Persécuté Mais Heureux
“Heureux zot été kan dimoune koz en mal lor zot, persécute zot ek koz menti pou dire tou sorte qualités mauvais kitsoz lor zot, à cause moi.”—MATTHIEU 5:11.
1. Ki l’assurance Jésus ti donne so bann disciples concernant le bonheur ek la persécution?
KAN premier fois, Jésus ti envoye so bann zapôtres prêche le Royaume, li ti averti zot ki zot pou gagne l’opposition. Li ti dire zot: “Partout dimoune pou éna la haine pou zot à cause mo nom.” (Matthieu 10:5-18, 22) Mais avant, kan li ti faire so Sermon lor Montagne, li ti donne l’assurance so bann zapôtres ek lézot ki ti pé écoute li, ki sa l’opposition-la pa pou nécessairement affecté zot bonheur. En fait, Jésus ti même montré ki éna enn lien entre le bonheur ek persécution ki bann Chrétiens pou gagné! Mais couma la persécution kapav apporte le bonheur?
Souffert à Cause la Justice
2. D’après Jésus ek d’après l’apôtre Pierre, kan eski la souffrance faire nous heureux?
2 Kan Jésus ti koz lor huitième bonheur, li ti dire: “Heureux bann dimoune ki finn gagne persécution à cause la justice, parski royaume ki dans le ciel inn vinn pou zot.” (Matthieu 5:10) En réalité, c’est pa zis parski enn dimoune pé souffer ki automatiquement li mérite louange. L’apôtre Pierre ti écrire: “Ki bénéfice zot gagné si kan zot faire péché ek ki dimoune batte zot, zot supporte sa? Mais, si zot souffer parski zot pé faire le bien, ek ki zot endure sa, sa c’est enn kitsoz ki faire Bondié plaisir.” Li ti dire encore: “Mais fodé ki personne parmi zot pa souffer parski li enn assassin, ou enn voleur, ou enn dimoune ki faire le mal, ou-soit enn kikenn ki veille zaffaire lézot. Mais si li souffer parski li enn Chrétien, fodé pa li honté, mais li bizin contigne donne Bondié la gloire en tant ki Chrétien.” (1 Pierre 2:20; 4:15, 16) D’après Jésus, nous pou heureux si nous pé souffer à cause la justice.
3. (a) Ki sa veut dire gagne persécution à cause la justice? (b) Ki l’effet persécution ti éna lor bann premier Chrétiens?
3 La vraie justice, c’est kan enn dimoune obéir volonté Bondié ek mette en pratique So bann commandements. Donc si enn dimoune souffer à cause la justice, c’est parski li refuse désobéir bann la lois ek bann principes ki Bondié inn fixé, même si lézot faire pressions lor li. Bann zapôtres ti persécuté par bann chefs Juifs, parski zot ti refuse pou arrête prêché lor nom Jésus. (Actes 4:18-20; 5:27-29, 40) Eski sa ti enlève zot la-joie ou-soit ti faire zot arrête prêché? Non jamais! La Bible dire: “Zot ti sorti devant Sanhédrin, dans la joie parski ti’nn juge zot digne pou gagne déshonneur à cause so nom. Ek toulé-jours dans temple, ek de maison-en-maison, zot ti contigné enseigne ek annonce la bonne nouvelle lor Christ Jésus, sans arrêté.” (Actes 5:41, 42) Sa persécution-la ti rann zot heureux ek ti faire zot vinn encore pli zélé dans la prédication. Plitar, bann premier Chrétiens ti gagne persécution avec bann Romains parski zot ti refuse pou adore l’empereur.
4. Cite certain raisons kifer bann Chrétiens gagne persécution?
4 Dans nou l’époque, bann Témoins de Jéhovah gagne persécution parski zot refuse arrête prêche “la bonne nouvelle lor royaume” Bondié. (Matthieu 24:14) Kan zot réunions interdit, zot disposé pou souffer au lieu ki zot arrête rassemblé zot, parski c’est enn l’ordre ki la Bible donné. (Hébreux 10:24, 25) Zot finn gagne persécution à cause zot neutralité, ou-soit parski zot finn refuse du sang. (Jean 17:14; Actes 15:28, 29) Seulement, position ki bann serviteurs Bondié finn prend pou la justice, finn faire zot konn enn grand la-paix intérieur ek le bonheur.—1 Pierre 3:14.
Kan Dimoune Koz Nous en Mal à Cause Christ
5. Pou ki raison principal bann Témoins de Jéhovah gagne persécution zordi?
5 Neuvième bonheur ki Jésus ti mentionné dans so Sermon lor Montagne, ti éna aussi enn rapport avec la persécution. Li ti dire: “Heureux zot été kan dimoune koz en mal lor zot, persécute zot ek koz menti pou dire tou sorte qualités mauvais kitsoz lor zot, à cause moi.” (Matthieu 5:11) Raison principal kifer bann serviteurs Jéhovah gagne persécution c’est parski zot pa faire partie dans sa mauvais lé-monde-la. Jésus ti dire so bann disciples: “Si zot ti faire partie dans le monde, le monde ti pou content seki dans so côté. Parski zot pa faire partie dans le monde, mais mo finn choisir zot dans le monde, à cause sa, le monde éna la haine pou zot.” (Jean 15:19) Pareillement, l’apôtre Pierre ti dire: “Parski zot pa pé contigne galope ensemble avec zot pou amène même mauvais la-vie, bannla étonné ek contigne koz en mal lor zot.”—1 Pierre 4:4.
6. (a) Kifer dimoune koz en mal lor le reste Chrétiens oints ek zot bann compagnons, ek persécute zot? (b) Eski sa situation-la diminué nou bonheur?
6 Nous finn trouvé ki bann premier Chrétiens ti gagne persécution parski zot ti refuse pou arrête prêche lor nom Jésus. Jésus ti confié so bann disciples sa mission-la: “Zot pou vinn mo bann témoins . . . ziska dans région pli loin lor la terre.” (Actes 1:8) Le reste fidèle bann Chrétiens oints, avec l’aide zot bann compagnons, “la grande foule,” finn rempli sa mission-la avec zèle. (Révélation 7:9) Donc, Satan faire la guerre “avec le reste so semence [semence de “la femme,” c’est-à-dire partie céleste l’organisation de Jéhovah], ki suive bann commandements Bondié ek ki pé rann témoignage lor Jésus.” (Révélation 12:9, 17) En tant ki Témoins de Jéhovah, nous rann témoignage lor Jésus, le Roi ki pé régné dans Royaume Bondié asterla. Sa Royaume-la pou détruire tou bann gouvernements humains ki opposé ar le monde juste ki Bondié pou mette en place. (Daniel 2:44; 2 Pierre 3:13) C’est à cause nou témoignage, ki dimoune koz en mal lor nous ek persécute nous. Mais nous heureux pou souffer à cause nom Christ.—1 Pierre 4:14.
7, 8. Ki fausses kitsoz, adversaires bann premier Chrétiens ti dire lor zot?
7 Jésus ti dire ki so bann disciples bizin estime zot heureux, même kan bann dimoune “koz menti pou dire tou sorte qualités mauvais kitsoz” lor zot à cause li. (Matthieu 5:11) C’est séki ti arrive bann premier Chrétiens. Kan l’apôtre Paul ti emprisonné à Rome entre 59-61 N.L., guetté ki bann chefs Juifs là-bas ti dire lor bann Chrétiens: “Vrai-même, concernant sa secte-la, nous koné ki partout [dimoune] pé koz contre sa.” (Actes 28:22) Bann adversaires Paul ek Silas ti accuse zot ki zot finn “bouleverse la terre entier,” ek ki zot finn agir “contre bann la-lois César.”—Actes 17:6, 7.
8 K. S. Latourette, enn historien ki ti écrire lor bann Chrétiens ki ti vive dans l’époque l’empire Romain, ti dire: “Ti éna plusieurs fausse accusations lor zot. Parski zot ti refuse pou participe dans bann cérémonies païens, bann Chrétiens ti considéré couma bann athées. Le fait ki zot pa ti mêlé dans la plupart activités ki la société ti organisé, couma bann fêtes païens, bann divertissements public . . . —[zot adversaires] ti bouffonne zot ek ti dire ki zot éna la haine pou la race humaine. . . . Certains ti dire ki bann zom ek bann femmes Chrétiens ti joinde à-soir . . . ek zot ti gagne bann relations immoral. . . . Étant donné ki zot ti célébré [Mémorial la mort Jésus] seulement entre bann croyants, ti éna enn rumeur ki bann Chrétiens ti sacrifié régulièrement enn zenfant ek zot ti mange so la-chair ek boire so di-sang.” En plus, parski bann premiers Chrétiens ti refuse pou adore l’empereur, certain ti accuse zot ki zot ti bann l’ennemis gouvernement.
9. Couma bann premier Chrétiens ti faire face ar bann fausse l’accusations ki ti éna contre zot, ek couma la situation été zordi?
9 Sa bann fausse accusations-la pa ti empêche bann premier Chrétiens pou accompli zot mission pou prêche la bonne nouvelle lor Royaume Bondié. En 60-61 N.L., Paul ti kapav dire ki la “bonne nouvelle” ti pé “rapporte bann fruits ek [ti] pé progressé dans le monde entier,” ek ki sa nouvelle-la finn “prêché dans tou création ki trouve enba le ciel.” (Colossiens 1:5, 6, 23) Même zaffaire pé arrivé zordi. Pareil couma avec bann premier Chrétiens, zordi aussi, dimoune faire bann fausse l’accusations lor bann Témoins de Jéhovah. Malgré sa, prédication lor Royaume Bondié pé prospéré ek sa apporte enn grand bonheur à bann ki participe dans sa l’activité-la.
Zot Heureux pou Gagne Persécution Pareil Couma Bann Prophètes
10, 11. (a) Couma Jésus ti termine séki li ti dire lor neuvième bonheur? (b) Kifer bann prophètes ti gagne persécution? Donne bann l’exemples.
10 Jésus ti termine séki li ti dire lor neuvième bonheur par sa bann paroles-la: “Zot bizin content . . . , parski c’est coumsa-même ki bannla ti persécute bann prophètes ki ti avant zot.” (Matthieu 5:12) Bann Israélites infidèle pa ti bien accueillir bann prophètes ki Jéhovah ti envoyé pou averti zot, ek souvent zot ti persécute sa bann prophètes-la. (Jérémie 7:25, 26) C’est séki l’apôtre Paul ti dire kan li ti écrire: “Ki mo pou dire encore? Parski le temps pou manqué si mo contigné raconte lor . . . bann lézot prophètes, ki grâce à la foi . . . finn gagne zot l’épreuve par bann moqueries ek bann coup-de-fouette, ek même plus ki sa, finn attache zot ek finn mette zot dans prisons.”—Hébreux 11:32-38.
11 Pendant règne mauvais lé-Roi Ahab ek so femme Jézabel, beaucoup prophètes Jéhovah ti assassiné par l’épée. (1 Rois 18:4, 13; 19:10) Bann adversaires prophète Jérémie ti mette li dans ceps ek plitar zot ti jette li dans enn trou rempli ar la-boue. (Jérémie 20:1, 2; 38:6) Ti jette prophète Daniel dans la fosse aux lions. (Daniel 6:16, 17) Tou sa bann prophètes ki ti vive avant Jésus Christ-la, ti gagne persécution parski zot ti soutenir l’adoration pur ki Jéhovah ti exigé. Beaucoup prophètes ti persécuté par bann chefs religieux Juifs. Jésus ti appelle bann scribes ek bann Pharisiens, “garçons bann ki finn assassine bann prophètes.”—Matthieu 23:31.
12. Kifer en tant ki Témoins de Jéhovah, nous considère sa couma enn privilège pou gagne persécution couma bann prophètes du passé?
12 Zordi, en tant ki Témoins de Jéhovah, souvent nous gagne persécution parski nous prêche avec zèle la bonne nouvelle lor Royaume Bondié. Nous bann l’ennemis accuse nous ki nous trop persisté pou converti bann dimoune. Mais nous koné ki bann fidèle serviteurs de Jéhovah dans le passé finn bizin faire face ar même critique. (Jérémie 11:21; 20:8, 11) Nous considère sa couma enn grand privilège pou souffer pou même raison ki bann prophètes dans le passé. Disciple Jacques ti écrire: “Frères, pou zot kapav supporte le mal ek pou zot kapav éna patience, prend l’exemple lor bann prophètes ki ti koz lor nom Jéhovah. Guetté! Nous déclare heureux tou bann ki finn enduré.”—Jacques 5:10, 11.
Bann Bon Raisons pou Nous Heureux
13. (a) Kifer nous pa découragé par la persécution? (b) Ki permette nous pou tini ferme, ek ki sa prouvé?
13 Au lieu ki nous laisse persécution décourage nous, au contraire, nous réconforté kan nous pensé ki nous pé suive l’exemple bann prophètes du passé, bann premier Chrétiens, ek Jésus li-même. (1 Pierre 2:21) Nous gagne enn grand l’encouragement par séki nous lire dans la Bible, couma par exemple, séki Pierre ti écrire: “Bien-aimés, pa bizin zot étonné à cause bann souffrances ki pé éprouve zot couma enn difé, coumadire c’est enn kitsoz drôle ki pé arrive zot. Si pé koz en mal lor zot à cause nom Christ, zot heureux, parski l’esprit ki rempli ar la gloire, oui l’esprit Bondié, pé repose lor zot.” (1 Pierre 4:12, 14) Par l’expérience, nous koné ki si nous réussi tini ferme kan nous gagne persécution, c’est seulement parski nous éna l’esprit saint Jéhovah ki donne nous la force. Le fait ki l’esprit saint soutenir nous, c’est enn preuve ki Jéhovah pé béni nous, ek sa apporte enn grand bonheur.—Psaume 5:12; Philippiens 1:27-29.
14. Pou ki raisons nous kapav heureux kan nous persécuté à cause la justice?
14 Enn l’autre raison kifer nous heureux kan nous gagne l’opposition ek persécution à cause la justice, c’est parski c’est enn preuve ki nous bann vrai Chrétiens ki attaché ar Bondié. L’apôtre Paul ti écrire: “D’ailleurs tou séki envie vive dans l’attachement avec Bondié, en tant ki disciple Jésus Christ, zot aussi, zot pou gagne persécution.” (2 Timothée 3:12) Nous ressenti enn la-joie extraordinaire kan nous maziné ki nou fidélité dans bann l’épreuve donne encore enn l’autre réponse ar sa défi ki Satan inn lancé contre Jéhovah. Li ti prétann ki tou bann serviteurs Jéhovah servi Li seulement par intérêt. (Job 1:9-11; 2:3, 4) Nous bien content ki nous éna enn part, même si li bien tigit, dans justification souveraineté Jéhovah.—Proverbes 27:11.
Saute ar la Joie à Cause la Récompense
15, 16. (a) D’après Jésus, pou ki raison nous kapav “content ek saute ar la-joie”? (b) Ki récompense inn réservé dans le ciel pou bann Chrétiens oints ek couma zot bann compagnons, les “autres brebis” aussi pou récompensé?
15 Jésus ti donne enn l’autre raison kifer nous kapav heureux kan dimoune koz en mal lor nous ek persécute nous. Juste après ki li ti fini koz lor neuvième bonheur, li ti dire: “Zot bizin content ek saute ar la joie, parski zot éna enn grand récompense dans le ciel.” (Matthieu 5:12) L’apôtre Paul ti écrire: “Salaire ki péché payé, c’est la mort, mais don ki Bondié donné, c’est la vie éternelle par Christ Jésus, nou Seigneur.” (Romains 6:23) Oui, nou “grand récompense,” c’est la vie, ek sa, li pa pareil couma enn salaire ki nous mérité après ki nou’nn faire enn travail. C’est enn cadeau ki nous gagné gratuitement. Jésus ti dire ki nous récompense trouve “dans le ciel,” parski c’est Jéhovah ki donne nous sa.
16 Bann Chrétiens oints gagne enn “couronne de vie,” ek dans zot cas sa représente la vie immortelle dans le ciel avec Christ. (Jacques 1:12, 17) L’espoir ki les “autres brebis,” éna, c’est pou gagne la vie éternelle dans enn paradis lor la terre. (Jean 10:16; Révélation 21:3-5) Pou toulé-deux groupes, sa ‘récompense-la’ c’est pa enn kitsoz ki zot gagné parski zot mérite sa. Bann Chrétiens oints ek “les autres brebis” toulé-deux, gagne zot récompense grâce à ‘faveur extraordinaire Jéhovah, enn faveur ki zot pa mérité.’ C’est pou sa ki l’apôtre Paul ti dire: “Nous remercié Bondié pou so don gratuit ki nous pa kapav décrire.”—2 Corinthiens 9:14, 15.
17. Kifer nous kapav heureux, ek “saute ar la-joie,” kan nous gagne persécution?
17 L’apôtre Paul ti écrire bann Chrétiens—certains ti près pou gagne enn persécution bien cruel par l’Empereur Néron—et li ti dire zot: “Anou réjouir kan nous dans l’épreuve, parski nous koné ki l’épreuve produire l’endurance, ek l’endurance en retour, produire enn condition approuvé [devant Jéhovah], ek condition approuvé produire l’espérance, ek dans l’espérance péna déception.” Li ti dire aussi: “Réjouir-zot dans l’espérance. Enduré dans l’épreuve.” (Romains 5:3-5; 12:12) Ki nou l’espérance li céleste ou-soit terrestre, récompense ki nous pou gagné à cause nou fidélité dans bann l’épreuve, li beaucoup pli grand ki tou séki nous mérité. Nous éna enn grand la-joie kan nous pensé ki nous pou kapav vive éternellement pou servi Jéhovah ek pou glorifié Li, enba direction nou lé-Roi, Jésus Christ. Oui, coumadire nous pé “saute ar la-joie.”
18. À mesure ki la fin approché, ki nous kapav atann de la part bann nations, ek ki Jéhovah pou faire?
18 Dans certains pays, bann Témoins de Jéhovah finn gagne persécution ek sa encore pé contigné. Dans enn prophétie lor la fin, Jésus ti donne sa l’avertissement-la bann vrai Chrétiens: “Tou nations pou éna la haine pou zot à cause mo nom.” (Matthieu 24:9) Alors ki nous pé approche ar la fin, Satan pou faire bann nations manifesté zot la-haine envers peuple Jéhovah. (Ézékiel 38:10-12, 14-16) Sa pou enn signal pou Jéhovah agir. Li ti dire: “Vrai-même, mo pou glorifié moi, ek mo pou sanctifié moi ek mo pou faire beaucoup nations konn moi; ek zot pou bizin koné ki mo-même Jéhovah.” (Ézékiel 38:23) Oui, Jéhovah pou sanctifié so grand nom ek pou délivré so peuple ki pou persécuté. Donc, “heureux celui ki contigne enduré.”—Jacques 1:12.
19. Alors ki nous pé atann grand “jour Jéhovah,” ki nous bizin faire?
19 Alors ki sa grand ‘jour Jéhovah-la’ pé approché de plus en plus, nous bizin content, parski Bondié finn ‘juge nous digne pou gagne déshonneur’ à cause nom Jésus. (2 Pierre 3:10-13; Actes 5:41) Alors ki nous pé atann nou récompense dans le monde juste ki Jéhovah inn promette, anou ‘contigne enseigne ek annonce la bonne nouvelle ki concerne Jésus Christ ek so Royaume, sans arrêté,’ pareil couma bann premier Chrétiens.—Actes 5:42; Jacques 5:11.
Révision
• Ki sa veut dire, souffer à cause la justice?
• Ki l’effet persécution ti éna lor bann premier Chrétiens?
• Kifer nous kapav dire ki bann Témoins de Jéhovah gagne persécution pareil couma bann prophètes du passé?
• Kifer nous kapav “content ek saute ar la-joie” kan nous gagne persécution?
[Zimage, page 28, 29]
“Heureux zot été kan dimoune koz en mal lor zot, persécute zot”
[Credit Line]
Enn groupe dimoune dans prison: Chicago Herald-American