Revision Lekol ministere theocratik
Nou pou examine bann question ki lor sa feuille-la dan Lekol ministere theocratik pendant semaine ki commence a partir le 26 octobre 2009.
1. Kifer Jéhovah ti en colere ar Balaam kan li ti al avek bann zom Balak, alors ki c’est Li ki ti dire li al avek zot? (Nomb. 22:20-22) [7 sept., w04-CE 1/8 p. 32 § 1] Jéhovah ti en colere ar Balaam, parski li ti tellement gourmand kass ki li ti paré pou faire n’importe ki kitsoz. Balaam ti al avek bann zom Balak dan l’intention pou maudit Israël. Li ti envie faire plaisir le roi Moabite ek gagne enn recompense. Kan Balaam ti obligé beni au lieu ki li maudit Israël, c’est li ki ti donne l’idée pou servi bann femme ki adore Baal pou attire bann zom Israélite. (Nomb. 31:15, 16) A cause sa, 24,000 dimoune ti mort.
2. Couma eski l’exemple Phinéas ki pa ti ‘tolere okenn rivalité’ kont Jéhovah aide nou pou reflechi lor voeu ki nou’nn faire Jéhovah? (Nomb. 25:11) [7 sept., w95-F 1/3 p. 16 § 13] Parski Phinéas ti ena enn grand zele, li’nn laisse enn l’exemple extraordinaire pou nou suive. Li pa ti tolere okenn rivalité kont Jéhovah. Fodé pa ki dan nou leker nou laisse mem enn ti kitsoz prend place voeu ki nou’nn faire Jéhovah. Pareil couma Phinéas, nou zele pou Jéhovah pousse nou pou garde congregation pur kan nou pa tolere bann cas immoralité grave, mais nou faire bann ancien konn sa.
3. Kifer ti choisir Josué pou remplace Moïse? (Nomb. 27:15-19) [14 sept., w02-F 1/12 p. 12 § 1] Jéhovah ti trouve la foi ek capacité Josué. Li ti dire ki li “enn zom ki ena l’esprit dan li.” Pareil couma Josué, bann ki pé faire zeffort pou gagne bann privilege dan congregation zordi, kapav sur ki zot pou gagne sagesse ek ki zot pou reussi, si zot lire Parole Bondié toulé-jour ek mette li en pratik.
4. Couma eski Nombres 31:27 kapav encourage bann chretien zordi? [21 sept., w05-CE 1/6 p. 32] Sa verset-la montré ki bann dimoune ki soutenir la congregation dan n’importe ki fason, ena beaucoup valeur pou Jéhovah. N’importe ki kitsoz nou pé faire, anou “faire sa avek tou [nou] nâme coumadir pou Jéhovah, pa pou bann zom.” (Col. 3:23)
5. Couma bann Israélite ti tire profit ar disposition concernant bann la ville refuge? (Nomb. 35:11, 12) [28 sept., w95-F 15/11 p. 14 § 17] Sa ti faire enn kikenn ki ti touye enn dimoune sans faire expré, reflechi ki quantité la vie li sacré. Kan li ti medite lor sa disposition ki Jéhovah ti prend avek misericorde-la, surement sa ti pou pousse li pou montré misericorde envers lezot. Sa disposition ki Bondié ti prend en seki concerne bann la ville refuge-la, ti aussi faire le peuple en general rappel ki zot bizin faire attention kan zot pé faire enn kitsoz pou ki sa pa cause la mort enn dimoune.
6. Kifer bon sens li enn qualité chretien ki important, ek ki resultat sa amené? (Deut. 1:13) [5 oct., w03-F 15/1 p. 30 § 4; w00-F 1/10 p. 32 § 1-3] Enn dimoune ki ena bon sens montré sa par so parole ek so conduite. Enn dimoune ki ena bon sens pa laisse bann parole sorti dan so la bouche brite. Li reflechi avant li kozé ek li ena bann bon relation avek lezot. So “la bouche ki faire attention avant li kozé,” faire li bien choisir so bann mot. (Prov. 12:8)
7. Dan ki fason la Loi mosaïk ti montré la justice Bondié? (Deut. 4:8) [12 oct., w02-CE 1/6 p. 22 § 8–p. 23 § 9-10] Jéhovah ti servi la Loi mosaïk pou faire bann Isarélite comprend so bann principe concernant le bien ek le mal, dan enn fason bien clair. La Loi ti traite bann zaffaire ki concerne la religion, business, bann relation entre mari ek femme, bann decision lor jugement, ek bann question concernant mangé ek l’hygiene. Mem si la Loi lor desobeissance ti bien severe, li pa ti faire bann dimoune perdi zot la joie ek zot liberté. Avredir, bann ki ti content Jéhovah ti trouve beaucoup plaisir dan so bann la loi ki droite.
8. Dapré Deutéronome 6:16-18, expliké dan ki bon fason ek mauvais fason nou kapav testé Jéhovah. [12 oct., w04-CE 1/10 p. 10 § 6] Bann Israélite ti testé Bondié dan enn mauvais fason kan zot ti insisté pou dire Jéhovah: ‘Si to au millieu nou, kifer to pa donne nou de l’eau?’ (Ex. 17:2, 3, 7) Verset 18 montré nou dan ki bon fason nou kapav testé Jéhovah: C’est kan nou ena la foi dan bann promesse Bondié ek ki nou attann ki Li beni nou bann zeffort a mesure ki nou obeir so bann l’ordre.
9. Dan ki sens bann declaration ki ti sorti dan la bouche Jéhovah ti nourri bann Israélite, ek couma sa bann parole-la kapav nourri-nou zordi? (Deut. 8:3) [19 oct., w99-F 15/8 p. 25-26] Grace a bann parole ki ti sorti dan la bouche Jéhovah, bann Israélite ti gagne bann kitsoz materiel, couma mangé ek linge. (Deut. 8:3, 4) Zot pa ti pou gagne tousala, si Jéhovah pa ti donne l’ordre pou zot gagne sa. Alors, dan enn fason litteral, bann Israélite ti vive “par tou parole,” ou-soit commandement, “ki sorti dan la bouche Jéhovah.” Zordi, nou nourri-nou kan nou lire bann parole Jéhovah ki trouve dan so Parole. En plus, kan nou compte lor Jéhovah, nou la foi vinn pli fort kan nou faire l’experience couma Li agir dan enn fason extraordinaire envers nou.
10. Couma eski Deutéronome 12:16, 24 ena enn influence lor bann traitement medical kot bizin servi nou prop di-sang? [26 oct., w00-F 15/10 p. 30 § 7] Parfois, enn docteur pou encourage so patient pou tire inpé di-sang deux-trois semaine avant li faire enn operation, pou kapav servi sa pou faire enn transfusion si jamais li perdi trop beaucoup di-sang pendant so l’operation. Mais selman, faire don di-sang, garde li ek faire enn transfusion coumsa, sa li al directement kont seki bann l’Ecriture dire. (Lév. 17:13, Deut. 15:23) Fodé pa garde di-sang; bizin verse li, coumadir retourne li ar Bondié. Bann vrai chretien determiné pou “pa prend di-sang.” (Actes 15:29) C’est a cause sa ki nou pa donne di-sang, ni nou tire li pou gardé, pou faire enn transfusion alors ki nou supposé ‘verse li.’