Question Ki’nn Soulevé
◼ Ki danger ena kan nou koz avek enn kikenn ki nou pa koné lor Internet?
Ena enn quantité site Internet ki’nn faire pou bann dimoune joinde ek kozé entre zot. Beaucoup parmi sa bann site-la permette bann dimoune pou crée ek publié enn description lor zot-mem. Sa vedir aussi ki zot kapav mette bann photo ek bann l’information personnel lor zot-mem. Bann dimoune ki trouve sa bann l’information-la kapav prend contact ar zot. Sa bann site-la bien populaire parmi bann jeune. Certain jeune dan congregation, finn al lor sa bann site-la pou rente en contact avek bann dimoune ki dire ki zot bann Témoins de Jéhovah.
Li facile pou enn dimoune ki nou joinde lor Internet koz menti lor seki li été vrai-mem, lor so spiritualité, ou-soit lor so l’intention. (Ps. 26:4) Enn dimoune ki dire ki li enn Témoin de Jéhovah kapav en realité enn dimoune ki pa Témoin, enn exclu, ou mem enn apostat ki pé faire so maximum pou faire bann chrétien tombé lor plan spirituel. (Gal. 2:4) Dapré bann rapport, ena enn quantité pedophile ki servi sa bann site-la pou rod zot bann victime.
Mem si nou sur ki sa dimoune avek ki nou pé kozé-la ena enn bon reputation dan congregation, bann conversation dan sa forme-la kapav facilement changé ek zot kapav vinn malprop. Sa arrivé parski bann dimoune ena tendance pou faire moins attention seki zot dire avek bann dimoune ki zot pa finn joinde personnellement. Zot kapav pensé ki zot bann conversation lor Internet reste personnel ek ki personne, couma par exemple zot parent ek bann ancien, jamais pa pou konn sa. Li bien triste pou dire ki ena certain jeune dan bann famille chrétien ki’nn tombe dan sa piege-la ek ki finn servi bann parole malpropre. (Éph. 5:3, 4; Col. 3:8) Lor sa site kot zot finn donne renseignement lor zot-la, certain finn mette zot bann photo ki provokan, zot inn servi enn lot nom ki ena double sens, ou-soit zot finn mette bann reference ki permette lezot guette bann clip video ki immoral.
Dapré seki nou finn trouvé, bann parent bizin control fason ki zot zenfant servi l’ordinateur. (Prov. 29:15) Li pou dangereux pou invite enn etranger dan ou lakaz ou-soit laisse li tousel avek ou bann zenfant. Pareil, li dangereux pou nou ek nou bann zenfant faire camarade avek bann etranger lor Internet, mem si zot dire ki zot bann Témoins de Jéhovah.—Prov. 22:3.