sa faire nous konn le vrai bonheur. (Guette l’encadré.) Ek séki plus important encore, kan nous manifesté l’amour, la bienveillance, la bonté, ek lézot qualités chrétiennes, nous faire Jéhovah plaisir ek nous éna l’espoir pou vive éternellement dans le monde juste ki Li’nn promette.

Le Bonheur, C’est enn Choix

Wolfgang ek Brigitte, c’est enn couple ki reste en Allemagne. Kan zot ti commence étudié la Bible sérieusement, zot ti possède beaucoup kitsoz matériel ki dimoune pensé bizin pou vive heureux. Zot ti jeune ek en bonne santé. Zot ti mette bann linge ki coûte cher, zot ti vive dans enn joli lakaz ki bien décoré, ek zot ti éna enn business ki ti pé marche bien. Zot ti pé passe la plupart zot lé-temps pou gagne plus kitsoz matériel, mais sa pa ti faire zot vrai-même heureux. Mais avec lé-temps, Wolfgang ek Brigitte ti faire enn grand choix. Zot ti commence passe plus lé-temps pou occupe bann kitsoz spirituel ek zot ti rod bann moyen pou vinn plus proche ar Jéhovah. Bientôt, zot choix ti faire zot change zot l’attitude, séki finn amène zot pou simplifié zot la-vie, ek zot ti vinn pionnier, (bann ki prêche la bonne nouvelle à plein temps). Ek zordi, zot pé servi couma volontaires dans bureau bann Témoins de Jéhovah, en Allemagne. En plus, zot pé aprann enn langue Asiatique pou zot kapav aide bann étrangers pou aprann la vérité ki éna dans la Bible.

Eski sa couple-la finn trouve le vrai bonheur? Guetté ki Wolfgang dire: “Depuis ki nous plus occupé avec bann kitsoz spirituel, nous finn vinn plus heureux ek nous finn gagne plus satisfaction dans nou la-vie. En plus, nou mariage inn vinn plus solide depuis ki nous servi Jéhovah avec tou nou léker. C’est vrai ki avant nous ti heureux dans nou ménage, mais seulement nous ti éna bann responsabilités ek bann l’objectifs ki ti faire nous al dans bann directions opposé. Asterla, toulé-deux nous pé poursuive même l’objectif.”

Ki Bizin pou Trouve le Bonheur?

En bref: Evite bann “oeuvres de la chair” ek développe “fruit de l’esprit [Bondié].” Pou ki enn dimoune heureux, li bizin éna désir pou éna bann bon relations avec Bondié. Si li faire zefforts pou faire sa, li pou vinn enn dimoune heureux, pareil couma Jésus ti décrire.

Donc, pa pensé dé-suite ki li impossible pou ou trouve le bonheur. C’est vrai, peut-être ki zordi ou péna enn bon la santé, ou-soit ou éna problème dans ou mariage. Kitfois aussi, li trop tard pou ou éna zenfants, ou-soit ou pé lutté pou trouve enn bon carrière. Peut-être ou porte-monnaie pa aussi rempli ki avant. Mais prend courage, péna okenn raison pou ou désespéré! Domination Royaume Bondié pou résoudre tou sa problème-la ek bann centaines lézot encore. Oui, bientôt Jéhovah pou réalise so promesse ki Li’nn faire écrire dans enn Psaume: “To royauté, li enn royauté ki pou dure pou touletan . . . To ouvert to la-main ek to rassasié désir tou séki vivant.” (Psaume 145:13, 16) Pareil couma plusieurs millions serviteurs Jéhovah à travers le monde finn faire l’experience, ou aussi si ou rappel sa grand promesse-la, sa pou contribué beaucoup à ou bonheur zordi.—Révélation 21:3.

[Note]

[Encadré/zimage lor page 6]

Bann Kitsoz Ki Kapav Faire Nous Vive Heureux

L’Amour pousse lézot pou content ou en retour.

La Joie donne ou la force pou faire face ar bann difficultés.

La Paix aide ou pou garde bann bon relations avec lézot.

La Patience aide ou pou reste heureux même kan ou gagne bann grand difficultés.

La Bienveillance pou attire lézot vers ou.

La Bonté ki ou manifesté incite lézot pou aide ou kan ou bizin zot l’aide.

La Foi pou donne ou l’assurance ki ou éna direction Bondié.

La Douceur pou faire ou éna enn léker calme ek la paix de l’esprit.

La Maîtrise de soi pou aide ou faire moins erreurs.

[Zimage, page 7]

Pou ou heureux, ou bizin comblé ou besoins spirituels