Parole Jéhovah Vivant

NOUS en 1473 A.N.L. Quarante ans inn passé depuis ki Jéhovah inn tire bann Israélites en Égypte kot zot ti en esclavage. Après ki zot inn passe tou sa bann l’années-la dans désert, bann Israélites encore toujours enn nation ki péna okenn pays pou zot. Mais, finalement, zot arrive dans bord la Terre Promise. Ki pé atann zot aster ki zot pé al prend possession sa la terre-la? Ki bann problèmes zot pou gagné, ek couma zot bizin faire face avec sa bann problèmes-la?

Avant ki Israël traverse la Rivière Jourdain pou zot rentre dans pays Canaan, Moïse prépare la congrégation pou sa grand travail ki pé atann zot-la. Couma li faire sa? Par enn série discours ki li prononcé ek ki encourage zot, pousse zot pou agir, conseille ek averti zot. Li rappelle bann Israélites ki Jéhovah mérite enn l’attachement zis pou Li tousel ek fodé pa ki zot faire pareil couma bann nations ki éna autour zot. Sa bann discours-la forme pli grand partie dans livre Deutéronome. Bann conseils ki éna ladan, sa-même ki nous bizin, parski nous aussi nous vive dans enn lé-monde kot li enn défi pou donne Jéhovah enn l’attachement zis pou Li tousel.—Hébreux 4:12.

À part so dernier chapitre, livre Deutéronome inn écrire par Moïse ek livre-la couver enn période enn tipé plus ki deux mois.a (Deutéronome 1:3; Josué 4:19) Anou guetté couma séki éna dans sa livre-la kapav aide nous pou content Jéhovah avec tou nou léker ek pou servi li fidèlement.

‘PA BLIÉ SÉKI ZOT LIZIÉ INN TROUVÉ’

(Deutéronome 1:1–4:49)

Dans so premier discours, Moïse raconte en détail certains l’expériences ki zot inn vive dans désert—particulièrement séki pou aide bann Israélites ki pé prépare zot pou prend possession la Terre Promise. Sûrement ki récit concernant bann juges ki Jéhovah ti’nn établi ti rappelle zot ki Jéhovah organise so peuple dans enn façon ki montre sans okenn doute ki Li occupe zot avec amour. Moïse raconte aussi mauvais rapport ki dix espions ti faire ek so résultat: Génération zis avant zot pa’nn réussi rentre dans la Terre Promise. Mazinn enn coup ki l’effet sa l’exemple ki ti servi couma enn avertissement-la ti’nn bizin éna lor bann ki ti pé écoute Moïse alors ki sa la terre-la ti là devant zot lizié.

Bann rappels concernant bann victoires ki Jéhovah ti’nn donne bann Israélites avant zot traverse la Rivière Jourdain ti’nn bizin donne zot courage alors ki zot ti paré pou prend sa partie ki l’autre côté la rivière-la. Sa pays kot zot ti pou al resté-la ti rempli avec l’idolâtrie. Li ti donc approprié ki Moïse donne zot enn l’avertissement sévère contre l’adoration bann zidoles.

Réponses pou Bann Questions Biblique:

2:4-6, 9, 19, 24, 31-35; 3:1-6—Kifer bann Israélites ti touye certains peuples ki ti reste dans l’est Jourdain alors ki zot ti épargne la vie certains? Jéhovah ti donne l’ordre Israël pou zot pa laguerre kont bann descendants Ésaü. Kifer? Parski zot ti bann descendants frère Jacob. Bann Israélites ti bizin aussi pa faire bann Moabites ek bann Ammonites nanyin ni laguerre kont zot parski zot ti bann descendants Lot, neveu Abraham. Mais seulement, bann lé-rois Amorite, Sihôn ek Og pa ti éna okenn lien parenté avec bann Israélites ek zot pa ti éna okenn droit lor sa pays ki zot ti pé dirigé-la. Alors, kan Sihôn ti refuse laisse bann Israélites traverse so pays ek ki Og ti vinn laguerre ar zot, Jéhovah ti donne l’ordre bann Israélites pou détruire sa bann la-villes-la, sans laisse okenn survivant.

4:15-20, 23, 24—Eski l’interdiction pou faire bann zimages sculpté veut dire ki li mal pou faire représentations bann objets ki servi couma décorations? Non. Sa interdiction-la ti concerne fabrication bann zimages pou adore zot—li condamne ‘prosterne devant bann zidoles ek servi zot.’ La Bible pa défann faire bann sculptures ou-soit faire bann tableaux dans enn but artistique.—1 Rois 7:18, 25.

Leçons pou Nous:

1:2, 19. Bann Israélites ti erré dans désert pendant apépré 38 ans, même si en principe kan passe par chemin Montagne Séïr, ti prend “seulement onze jours pou faire trajet entre Qadesh-Barnéa ek Horeb [région montagne autour Montagne Sinaï kot ti recevoir les Dix Commandements].” Zot inn vrai-même paye bien cher pou zot désobéissance envers Jéhovah!—Nombres14:26-34.

1:16, 17. Zordi Jéhovah juge d’après bann même principes. Fodé pa ki bann ki faire partie dans enn comité judiciaire laisse la préférence ou-soit la crainte pou bann zom fausse zot jugement.

4:9. Pou ki Israël réussi, li ti bien important ki zot ‘pa blié séki zot lizié ti’nn trouvé.’ À mesure ki le monde nouveau ki Jéhovah inn promette nous approché, li bien important ki nous aussi nous concentré lor bann actions extraordinaire ki Jéhovah inn faire. Couma nous kapav faire sa? C’est kan nous contigné étudié So Parole avec sérieux.

CONTENT JÉHOVAH, EK OBÉIR SO BANN COMMANDEMENTS

(Deutéronome 5:1–26:19)

Dans so deuxième discours, Moïse raconté couma li ti gagne la Loi lor Montagne Sinaï ek li re-prononce les Dix Commandements. Li mentionne clairement sept nations ki pou bizin détruire complètement. Li rappelle Israël enn leçon important ki zot ti aprann pendant ki zot ti dans désert: “Zom pa vive seulement avec du pain mais avec tou déclaration ki sorti dans la bouche Jéhovah.” Dans sa nouveau situation kot zot été-la, zot ‘bizin obéir commandement Bondié dans tou so détail.’—Deutéronome 8:3; 11:8.

À mesure ki zot établi dans la terre de la promesse, bann Israélites pou bizin bann la-lois ki concerne non seulement l’adoration mais aussi jugement, gouvernement, la guerre, ek la vie sociale ek privé. Moïse ré-guette sa bann la-lois-la ek mette en valeur l’importance pou content Jéhovah ek pou obéir so commandements.

Réponses pou Bann Questions Biblique:

8:3, 4—Dans ki façon linge bann Israélites pa ti usé ni zot lipié ti enflé pendant zot parcours dans désert? Sa ti enn miracle ki Jéhovah ti faire, pareil couma Li ti veillé ki zot gagne zot provision la manne. Bann Israélites ti servi même linge ek sandalettes ki zot ti éna avant ki zot commence erré dans désert. Sûrement à mesure ki bann zenfants grandi ek bann adultes mort, bann lézot ti hérite zot bann zaffaires. Étant donné ki sa deux recensements ki ti faire dans commencement ek à la fin zot séjour dans désert-la ti montré ki population bann Israélites pa ti augmenté, séki zot ti éna dans commencement ti suffi.—Nombres 2:32; 26:51.

14:21—Bann Israélites pa ti gagne droit mange enn zanimo mort ki pa’nn saigné. Mais kifer zot ti kapav donne sa enn résident étranger ou-soit vann sa ar enn étranger? Dans la Bible, l’expression “résident étranger” ti kapav applique pou enn non-Israélite ki ti vinn enn prosélyte ou-soit pou enn immigrant ki ti suive bann la-lois principal dans pays mais ki pa ti vinn enn adorateur Jéhovah. Enn étranger ek enn résident étranger ki pa ti bann prosélytes pa ti obligé obéir la Loi ek zot ti kapav servi enn zanimo mort ki pa’nn saigné dans différent façons. Bann Israélites ti gagne droit donne zot ou-soit vann avec zot sa qualité zanimaux-la. Par contre, enn prosélyte ti obligé vive d’après l’alliance de la Loi. Pareil couma Lévitique 17:10 montré, li, li pa ti gagne droit mange du sang zanimo.

24:6—Kifer kan ti saisi ‘enn moulin à bras ou-soit so la-meule ki lor là couma enn gage’, li ti coumadire ti saisi “enn nâme”? Enn moulin à bras ek so la-meule ki lor là ti représente “nâme” enn dimoune, ou-soit so moyens l’existence. Kan ti saisi enn ladan, sa ti pou empêche sa famille-la gagne so mangé toulé-jours.

25:9—Kan enn kikenn ti refuse mariage léviratique, ti bizin tire so enn côté sandalette ek crache dans so figure? Ki sa ti signifié? D’après “coutume longtemps en Israël concernant droit rachat . . . , enn zom ti bizin tire so sandalette ek donne sa so compagnon.” (Ruth 4:7) Alors, tire sandalette dans lipié enn zom ki ti refuse enn mariage léviratique, ti confirmé ki li ti’nn renonce à so position ek so droit pou produire enn héritier pou so frère ki’nn mort. Sa ti enn la-honte. (Deutéronome 25:10) Crache dans so figure ti enn acte humiliation.—Nombres 12:14.

Leçons pou Nous:

6:6-9. Pareil couma bann Israélites ti gagne l’ordre pou konn la Loi, nous’si nous bizin konn bien bann commandements Bondié, rappelle zot touletan, ek répète sa ar nou bann zenfants. Nous bizin ‘attache zot couma enn signe lor nou la-main’ dans sens ki nou bann actions—ki représenté par nou la-mains—bizin montré ki nous obéissant envers Jéhovah. Ek couma ‘enn bandeau entre nou lizié,’ nou l’obéissance bizin visible pou tou dimoune.

6:16. Ki jamais nous pa mette Jéhovah à l’épreuve couma bann Israélites ti faire à Massa, kot zot ti murmuré à cause pa ti éna de l’eau.—Exode 17:1-7.

8:11-18. Matérialisme kapav faire nous blié Jéhovah.

9:4-6. Nous bizin faire attention pou pa croire ki nous trop juste.

13:6. Nous bizin pa laisse personne empêche nous servi Jéhovah.

14:1. Kan nous coupe-coupe nou, sa montré ki nous péna respect pou lé-corps humain. Sa kapav éna enn rapport avec la fausse religion, ek c’est enn pratique ki nous bizin évité. (1 Rois 18:25-28) Sa façon exagéré pou exprime chagrin pou bann ki’nn mort-la pa allé avec l’espérance ki nous éna dans la résurrection.

20:5-7; 24:5. Nous bizin montré considération pou bann ki trouve zot dans enn situation spéciale, même kan éna enn travail important pou faire.

22:23-27. Kan enn madame trouve li devant enn menace viol, li bizin crié. C’est enn moyen défense pli efficace ki kapav éna.

“TO BIZIN CHOISIR LA VIE”

(Deutéronome 27:1–34:12)

Dans so troisième discours, Moïse dire ki, après ki zot inn traverse la Rivière Jourdain bann Israélites pou bizin écrire la Loi lor bann grand roches ek prononce malédictions pou bann ki désobéir ek bénédictions pou bann ki obéir. Pou commence so quatrième discours, Moïse renouvelé l’alliance entre Jéhovah ek Israël. Li donne enn l’avertissement encore kont la désobéissance ek encourage le peuple pou “choisir la vie.”—Deutéronome 30:19.

En plus de so quatre discours, Moïse discute changement concernant celui ki pou dirige le peuple ek li montré bann Israélites enn joli cantique ki loué Jéhovah ek averti zot concernant bann malheurs ki kapav arrive zot si zot vinn infidèle. Après ki li béni bann tribus Israël, Moïse mort à l’âge 120 ans et bannla enterre li. Zot observe enn deuil 30 jours, séki faire environ la moitié période ki livre Deutéronome couver.

Réponses pou Bann Questions Biblique:

32:13, 14—Bann Israélites pa ti gagne droit mange okenn la graisse. Alors ki l’expression mange “la graisse bann béliers” veut dire? Ici sa mot la graisse-la inn servi dans sens symbolique ek li veut dire pli bon ki éna dans troupeau. C’est enn langage poétique parski dans même verset, servi bann l’expressions couma “rognons du-blé” ek “du sang raisin.”

33:1-29—Kifer pa faire mention Siméon dans bénédiction ki Moïse ti donne bann Israélites? C’est parski Siméon ek Lévi aussi ti agir ‘avec violence’ek zot colère ti “cruel.” (Genèse 34:13-31; 49:5-7) Zot l’héritage pa ti pareil couma pou bann lézot tribus. Lévi ti gagne 48 la-villes, ek part Siméon ti tombe dans territoire Juda. (Josué 19:9; 21:41, 42) Alors, Moïse pa ti donne Siméon okenn bénédiction en particulier. Seulement, dans bénédiction ki ti adressé ar Israël en général, ti éna aussi bénédiction pou Siméon.

Leçons pou Nous:

31:12. Bann jeunes bizin assize ensemble avec bann adultes pendant bann réunions ek zot bizin faire tou zot possible pou écouté ek aprann.

32:4. Tou bann actions Jéhovah parfait dans sens ki Li exprime so bann attributs couma la justice, la sagesse, l’amour ek la puissance dans enn façon équilibré ki parfait.

Livre Deutéronome Éna enn Grand Valeur pou Nous

Deutéronome présente Jéhovah couma “enn seul Jéhovah.” (Deutéronome 6:4) Li enn livre ki raconte zhistoire enn peuple ki ti éna enn relation ki jamais okenn l’autre peuple pa’nn éna avec Bondié. Livre Deutéronome aussi averti nous kont l’idolâtrie ek montré nous l’importance pou donne le vrai Dieu enn l’attachement zis pou Li tousel.

Li sûr ki Deutéronome éna enn grand valeur pou nous! Même si nous pa obligé suive la Loi Mosaïque, nous kapav tire beaucoup leçons ki pou aide nous pou ‘content Jéhovah nou Bondié avec tou nou léker, tou nou nâme, ek tou nou la-force.’—Deutéronome 6:5.

[Note]

[Map, page 8]

(Pou texte complet, guette publication)

SÉIR

Qadesh-Barnéa

Mt. Sinaï (Horeb)

La Mer Rouge

[Credit Line]

D’après bann cartes avec copyright de Pictorial Archive (Near Eastern History) Est. and Survey of Israel

[Zimage, page 8]

Pli grand partie livre Deutéronome concerne bann discours Moïse

[Zimage, page 10]

Ki leçon nous kapav tiré dans sa disposition ki Jéhovah ti prend pou donne la manne-la?

[Zimage, page 10]

Kan ti saisi enn moulin à bras ou-soit so la-meule ki lor là couma enn gage, c’est coumadire ti pé saisi “enn nâme”